Esera 1; 3–7; Niemaia 2; 4–6; 8

Ni valuti Papiloni oti o Perisia, na Turaga a qai vakauqeta na tui kei Peresia, o Sairusi me tala eso na ilawalawa Jiu ki Jerusalemi me tara tale na valetabu. Nio wilika na Esera 1, raica na ka a cakava o Sairusi me tokoni ira kina na Jiu ena cakacaka bibi oqo. O raica vakacava na Turaga ni cakacaka vei ira na tagane kei na yalewa wavoliti iko, oka kina o ira era sega ni lewe ni Nona Lotu? Na cava e vakatututaka vei iko oqo me baleta na Turaga kei na Nona cakacaka?

Raica talega na Aisea 44:24–28.

Nira valuti Jerusalemi na kai Papiloni, era a butakoca na valetabu ka vakama kina qele (raica na 2 Tui 25:1–10; 2 Veigauna 36:17–19). Na cava o nanuma ni a rawa mo vakila kevaka mo a dua vei ira na Jiu era raica e matadra na veika oqo? (raica na Same 137). Raica na nodra nanuma na Jiu, ni oti e tini vakacaca na yabaki ki muri, nira a vakatarai mera lesu ka tara cake tale na valetabu (raica na Esera 3:8–13; 6:16–22). Oya e rawa ni vakauqeti iko mo vakasamataka vakatitobu na nomu nanuma me baleta na Turaga kei na Nona vale. Na cava edau marautaki kina na tara ni dua na valetabu?

Na cakacaka ni Turaga e dau vakavudua sara me sega ni saqati. E a dina oqori ki na nodrau sasaga o Serupapeli kei Niemaia. Oqo e dua na iwalewale rawarawa ka na vukei iko mo vuli mai na italanoa eso oqo, ka vakasamataka na sala mo cakava kina na cakacaka ni Turaga, dina ga ni o na saqati:

Na cakacaka ni Kalou vei Serupapeli (Esera 4:3):

Na cakacaka ni Kalou vei Niemaia (Niemaia 2:17–18):

Na cakacaka ni Kalou vei au:

Veisaqasaqa a sotava o Serupapeli (Esera 4:4–24):

Veisaqasaqa a sotava o Niemaia (Niemaia 2:19; 4:1–3, 7–8; 6:1–13):

Veisaqasaqa au sotava:

Na ka a cakava o Serupapeli (Esera 5:1–2):

Na ka a cakava o Niemaia (Niemaia 2:20; 4:6, 9; 6:3–15):

Na cava meu na cakava:

Me vukea nomu vakatauvatana na ka a sotava o Niemaia vata kei na nomu bula, e rawa mo vulica na itukutuku nei Peresitedi Dieter F. Uchtdorf “We Are Doing a Great Work and Cannot Come Down” (Liahona, Me 2009, 59–62), vakabibi na iotioti ni rua na iwasewase. Ni ko vakasamataka na cakacaka sa solia vei iko na Kalou, sa rawa mo vulica na “iToko ni Goneyalewa” se na “iToko ni Kuoramu ni Matabete i Eroni” (Valenivola Vakosipeli). Se e rawa nio raica edua na serenilotu me vaka na “Marama e Saioni” (Sere ni Lotu, naba 192) se “Kemuni sa Kacivi (Turaga)” (Sere ni Lotu, naba 195).

Na cava o nanuma ni ibalebale ni “gumatua ena cakacaka” ena veiqaravi vua na iVakabula? (Niemaia 4:6). Na cava beka e kena ibalebale me tiko na “liga vinaka ni Kalou vei [iko]” nio cakava na Nona cakacaka? (Niemaia 2:8; raica talega na Niemaia 2:18; Esera 7:6, 9, 27–28). O sa raica vakacava na ligana ena nomu sasaga mo qaravi Koya?

Ena veitabatamata ni nodra tiko vakavesu na Jiu, ea yalani ga na nodra raica na “ivola ni lawa i Mosese” (Niemaia 8:1). Ena Niemaia 8, ea wilika kina o Esera na lawa vei ira na tamata. Na cava o raica ena wase oqo ka vakaraitaka na nodrau nanuma o Esera kei ira na nona tamata me baleta na Kalou kei na Nona vosa? (raica vakabibi na tikina e 1–12). E vakaraitaka vakacava na nomu bula na veika o nanuma me baleta na Kalou kei na Nona vosa?

Raica talega na Nodra iVakavuvuli na Peresitedi ni Lotu: Ezra Taft Benson (2014), 115–24.

• Mo vakavulica vei ira na luvemu na reki era a vakila na Jiu ni tara tale na nodra valetabu, e rawa nio vakaraitaka vei ira edua na iyaloyalo me vaka na kena e ra. Veivosakitaka na vuna era na marautaka beka kina na tamata oqo mera tiko ena vale ni Turaga. E rawa talega nio tukuna vei ira na luvemu na vuna e vanua ni reki kina vei iko na valetabu. E sa vukei iko vakacava na valetabu mo vakila nio voleka vua na Tamada Vakalomalagi kei na iVakabula?

• Ni dou wilika vata vakaveiluveni na Esera 3:10–13 vukei iratou me kunea na vosa e vakaraitaka na nodra nanuma na Jiu ni tara tale na valetabu. Nio yacova na itinitini ni tikina e 13, de dua e rawa ni dou kaila vata ena reki. Vukei ira na luvemu mera vakananuma na vuna meda reki kina ni solia tu vei keda na Turaga na valetabu. Eda na vakaraitaka vakacava na reki oya?

• Navuca mo lagata vata kei ira na luvemu edua na sere me baleta na valetabu, me vaka na ikarua ni qaqa ni “Welcome Home [Sa Kidavaki Ki Vale]” (Gospel Library). Ni oti edua na laini, cegu mo kerea edua na gone me wasea edua na ka e taleitaka me baleta na valetabu. E rawa talega nio raica eso na iyaloyalo ni valetabu nio lagasere tiko.

• Wasea vei ira na luvemu na italanoa kei Niemaia (raica na Niemaia 2:17–20; 6:1–9; se “Niemaia” ena iTalanoa eso mai na Veiyalayalati Makawa, 173–74). Ni ko wilika na Niemaia 2:20, sa rawa vei iko kei ira na luvemu mo dou “tucake” ka matanataka ni dou veivuke tiko ena tarai ni bai kei Jerusalemi. Se era na marautaka beka na luvemu mera tara lalaga ena buloko se ena so tale na ka. Nira cakava tiko, sa rawa mo vukei ira mera vakasamataka na veika bibi e vinakata na Tamada Vakalomalagi meda cakava.

  

  1:38

• Nio wilika na Niemaia 6:9, sureti ira na luvemu mera laveta na ligadra nira rogoca ni ko kaya “vakaukauwataka na ligaqu.” Tukuna vei ira na gone me baleta edua na gauna o a vakila kina ni Kalou a vakaukauwataka na ligamu mo cakava kina na Nona cakacaka.

• Wilika e cake eso na malanivosa mai na Niemaia 8:2–3, 5–6, 8–9, 12 e vakamacalataka na veika era a cakava na tamata nira rogoci Esera ni wilika na ivolanikalou. Nio wiliwili tiko, e rawa nira matanataka na luvemu na veimalanivosa oqo. Oti mo dou qai veiwaseitaka na veika dou dui vakila ni dou wilika se vakarorogo ki na ivolanikalou.

• Ni dou wilika vata na Niemaia 8:8, e rawa nio tarogi ira na luvemu se cava e vukei ira mera kila vakavinaka kina na ivolanikalou. Vakaraitaka vei ira na iwalewale ni kena vakayagataki na ivukevuke ni vuli ivolanikalou me vaka na iDusidusi ki na iVolanikalou kei na Topics and Questions (Gospel Library). Sureti ira na gone mera wasea edua na ka era sa vulica me baleta na iVakabula mai na ivolanikalou.