Same 102–103; 110; 116–119; 127–128; 135–139; 146–150

Raica na sala e vakamacalataka kina na Same 102:1–11 na yalo ni nuiqawaqawa kei na tawasei tani ka dau yaco ena gauna ni bolebole. De dua o iko se so tale o ni sa sotava oti na veituvaki ni yalo vakaoqori. Ni o wilika na Same 102:12–28; 103; 116, vakaraica na veimalanivosa e solia vei iko na yalodei mo “masuta na yaca ni Turaga” ni o vakatovolei (Same 116:13). O na gadreva beka mo makataka, cavuqaqataka, se wasea vei ira na tani na veimalanivosa e vakavuna mo nuitaki Koya.

Raica talega na Aisea 25:8; Iperiu 2:17–18; Alama 7:11–13; Camille N. Johnson, “O Jisu Karisito na Veivakacegui,” Liaona, Me 2023, 81–83; “Meu Gole Tu Kivei” (Serenilotu, naba 71).

Na Same e tu kina eso na malanivosa e dusia na bula kei na veiqaravi nei Jisu Karisito. Oqo e vica na ivakaraitaki:

• Same 110:1–4 (raica na Maciu 22:41–45; Iperiu 5:4–10; 6:20)

• Same 118:22 (raica na Maciu 21:42; Cakacaka 4:10–11; 1 Pita 2:7)

• Same 118:25–26 (raica na Maciu 21:9)

Na cava e vakavulica vei iko na veitikina oqo me baleti Jisu Karisito? Na cava e bibi kina meda kila na veika oqo baleti Koya?

NaSame 119 e tiko kina e vuqa na malanivosa ka vakatauvatana na noda bula ki na dua na ilakolako lesu vua na Tamada Vakalomalagi. Nio wilika, vakasaqara na vosa me vaka na “lako” “salatu,” “sala,” “yava,” kei na “lako sese.” Vakananuma vakatitobu na nomu ilakolako ni bula—na vanua o a tiko kina, na vanua o tiko kina nikua, kei na vanua o gole tiko kina. Na cava o vulica mai na same oqo baleta na nomu ilakolako lesu ki vale? Na cava o sa vulica ena nomu sarava na nodra sala eso tale? Me vaka na same oqo, na cava sa vakarautaka tu na Kalou me vukei iko mo tiko ga kina ena Nona salatu?

Vakasamataka mada e dua na gauna o a muria kina e dua na sala se mape ka a vukei iko mo yaco ki na vanua o a lako tiko kina. Na cava e vakavulica vei iko na veika o a sotava oya me baleta na nomu muria na sala ni Kalou?

Ena vuqa tale na ivolanikalou, na Turaga kei ira na Nona parofita era tukuna kina e dua na sala. E tiko e ra e vica na ivakaraitaki. Navuca mo vakasaqaqara ena veitikina oqo ka vola se wasea vei ira tale eso na veika o vulica.

Ena vukei iko vakacava na veidina oqo mo tiko ga kina ena sala ni Kalou?

Na ikuri ni vakasama cava o rawa ni vulica mai na ivakasala oqo mai vei Peresitedi Russell M. Nelson?

“Kevaka me vuavuai vinaka na noda ilakolako ena bula oqo, ena gadrevi meda muria na veidusimaki vakalou. E kaya na Turaga, ‘Drau vakararavi tiko mai vei au ena vakasama kecega, kakua ni vakatitiqa, ka kakua ni rere’ [Vunau kei na Veiyalayalati 6:36]. A vola na Daunisame, ‘Na nomuni vosa sa cina ki na yavaqu, ka sa rarama ki na noqu sala’ [Same 119:105]. …

“Ena nomu ilakolako ena bula oqo, o na sotava e vuqa na dredre ka cakava eso na cala. Na veituberi vakaivolanikalou e vukei iko mo kila na cala ka cakava na veivakadodonutaki e gadrevi. Ena tarova na nomu muria na sala cala. Mo vulica sara vakavinaka na mape ni gaunisala vakaivolanikalou. Mo qai tosokiliu ena veivutuni kei na veivakadodonutaki e gadrevi mo tiko ga kina ena ‘sala qiqo ka rabailailai sa basika ki na bula tawamudu’ [2 Nifai 31:18]” (“Living by Scriptural Guidance,” Ensign, Nove. 2000, 17).

Raica talega na Dieter F. Uchtdorf, “Na Gone Cidroi kei na Sala E Mua ki Vale,” Liaona, Nove. 2023, 86–88.

Raica na vuna e ka lialia kina meda vakabauta na kalou lasu me vaka e tukuni tiko ena Same 135:15–18. Na cava ona rawa beka ni temaki kina mo nuitaka me vakataka edua na matakau? Sa rawa mo cakava e dua na lisi ni veika e rawa ni cakava na Turaga, me vaka a cakava na daunisame ena Same 134–136. Na veika kaukauwa cava e sa cakava vei iko o Koya?

Na cava o kunea ena Same 139 ka vukei iko mo kila ni Turaga e kilai iko tiko—na nomu vakasama kei na ivalavala, nomu kaukauwa kei na malumalumu? E cakacakayaco vakacava na kila ka oqo ki na nomu bula kei na nomu digidigi?

Ni o wilika na iotioti ni Same ni veivakacaucautaki, vakasamataka eso na vuna mo vakacaucautaka kina na Turaga. Na cava na vuna e bibi kina me da vakacaucautaki Koya? Na cava eso na sala o rawa ni vakacaucautaki Koya kina?

• O iko se dua vei ira na luvemu e rawa ni wilika na Same 102:1–2, ka vakaraica na sala e vukei keda kina na Turaga nida sota kaya na dredre. E rawa vakacava nida kunea na Nona veivuke? E rawa talega ni o ni veiwaseitaka vakai kemuni na gauna o ni a gadreva kina na veivuke ka vakila ni a rogoca na Kalou na nomuni masu.

• Era na marautaka beka na luvemu mera talanoataka se vakacava tu na tiko ena butobuto. Se era rawa ni veivosakitaka na veika cava soti edau dredre me caka ena butobuto. O na sureti ira beka mera cakava e dua na ka nira bobo tiko, me vaka na droinitaka e dua na iyaloyalo. Na cava eda vulica mai na Same 119:105 me baleta na rarama kei na vosa ni Kalou?

• Vakaraica edua na ka sa solia vei keda na Tamada Vakalomalagi me vukei keda meda tiko ga ena Nona sala ena veitikina oqo: Same 119:47–48; 119:105; 1 Nifai 11:25; 2 Nifai 31:20. Na cava e rawa nida cakava meda tiko ga kina ena salatu ni Kalou?

• Era na marautaka beka na luvemu mera sarava na iyaloyalo ni veika e cavuti tiko ena Same 119:105. E rawa nira biuta na iyaloyalo ena kena iyatu dodonu nira wilika na tikina oqo. E rawa talega nio ni lagata vata edua na sere veisemati, me vaka na “Tuberi Au E Nona Loloma” (iVolanisere ni Gonelalai, 70) se “I Will Walk with Jesus” (Gospel Library).

• Navuca mo cakava na lisi lekaleka ni veika o kila me baleti ira yadua na luvemu. Nio wilika yadudua na lisi, kerei ira na gone mera kilakila se o cei o vakamacalataka tiko. Ni oti nomudou wilika vata na Same 139:1–3 sa rawa mo vola na veika erau kila tu na Tamada Vakalomalagi kei Jisu me baleti keda.

• Vola na vosa ni Same 139:23–24 ena dua na tiki ni pepa se dua na papa. Sureti ira na luvemu mera toqa na veivosa e vakamacalataka na veika e rawa ni cakava vei keda na Kalou. Na cava na vuna eda vinakata kina vua na Kalou me cakava na veika oqo?

• Sureti ira na gone mera wasea na veika era sotava ni dua e vakacaucautaki ira se tukuna vei ira nira cakava e dua na cakacaka vinaka. Wasea eso na ka vinaka mai na Same 146:6–9 sa cakava na Turaga (vukei ira na luvemu mera kila na ibalebale ni vosa tawakilai). Sureti ira na luvemu mera tukuna na veika tale eso e cakava vei keda o Koya. Eda na vakacaucautaki Koya vakacava ena vuku ni veika oqori?