Esiteri

A vakavulica o Peresitedi Dieter F. Uchtdorf nio keda yadua “eda tu ena dua na vanua duatani ka tiko edua na itavi bibi ka rawa duadua ga vei [keda] meda cakava. … Na Turaga a solia vei iko na nomu itavi ena dua na inaki. Era na tiko beka na tamata kei na yalo, o iko duadua ga ona rawa ni yacovi ira ka tarai ira. De dua e sega tale ni dua e rawa ni cakava ena sala vata ga oqori” (“Lave ena Vanua ga o Tu Kina,” Liaona, Nove. 2008, 56).

Nio wilika na italanoa kei Esiteri, vakasamataka na sala e yaga kina vua na itukutuku oqo. Vakaraica na sala eso a vakarautaka na Turaga me rawa kina vua me vakabulai ira na Jiu (raica, me kena ivakaraitaki, Esiteri 2:21–23; 3:10–14; 4:14–16). Qai vakasamataka vakatitobu na sala e solia kina vei iko o Koya na madigi mo vakalougatataki ira kina na tani. Na cava eso na ituvaki se veiwekani o nanuma ni dusimaki iko kina o Koya ki na “dua na gauna vakaoqo”? (Esiteri 4:14). Kevaka e tiko edua na nomu veivakalougatataki vakapeteriaki, vakasamataka mo wilika mo vulica e levu na ka me baleta na cakacaka e tu vua na Turaga mo cakava. Na cava e rawa nio cakava me vakayacori kina na cakacaka oqo?

Raica talega na “For Such a Time as This” (vidio), ChurchofJesusChrist.org.

13:44

Ena iVola i Esiteri, eda vuli mai na nodrau yalodina o Esiteri kei Moatekai vakakina mai na dokadoka kei na cudru nei Emani. Nio wilika na Esiteri 3; 5:9–14, vakaraica na nanuma, na vosa, kei na ivalavala i Emani. Na cava era vakatakila me baleti koya kei na nona inaki? Na cava a sotava o koya me kena i sau? (raica na Esiteri 7). Na wiliki ni veika e baleti Emani ena rawa ni vakauqeti iko mo dikeva na veika e vakauqeta na lomamu kei na nomu ivalavala. O vakauqeti beka mo cakava e dua na veisau? Ona gole vakacava vua na Tamada Vakalomalagi mo vukei?

Raica talega na Vosa Vakaibalebale 16:32; Alama 5:28.

Raica na vuna era a digitaka kina o Esiteri kei ira na vo ni Jiu mera lolo (raica na Esiteri 3:13; 4:1–3, 10–17). E a vakalougatataki ira vakacava na lolo? (raica na Esiteri 5:2–3; 8:11–12). Na cava na vuna edau kerei keda kina na Turaga meda lolo? (raica na Topics and Questions, “Fasting and Fast Offerings,” Gospel Library). Vakasamataka na sala o rawa ni cakava me veivakalougatataki vakalevu cake kina na nomu bula ni lolo.

Raica talega na Aisea 58:6–12; “Fasting: Young Single Adult Ward, Amanda” (vidio), ChurchofJesusChrist.org.

2:41

Nirau tutaka o Moatekai kei Esiteri na nodrau vakabauta kei ira na nodrau tamata, erau a bolea kina na mate. Ena rairai sega soti ni bibi na revurevu ni noda digidigi, ia na noda vakayacora na ka dodonu ena gadrevi tiko ga kina na yaloqaqa. Na cava o vulica mai na Esiteri 3:1–4; 4:10–17 me baleta na noda taukena na yaloqaqa me caka kina na ka dodonu? Raica na duidui ni veika erau sotava o Moatekai kei Esiteri ni oti na nodrau vakaraitaka na yaloqaqa (raica na Esiteri 3:5–11; 5:1–4). Na cava a gadrevi vei Esiteri kei Moatekai me rau kila me baleta na Kalou, me rau cakava kina na digidigi erau a cakava?

Vakananuma mada eso na ituvaki ona gadreva kina na yaloqaqa mo tutaka kina na ka dodonu. Na cava o vulica mai vei Esiteri kei Moatekai ka rawa ni vukei iko mo yaloqaqa kina ena vuku ni Turaga?

Na yaloqaqa nei Esiteri a yaco kina edua na “siga ni marau” (raica na Esiteri 9:17–19). E solia vakacava vei iko edua na “siga ni marau” na yaloqaqa Va Karisito?

Raica talega na “Courage,” “Dare to Stand Alone” (vidio), Gospel Library; “Dina Ena Vakabauta,” Sere ni Lotu, naba 154.

3:19

4:20

• O na vakauqeti beka mo vakayagataka na Esiteri 2:7 mo vakavulici ira kina na luvemu me baleta na nodra vukei na lewe ni matavuvale era vakaleqai tu, me vaka a cakava o Moatekai vei Esiteri. E rawa ni dou wilika vata na tikina oya se o vakalekalekataka vakai iko ena nomu vosa ga. Oti dou qai rawa ni vakasamataki ira na lewe ni matavuvale era na gadreva beka na nomudou veivuke. Cakava edua na ituvatuva mo vukei ira kina.

• Na ivakaraitaki nei Esiteri kei Moatekai e rawa ni vukei ira na luvemu mera kila ni ibalebale ni yalodoudou, e kena ibalebale na caka dodonu ena gauna mada ga o rere kina. Vakasamataka mo vola na veimalanivosa oqo A yalodoudou o Moatekai ena gauna e … kei O Esiteri a yalodoudou ena gauna e …. Ni dou vulica vata na italanoa kei Esiteri, e rawa nira vakatura na luvemu na sala mera vakacavara kina na iyatuvosa. E rawa nio wilika na Esiteri 3:1–11; 4:10–17 se “Ranadi o Esiteri” (ena iTalanoa ni Veiyalayalati Makawa, 166–70) se sarava na iyaloyalo ena ituvatuva oqo. Mo qai vola Au na yalodoudou niu … , ka sureti ira nomu gone mera vola na veika e vinakata na Tamada Vakalomalagi mera cakava ka na gadrevi kina na yalodoudou. E dua na sere me baleta na yalodoudou, me vaka na “Mo Bolea Mo Dina Tu” (iVolanisere ni Gonelalai, 80), ena rawa ni veivuke.

  

  2:45

• E rawa talega mo dou raica na veigauna a yalodoudou kina o Jisu Karisito—me ivakaraitaki, ena Nona a vakararawataki ena vuku ni noda ivalavala ca, mai Kecisemani kei na kauveilatai (raica na Maciu 26:36–39; 27:33–35). Kerei ira na luvemu mera wasea edua na gauna era a yalodoudou kina, ka wasea talega na veika o sotava vakai iko.

• Na wiliki ni Esiteri 4:1–3, 10–17 ena rawa ni vukei iko mo vakavulici ira na luvemu me baleta na lolo. Na cava e a lolo kina o Esiteri vata kei ira na Jiu? Tukuna vei ira na luvemu na vuni nomu dau lolo. E rawa talega nio tarogi ira se ra na vakamacalataka vakacava na lolo vua edua na itokani e se bera vakadua ni cakava. Eda na vukei ira vakacava na noda itokani mera kila na veivakalougatataki e yaco mai ena lolo?

• Vakauqeti ira na luvemu mera vakasamataka edua na ka era na gadreva kina na veivuke ni Turaga. Vakatututaka mera cakava me tiki ni nodra lolo ena Sigatabu ni lolo ka tarava.

• Vukei ira na luvemu mera kila ni gauna a rere kina o Esiteri, o Moatekai a vakayaloqaqataki koya ena nona vakamacalataka ni Turaga a vukei koya me yaco me ranadi “ena vuku ni gauna qo” (Esiteri 4:14). Na cava na ibalebale ni ka a tukuna o Moatekai? Dou veitalanoataka na sala a yaco kina o Esiteri me iyaya ni cakacaka ena liga ni Turaga. E rawa vakacava meda iyaya ni cakacaka vua na Turaga?

• Ona vukei ira vakacava na luvemu mera kila se cava na iyaya ni cakacaka? De dua e rawa nio sureta edua me vakatagitaka e dua na sere ena dua na iyaya ni ivakatagi se vakaraitaka e dua na iyaloyalo nidua e vakayagataka tiko edua na iyaya ni cakacaka. Dou qai veivosakitaka se cava na kena ibalebale meda dua na iyaya ni cakacaka ena liga ni Kalou.