“24–30 ni Okosita. ‘Au Na Tukuna Na Ka Sa Cakava Ko Koya Ena vuku Ni Yaloqu’: Same 49–51; 61–66; 69–72; 77–78; 85–86,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)

“24–30 ni Okosita. ‘Au Na Tukuna Na Ka Sa Cakava Ko Koya Ena vuku Ni Yaloqu,’” Lako Mai, Mo Muri Au: Veiyalayalati Makawa 2026

Saving That Which Is Lost [Vakabulai na Ka Sa Yali], mai vei Michael T. Malm

24–30 ni Okosita: “Au Na Tukuna Na Ka Sa Cakava Ko Koya Ena vuku Ni Yaloqu”

Same 49–51; 61–66; 69–72; 77–78; 85–86

Era a wasea vakatitobu na Daunisame na veika era nanuma ena nodra veiserekali. Era vola me baleta na nodra yalolailai, rere, kei na yaluma. Ena so mada ga na gauna, era nanuma ni sa biuti ira na Kalou, ka so na same e voqa kina na domo ni vuturi kei na nuiqawaqawa. Kevaka o sa bau vakila oti na veika vakaoqo, na wiliki ni Same ena vukei iko mo kila ni sega nio iko duadua ga. Ia ona kunea talega na same eso ka na rawa ni vakayaloqaqataki iko ni o sotava na mataqali yalo vakaoya, baleta na daunisame a vakacaucautaka na Turaga ena Nona vinaka, qoroya na Nona kaukauwa, qaqa, ka reki ena Nona loloma veivueti. Era a kila tu nida vakacolati ena ca kei na ivalavala ca ia na Turaga sa “vinaka, ka dau veivosoti” (Same 86:5). Era kila vakavinaka tu ni vakabauta na Turaga e sega ni kena ibalebale nio na sega ni sotava na nuiqawaqawa, ivalavala ca, se rere. E kena ibalebale nio kila o cei mo gole kina ena gauna o cakava kina.

Vakasama eso ni Vuli e Vale kei na Lotu

Same 49; 62:5–12

Na veivueti e lako duadua ga mai vei Jisu Karisito.

NaSame 49 e tiko kina e dua na itukutuku baleti ira “na tamata wale kei na turaga, na vutuniyau kei na dravudravua” (tikina e 2). Na cava ona kaya ni tukuna tiko na itukutuku oqo? Na cava o vakila ni vakuria na Same 62:5–12 ki na itukutuku oya?

Na wiliki ni veisame oqo ena rawa ni vakauqeti iko mo vakananuma vakatitobu na sala eso era na vakararavi kina na tamata ki na dua tale na ka, ka sega vua na Kalou mera vueti (raica na Same 49:6–7). E vakauqeti vakacava na nomu bula ena nomu ivakadinadina ni “Kalou ena vakabula na [yalomu] mai na kaukauwa ni ibulubulu”? (Same 49:15).

Same 51; 85–86

Ena vuku ni loloma veivueti ni iVakabula, sa rawa vei au meu vosoti.

A vola o Tui Tevita na Same 51 ni oti nona kila ni gadreva vakalevu na veivosoti—edua na ka eda gadreva kece. Na veitikina cava e vakamacalataka na veika o vakila? Na cava o raica ena same oqo ka solia vei iko na inuinui mo vosoti?

Mo vakasaqara tale ga na Same 51 mo kila kina se cava na ibalebale ni veivutuni. Cakava edua na lisi ni ka o kunea. Nio vakarau mo veivakavulici, navuca mo vulica na itukutuku nei Peresitedi Russell M. Nelson “E Rawa ni Vinaka Cake na Veika Eda Cakava tiko meda Vinaka Cake kina” (Liaona, Me 2019, 67–69).

O na vakamacalataka vakacava na ka e vakilai ni ciqomi na veivosoti ena vuku i Karisito? Kevaka o gadreva na veivuke me vakamacalataki kina na lomamu, e rawa ni o raica ena Same 51:1–2, 7–12; 85:2–9. Eso na tamata era dau taleitaka mera droini se vakayagataka nai yaloyalo mera vakaraitaka kina na nodra nanuma; ona rawa ni tovolea oya. E rawa talega nio lagata se vakarorogo ki na dua na serenilotu me baleta na iVakabula, me vaka na “Loloma i Jisu” (Sere ni Lotu, naba 110).

Meda veivutuni, eda gadreva meda vakabauta nio Jisu Karisito e sega walega ni rawa ni vakasavasavataki keda ia o Koya enavakayacora vakakina. Na cava o raica ena Same 86:5, 13, 15 ka vukei iko mo kila ni sa rawa ka tu vakarau tu na iVakabula me veivosoti?

Raica talega na Alama 36; Peter F. Meurs, “E Rawa ni Vakabulai Au!,” Liaona, Me 2023, 39–41.

Same 51:13–15; 66:5–20; 71:15–24

Na noqu ivakadinadina me baleti Jisu Karisito e rawa ni vukei ira na tani me ra lako mai Vua.

Vakasamataka vakatitobu na sala o a rawata kina na nomu ivakadinadina baleti Jisu Karisito kei na Nona kaukauwa ni veisorovaki. Oti, nio vulica na Same 51:13–15; 66:5–20; 71:15–24, vakasamataka na sala o rawa ni sureta kina eso mera “lako mai ka raica na cakacaka ni Kalou” (Same 66:5). Kevaka mo na “tukuna na ka sa cakava [na Turaga] ena vuku ni [yalomu]” (Same 66:16), na cava o na tukuna?

Na cava na kena ibalebale vei iko mo “tukuna tikoga na [Nona] cakacaka dodonu ena siga kecega”? (Same 71:24).

Raica talega na Alama 26.

wasea tiko na cauravou na ivolanikalou vei ira tale eso — “Dou toro mai ka mai rogoca, kau na tukuna na ka sa cakava na [Kalou] ena vuku ni yaloqu” (Same 66:16).

Same 63; 69; 77–78

Na Turaga ena vukei au ena gauna au gadreva kina.

E vica na same e vakamacalataka se cava ena vakilai nida yawa mai vua na Kalou ka gadreva vakalevu sara na Nona veivuke (raica na Same 63:1, 8; 69:1–8, 18–21; 77:1–9). Na cava o raica ena Same 63; 69; 77–78, ka solia na veivakadeitaki vei ira na daunisame oqo?

Nio kune rarawa, ena vukei iko vakacava mo “nanuma tiko na cakacaka ni Turaga” kei na Nona “cakacaka mana mailiu”? (Same 77:11). Eso vei ira na cakacaka mana oqori era vakamacalataki tiko ena Same 78. Nio wilika ira tiko, vakasamataka vakatitobu se cava e vukei iko “mo vakararavi ga vei Koya na [Nomu] Kalou” (tikina e 7).

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Me vaka ni Sigatabu oqo na ikalima ni Sigatabu ni vula, era sa vakayaloqaqataki na qasenivuli ni Lalai me ra vakayagataka na itaviqaravi ni vuli ena “iKuri ni iVakamacala B: Vakarautaki ira na Gone ki na Bula Taucoko ena Salatu ni Veiyalayalati ni Kalou”

Same 51; 86:5, 13, 15

Niu cakava edua na digidigi cala, sa rawa ni vukei au ko Jisu meu veisau.

Me vukei ira na luvemu mera kunea na dina me baleta na veivutuni ena Same 51, e rawa nio droinitaka edua na uto levu. Oti qai vukei ira na luvemu mera vola e loma na veika ca e vakatovolei keda kina o Setani meda cakava. Eda na kauta tani vakacava mai yaloda na veika oqo? Kerei ira na gone me ra vakasaqara na vosa “lomaqu” ena Same 51:10, 17. Veivosakitaka na veika e vakavulica na veitikina oqo me baleta na veivutuni. Mera bokoca laivi na luvemu na vosa e loma ni uto ka vola na vosa vou ka vakamacalataka na sala e rawa ni veisautaki keda kina o Jisu nida veivutuni.
O na vinakata beka mo vukei ira na luvemu mera vulica na ibalebale ni “yalo sa ramusu ka bibivoro” (Same 51:17). E rawa nira veivukevuke me voroki e dua na ka e kaukauwa na qana, me vaka edua na yaloka se niu. E rawa nio vukei ira mera vakatauvatana na qana kina veika e tarovi keda meda vakila na loloma nei Tamada Vakalomalagi. E rawa vakacava nida dolava na lomada Vua?
E rawa talega ni dou raica vata edua na iyaloyalo ni iVakabula ka tarogi iratou na luvemu se vosa cava era na vakayagataka me vakamacalataki Koya kina. Sureti ira mera vakasaqara na vosa e vakamacalataki Koya ena Same 86:5, 13, 15. Na cava na vuna e bibi kina meda kila na veika oqo baleti Koya?

Same 61:2–3

O Jisu Karisito sa noqu uluvatu.

Era na marautaka beka na luvemu me droinitaka na iyaloyalo ni ivakatakarakara ena Same 61:2–3. Ena “uluvatu” cecere (tikina e 2), “ivakaruru”, ka “koro kaukauwa” (tikina e 3) beka vakaevei o Jisu Karisito?

vale ni vakatawa tara ena vatu — “Ni kemuni sa noqu ivakaruru, na noqu koro kaukauwa” (Same 61:3).

Same 66:16; 77:11; 78:6–7

“Au na nanuma na cakacaka ni Turaga”

Kerei ira na luvemu mera wasea eso na nodra italanoa taleitaki ena ivolanikalou (na iyaloyalo mai na iVola ni iYaloyalo Vakosipeli ena rawa ni veivuke). Na cava e vakavulica vei keda na italanoa eso oqo me baleta na Turaga? E rawa moni wilika vata na Same 66:16 ka veivukevuke ena saumi ni taro “Na cava sa cakava na Turaga ena vuku ni yaloqu”?
Ni dou wilika vata na Same 77:11; 78:6–7 e rawa ni dou veiwaseitaka na sala o tovolea kina mo “nanuma na cakacaka ni Turaga” (Same 77:11), oka kina na Nona cakacaka ena nomu bula. E vukei keda vakacava na sakaramede meda “dau nanuma tikoga”? (Moronai 4:3; 5:2).

Same 71:8

Au rawa ni tukuni Jisu Karisito vei ira na tani.

Ni oti na nomu wilika vata kei ira na luvemu na Same 71:8 sureti ira mera droinitaka edua na gusu levu. Kerei ira mera vukei iko me “vakasinaiti” na gusu ena iyaloyalo se vosa ka ra matataka na veika eda rawa ni tukuna vei ira na tani me baleti Jisu Karisito.
E rawa mo veisoliyaka wavoki e dua na itaba kei Jisu Karisito. O koya e taura tu na itaba e rawa ni tukuna e dua na ka e kila me baleti Koya. Eda na vukei ira vakacava na tamata tale eso mera kila na veika oqo?

E tu e levu sara na ka mera wasea na gone. “Nira vulica na gone edua na ka vou, e ivakarau ni nodra bula mera via wasea vei ira na tani. Vakayaloqaqataka na gagadre oqo ena nomu solia na madigi vei ira na gone mera vakavulica na ivakavuvuli ni kosipeli vei ira vakataki ira, ira nodra lewe ni matavuvale, kei ira nodra itokani. Kerea talega vei ira mera wasea vei iko na nodra vakasama, na veika era vakila, kei na veika era sotava ka semati ki na ivakavuvuli o vakatavulica tiko. Ona raica ni tu vei ira na vakasama e rawarawa, savasava, ka mana” (Veivakavulici ena iVakarau ni iVakabula, 32).

Same 86:7

O Tamada Vakalomalagi edau rogoca ka sauma na noqu masu.

E levu na same era vaka na masu vua na Kalou. Nio wilika na Same vata kei ira na luvemu, ena rawa nio vakaraitaka vei ira na veika eda rawa ni vakayagataka meda veitaratara kina kei ira na tamata era tu vakayawa, me vaka na talevoni se ivola. Qai wilika na Same 86:7. Eda “masuti” Tamada Vakalomalagi tiko beka vakacava? E sauma tiko beka mai vakacava o Koya noda masu?
E rawa ni dou lagata vata edua na sere me baleta na masu, me vaka na “Tamaqu mai Lagi” (iVolanisere ni Gonelalai, 6; raica talega na Susan H. Porter, “Masu E Tiko O Koya,” Liaona, Me 2024, 77–79). Veitalanoataka edua na gauna a sauma kina na nomu masu na Kalou.

Me baleta na vakasama tale eso, raica na ilavelave ni mekasini na iTokani ni vula oqo.

a itaba kei Jisu — Come unto Christ [Lako Mai vei Karisito]’ mai vei Casey Childs

Tabana ni itaviqaravi ni Lalai: Niu cakava edua na digidigi cala, sa rawa ni vukei au o Jisu Karisito meu veisau — Come unto Christ [Lako Mai vei Karisito]’ mai vei Casey Childs