Te Mau Tāvana 2–4 ; 6–8 ; 13–16

E nehenehe te buka a Te Mau Tāvana e riro ’ei fa’aarara’a ’e ’ei fa’aitoitora’a. ’A ’imi mai i teie fa’aarara’a ’e teie fa’aitoitora’a ma te tai’o Te Mau Tāvana 2:1–19 ; 3:5–12. Nāhea i tō ’outou mana’o e tano ai teie fa’aarara’a ’e teie fa’aitoitora’a nō ’outou ?

’Ei hi’ora’a, mai te mea tē parau ra Te Mau Tāvana 2:19 nō ’outou ’e tō ’outou mau fa’ahemara’a, ’eiaha rā i tō te mau ’āti ’Īserā’ela i tahito ra, e aha ïa tā te reira e parau mai ? Mai te peu tē parau ra Te Mau Tāvana 3:9, nō te mea tā te Fatu i rave nō te fa’aora ia ’outou, e aha ïa tāna e parau mai ?

’A feruri i te tai’o i te uira’a ’e e pāhono i te ’api 9 o te Nō te Pūai o te Feiā ’Āpī : E arata’i nō te rave i te mau mā’itira’a. I tō ’outou mana’o, nāhea te reira e tano ai i te ’ohipa i tupu nō te mau ’āti ’Īserā’ela i roto te buka a Te Mau Tāvana ? E aha tā te reira e ha’api’i nei ia ’outou nō ni’a ia Iesu Mesia ?

I te tahi taime e nehenehe te fa’aro’o o te hō’ē ta’ata e fa’auru i te fa’aro’o o te tahi atu mau ta’ata. I roto Te Mau Tāvana 4, taua ta’ata ra ’o Debora ïa. ’A tai’o nō ni’a iāna i roto Te Mau Tāvana 4:1–15, ’e ’a hi’o nā i te fa’aurura’a tāna i fa’ari’i i ni’a i te ta’ata ’ati a’e iāna. Teie te tahi mau uira’a nō te tauturu ia ’outou ’ia feruri, e mea nāhea tōna ’itera’a e tano ai i tō ’outou orara’a :

• Nāhea ’outou i te fa’ata’a i te huru orara’a o te mau ’āti ’Īserā’ela i taua taime ra ? (hi’o ’īrava 1–3). E aha te mau tū’atira’a tā ’outou e ’ite nei i teie mahana—i roto i te ta’ata iho ’e i te tōtaiete ?

• E aha te mau parau ’aore rā te mau ’ohipa a Debora e fa’a’ite nei ia ’outou, tē vai ra tōna fa’aro’o i te Fatu ? Nāhea tōna fa’aro’o i te fa’aurura’a ia vetahi ’ē ? E aha tā ’outou e fa’ahiahia nei nō ni’a iāna ?

• I tō ’outou mana’o e aha tā Debora e hina’aro e parau nā roto i tāna uira’a i te ’īrava 14: « E ’ere ’ua reva na Iehova nā mua ia ’oe na ? » Nāhea te Fatu ’ia « reva nā mua » ia ’outou ? (hi’o Te Ha’api’ira’a Tumu ’e te mau Fafaura’a 84:87–88).

’A feruri nā nāhea tō ’outou fa’aro’o ia Iesu Mesia e nehenehe ai e ha’amaita’i ia vetahi ’ē, mai te fa’aro’o o Debora i ha’amaita’i ia Baraka ’e te tahi mau ’āti ’Īserā’ela. Nō te tauturu ia ’outou ’ia feruri i te reira, e nehenehe ’outou e ’imi māite i te a’ora’a a Elder Neil L. Andersen « Tē paraparau nei tātou nō te Mesia » (Liahona, Novema 2020, 88–91). ’A ’imi mai i roto i te a’ora’a (1) te mau tumu nō te parau rahi atu ā nō te Fa’aora ’e (2) te mau rāve’a nō te rave i te reira.

I muri iho e nehenehe ’outou e hāmani i te hō’ē tāpura nō te mau mea tā ’outou i ’ite nō ni’a ia Iesu Mesia—nā roto mai i te mau pāpa’ira’a mo’a, te mau parau a te mau peropheta ora ’e tō ’outou iho ’itera’a. ’O vai tei hina’aro e ’ite i te reira ? Nāhea ’outou ’ia fa’a’ite atu i te reira ?

Hi’o ato’a Mataio 5:14–16 ; 1 Petero 3:15 ; « Tē ’ite nei mātou i tō here », Te mau Hīmene, N°177.

’A tai’o ai ’outou Te Mau Tāvana 6–8, ’a tāpa’o i te mau tupura’a ’a ani ai te Fatu ia Gideona ’ia ti’aturi i te hō’ē mea, e au ra e’ita e tupu mau. ’Ua ani a’ena ānei ’oia ia ’outou i te hō’ē mea mai te reira te huru ?

I tō ’outou mana’o, e aha tā te Fatu e tāmata nei i te ha’api’i ia ’outou nā roto i teie parau pāpa’i ? Nāhea ’outou i te ’itera’a, ’ua fa’atupu te Fatu i tāna ’ohipa, ma te rāve’a e au ra e’ita e tupu mau ?

’Ua ’ere Samasona i tōna pūai pae tino ’e tōna pūai pae vārua, nō te mea ’ua ’ōfati ’oia i tāna mau fafaura’a ’e te Atua, nā reira ato’a terā tei fa’ata’a-ta’a-’ē-hia nō te mau Nazira (nō te ha’amāramaramara’a nō ni’a i te mau Nazira, hi’o Nūmera 6:1–6 ; Te Mau Tāvana 13:7). ’A tai’o ai ’outou nō Samasona i roto Te Mau Tāvana 13–16, ’a pāpa’i i te mau ’īrava e fa’a’ite ra tei pīha’i iho te Fatu ia Samasona, ’oia ato’a te mau ’īrava e fa’a’ite ra ē ’aita Samasona i fafau hope roa iāna i te Fatu.

E nehenehe ato’a ’outou e feruri i te mau fafaura’a tā ’outou i rave ’e te Fatu. Nāhea teie mau fafaura’a i te hōpoira’a mai i tōna mana i roto i tō ’outou orara’a ? E aha tā ’outou i ’apo mai nā roto mai i te ’itera’a o Samasona ’o tē fa’auru nei ia ’outou, ’ia vai ha’apa’o noa i tā ’outou mau fafaura’a ’e te Atua ?

’Ua ha’api’i te tuahine Ann M. Dibb : « E pūai rahi tō Samasona i tōna fānaura’ahia. ’Ua fafauhia i tōna metua vahine, ‘nāna e ha’amata i te fa’aora ia ’Īsera’ela i te rima o te Philiseti’ [Te Mau Tāvana 13:5]. ’Āre’a rā, i tō Samasona pa’arira’a, ’ua hi’o rahi ’oia i te mau fa’ahemara’a o teie nei ao ’eiaha rā i te arata’ira’a a te Atua. ’Ua rave ’oia i te mau mā’itira’a nō te mea ‘’ua au roa te reira [iāna]’[Te Mau Tāvana 14:3], ’eiaha rā nō te mea e mea parauti’a te reira mau mā’itira’a. Pinepine roa, te mau pāpa’ira’a mo’a i te fa’a’ohipa i te parau ‘haere atu ra ’oia i raro’ [Te Mau Tāvana 14:7] ’a fa’ati’a ai te reira i te mau tere, te mau ’ohipa ’e te mau mā’itira’a a Samasona. ’Āhani i te ti’ara’a mai ’e ’ia ’ana’ana mai nō te fa’atupu i tōna fāito pūai rahi, ’ua pau Samasona ’e tō te ao nei, ’ua ’ere i tōna mana i hōro’ahia mai e te Atua, ’e ’ua pohe i te hō’ē pohe ri’ari’a i tōna noa ’āpīra’a » (« ’A ti’a mai na i ni’a ’e ’a ’ana’ana mai na », Liahona, Mē 2012, 118).

Hi’o Dallin H. Oaks, « Te mau fafaura’a ’e te mau hōpoi’a », Liahona, Mē 2024, 93–96 ; Ulisses Soares, « Ti’aturira’a i te fafaura’a nā roto ia Iesu Mesia », Liahona, Mē 2024, 17–21.

• Tē fa’ata’a nei Te Mau Tāvana 3 i te hō’ē hōho’a e ha’api’i nei nō ni’a i te mana o te Fa’aora nō te fa’aora ia tātou i te hara. Nō te tauturu i tā ’outou mau tamari’i ’ia ’ite mai teie hōho’a, e nehenehe ’outou e pāpa’i i teie mau pereota : « ’ua rave i te ’ino », « ’ua ti’aoro i te Fatu », ’e « ’ua fa’atupu mai i te hō’ē fa’aora ». I muri iho e nehenehe tā ’outou mau tamari’i e ’imi mai teie mau pereota i roto Te Mau Tāvana 3:7–9 ’e Te Mau Tāvana 3:12–15. E aha tā tātou e ha’api’i mai nei nō ni’a i te Fatu nā roto mai i teie hōho’a ?

• Nō te ha’apāpū ē ’o Iesu Mesia tō tātou Fa’aora, e nehenehe ’outou e ha’aputu mai e rave rahi hōho’a nō te mau ta’ata, ’a tu’u ato’a atu te hōho’a o Iesu Mesia, ’e ’a huri te reira ma te hōho’a i raro. ’A vaiiho i tā ’outou mau tamari’i ’ia fa’ahuri i te mau hōho’a te tahi i muri mai i te tahi. ’Ia ’ite-ana’e-hia mai ia rātou te hōho’a o Iesu, ’a hīmene i te hō’ē hīmene nōna, mai « ’Ua tono mai i tāna Tamaiti » (Mau hīmene nā te mau tamari’i, 20–21), ’e ’a fa’ati’a i tā ’outou mau tamari’i mea nāhea ’oia i te fa’aorara’a ia ’outou.

• E nehenehe ’outou e fa’a’ohipa « Debora te peropheta vahine » i roto Te mau ’ā’amu o te Faufa’a Tahito, 92–95, nō te fa’ati’a i tā ’outou mau tamari’i te ’ā’amu i roto Te Mau Tāvana 4. ’A fa’a’ite i te tahi ’e te tahi i te mea tā ’outou e fa’ahiahia nei nō ni’a ia Debora. Nāhea tōna fa’aro’o i te Fatu i te ha’amaita’ira’a i te mau ta’ata ’ati a’e iāna ? E aha tā tātou e nehenehe e rave nō te tauturu ia vetahi ’ē ’ia rahi atu ā te fa’aro’o ia Iesu Mesia ?

  

  2:9

• ’A fa’a’ohipa Te Mau Tāvana 7:4–7, te ’api ’ohipara’a nō teie hepetoma, ’aore rā « Te nu’u a Gideona » i roto Te mau ’ā’amu o te Faufa’a Tahito, 96–99, nō te ha’api’i i tā ’outou mau tamari’i e mea nāhea te Fatu i te fa’a’itira’a mai i te nu’u o ’Īserā’ela. Nō te aha te Fatu i hina’aro ai ’ia iti roa mai te nu’u a Gideona ? (hi’o Te Mau Tāvana 7:2).

  

  2:37

• E nehenehe tā ’outou mau tamari’i e pāpa’i hōho’a hō’ē ’o’e, hō’ē pāruru ’ōuma, hō’ē pū, hō’ē lamepa ’e hō’ē fāri’i ’araea ’e ’a parau nō ni’a i teie mau tao’a tā rātou e hina’aro i roto i te hō’ē ’arora’a. I muri iho, ’ia tai’o rātou Te Mau Tāvana 7:16 nō te ’apo mai e aha tā te Fatu i parau i te nu’u o Gideona ’ia fa’a’ohipa. ’A tai’o ai ’outou nō ni’a i te ’arora’a i roto Te Mau Tāvana 7:19–21, ’ia fa’a’ite mai te tahi ’e te tahi e aha tā ’outou i ha’api’i mai nō ni’a i te Fatu nō roto mai i teie ’ā’amu.

• ’Ua hōro’a te mau fafaura’a a Samasona ’e te Fatu i te pūai pae tino ia Samasona, mai tā tātou ato’a mau fafaura’a e hōro’a mai ia tātou te pūai pae vārua. E au paha tā ’outou mau tamari’i ’ia fa’a’eta’eta i tō rātou tino ’e ’ia ’āparau e mea nāhea teie mau fa’a’eta’etara’a e tauturu ai i te ha’apūai i tō tātou tino. Nāhea te ha’apa’ora’a i tā tātou mau fafaura’a i te ha’apūai i tō tātou vārua ? (hi’o Mosia 18:8–10 ; Te Ha’api’ira’a Tumu ’e te mau Fafaura’a 20:77, 79).