7–13 ni Sepiteba. ‘Ia Ena Vakadodonutaka Na Nomui Lakolako Ko Koya’: Na Vosa Vakaibalebale 1–4; 15–16; 22; 31; Na Dauvunau 1–3; 11–12,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)
7–13 ni Sepiteba. ‘Ia Ena Vakadodonutaka Na Nomui Lakolako Ko Koya,’” Lako Mai, Mo Muri Au: Veiyalayalati Makawa 2026
Jesus with Children [Jisu kei ira na Gone], mai vei Dilleen Marsh
7–13 ni Sepiteba: “Ia Ena Vakadodonutaka Na Nomui Lakolako Ko Koya”
Vosa Vakaibalebale 1–4; 15–16; 22; 31; Na Dauvunau 1–3; 11–12
Ena rawa mo vakasamataka ni ivola ni Vosa Vakaibalebale era ikumuni ni ivakasala vuku mai vei ira na itubutubu dauloloma (raica na Vosa Vakaibalebale 1:8). Na uto ni itukutuku oya ni ke o vakasaqara na vuku—vakabibi na vuku ni Kalou—ena cici vinaka na bula. Ia Na Vosa Vakaibalebale e taravi koya mai na ivola ni Dauvunau, ka vaka me kaya, “E sega ni rawarawa.” Na Dauvunau ka cavuti tiko na nona vosa ena ivola ni Dauvunau e kaya ni a “solia na [yalona] me kila na ivalavala vuku” ia ka kunea ni “sa ka ni oca wale na ka talega oqo” ka “levu kina na rarawa” (Na Dauvunau 1:17–18). Ena veisala eso, e taroga tiko na ivola oqo, “E tiko beka edua na ibalebale dina ni bula ena dua na vuravura ka vaka e ka wale, vakaicavacava, ka veilecayaki kina na ka kecega?”
O irau na ivola erua oqo e duidui na nodrau rai me baleta na bula, ia e tautauvata ga na veidina eso erau vakavulica. E tukuna na Dauvunau: “Tou rogoca na itinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata” (Na Dauvunau 12:13). Oqo na ivakavuvuli vata ga e kunei ena Vosa Vakaibalebale: “Mo vakararavi vei Jiova ena vu ni yalomu” (Vosa Vakaibalebale 3:5; raica talega na tikina e 7). Ena dau vinaka cake tiko ga na bula—kevaka mada ga e sega ni vinaka sara—nida vakararavi ka muria na Turaga o Jisu Karisito.
Me baleta na raici raraba ni ivola oqo, raica na “Vosa Vakaibalebale, Na” kei na “Dauvunau” ena iDusidusi ki na iVolanikalou.
Vakasama eso ni Vuli e Vale kei na Lotu
Vosa Vakaibalebale 1–4; 15–16; Dauvunau 1–3; 11–12
“Mo vakatu daligamu kina kina vuku.”
Na ivola ni Vosa Vakaibalebale kei na Dauvunau e vakasinaiti tu ena veivakararamataki me baleta na vuku. Navuca mo toqa na vosa “vuku” kei na vosa veiwekani, me vaka na “kila ka” kei na “yalomatua,” nio kunei ira ena Vosa Vakaibalebale 1–4; 15–16; Dauvunau 1–3; 11–12. E vakayaco ka vakacava na veiiwase oqo kina sala o vakananuma kina na vuku? Mai na veika o sa kunea, o na vakamacalataka vakacava na vuku e “solia ko Jiova”? (Vosa Vakaibalebale 2:6). Na veivakalougatataki cava e kauta mai na vuku ni Kalou?
Raica talega na Maciu 7:24–27; 25:1–13.
Vukei ira na vuli mera bulataka na veika era vulica tiko. “Solia na madigi vei ira na vuli tiko mera veiwaseitaka na veika era sa vulica tiko me baleta na iVakabula kei na Nona kosipeli. Na kena vakayacori na ka oqo ena vukei ira mera vakananuma vakatitobu na veidina era vakavulici kina ka rawa mera na vakamacalataka. Ena vukei ira talega mera yalodei ena nodra rawata mera wasea na veidina eso ena veituvaki tale eso” (Veivakavulici ena Sala ni iVakabula, 26). Me vaka beka oqo, e rawa nio sureti ira na vuli tiko mera vola eso na tikina mai na Vosa Vakaibalebale se Dauvunau ka ra kunea kina eso na raititobu me baleta na vuku ni Kalou. Qai sureti ira na vuli mera wasea na ka era sa vulica.
Vosa Vakaibalebale 1:7; 2:5; 3:7; 15:33; 16:6; 31:30; Dauvunau 12:13
“Mo kakua ni nanuma nio sa vuku: mo rerevaki Jiova.”
Edua tale na iulutaga ka kunei ena Vosa Vakaibalebale kei na Dauvunau sai koya na “rerevaki Jiova.” Vakaraica na malanivosa oqo nio wiliwili tiko. Na cava o nanuma ni kena ibalebale mo rerevaki Jiova? Vakasaqara eso na raititobu ena itukutuku nei Elder David A. Bednar “Ia Era sa Vosota na Nodra Rere” (Liaona, Me 2015, 46–49). E duidui vakacava na rerevaki Jiova mai na vei mataqali rere tale eso?
Raica tale ga na Vosa Vakaibalebale 8:13.
Vosa Vakaibalebale 3:5–7; 4
“Mo vakararavi vei Jiova ena vu ni yalomu.”
Ona tovolea vakacava mo tukuna vua edua ni vinaka cake na “vakararavi vei Jiova” mai na “vakararavi kina [noda] yalomatua”? (Vosa Vakaibalebale 3:5). Na veivakatauvatani se lesoni ivakaraitaki cava ona vakayagataka? Nio vakasamataka vakatitobu na Vosa Vakaibalebale 3:5–7, navuca na sala eso ona rawa ni vakacavara kina na veiyatuvosa vakaoqo: Na vakararavi vua na Turaga sa vaka … Na vakararavi kina noda yalomatua sa vaka …
Na cava e ka lialia kina na noda vakararavi kina noda yalomatua? O a kila vakacava ni rawa me nuitaki na Turaga?
Ia, ena so na gauna eda na kunea ni vaka e dredre meda nuitaka na Turaga. Ena vuku ni cava? E vakatura o Elder Gerrit W. Gong eso na vuna, vata kei na ivakasala me veivuke ena “Vakanuinui Tikoga,” (Liaona, Nove. 2021, 97–99). Na italanoa se ivakavuvuli cava o kunea ena itukutuku oqo ena rawa ni vukea edua me vakalesuya mai na nona nuitaka na Turaga?
Na Vosa Vakaibalebale 3:6 kei na Vosa Vakaibalebale 4 erau vakatauvatana na bula kei na dua na “sala” se dua na “ilakolako.” Na cava o nanuma e ibalebale ni Nona vakatarai na Turaga me “dusimaka na [nomu] ilakolako”? (Vosa Vakaibalebale 3:6). Na cava o raica ena wase e 4 ena vukei iko mo “lewa vakamatau na ilakolako ni [yavamu]”? (tikina e 26). Me kena ivakaraitaki, na cava e vakavulica na tikina e 11–12 kei na 18–19 me baleta na veivakalougatataki ni kena muri na sala dodonu? Na cava na ibalebale ni tikina e 26–27 vei iko?
Raica talega na 2 Nifai 31:18–21; “Turaga, Meu na Muri Kemuni,” Sere ni Lotu, naba 129.
Vosa Vakaibalebale 15; 16:24–32
“A vosa vakayalovinaka sa ivakamalumu ni cudru.”
Eso na vakasama ena Vosa Vakaibalebale 15–16 ena rawa ni vakauqeti iko mo vakavinakataka na ivakarau ni nomu veivosaki kei ira na tani, vakabibi vei ira na daulomani. Me vaka beka oqo, vakananuma na veigauna eso a veivuke kina na “vosa vakayalovinaka” me “[ivakamalumu] ni cudru” (Vosa Vakaibalebale 15:1).
Ona rawa ni vakananuma beka na veigauna eso e a ivakaraitaki kina ni veivakavuvuli ena Vosa Vakaibalebale 15:1–4, 18 na iVakabula (raica na Marika 12:13–17; Joni 8:1–11). Ena rawa vakacava meda muria na Nona ivakaraitaki nida veimaliwai kei ira na tani?
Ena rawa vakacava me vakayagataki na ivakasala ena Vosa Vakaibalebale 15; 16:24–32 ki na veitaratara vakalivaliva nikua? Raica ke o rawa ni kunea e dua na tikina ena veiwase oqo ka rawa ni o cavuta me ivakasala me baleta na veimaliwai ena sala ni vakauitukutuku raraba.
Raica talega na Neil L. Andersen, “Mo Muri Jisu: Mo Dua na Dautataro,” Liaona, Me 2022, 17–20; Ronald A. Rasband, “E Bibi Na Vosa,” Liaona, Me 2024, 70–77; Me iSakisaki ni iTabagone: iDusidusi mo Cakava na Digidigi (2022), 11–12.
Who Can Find a Virtuous Woman? [Ko Cei Sa Kunea Rawa na Yalewa Sa Vinaka Sara]? II,, mai vei Louise Parker
Vosa Vakaibalebale 31:10–31
“Na yalewa sa rerevaki Jiova, ena vakacaucautaki.”
Na Vosa Vakaibalebale 31:10–31 e vakamacalataka e “dua na yalewa sa vinaka sara,” se dua na marama e cecere nona kaukauwa vakayalo, nona rawa ka, kei na veivakayarayarataki. Sa rawa nio tovolea mo vakalekalekataka vakai iko na cava era tukuna na veitikina oqo me baleti ira na marama era sa uasivi sara. Na vei itovo cava soti o rawa ni vakatotomuria?
Dauvunau 1–3; 12
E vakaicavacava ga na bula vakayago.
Na cava na vuna e yaga kina vei iko mo nanuma tiko ni levu na ka ena vuravura oqo, me vaka e vakadeitaka na Dauvunau 1–2 era “ka wale” (se vakaicavacava ka vakavuqa mera sega ni bibi)? Na cava o kunea ena Dauvunau 12 ka solia kina bula na veika e tawamudu na kena yaga?
Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.
Vakasama eso ni Nodra Vakatavulici na Gonelalai
Vosa Vakaibalebale 1:7; 2:5; 15:33; 16:6; Dauvunau 12:13
Na “rerevaka na Kalou” e kena ibalebale meda lomana ka talairawarawa vei Koya.
-
Mera vukei na luvemu me matata vei ira na veitikinivolatabu me baleta na rerevaka na Kalou, sa rawa mo sosomitaka na vosa “rere” ena vosa me vaka na vakarokoroko, loloma, se talairawarawa (raica talega na Iperiu 12:28). Ena vakayaco-ka vakacava oqo ki na ivakarau ni noda vakasamataki ira na veitikina oqo? Eda na vakaraitaka vakacava nida rerevaka na Turaga?
Vosa Vakaibalebale 3:5–7
Au rawa ni vakararavi vei Jiova mai vu ni yaloqu.
-
Dou rawa ni cakava kei iratou na luvemu eso na ivukivuki me lako vata kei na Vosa Vakaibalebale 3:5–7, me vaka na buli uto ena ligamu, ravi kina dua na yasana, taubale tiko ena vanua o duri kina, kei na dusia na matamu. Ena rawa vakacava nida vakaraitaka noda vakabauti Jisu Karisito mai vu ni yaloda?
-
Mo vakaraitaka na ibalebale ni “kakua ni vakararavi kina nomu yalomatua” (Vosa Vakaibalebale 3:5), navuca mo sureti ira na luvemu mera ravita edua na ka e kaukauwa ka tudei, me vaka na lalaga. Oti mera qai tovolea mera ravita edua na ka e sega ni kaukauwa, me vaka e dua na itataviraki. Se rawa nira tovolea mera vakaravita edua na kau se penikau kina veika eso e duidui na kedra kaukauwa, me vaka na ivola se tikinipepa. Na cava e bibi kina meda “vakararavi vei Jiova” (tikina e 5) ka kakua ni vakararavi ki na noda “yalomatua”?
Learning to Trust the Lord [Vulica mo Vakararavi vua na Turaga], mai vei Kathleen Peterson
Vosa Vakaibalebale 15:1, 18
Au rawa ni vakayagataka na vosa vakayalovinaka.
-
Ena rawa nio vakananuma beka kei iratou na luvemu eso na ituvaki ka rawa ni dou vakacudrui kina. Wilika vata na Vosa Vakaibalebale 15:1 ka vukei ira na luvemu mera vakayagataka na tikina oqo kina ituvaki era vakananuma. De rawa beka nira vakatovotovotaka eso na “ivakamalumu ni cudru” Edua na sere me baleta na yalovinaka, me vaka na “Vosa ni Loloma” (iVolanisere ni Gonelalai, 102), e rawa ni vaqaqacotaka na ivakavuvuli oqo.
-
Me kilai na ibalebale ni “berabera ni cudru” (Vosa Vakaibalebale 15:18), dou rawa ni veiwaseitaka kei iratou na luvemu edua na gauna o iko (se dua o kila) a cudru kina, ia a qai digia me yalovinaka ga. Vukei ira na luvemu mera vakasamataka na veika e rawa nida totolo ni kevaka eda “berabera ni cudru.” Me vaka beka oqo, e rawa nida totolo ni vakasamataki Jisu, kerea vua na Tamada Vakalomalagi me veivuke mai, meda vakasamataka edua na sere ni Lalai, se, ke rawa, meda lako tani.
Me baleta na vakasama tale eso, raica na ilavelave ni mekasini na iTokani ni vula oqo.