“Vakasama me Nanumi Tiko: Wiliki ni Serekali ena Veiyalayalati Makawa,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)
“Wiliki ni Serekali ena Veiyalayalati Makawa,” Lako Mai, Mo Muri Au: Veiyalayalati Makawa 2026
Vakasama me Nanumi Tiko
Wiliki ni Serekali ena Veiyalayalati Makawa
Ena ivola ni Veiyalayalati Makawa mai na iVakatekivu ki na Esiteri, eda kunea kina vakalevu na italanoa—ka vakamacalataka na itukutuku makawa mai na dua na rai vakayalo. A tara o Noa edua na waqa, a vakabulai Isireli o Mosese, ka masulaka o Ana me dua na luvena tagane, kei na so tale. Tekivu vei Jope, eda raica kina edua tale na iwalewale ni volavola. Ena veiivola oqo, era volavola na dauvolaivola ni Veiyalayalati Makawa ena vosa vaka-serekali mera vakaraitaka na lomadra mai loma se veiparofisai bibi eso ena dua na sala e guiguilecavi dredre.
Eda sa raica oti e vica na ivakaraitaki ni serekali ka kunei ena loma ni veiivola ni itukutuku makawa ena Veiyalayalati Makawa. Mai na ivola i Jope ka lako yani, eda na raica kina e levu cake tale. Na ivola i Jope, Same, kei na Vosa Vakaibalebale e voleka nira serekali taucoko, vakakina eso na tiki ni nodra volavola na parofita me vakataki Aisea, Jeremaia, kei Emosi. Baleta ni duidui na wiliki ni serekali mai na wiliki ni dua na italanoa, na kena kilai vinaka ena gadrevi kina edua tani na iwalewale. Oqo eso na vakasama ena rawa ni vukei iko me vakaibalebale cake vei iko na serekali ena Veiyalayalati Makawa.
Na Kilai ni Serekali Vaka Iperiu
Taumada, ena rawa ni vukei iko mo nanuma tiko ni serekali vaka-Iperiu ena Veiyalayalati Makawa e sega ni yavutaki ena rogorogovata, me vaka eso tale na mataqali serekali. Ka dina ga ni itautau, qitorivosa, kei na tokaruataki ni rorogo era dau takalevu ena serekali vaka-Iperiu makawa, era sa mai yali ena vakavakadewa. E dua na gacagaca ona raica, sai koya, na tokaruataki ni vakanananu se vakasama, ka dau vakatokai ena so na gauna me “veivakatautauvatataki.” Oqo edua na ivakaraitaki rawarawa mai vei Aisea:
Vakaisulutaki iko ena nomu kaukauwa, Saioni;
vakaisulutaki iko ena nomu isulu vakaiukuuku, Jerusalemi. (Aisea 52:1)
NaSame 29 e levu na kena laini e vakatautauvatataki—me kena ivakaraitaki:
Sa rogo vakaukauwa na domo i Jiova;
sa rogo vakaturaga na domo i Jiova. (Same 29:4)
Ena ivakaraitaki oqo, na kena kilai nirau tautauvata na ikarua kei na imatai ni laini ena vakavuna me matata vinaka kina na tiki ni wase oqo:
Kau a solia me savasava na batimudou, ena nomudou veikoro kecega,
io mo dou viakana mai ena nomudou veiyasana kecega. (Emosi 4:6)
Ena ivakaraitaki oqo, e tokaruataka na dauniserekali e dua na vakasama ka tiko kina edua na duidui lailai. Na iwalewale oqo e rawa ni vakabibitaka na vakasama e tokaruataki, ka vakayagataki na duidui me vakamacalataki se vakamatatataki cake kina.
Ena so tale na gauna, na rua na iyatuvosa ka rau tautauvata, erau vakayagataka na vosa vata ga me vakaraitaka na vakasama e veibasai, me vaka ena ivakaraitaki oqo:
A vosa vakayalovinaka sa ivakamalumu ni cudru:
ia na vosa vakararawa sa vakatubura na cudru. (Vosa Vakaibalebale 15:1)
A sega ni yaco vakacalaka na veivakatautauvatataki oqo. Era nakita o ira na dauvolavola. E vukei ira mera vakaraitaka na nanuma se dina vakayalo ena kena kaukauwa kei na kena totoka. Ia nio raica na veivakatautauvatataki ena Veiyalayalati Makawa, tarogi iko se vukei iko vakacava me matata vei iko na itukutuku nei koya e volavola. Me kena ivakaraitaki, na cava beka e tovolea tiko o Aisea me tukuna ena nona vakaveiwekanitaka na “kaukauwa” vata kei na “isulu vakaiukuuku” o “Saioni” vata kei “Jerusalemi”? (Aisea 52:1). Na cava eda rawa ni kila me baleta na malanivosa “a vosa vakayalovinaka” kevaka eda kila ni kena veibasai na “vosa vakararawa”? (Vosa Vakaibalebale 15:1).
He Restoreth My Soul [Sa Vakabulabulataka Tale Mai Na Yaloqu], mai vei Walter Rane
Serekali Vaka-Iperiu me iTokani Vou
Eso era vakatauvatana na wili serekali kei na sota kei na dua na tamata vou. Na wiliki ni serekali ena Veiyalayalati Makawa, ena vaka beka na sota kei na dua, mai na dua na vanua vakayawa ka duatani na nona itovo vakavanua ka duidui na nona vosa mai vei keda—ka sa sivia na rua na udolu na nona yabaki ni bula. Na tamata oqo ena tukuna beka eso na ka eda na sega taumada ni kila, ia e sega ni kena ibalebale oya ni sega ni tiko edua na ka yaga mera tukuna. E gadrevi ga meda toka vata mada kei ira me dua na gauna, ka tovolea meda raica na ka mai na nodra itovo ni rai. Eda na kunea beka mai lomada e loma, nida veikilai sara vakavinaka. Ka keda vakaraitaka na vosota kei na yalololoma, ena rawa ni yaco me dua na itokani lomani o noda itokani vou.
O koya gona, nio wilika edua na iwase ni tikina mai na Aisea, me ivakaraitaki, vakasamataka oya me imatai ni gauna drau veikilai kina kei na dua na itokani vou. Tarogi iko, “Na cava au vakila vakararaba?” E vakayavalati au vakacava na tikina oqo—kevaka mada ga au sega ni kila na veivosa kece sara? Mo qai wilika tale, vakavica vata kevaka e rawa. Navuca mo wilika vakadomoilevu; eso era kunea tale eso na kena ibalebale ena sala vaka oya. Raica na vosa eso e digitaka o Aisea, vakabibi na vosa e boroya e dua na iyaloyalo ena nomu vakasama. E vakacava na nomu nanuma ena vuku ni iyaloyalo oqori? Na cava era vakatututaka me baleta na nanuma nei Aisea? Na levu ni nomu vulica na nodra vosa na dauvolavola ni Veiyalayalati Makawa oqo, na levu talega ni nomu na kunea nira a digitaka vakamatau na nodra vosa kei na iwalewale mera vakamacalataka kina edua na itukutuku titobu vakayalo.
E rawa nira itokani talei na serekali baleta nira vukei keda meda kila vinaka na veika eda vakananuma kei na veika eda lako curuma. Na serekali ni Veiyalayalati Makawa era ka talei sara, baleta nira vukei keda meda kila vinaka na veika eda vakananuma vakabibi kei na veika eda lako curuma—na kena era semati ki na noda veiwekani vata kei na Kalou.
Nio vulica na serekali ena Veiyalayalati Makawa, nanuma tiko ni vuli ivolanikalou ena yaga vakalevu duadua ni tuberi keda vei Jisu Karisito. Vakaraica na ivakatakarakara, iyaloyalo, kei na veidina e tara cake na nomu vakabauti Koya. Vakarogoca na veivakauqeti ni Yalo Tabu ni o vuli tiko.
iVola ni Vuku
E dua na iwasewase ni serekali ni Veiyalayalati Makawa era vakatoka na tamata vuli me “ivola ni vuku.” Na Jope, Na Vosa Vakaibalebale, kei na Dauvunau era tiko ena iwasewase oqo. Na same e tukuna na yalo ni vakavinavinaka, ni vakaloloku, kei na sokalou, ia na ivola ni vuku e vakanamata ki na ivakasala tawamadra rawa se na veitaro ni bula, titobu. Na iVola i Jope, me ivakaraitaki, e vakadikeva na lewa dodonu ni Kalou kei na vuni nona kune rarawa tiko na tamata. Na Vosa Vakaibalebale e solia tu na ivakasala me baleta na ivakarau ni bula vinaka, oka kina na vosa vakayalomatua ka a soqoni ka veisolitaki mai na veitabatamata taumada. Kei na Dauvunau e lomatarotarotaka na inaki dina ni bula—ni veika kece e vaka me sega ni tudei ka veilecayaki, ka da na kunea evei na ibalebale dina ni bula? Sa rawa mo vakasamataka na ivola ni vuku me vaka na veivosaki vakaibalebale kei ira na daunivakasala veivakauqeti, ka ra vinakata mera wasea eso na vakadidike me baleta na Kalou kei na vuravura a bulia o Koya—ka vukei iko tale beka ga mo kila vakavinaka cake na veika oqo mai na kena e liu.