Aisea 13–14; 22; 24–30; 35

Ena gauna i Aisea, o Papiloni e a matanitu kaukauwa ka a dua tiko na kena iliuliu kaukauwa. O Papiloni ena gauna oqo, sa dua ga na itukutuku makawa. Na cava e bibi kina vei keda nikua na itukutuku nei Aisea vei Papiloni, ena Aisea 13–14? Baleta ni o Papiloni e vakatakarakarataka na viavialevu, kocokoco, kei na ivalavala ca, na veika e se vakavolivoliti keda tu nikua. Vakasamataka na ivakatakarakara oqo nio wilika na Aisea 13:1–11, 19–22; 14:1–20. Sa rawa talega mo vakasamataka na taro vaka oqo:

• Na veivakatauvatani cava o raica ena viavialevu nei tui Papiloni kei na viavialevu nei Setani? (raica na Aisea 14:4–20; Mosese 4:1–4). Na ivakasala cava eso o kunea me baleti iko ena veitikina oqo?

• E vakarautaka tu vakacava na iVakabula na “vakacegu mai na nomu rarawa, kei na nomu rere”? (Aisea 14:3).

Na ivakavuvuli nei Aisea e vakawasoma me dusia na ilesilesi ni iVakabula, okati kina na Nona Veisorovaki, Tucaketale, kei na iKarua ni Lako Mai. Na vakanananu cava baleta na Nona ilesilesi e basika vei iko nio wilika na veitikina oqo: Aisea 22:22–23; 24:21–23; 25:6–8; 26:19; 28:16? Na veimalanivosa cava tale o kunea ni vakananumi iko me baleta na iVakabula?

Ena Nona loloma cecere, na Turaga a talai Aisea mai me vakasalataki ira na tamata ni veiyalayalati nira sa gole tani tiko mai Vua. Raica kevaka o rawa ni kunea na veivakatakilakila ni leqa vakayalo ena Aisea 24:5; 29:13; 30:8–12. Na cava era rerevaki kina vakayalo na vei itovo kei na veivalavala vakaoqo?

Me veivakasalataki me baleta na revurevu ni vuki tani mai vua na Turaga, a vakayagataka o Aisea eso na veivakatauvatani guiguilecavi dredre. Nio vulici ira, tarogi iko se vakaevei tu na vuki tani mai vua na Turaga:

• E vaka edua na vuravura rarawa, ka lala (Aisea 24:1–12).

• E vaka na daumateni (Isaiah 28:7–8).

• E vaka na viakana kei na viagunu (Aisea 29:7–10).

• Na lalaga se bilo sa kavoro (Aisea 30:13–14).

Na cava e bibi kina vei iko mo voleka tikoga vua na Turaga?

O sa bau vakayalia beka edua na ka o nanuma nio na sega tale ni kunea? Se dua beka na ka e kavoro, o qai lomaleqataka ni na sega ni vakavinakataki rawa. Nida vuki tani mai vua na Turaga, o Setani ena vinakata meda nanuma nida na sega ni lesu rawa tale se vakabulai. Ia, o Aisea a vakamacalataka eso na ka veivakurabuitaki ena cakava na Turaga me vukei keda meda lesu Vua. Na cava o vulica mai na Aisea 29:13–24; 30:18–26; 35 me baleta na Turaga, Nona loloma, kei na Nona kaukauwa? De dua ona kunea edua na malanivosa ena veitikina oqo ka na solia vei iko na inuinui nio gadreva na veivakabulai. E rawa talega nio raica na itukutuku nei Sisita Amy A. Wright “E Vakabula o Karisito na Veika sa Kavoro” (Liaona, Me 2022, 81–84).

Edua na sala sa vakatakila mai kina na Turaga na Nona kaukauwa kei na loloma veivueti sai koya ena kena Vakalesui mai na Nona kosipeli. NaAisea 29 e tiko kina e vica na malanivosa ka tautauvata kei na veika a yaco ena Veivakalesuimai. Me kena ivakaraitaki:

• Vakatautauvatataka na Aisea 29:11–12 kei na 2 Nifai 27:6–26 kei na Josefa Simici—Ai Tukutuku 1:63–65.

• Vakatautauvatataka na Aisea 29:13–14 kei na Vunau kei na Veiyalayalati 4 kei na Josefa Simici—Ai Tukutuku 1:17–19.

• Vakatautauvatataka na Aisea 29:18–24 kei na tabana ni ulutaga ni iVola i Momani.

Ena nomu nanuma, na cava erau vosa vinaka me vakamacalataki kina na nona vakalesuya mai na Turaga na Nona kosipeli na “talei” kei na “veivakurabuitaki” (Aisea 29:14)? Ona veivuke vakacava ena kena vakayacori na parofisai me baleta na Veivakalesui mai? Me baleta na veivakasama eso, raica na itukutuku nei Elder Gerrit W. Gong “Na Veimatanitu Veimataqali, kei na Duivosavosa” (Liaona, Nove. 2020, 38–41).

Raica talega “Na Vakalesui Mai ni Taucoko ni Kosipeli i Jisu Karisito: A iVakaro ni Yabaki Ruanadrau ki Vuravura” (Valenivola Vakosipeli); “Mataka Sa Qai Kida Mai,” Sere ni Lotu, naba 1.

• Ona vukei ira vakacava na luvemu mera kunea na iVakabula ena ivola i Aisea? Ona rawa ni vukei ira beka mera kunea na veimalanivosa ka vakananumi Koya vei ira ena Aisea 14:3; 25:8; se 28:16. E rawa talega nira veisotaritaka vata na veitikina oqo mai vei Aisea kei na veitikina tale eso e vakavulica na veika me baleta na iVakabula, me vaka na Maciu 11:28–30; 1 Korinica 15:53–57; Ilamani 5:12. Na veika lelevu cava sa cakava oti vei keda na Turaga?

• Ni oti nomudou wilika vata na Aisea 25:8–9 sa rawa mo dou sarava na iyaloyalo ni iVakabula mai Kecisemani, ena kauveilatai, kei na oti ni Nona Tucaketale. Mera veivosakitaka na luvemu na veika e yaco tiko ena iyaloyalo kei na vuna era lomani Jisu kina ka “rekitaka na nona veivakabulai” (tikina e 9).

• Ona rairai digitaka mo tukuna vei ira na luvemu na rarawa o vakila ni takali edua o lomana. Vakadinadinataka na vakacegu o ciqoma ena vuku i Jisu Karisito. De dua e rawa nira droinitaka na luvemu edua na mata ni tagi tiko ka qai bokoca laivi na wainimata ni dou wilika vata tiko na Aisea 25:8

• Dou sa bau sotava oti beka kei iratou na luvemu na veivakalougatataki ni vakarurugi mai na cava kei na dua na siga katakata ni vulaikatakata? Se o a marautaka beka e dua na kakana vinaka nio a viakana? Veivosakitaka na veika sotavi oqo nio wilika na Aisea 25:4–6. E tautauvata vakacava o Jisu Karisito kei na veika oqo?

• Ni dou wilika kei iratou na luvemu na Aisea 29:14, wasea vei ira eso tale na vosa ka ibalebale vata kei na “talei” kei na “veivakurabuitaki.” Vakatara mera vukei iko mo kunea na iyaya se iyaloyalo ka matataka eso na cakacaka veivakurabuitaki ni Turaga ena veisiga e muri. Oqo e rawa ni oka kina edua na ilavelave ni iVola i Momani, dua na iyaloyalo ni valetabu, se dua na iyaloyalo ni iMatai ni Raivotu (e dua e tiko ena itekivu ni ituvatuva oqo). Sureti ira na gone mera digitaka edua na ka, ka qai wasea na vuna e talei kina vei ira.

• Na sere me baleta na Vakalesui mai ni kosipeli e rawa ni veiganiti kei na Aisea 29, me vaka na “Vulaitubutubu” (iVolanisere ni Gonelalai, 57). De dua na wasei ni dua na ka o sotava vakai iko ena rawa ni vukei ira na gone mera kila vakavinaka na veivakalesui mai keina kena i balebale. Me ivakaraitaki, dou rawa ni veitalanoataka vakaveiluveni edua na ka o a vakayalia kei na sala o qai kunea tale kina. Vukei ira na gone mera vakatauvatana na ka oqo ki na Vakalesui mai ni kosipeli. Me vaka na Aisea 29:13–15, na cava eda gadreva kina na Veivakalesui mai? Na veicakacaka veivakurabuitaki cava e cakava tiko na Turaga me vakalesuya mai kina na Nona kosipeli? (raica na tabana ni itaviqaravi ni macawa oqo).