Iosua 1–8 ; 23–24

’A feruri na e aha tā Iosua i putapū mai te peu e pi’ihia ’oia e mono ia Mose. ’A hi’o na e aha tā te Fatu i parau i roto te Iosua 1:1–9 nō te fa’aitoito iāna. ’A feruri i te mau tāmatara’a fifi ’o tā ’outou e fa’aruru nei ; e aha te mea i roto i teie mau ’īrava e hōro’a ia ’outou i te itoito ?

Te i’oa Iosua (Yehoshua ’aore rā Yeshua i roto te reo Hebera) te aura’a « Iehova e fa’aora nei ». ’E nō roto mai te i’oa Iesu i te i’oa Yeshua. Nō reira ’a tai’o ai ’outou nō ni’a ia Iosua, ’a feruri i tōna ti’ara’a i roto i te arata’ira’a i te mau tamari’i o ’Īserā’ela nā roto i te ’ānāvai Ioridana ’e i roto i te fenua i parauhia. Nāhea tāna misiōni e tū’ati ai i te ’ohipa tā te Mesia i rave nō tātou ?

’A fa’aitoito ai ’oia ia Iosua, ’ua hōro’a te Fatu i te a’o i roto te Iosua 1:8 nō ni’a i te mau pāpa’ira’a mo’a, aore rā « te buka ture ». Ma te ferurira’a i te teimaha o te hōpoi’a a Iosua, nō te aha teie mau parau a’o e riro ai ’ei tauturu ta’a ’ē mau ?

’Ia ani ana’e mai te Fatu ia tātou ’ia tai’o i te mau pāpa’ira’a mo’a, pinepine ’oia i te fa’a’ohipa i te mau ta’o tei hau atu i te tai’o-noa-ra’a. E fafau ato’a mai ’oia i te ha’amaita’ira’a rarahi. E nehenehe te tāpura i raro nei e tauturu ia ’outou ’ia ’ite i teie mau anira’a ’e mau ha’amaita’ira’a i fafauhia :

Mea nāhea tō te Fatu fa’atupura’a i teie mau fafaura’a i roto i tō ’outou orara’a ? ’O teie paha te taime maita’i nō te hi’opo’a i tā ’outou peu nō te tai’o i te pāpa’ira’a mo’a. E aha te mea i tere maita’i ? E aha te mea e fa’auru nei ia ’outou ’ia rave nō te fa’ari’i i te mau ’itera’a faufa’a rahi atu ā ma te parau a te Atua ?

Hi’o ato’a « Ia tai’o vau i te parau mo’a », Te mau Hīmene; N°169.

’Ua hi’o te mau keresetiano o te Faufa’a ’Āpī ia Rahaba ’ei hi’ora’a nō te mana o te fa’aro’o ’e o te mau ’ohipa (hi’o Hebera 11:31 ; Iakobo 2:25). ’A tai’o ai ’outou te Iosua 2, ’a feruri i te ti’ara’a o te fa’aro’o ’e te mau ’ohipa a Rahaba i roto i te fa’aorara’a iāna, tō tōna ’utuāfare ’e te mau i nā mata huna o ’Īserā’ela. E aha tā te reira e ha’api’i nei ia ’outou nō ni’a i tō ’outou fa’aro’o i te Mesia ’e tā ’outou mau ’ohipa, e nehenehe e fa’auru ia ’outou iho ’e ia vetahi ’ē ?

’Ua fa’atupu te Fatu i te mau mea ’ūmere i rotopū i tōna mau ta’ata, ’a arata’i ai ’oia ia rātou i te fenua i parauhia, ’e e nehenehe ’oia e nā reira ato’a nō ’outou. Teie te tahi mau uira’a nō te arata’i i tā ’outou ’imira’a māite te Iosua 3–4 :

• Nō te aha i tō ’outou mana’o e ti’a i te mau ’āti ’Īserā’ela ’ia ha’amo’a ia rātou iho, hou ’a haere ai nā roto i te ’ānāvai Ioridana ? (hi’o Iosua 3:5).

• ’A hi’o ē, ’aita te ’ānavai i fa’ata’a-’ē-hia i muri a’e noa « te ’āvae o te feiā tahua… e rari a’era… i te hiti pape » (Iosua 3:13, 15). Nō te aha e mea faufa’a te reira ?

• E rave rahi atu ā mau ’ohipa ta’a ’ē i tupu i te ’ānāvai Ioridana—hi’o 2 Te mau Ari’i 2:6–15 ; 5:1–14 ; ’e Mareko 1:9–11. E aha te mau tū’atira’a tā ’outou e ’ite nei i rotopū i teie mau ’ohipa i tupu ?

• Mea nāhea te Fatu i te fa’atupura’a i te « mea ta’a ’ē [māere] » i roto i tō ’outou orara’a ? (Iosua 3:5). Nāhea ’outou e nehenehe ai e tāmatamata—’aore rā e ’ite—pinepine i teie mau mea māere ? (’ei hi’ora’a, hi’o Iosua 3:17).

Tē fa’ata’a nei te Iosua 6–8 i te mau tama’i i ni’a i te mau fenua nō Ieriko ’e nō Ai. ’A tai’o ai ’outou i teie mau pene, ’a feruri nāhea ’outou i te ’aro atu i te fa’ahemara’a (’ei hi’ora’a, hi’o Iosua 7:10–13). E aha tā ’outou i ’apo mai e nāhea te Atua e nehenehe ai e tauturu ia ’outou, ’e e aha te tītauhia ia ’outou e rave nō te fa’ari’i i tōna mana ? ’Ei hi’ora’a, e aha te mea tā ’outou e fa’ahiahia nei i roto i te mau arata’ira’a a te Fatu nō te haru ia Ieriko ? (hi’o Iosua 6:1–5). Penei a’e e fa’aitoito te parau pāpa’i i roto te Iosua 7 ia ’outou ’ia fa’ata’a, tē vai ra ānei te « mea anatemahia » i roto i tō ’outou orara’a e ti’a ia ’outou ’ia fa’a’ore atu (Iosua 7:13).

Te mau ha’api’ira’a hope’a a Iosua i tō ’Īserā’ela i roto te Iosua 23–24, tei roto te mau fa’aarara’a faufa’a rahi, te mau parau a’o ’e te mau ha’amaita’ira’a i fafauhia mai. Penei a’e e nehenehe ’outou e hāmani i te hō’ē tāpura nō te mea tā ’outou i ’ite mai. ’A feruri i te mau mea ato’a tei fa’aruruhia e te mau ’āti ’Īserā’ela, i tō ’outou mana’o nō te aha Iosua i mā’iti ai e parau ia rātou i teie mau mea i te pae hope’a o tōna orara’a ? E aha te mea tā ’outou i ’ite mai e fa’auru nei ia ’outou ’ia « ’ati atu ia Iehova » ? (Iosua 23:8).

Hi’o ato’a Dale G. Renlund, « E mā’iti na ’outou i teie nei mahana », Liahona, Novema 2018, 104–6.

• Teie te hō’ē rāve’a nō te tauturu i tā ’outou mau tamari’i ’ia « fa’a’eta’eta ’e ’ia itoito roa » (Iosua 1:6) nā roto ia Iesu Mesia. E ani ia rātou ’ia ’ite mai i te hō’ē pereota tei fa’ahiti-fa’ahou-hia i roto te Iosua 1:6, 9, ’e te 18, ’e ’ia pāpa’i i te reira ’aore rā ’ia tāmau ’ā’au i te reira. ’A tauturu i tā ’outou mau tamari’i ’ia feruri i te mau tupura’a ’ohipa i reira rātou e hina’aro ai i teie parau poro’i, mai ia Iosua. E nehenehe ato’a ’outou e hi’o ’āmui fa’ahou i te tahi mau ’ā’amu i roto te Iosua 1–4 ; 6 (hi’o ato’a « Iosua te peropheta » ’e « Rahaba ’e te mau mata huna » i roto Te mau ’ā’amu o te Faufa’a Tahito, 85–91). Nāhea te mau ta’ata i roto i teie mau ’ā’amu i te fa’a’itera’a i te itoito ’e te pūai i roto i te Fatu ?

  

  2:59

  

  1:39

• E nehenehe te tai’ora’a te Iosua 1:8 e fa’auru i tā ’outou mau tamari’i ’ia tai’o nō rātou iho i te mau pāpa’ira’a mo’a. Tauturu ia rātou ’ia ’ite mai i te mau ta’o i roto i teie ’īrava ’o tē ha’api’i ia rātou nāhea ’e nō te aha tātou e tai’o ai i te mau pāpa’ira’a mo’a. E nehenehe ato’a rātou e ’imi i te hō’ē ā ’ohipa mai te reira i roto te 1 Nephi 15:23–24 ; 2 Nephi 31:20 ; 32:3 ; Iakoba 4:6 ; Helamana 3:29–30. E nehenehe ato’a ’outou e tauturu ia rātou ’ia fa’aineine ’e ’ia fa’a’ohipa i te hō’ē fa’anahora’a nō te tai’o i te pāpa’ira’a mo’a.

• E nehenehe ’outou e fa’a’ohipa i te ’ā’amu o te ’āti ’Īserā’ela tei nā roto atu i te ’ānāvai Ioridana ’ei tāpa’o nō te bāpetizora’a—i te fa’aru’era’a i tō tātou orara’a tahito i roto i te mēdēbara ’e te ha’amatara’a i te hō’ē orara’a ’āpī i roto i te hō’ē aura’a o te fafaura’a ’e te Atua. Nō reira, ’a tai’o ’āmui ai ’outou te Iosua 3–4 (’aore rā « Iosua te peropheta » i roto Te mau ’ā’amu o te Faufa’a Tahito, 85–89), e nehenehe ato’a ’outou e hi’o i te hō’ē hōho’a nō Iesu e bāpetizohia ra ’e ’a fa’ata’a atu ē, ’ua bāpetizohia Iesu i roto i taua ā ’ānāvai ra ’o tā te mau ’āti ’Īserā’ela i haere nā roto. I muri iho e nehenehe ’outou e hīmene i te hō’ē hīmene mai te « Bāpetizo » (Buka Hīmene nā te mau Tamari’i, 100–101). ’A fa’a’ite i te tahi ’e te tahi nāhea te bāpetizora’a e riro ai mai te ha’amatara’a i te hō’ē orara’a ’āpī i roto i te bāsileia o Iesu Mesia.

  

  2:59

• E aha tā ’outou e nehenehe e rave nō te tauturu i tā ’outou mau tamari’i ’ia ha’api’i mai i te mā’iti ’ia pe’e ia Iesu Mesia, mai tā Iosua i ani i te mau ’āti ’Īserā’ela ’ia nā reira ? E nehenehe ’outou e ani ia rātou ’ia :

  • Tāmau ’ā’au i te hō’ē pereota poto i roto te Iosua 24:15. E tāmata i te fa’ariro i te reira e mea ’ārearea nō tā ’outou mau tamari’i. Te rahira’a ta’o ’o tā rātou e nehenehe e tāmau ’ā’au, tei te huru ïa ’o tō rātou fāito matahiti.

  • ’A ’ite mai i te mau ’ā’amu nō te mau ta’ata tei mā’iti i te tāvini ia Iesu Mesia. E nehenehe rātou e hi’o atu i te ve’a Hoa, te Buka hōho’a nō te ’evanelia, ’aore rā Te mau ’ā’amu o te Faufa’a Tahito ’e te tahi atu mau buka ’ā’amu o te pāpa’ira’a mo’a.

  • Ha’uti ta’ata ora i te mau tupura’a i reira rātou e nehenehe ai e mā’iti i te pe’e ’e i te tāvini i te Fa’aora.