Yaxayas 1–12

Tus Cawm Seej qhia tias “txhua yam uas [Yaxayas] tau hais twb muaj lawm thiab tseem yuav muaj los, twb yog raws li tej lus uas nws tau hais” (3 Nifais 23:3). Thaum koj kawm txog phau ntawv Yaxayas, xav seb puas sau ib daim ntawv txog tej lus qhia txog tej lus qhia tej yuav muaj los yav tom ntej tej yam ntawm yav tom ntej xws li no: Yaxayas lub caij nyoog, Tus Cawm Seej txoj hauj lwm qhuab qhia hauv ntiaj teb, thiab Hnub nyoog kawg. Nco ntsoov tias twb siv ntau txoj kev kom muaj raws li Yaxayas tej lus qhia txog tej yuav muaj los yav tom ntej (saib Phau Qhia txog Vaj Lug Kub, “Yaxayas”).

Thawj Tswj Hwm Dallin H. Oaks qhia tias: “Phau Yaxayas muaj ntau yam tej lus qhia tej yuav muaj los yav tom ntej es twb muaj raws li tej lus ntawd ob peb zaug. Zoo nkaus ib zaug hais txog cov neeg hauv Yaxayas lub caij nyoog los sis lwm lub sij hawm yog hais rau tiam neeg tom ntej no. Lwm lub ntsiab, ntau zaus yog ib lub cim, qhia txog tej xwm txheej hauv lub caij nyoog nruab nrab, thaum Yeluxalees raug puas tsuaj thiab cov neeg haud tau tawg khiav ri niab tom qab Vajtswv Leej Tub raug ntsia saum ntoo khaub lig. Lwm lub ntsiab ntawm zaj lus qhia ntawd yog hais txog tej xwm txheej uas yuav muaj thaum tus Cawm Seej rov los zaum ob. Qhov uas hais tias cov lus hais txog yav tom ntej no muaj ntau lub ntsiab li no qhia peb tias yeej yog ib qho tseem ceeb rau peb nrhiav kev tshwm sim los ntawm tus Vaj Ntsuj Plig Dawb Huv kom nkag siab” (“Scripture Reading and Revelation,” Ensign, Ib Hlis Ntuj. 1995, 8).

Zoo li cov yaj saub hauv txhua lub caij nyoog, Yaxayas pheej ceeb toom cov neeg txog qhov uas lawv sab ntsuj plig nyob zoo li cas. Thaum koj nyeem Yaxayas 1; 3; 5, nrhiav tej lo lus uas qhia txog seb cov neeg ua zoo li cas ntawm sab ntsuj plig (saib, ua piv txwv, Yaxayas 1:2–4, 21–23; 3:9, 16–17; 5:11–12, 20–23). Koj pom tej teeb meem twg zoo li no hauv peb lub caij nyoog? Tej zaum koj yuav xav nrhiav tej nqe lus uas ceeb toom txog tej yam uas cov neeg Ixayees yuav raug los ntawm seb lawv sab ntsuj plig yuav nyob li cas (xws li Yaxayas 1:7; 3:17–26; 5:5–7, 13–15).

Nrog rau tej lus ceeb toom, Yaxayas kuj qhia tej zaj lus txog kev cia siab rau tus Cawm Seej txoj kev txhiv dim (saib, ua piv txwv, Yaxayas 1:16–19, 25–27; 3:10; 4). Koj kawm dab tsi txog tus Tswv los ntawm tej zaj lus no? Tus Tswv zaj lus hauv tej nqe no txawv li cas los ntawm tej yam uas Dab Ntxwg Nyoog xav kom peb ntseeg?

Ib yam li Yaxayas, cov yaj saub niaj hnub no tau ceeb toom peb txog kev txhaum thiab qhia tias yuav raug dab tsi thaum ua txhaum thiab lawv hais tej zaj lus txog kev cia siab rau Yexus Khetos. Koj txawj xav txog tej yam piv txwv twg? Tej zaum koj yuav xav rov qab nyeem tej zaj lus los ntawm lub tuam rooj sab laj tas los, thiab nrhiav tej lus ceeb toom thiab tej lus cog tseg.

Yaxayas tej lus qhia txog yav tom ntej los muaj ib lub ntsiab tseem ceeb rau peb niaj hnub nim no. Yog xav nrhiav tej ntawd, cia li nyeem tej lo lus uas qhia txog yav tom ntej (xwv li “yuav ua” los sis “yuav mus”). Piv txwv hais tias, nrhiav tej lus no thaum koj nyeem Yaxayas 2; 4; 11–12. Tej zaum koj yuav xav muab tej lus ntawd pauv kom siv tej lus uas hais txog tam sim no (xws li yog los sis ua). Tej lus qhia txog tej uas yuav muaj los yav tom ntej twg tshoov koj lub siab? Koj kawm dab tsi los ntawm tej lus qhia txog tej uas yuav muaj los yav tom ntej txog Xi-oos, kev ua cov tuam tsev, thiab txoj kev muab sau Ixayees los ua ke?

Yaxayas 2:2–3 yog ib zaj uas Haiv Neeg Ntseeg hauv Hnub Nyoog Kawg siv tau. Yog li cas thiaj li muaj raws li tej lus qhia txog tej uas yuav muaj los yav tom ntej no? Koj kawm dab tsi txog yam uas tus Tswv ua thiab “tej kev” hauv Nws lub tsev? (nqe 3).

Kuj saib Yaxayas 5:26; “Nyob Puag Saum Ib lub Roob,” Cov Nkauj Qhuas Vajtswv, zaj 4.

Nyob hauv Yaxayas 6, Yaxayas qhia txog lub sij hawm uas Vajtswv hu nws ua ib tug yaj saub. Thaum koj nyeem tshooj no, koj xav li cas txog Yaxayas tej xwm txheej? Tshooj no puas hloov koj txoj kev xav txog tus Tswv, Nws cov yaj saub, thiab txoj hauj lwm uas tus Tswv hu lawv ua?

Nyob hauv Yaxayas txoj hauj lwm qhuab qhia, Ixayees tau koom nrog Xilias kom tiv thaiv thaum Axilias tawm tsam lawv. Ixayees thiab Xilias xav yuam kom Ahas, tus vaj ntxwv ntawm Yudas, nrog lawv koom ua ke. Tiam sis Yaxayas tau qhia tias kev sib koom ntawd yuav ploj mus thiab hais kom Ahas tso siab rau tus Tswv (Yaxayas 7:7–9; 8:12–13).

Thaum Yaxayas hais li no rau Ahas, nws tau hais txog ntau zaj lus qhia txog tej uas yuav muaj los yav tom ntej uas peb paub txog, xws li tej uas nyob hauv Yaxayas 7:14; 8:13–14; 9:2, 6–7. Txawm Ahas xav li cas txog tej lus qhia no los, tej lus ntawd yeej hais txog Yexus Khetos thiab (kuj saib Mathais 1:21–23; 4:16; 21:44; Lukas 1:31–33). Vim li cas lub npe “Emanu-es” yog ib lub npe zoo rau tus Cawm Seej? (saib Mathais 1:23). Nws tau ua ib tug “Neeg Coj Kev” los sis “Tub Vaj Ntxwv ntawm Kev Thaj Yeeb” rau koj li cas? Yaxayas 9:7. Koj kawm dab tsi ntxiv txog tus Cawm Seej los ntawm tej nqe no?

• Nyob hauv Yaxayas 1:2–4, tej zaum koj thiab koj cov me nyuam yuav xav kawm vim li cas tus Tswv tsis zoo siab rau cov neeg. Nco txog tej lus uas uab peb piv rau cov tsiaj hauv nqe 3—leej twg yog peb “tus tswv”? Peb ua dab tsi kom qhia Nws hais tias peb paub Nws?

• Kom txawj xav txog Yaxayas 1:16–18, tej zaum koj thiab koj cov me nyuam yuav xav saib dab tsi uas liab thiab dab tsi uas dawb dawb. Los sis tej zaum nej yuav xav ntxuav ib yam dab tsi ua ke. Yog li cas peb thiaj li hloov los ua neeg tsis huv ntawm sab ntsuj plig? Yexus pab peb li cas kom hloov los ua neeg dawb huv? Peb kawm dab tsi txog tus Cawm Seej los ntawm tej nqe no? Qhia koj cov me nyuam saib koj xav li cas txog Nws thiab tej yam uas Nws tau ua rau koj.

• Yaxayas pom ib lub sij hawm thaum yuav muaj neeg xav los rau “lub roob ntawm tus Tswv lub tsev” uas los ntawm “txhua haiv neeg” (Yaxayas 2:2). Koj yuav ua li cas kom pab koj cov me nyuam zoo siab mus rau tus Tswv lub tsev? Tej zaum koj yuav xav caw lawv kos ib daim duab txog lawv lub tsev. Ces cia li nyeem Yaxayas 2:2 ua ke, thiab caw lawv kos ib daim duab txog “tus Tswv lub tsev,” uas yog lub tuam tsev. Nyeem Yaxayas 2:3 ua ke. Caw lawv kos duab txog tib neeg coob uas mus rau lub tuam tsev, tsis hais lawv tsev neeg los yog.

• Tej zaum koj kuj yuav xav nyeem Yaxayas 2:2–3 ua ke thiab kawm txog tej yam uas tshoov koj thiab koj cov me nyuam lub siab mus rau lub tuam tsev. Ces, tom qab nej nyeem Yaxayas 2:4 ua ke, tej zaum nej yuav xav sib tham seb lub tuam tsev ua li cas kom lawv nyob kaj siab lug. Xav seb nej puas yuav hu ib zaj nkauj txog lub tuam tsev “I Love to See the Temple” (Children’s Songbook, 95). Pab koj cov me nyuam nrhiav tej lus hauv zaj nkauj uas qhia tias lub tuam tsev yog dab tsi thiab peb ua dab tsi haud.

• Kom pib qhia txog Yaxayas tej lus qhia txog tej uas yuav muaj los yav tom ntej txog Khetos, koj thiab koj cov me nyuam sib tham tau txog tej npe uas tib neeg muaj, xws li thawj tswj hwm, npisov, los sis xib hwb. Tej npe no qhia peb dab tsi txog cov tib neeg no? Pab koj cov me nyuam nrhiav Yexus Khetos tej lub npe nyob hauvYaxayas 7:14 thiab 9:6–7 (kuj saib phab ntawv ntxim ua rau lub lim tiam no). Tej npe no qhia peb dab tsi txog Nws? Peb kawm dab tsi ntxiv txog Yexus Khetos los ntawm tej nqe no?

• Tej zaum koj kuj yuav xav qhia koj cov me nyuam los ntawm “Tus Yaj Saub Yaxayas” (nyob hauv Cov Dab Neeg hauv Phau Qub, 150–51). Tos ob peb zaug thiab nug seb Yaxayas paub dab tsi txog Yexus Khetos ntau xyoo ua ntej Nws yug los. Ces nej nyeem tau Mathais 1:21–23; Lukas 1:31–33 kom sib tham txog qhov uas tau muaj li cas kom muaj raws li Yaxayas tej lus qhia txog tej uas yuav muaj los yav to ntej nyob hauv Yaxayas 7:14; 9:6–7.

  

  1:18