2 Tui 2–7

Na cakamana e vakaraitaka vei keda na kaukauwa ni Kalou. E rawa ni ra vukei keda meda vorata rawa na dredre ni bula oqo—me vaka e dua na qele sa sega ni vua ka gadreva na wai savasava (raica na 2 Tui 2:19–22) se dua na imatau sa yali ka gadrevi me vakalesui mai (raica na 2 Tui 6:4–7). Ia na ka bibi duadua, na cakamana e rawa ni vagolei keda vua na Turaga. Ni o wilika na 2 Tui 2–6, sa rawa mo vola na cakamana eso o kunea, ka vakasamataka vakatitobu na lesoni vakayalo o vulica mai vei ira yadua.

O na rawa talega ni vakatauvatana na cakamana a vakayacora o Ilaisa kei na cakamana a vakayacora o Jisu Karisito (raica na 2 Tui 4:8–37 kei na Luke 7:11–16; 2 Tui 4:42–44 kei na Joni 6:1–13; 2 Tui 5:1–15 kei na Luke 17:11–19). Na cava era vakavulica vei iko na cakamana eso oqo me baleta na Turaga kei ira na Nona parofita?

Raica talega na 2 Nifai 26:12–13; 27:23; Moronai 7:35–37; na iwasewase “Vaqara ka namaka na cakacaka mana” ena Russell M. Nelson, “Na Kaukauwa ni iGu Vakayalo,” Liaona, Me 2022, 99–100.

A vakauqeti Ilaisa na Turaga me parofisaitaka na veika ena yaco mai—e vakavuqa, na veika e vaka me na sega ni yaco rawa. Ni o wilika na 2 Tui 4:8–17; 7:1–16, vakasamataka na nomu ciqoma na vosa ni Turaga mai vei ira na Nona parofita nikua. Na ivakavuvuli cava, parofisai, se yalayala cava o sa bau rogoca mai vei ira na parofita bula? Na cava o sa cakava tiko mo cakacakataka kina ena vakabauta na nodra vosa?

Raica talega na 3 Nifai 29:6; Vunau kei na Veiyalayalati 1:37–38; “Nodra iVakavuvuli na Peresitedi” ikumuni, Valenivola ni Kosipeli.

Ni o wilika na 2 Tui 5, vakasamataka mo vakatauvatana na vukavuka i Neamani kei na dua na bolebole vakayalo o sotava tiko.

E tiko beka e dua e vaka na “goneyalewa lailai” ena nomu bula, ka vakayaloqaqataki iko mo vakasaqara na veidusimaki me baleta na nomu bolebole mai vei ira na parofita ni Turaga? (raica na tikina e 2–3, 13).

Na cava e sureti iko tiko kina na Turaga mo cakava ka na rairai rawarawa sara—me vaka “mo sili, ka ko na savasava”? (tikina e 13). Na cava beka e tarovi iko tiko mai na nomu ciqoma na Nona veisureti rawarawa?

O na vakaraitaka vakacava na yalomalumalumu me vakataki Neamani?

Raica na sala a tara kina na nona vakabauta na Kalou ni Isireli na veika a sotava o Neamani (raica na tikina e 15). Na cava o rawa ni vulica mai na ka oqo?

Raica talega na Luke 4:27; 1 Pita 5:5–7; Alama 37:3–7; Ica 12:27; L. Whitney Clayton, “A Ka Kecega sa Kaya vei Kemudou ko Koya, Dou Kitaka,” Liaona,, Me 2017, 97–99; “Naaman and Elisha” (vidio), Valenivola Ni Kosipeli.

14:30

Ni o tovolea mo muri Karisito, o sa bau vakila beka me vaka na dauveiqaravi gone nei Ilaisa—yalolailai ka rere? Raitayaloyalotaka mada ni o a tiko ena nona itutu ni o wilika na 2 Tui 6:8–23. E veisautaka vakacava na italanoa oqo na nomu vakasama kei na nomu nanuma me baleta na nomu vakatovolei, nomu itavi, se na nomu sasaga mo bulataka na kosipeli?

Ni o vakasamataka vakatitobu, taurivaka na vosa nei Peresitedi Henry B. Eyring: “Me vaka na italai nei Ilaisa, era sa levu cake sara sa tu vata kei iko mai vei ira o rawa ni raica ni saqati iko. Eso era tiko vata kei iko ena sega ni o raici ira rawa ena matamu vakayago. Ena tokoni kemuni cake na Turaga ka na kaciva eso me ra tu vata kei kemuni” (“Koi Kemudou Kece Sa Lesi,” Liaona,, Nove. 2008, 58).

Vakasamataka mo cakava e dua na lisi baleti ira “era sa tiko kei [iko]” (tikina e 16)—na tamata sa biuta na Kalou ki na nomu bula mera tokoni iko. O na kerei Koya beka me vukei iko mo kilai ira ena nona dolava na matamu vakayalo. E rairai sa biuti iko talega o Koya ena nodra bula eso tale mo vukei ira. O ni na rawata vakacava na kaukauwa kei na veitokoni vakai kemuni?

Na gauna cava o sa bau vakila kina na veitokoni e vakamacalataka na Turaga ena Vunau kei na Veiyalayalati 84:88?

Sa rawa talega mo vulica na itukutuku nei Sisita Michelle D. Craig “Na Mata me Raica” (Liaona, Nove. 2020, 15–17). Mo tarogi iko, “Na cava e vinakata na Kalou me’u raica?”

Ni tukuni tiko na italanoa ena 2 Tui 6:8–23, a kaya kina o Elder Ronald A. Rasband: “E rawa beka ni vakau se sega na noda qiqi bukawaqa me vakasava laivi na noda rere ka vakamalumalumutaka na noda timoni, ia e matata na lesoni. Sa tiko kei keda na Turaga, sa nanumi keda ka vakalougatataki keda ena sala e rawa ga Vua. Na masu ena kaciva mai na kaukauwa kei na ivakatakila eda gadreva me usutu kina ni noda vakasama o Jisu Karisito kei na Nona solibula veisorovaki. Sa kila tu na Turaga ni so na gauna eda na vakila na rere. Au a tiko e kea ka vakakina o iko. … Ena Lotu oqo eda na rairai lewe lailai beka ga ka sa vakayarayarataki kina na vuravura, ia ni da dolava na matada vakayalo, ‘sa lewevuqa era sa tiko kei kedaru, ka lewe lailai era sa tiko kei ira’ [2 Tui 6:16]” (“Dou Kakua ni Rarawa,” Liaona,, Nove. 2018, 18–19). O na vakayagataka vakacava na veivosa oqo mo vukea kina e dua e lomaleqa se rere?

Raica talega na “Sa Voleka na Kalou,” Sere ni Lotu, naba 49.

• Ni o vukei ira oti na luvemu mera kila na cava na cakamana, sureti ira mera vola na levu ga ni ivakaraitaki ni cakamana era rawata. Na iyaloyalo eso ena iVola ni iYaloyalo Vakosipeli se Lako Mai, Mo Muri Au ena rawa ni veivuke. Sa na qai rawa ni ra vakasaqara na cakamana ena 2 Tui 4:1–7, 14–17, 32–35, 38–44. Na cava era vakavulica vei keda na cakamana eso oqo me baleti Tamada Vakalomalagi?

• O iko kei ira na luvemu e rawa ni veivosakitaka na sala sa vakaraitaka kina na Kalou na Nona loloma ena cakamana. E rawa talega ni o ni lagata vata e dua na sere me vaka na “God’s Gracious Love” (Valenivola Ni Kosipeli).

• Vukei ira na luvemu mera vulica na italanoa ena 2 Tui 5:1–3, 9–14. Tovolea mo vakayagataka na “Vakabulai Neamani o Ilaisa” (ena iTalanoa eso mai na Veiyalayalati Makawa, 134–37) se iyaloyalo kei Neamani ena ituvatuva ni macawa oqo. Na cava a sega ni vinakata kina o Neamani me sili ena Uciwai na Joritani, e dina ga ni a tukuna vua o Ilaisa ni oqo ena vakabulai koya. A vakalougatataki vakacava o Neamani ni muria na ivakasala nei Ilaisa? E rawa ni o ni wasea vakai kemuni na veika o ni sa sotava ena gauna o ni talairawarawa kina vua na Turaga, ena gauna mada ga o ni sega ni vakadeitaka kina ni o ni a vinakata.

  

  1:52

• E rawa talega ni o vakabibitaka na 2 Tui 5:13, ka ra vukei koya kina na dauveiqaravi nei Neamani me vakatulewataka me talairawarawa vua na parofita o Ilaisa. Mera qai tukuna na luvemu na sala eso e rawa ni ra vukei ira kina na nodra itokani se lewe ni matavuvale mera vakarorogo ka talairawarawa vua na parofita.

• O iko kei ira na luvemu e rawa ni raitayaloyalotaka ni ra vakavolivoliti kemuni tu e dua na mataivalu ena iseleiwau, ose, kei na qiqi ni ivalu. Na cava beka o na vakila? Na cava beka o na cakava? Mera qai bobo na matadra na luvemu ni o wilika na 2 Tui 6:16–17 vei ira. (Raica talega na “O Ilaisa kei na Mataivalu ni Turaga,” ena iTalanoa eso mai na Veiyalayalati Makawa, 138–39, se na iyaloyalo ena mua ni ituvatuva oqo.) Ni o sa yacova na vosa “vakayadrata … na matana” (tikina e 17), kerei ira sara na gone mera dolava na matadra. Veivosakitaka na ka a raica na dauveiqaravi. Wasea vei ira na luvemu na sala o vakila ni a tiko vata kei iko na Turaga ena gauna ni nomu bolebole, ena gauna mada ga e vaka me o a tiko duadua kina.

  

  1:9