O ira na Parofita kei na Parofisai

O ira na parofita kei na parofisai e tiko na nodra i lesilesi bibi ena loma taucoko ni Veiyalayalati Makawa. O Eparaama, Aisake, kei Jekope eratou a raica na raivotu ka veitalanoa kei ira na italai vakalomalagi. O Mosese a veitalanoa e matana votu kei na Kalou ka vakasavuya na Lomana vei ira na mataqali i Isireli. Na iMatai kei na iKarua ni kedra ivola na Tui e tukuna na nodrau cakacaka vakairogorogo kei na nodrau itukutuku na parofita o Ilaijia kei Ilaisa. Na Veiyalayalati Makawa e tukuni ira talega na parofita yalewa me vakataki Miriama kei Tepora, vata kei ira na marama tale eso era vakalougatataki ena yalo ni parofisai, me vakataki Repeka kei Ana. E dina ga ni a sega ni volai na ivola ni Same mai vei ira era kacivi me parofita, o ira talega era a vakasinaiti ena yalo ni parofisai, vakabibi nira dusia tiko mai na lako mai ni Mesaia.

E sega ni dua na ka oqo e yaco vakidacala vei ira na lewe ni Lotu i Jisu Karisito ni Yalododonu Edaidai. Ia na ka dina, ni kosipeli vakalesui mai i Jisu Karisito e vakavulica vei keda nio ira na parofita era sega walega nira rogo ena itukutuku ni veigauna ia era tiki bibi ni ituvatuva ni Kalou. E dina ga ni so era na raici ira na parofita mera okati vakatabakidua ga ki na gauna ni Veiyalayalati Makawa, eda okati ira me vaka era semati keda kina gauna ni Veiyalayalati Makawa.

Ia, na wiliki ni dua na wase mai vei Aisea se o Isikeli ena duidui beka mai na kena wiliki e dua na itukutuku ni koniferedi raraba mai vua na Peresitedi ni Lotu ena gauna oqo. So na gauna ena dredre me kilai nio ira na parofita mai liu e tiko na veika eso mera tukuna vei keda. Baleta ni vuravura eda bula tiko kina nikua e duidui sara mai na kena era a vunau ka parofisai voli kina. Kei na dina ni tiko edua na noda parofita bula e rawa ni vakavurea na taro: E yaga beka na kena sagai—ka na taura na sasaga—me wiliki na nodra vosa na parofita ni gauna makawa?

Ena vuqa na gauna, o ira na parofita ni Veiyalayalati Makawa era sega ni vosa tiko vei ira na tamata nikua. O ira na parofita oqori era a vosa tiko me baleta na leqa a yaco tiko ena nodra gauna ena nodra vanua—me vaka ga na nodra vosa tiko na noda parofita nikua me baleta na leqa sara ga eda sotava tiko nikua.

Ena gauna vata oqori, e rawa talega vei ira na parofita mera raisivita na kauwai e sotavi sara tiko ga. Era vakavulica na dina tawamudu, ka veiganiti kei na gauna kei na vanua cava ga. Nira vakalougatataki ena ivakatakila, era raica tiko na iyaloyalo levu sara ni cakacaka ni Kalou. Kena ivakaraitaki, a vakasalataki ira na tamata o Aisea ena nona gauna me baleta na nodra ivalavala ca. A vola tale ga na veika me baleta na nodra sereki na Isireli era na bula ena 200 na yabaki mai ki muri. Ena gauna vata oqori, a vakavulica kina na veisereki era vakasaqara kece tiko na tamata ni Kalou. Ka a vola o koya na parofisai eso, e se waraki tiko me yacova mai nikua, me vakavotukanataki—me vaka na yalayala ni “dua na vuravura vou” (Aisea 65:17) ka na “roboti vuravura kina na veikilai kei Jiova” (Aisea 11:9), na vanua era na soqoni vata kina na yavusa i Isireli era sa yali tu vakakina nira na sega tale ni “vulica nai valu” na “veimatanitu.” (Aisea 2:4). E tiki ni reki kei na veivakauqeti e yaco mai nida wilika na nodra vosa na parofita ni Veiyalayalati Makawa me vakataki Aisea, sai koya me kilai nida vakaitavi tiko ena siga lagilagi era a parofisaitaka mai.

O koya gona, nio wilika na veiparofisai makawa, ena rawa ni veivuke mo vulica na veika a yaco tiko ena gauna era a volai kina na itukutuku oya—ia e dodonu mo raici iko talega kina, se “vakatauvatana vei [iko]” (1 Nifai 19:24; raica talega na tikina e 23). Ena so na gauna ena kena ibalebale mo raici Papiloni me ivakatakarakara ni ivalavala ca kei na dokadoka, ka sega walega ni dua na korolevu makawa. E rawa ni kena ibalebale na kena kilai o Isireli mera tamata ni Kalou ena gauna kei na vanua cava ga. Se e kena ibalebale beka me raici o Saioni me dua na ivakarau ni vakasama era vakabauta na tamata ni Kalou, mai na kena raici me dua tale na yaca kei Jerusalemi.

E rawa nida vakatauvatana na ivolanikalou kina noda bula baleta nida kila ni dua na parofisai ena rawa ni vakayacori ena vuqa sara na sala. E dua na ivakaraitaki vinaka sai koya na parofisai ena Aisea 40:3: “A domona edua sa kacikaci e loma ni vanua lala, Dou caramaka na sala i Jiova.” Kivei ira na Jiu bobula mai Papiloni, na itukutuku oqo e rawa ni kena ibalebale vei ira ni Turaga sa vakarautaka tiko edua na sala mera sereki kina ka lesu tale ki Jerusalemi. Kivei Maciu, Marika, kei Luke, na parofisai oqo e dusi Joni na Dauveipapitaisotaki, o koya ka a caramaka na sala me baleta na Nona veiqaravi vakayago na iVakabula. Ka ciqoma o Josefa Simici na ivakatakila ni parofisai oqo e se vakayacori tiko ga nikua ena vakavakarau kina Nona veiqaravi dua na udolu na yabaki e vuravura na Karisito. Ena veisala eso eda sa qai mai kila tiko, nio ira na parofita ni gauna makawa era a vosa tiko vei keda. Ka ra vakavulica e vuqa na veidina talei ka tawamudu ka ganiti keda sara ga me vaka ga vei Isireli ena gauna makawa.

Ena bibi cake beka mo raici Jisu ena veiparofisai ni Veiyalayalati Makawa mai na nomu raici iko kina. Kevaka o vakasaqarai Koya, o na kunei Koya, kevaka mada ga e sega ni cavuti na Yacana. Ena veivuke beka meda nanuma tiko ni Kalou ni Veiyalayalati Makawa, na Turaga ko Jiova, sai Jisu Karisito. Ena veigauna era vakamacalataka kina na parofita na veika e cakava tiko na Turaga se na ka ena qai cakava o Koya, era tukuni Koya tiko na iVakabula.

Ona kunea talega na idusidusi me baleta edua sa Lumuti, na Dauniveivueti, kei na dua ena Tui mai muri ena kawa i Tevita. Oqo era sa parofisai kece baleti Jisu Karisito. Vakararaba, o na wilika me baleta na veisereki, veivosoti, veivueti, kei na veivakalesui mai. Ni tiko na iVakabula ena nomu vakasama kei na yalomu, ena dusi iko na veiparofisai oqo vua na Luve ni Kalou. Ia, na sala vinaka duadua ni kena kilai na parofisai sai koya me tu vei keda “na yalo ni parofisai,” ka tukuna vei keda o Joni ni “itukutuku kei Jisu” (Vakatakila 19:10).