2 Veigauna 14–20; 26; 30

Ni se tui Juta voli o Esa, a sotava o koya e vuqa na bolebole—me vakataki keda kece nikua. Ni o wilika me baleta na veivakatovolei a sotava, raica na vanua a vakanuinui kina o koya kei na sala a qai veisau kina oqori ena toso ni gauna.

Na cava eda dau muduka kina ena so na gauna na noda vakararavi vua na Turaga? Na cava tale o vulica mai na bula nei Esa?

Raica tale ga na Elder D. Todd Christofferson, “Na Keda iSema ni Veiwekani kei na Kalou,” Liaona, Me. 2022, 78–80.

A rairai vakila ni vakasaurarataki o Maikaia na parofita me tukuna ni rau na qaqa na tui o Jiosafati kei Eapi ena nodrau valuti Siria. Vakasaqara na ivakadinadina ni veivakasaurarataki oya ena 2 Veigauna 18:1–12. Na ivakadinadina cava o raica me baleta na yaloqaqa kei na yalodina nei Maikaia ena tikina e 13–27? (Me kilai tiko ni ena tikina e 14, e sauma ena vosa veivakacacani o Maikaia; ia na nona isaunitaro dina e tiko ena tikina e 16.) A vakayacori vakacava na vosa nei Maikaia ena tikina e 28–34?

Na ituvaki cava eso o na sotava beka kina na veivakasaurarataki me vakataki Maikaia? Na cava e solia vei iko na yaloqaqa mo tutaka na Turaga kei na Nona ivakavuvuli?

Ni o wilika na 2 Veigauna 20:1–12, raica na ka a cakava o Tui Jiosafati ena nodra mai kabai Juta na veimatanitu e vuqa. O na vakayagataka beka vakacava na nona ivalavala ena ituvaki dredre eso o sotava?

Na nona sauma na Turaga na masu nei Jiosafati e kunei ena tikina e 14–17. Na malanivosa cava o raica e kea ena rawa ni vakacegui iko se dua o kila ena gauna dredre eso?

Ena siga ka tarava, era lako yani na lewe i Jerusalemi mera sotavi ira na mataivalu era veisaqasaqa kaya. Ni o wilika na 2 Veigauna 20:20, vakasaqara na itukutuku a solia o Jiosafati vei ira na tamata mai Jerusalemi. A vakayacori vakacava na nona vosa? (raica na tikina e 22–23). Sa vakalougatataki iko vakacava na Kalou ena nomu vakabauti Koya ka muri ira na Nona parofita?

A kaya o Peresitedi Russell M. Nelson: “Na veika au sa sotava oya ni gauna o sa muduka kina na nomu biuta na ivakatakilakila ni taro ena daku ni nona vosa na parofita ka biuta ga na tikina ni veivakayadrati, ka cakava, na veivakalougatataki e sovaraka ga. Au sega vakadua ni tarogi au, ‘Na gauna cava e vosa kina na parofita me vaka e dua na parofita kei na gauna cava e sega kina?’ Au taleitaka, ‘Me’u na vakataki koya vakalevu cake vakacava?’” (ena Lane Johnson, “Russell M. Nelson: A Study in Obedience,” Ensign, Okos. 1982, 24).

Raica talega na Vunau kei na Veiyalayalati 21:4–6; “A Secure Anchor” (vidio), Gospel Library; “Vakayaco digidigi e veivakauqeti,” Me iSakisaki ni iTabagone: iDusidusi ni Vakayaco Digidigi (2022), 4–5.

3:37

Me vaka ga vei ira e vuqa tale na tui kei Juta, a tekivu na veiliutaki nei Usaia ena veika cecere ia ka mai tini ena leqa. Vakaraica na ivakarau oqo ena 2 Veigauna 26. Na cava o na kaya a veisautaka na bula nei Usaia?

Ni o wilika na tikina e 16–23, nanuma tiko ni gauna oqo, era a vakatarai ga na bete mera vakama na ka boi vinaka ena valetabu. Na cava o nanuma ni talaidredre kina vua na Kalou o Tui Usaia? Na cava o vulica mai na ka vakaloloma oqo?

Raica talega na “Mo Yalo Malumalumu,” Sere ni Lotu, naba 72.

Ena 2 Veigauna 30, a tui Juta voli kina o Esekaia. A sureta o koya na Matanitu veiqati o Isireli mera soqoni vata mai Jerusalemi mera mai marautaka na Lakosivia—e dua na ka era a sega tu ni rawa ni cakava na Isireli ena vuqa na yabaki (raica na tikina e 1–12). Na cava e vakauqeti iko me baleta na veisureti kei na sala a ciqomi kina—mai vei ira na vulagi ni Isireli kei ira na lewe i Juta?

Baleta ni sa balavu sara na gauna, era a sega ni kila vinaka tu eso na vulagi i Jerusalemi na veika matailalai me baleta na nodra vakaitavi ena Lakosivia. Ni o wilika na 2 Veigauna 30:18–27, na cava o vulica mai na ka a cakava kina o Esekaia kei na veika a qai yaco ena vuku ni ka oqori?

Raica na Russell M. Nelson, “Era Gadrevi na Dautataro,” Liaona, Me 2023, 98–101.

• Me vakamacalataki na vakasama ni nuitaka na Turaga, sa rawa mo vakaraitaka vei ira na luvemu e dua na ka o nuitaka me na maroroi iko mai na tau ni uca, me vaka na iviu se jakete. Mera veivosakitaka na vuna eda rawa ni nuitaka kina na veika oqo. Qai vukei ira mera vakatauvatana oqori ki na noda nuitaka na Turaga. Na cava eda nuitaki Koya kina me taqomaki keda vakayalo?

• E rawa ni o vukei ira na luvemu mera kila na sala erau a sotava kina o Tui Esa kei Tui Jiosafati na bolebole eso ena nodrau nuitaka na Turaga (raica na 2 Veigauna 14:11; 20:3–5, 12). Wasea vakai kemuni na sala e rawa ni o ni vakaraitaka kina vua na Turaga ni o ni nuitaki Koya.

• Na tabana ni itaviqaravi ni macawa oqo ena rawa ni vukei ira na luvemu mera kila na italanoa ni masu nei Jiosafati kei na kena isau mai vua na Turaga. O iko kei ira na luvemu e rawa ni wasea na veigauna a rogoca ka sauma kina na Kalou na nomuni masu. Vakasamataka mo okata kina na gauna e yaco mai kina na kena isau ena sala se ena so na gauna o a sega ni namaka. E dua na sere me baleta na masu, me vaka na “I Pray in Faith” (Children’s Songbook, 14), e rawa ni veivuke ena kena tarai cake na nodra vakabauta na luvemu.

• Me rawa nira vulica kina na rerevaki ni viavialevu, e rawa ni ra tara na luvemu e dua na vale cecere ena buloko se bilo lalai. Ni ra biuta na buloko yadua se bilo ena vale cecere, vukei ira mera raica e dua na ka a rawata o Usaia mai na 2 Veigauna 26:3–15. Ni ra sa tara oti na vale cecere, veivosakitaka kei ira se a cakava vakacava o Usaia me dei tikoga kina na kena cecere kei na kaukauwa. Na cava ena rawa ni vakavuna me bale? Qai, ni o wilika na tikina e 16, sa rawa mo veivosakitaka na ibalebale ni noda “yalolevu mai [meda] ca kina.” Wasea vei ira na luvemu na ka a yaco vei Usaia ena tikina e 16–23. Mera qai vakabalea sobu na nodra vale cecere. Veivosakitaka na veika eda rawa ni cakava meda yalomalumalumu tikoga kina.

• E vakaraitaki ena iyaloyalo e cake na gauna a sureti ira kina o Esekaia na wekai Juta mai na Matanitu o Isireli mera laki solevutaka vata kei ira na Lakosivia. E rawa ni o raica na iyaloyalo oqo kei ira na luvemu ka wilika na 2 Veigauna 30:18–19, ka vakamacalataka ni so vei ira na vulagi era a sega ni savai ira me vaka na lawa i Mosese. Na cava a qai cakava o Esekaia? Na cava beka era a rawa ni vakila na vulagi? Vukei ira na luvemu mera vakasamataka na sala mera vakataki Esekaia kina ena ivakarau era qaravi ira kina na tani.