Jope 1–3; 12–14; 19; 21–24; 38–40; 42

Na imatai ni vica na iwase ni ivola i Jope e vakabibitaka, ena sala vaka-serekali, na itavi nei Setani me noda meca se dauveibeitaki; eratou sega ni vakamacalataka edua na veitaratara dina ena kedrau maliwa na Kalou kei Setani. Nio wilika na ka e tukuna o Setani me baleti Jope (raica na Jope 1:9–11; 2:4–5), ona tarogi iko beka, “Na cava au yalodina tiko ga kina vua na Kalou?” Na cava na vuna ena rerevaki kina meda talairawarawa vua na Turaga ena vuku duadua ni inaki a vakatututaka o Setani?

Na cava o vakauqeti kina ena ka a cakava o Jope ni vakatovolei? (raica na Jope 1:20–22; 2:9–10).

Era vakatututaka na itokani i Jope ni totogitaki koya tiko na Kalou (raica na Jope 4–5; 8; 11). Na veileqa cava soti o raica ena vakasama oqo? Wilika na isaunitaro nei Jope ena wase e 12–13. Na cava a kila o Jope me baleta na Kalou ka a rawa kina vua me vakararavi tikoga kina? Na cava o kila me baleta na Kalou ka na vukei iko mo sotava kina na veibolebole eso?

Ena so na gauna eda na vulica na veidina bibi duadua nida sotava na noda veigauna dredre duadua. Vakasamataka vakatitobu na veivakatovolei e vakamacalataka tiko o Jope ena Jope 19:1–22 kei na veidina eso a vunautaka ena tikina e 23–27. O kila vakacava ni bula tiko na nomu Dauniveivueti? Na duidui cava e vakayacora na kilaka oqo ena nomu bula?

Navuca mo lagata se vakarogoca edua na serenilotu me baleti Jisu Karisito, me vaka na “Au Sa Kila ni Bula Tu” (Sere ni Lotu, naba 136). Na veivosa cava soti mai na serenilotu oqo e vakaraitaka na nomu nanuma me baleti Koya?

Raica talega na Vunau kei na Veiyalayalati 121:1–12; 122.

Ena Jope 21–24, ona wilika kina edua na veivosaki ena kedratou maliwa o Jope kei iratou na nona itokani. Ena loma ni veivosaki oqo, e a tiko kina edua na taro era dau taroga e vuqa na tamata: Na cava era dau vakararawataki kina ena so na gauna na tamata yalododonu?

E dina ga nida sega ni kila na vei isaunitaro kece, ena kosipeli vakalesui mai i Jisu Karisito, e tu vei keda eso na dina ka na rawa ni vukei keda meda kila vinaka na ibalebale ni dredre kei na rarawa. E tiko e ra eso na ivolanikalou ni yalododonu-edaidai ka tiko kina eso na veidina oqo. Na cava e vakavulica vei iko na veiivolanikalou oqo baleti Tamada Vakalomalagi kei na Nona ituvatuva?

• 2 Nifai 2:11–13

• Mosaia 23:21–23; 24:10–16

• Ica 12:27

• Vunau kei na Veiyalayalati 58:3-5

• Eparaama 3:22–26

E rawa talega nio wilika na ivakavuvuli nei Peresitedi Spencer W. Kimball me baleta na veikadredre ena “Leqa Vakacalaka se iVotavota?” (Nodra iVakavuvuli na Peresitedi ni Lotu: Spencer W. Kimball [2011]), 11–21).

Yavutaki ena veika o sa vulica, ona sauma vakacava e dua na taro vakaoqo “Na cava e vakatara kina na Kalou mera vakararawataki na tamata yalododonu?”

Ni rarawataka na nodratou veibeitaki na nona itokani (raica na Jope 16:1–5; 19:1–3), a taroga vakavicavata o Jope na Kalou se cava e vakararawataki vakalevu kina (raica na Jope 19:6–7; 23:1–9; 31). A sega ni tukuna na Turaga edua na vuna matata ena ivola i Jope. Ia a vakavulica o Koya edua na itukutuku bibi ena wase e 38–40. Ona vakalekalekataka beka vakacava na itukutuku oya? Me ivakaraitaki, na cava o vulica mai na taro ni Turaga ena Jope 38:1–7, 18–24?

Ona raica ni Turaga a vosa vei Jope me baleta eso na Nona ibulibuli kei na veicakacaka lelevu tale eso (raica na Jope 38–39). Ena rawa mo raica eso na ibulibuli oqori (se kedra iyaloyalo). Era vukei iko vakacava na veika oqo me duatani kina na nomu nanuma me baleta na Kalou? me baleta na nomu vakatovolei? Era a veisautaka vakacava na rai nei Jope? (raica na Jope 42:1–6; raica talega na Mosese 1:8–10).

Oqo erua na itukutuku ni koniferedi raraba ka rawa ni vukea na veisautaki ni noda rai: Tamara W. Runia, “Raica na Matavuvale ni Kalou ena Iloilo Vakararaba” (Liaona, Nov. 2023, 62–69); Russell M. Nelson, “Vakasama Vaka Silesitieli!” (Liaona, Nov. 2023, 117–20). Ena loma ni itukutuku ruarua, vakasaqara edua na ka o na vinakata mo nanuma, ena gauna ka tarava ni via tarabi na veivakatovolei. Ona vakananumi iko vakacava ena veika o sa vulica?

• Kerei ira na gone mera tukuna vei iko na veika era kila me baleti Jope. Kevaka era gadreva na veivuke, sa rawa mo dusimaki ira ki na Jope 1:1, 13–22; 2:7–10 se ki na “Jope” (ena iTalanoa eso mai na Veiyalayalati Makawa, 145–47). Na cava a cakava o Jope me sotava kina na bolebole? (raica na Jope 1:21; 2:10).

  

  1:55

• A yalodina o Jope ni sotava na bolebole baleta na veika a kila me baleta na Turaga. De dua dou rawa ni sarava vata kei iratou na luvemu eso na iyaloyalo kei Jisu Karisito ni veimaliwai tiko kei ira na tamata (me vaka na kena e ra se iyaloyalo ena Gospel Art Book). Veivosakitaka na veika o kila me baleti Koya kei na kena ituvaki. Oqo eso na tikina ka vakaraitaka na veika e kila o Jope me baleta na Turaga: Jope 12:10, 13, 16; 19:25–27. Na cava e yaga kina meda kila na veika oqo me baleti Koya?

• A taroga o Jope e dua na taro bibi ena Jope 14:14. De dua dou rawa ni veivukevuke kei iratou na luvemu me wasea na sala e rawa nio sauma kina na taro nei Jope. E rawa nio vaqara eso na vakasama ena Alama 11:42–44, ena vidio “In a Coming Day” (Gospel Library), se ena dua na sere me baleta na Tucaketale, me vaka na “Ko Jisu Ni Sa Bula Tu” (iVolanisere ni Gonelalai, 45).

1:11

• Ni rarawa tiko o Jope, era a kaya na nona itokani ni totogitaki koya tiko na Kalou baleta ni a cakava na valavala ca (raica na Jope 22:5). Kevaka meda a itokani i Jope, eda na tovolea vakacava me vukei koya? Ena rawa me vukei ira vakacava eso tale na veika eda tukuna, nira rarawa tiko? (raica na Jope 16:5). Navuca mo vakaraitaka edua se sivia na iyaloyalo ena ituvatuva oqo ni veivosakitaki na veitaro oqo.

• Navuca mo kerei ira na luvemu mera vola eso na itovo ni bula ni dua na itokani vinaka, ka cavuta na yaca ni dua na itokani ka tiko vua na veiitovo vinaka vakaoqo. Oti mo qai sarava e dua na iyaloyalo kei Jisu Karisito. Na sala cava soti e itokani vinaka kina o Jisu vei keda yadua? Ona rawa ni kila beka edua e lako curuma tiko edua na gauna dredre. Tuvanaka na sala mo na dua na itokani Va-Karisito kina vei ira.

• Ni oti na nomudou wilika kei iratou na luvemu na Jope 19:23–27, sa rawa mo dou veivosakitaka na sala dou kila kina ni bula tiko na noda Dauniveivueti. Sa rawa moni cakacaka vata ka biuta vata vakaivola na nomuni ivakadinadina (se na kedra droini na iVakabula) (raica na tikina e 23).

• E rawa moni lagata vata edua na sere ka vakadinadinataka na iVakabula, me vaka na “Au sa Kila ni Bula Tu” (Sere ni Lotu,, naba 136). Wasea na veimalanivosa eso mai na serenilotu ka na vaqaqacotaka na nomu vakabauti Koya. Na cava na vuna e bibi kina meda kila ni bula tiko o Jisu Karisito?