Exodo 35–40 ; Levitiko 1 ; 4 ; 16 ; 19

Tē fa’ata’a nei te Exodo 35–40 i te mau tauto’ora’a a te ’āti ’Īserā’ela nō te hāmani i te sēkene, i reira te mau ’ōro’a mo’a e tauturu ai ia rātou ’ia riro ’ei nūna’a mo’a. ’A tai’o ai ’outou i teie mau pene, ’a ’imi i te mau mea tā te Fatu i ani i tōna mau ta’ata ’ia tu’u i roto i te sēkene. E aha tā teie mau tao’a e fa’ahōho’a nei ? E aha tā te reira e tītau nei ia ’outou nō ni’a i te fa’arahira’a i te mo’ara’a ? ’A feruri ta’a ’ē na, nāhea teie mau tao’a i te fāriu atu i tō ’outou mau mana’o i ni’a i te Fa’aora. E nehenehe te hō’ē tāpura mai teie e tauturu ia ’outou :

’Oia mau, nō te mea noa tē pārahi nei tātou i roto i te mau vāhi mo’a, ’aita e fa’ariro ia tātou e mea mo’a. Tē fa’ata’a nei te Levitiko 19 i te mau ture ’e te mau fa’auera’a ’o tā te Fatu i hōro’a mai, nō te tauturu i te ’āti ’Īserā’ela ’ia fa’arahi i roto te mo’ara’a. E aha tā ’outou i ’ite mai i roto i teie mau fa’auera’a ’o te nehenehe e tauturu ia ’outou, ’ia mā’imi i te ha’amo’ara’a a te Fatu ? E aha tā te mea e putapū nei ia ’outou, e tūra’i nei ia ’outou ’ia rave nō te ora hope roa i teie mau parau tumu ?

Hi’o ato’a Henry B. Eyring, « Te mo’ara’a ’e te fa’anahora’a nō te ’oa’oa », Liahona, Novema 2019, 100–103 ; « The Tabernacle [Te sēkene] » (vidéo), Vaira’a buka ’evanelia.

7:19

I te matahiti i muri mai i te fa’aru’era’a ia ’Aiphiti, te aura’a i roto i te tamari’i o ’Īserā’ela ’e ’o Iehova e nehenehe e fa’ata’ahia e mea pāpū ’ore. ’E teie rā, ’ia tai’o ’outou te Exodo 35:4–35 ’e te 36:1–7, ’a hi’o maita’i e mea nāhea te mau ’āti ’Īserā’ela pāhonora’a i te fa’auera’a ’ia hāmani i te sēkene. E aha tā ’outou i ’apo mai roto mai i te mau ’āti ’Īserā’ela ’o tē nehenehe e tauturu ia ’outou ’ia tāvini maita’i a’e i te Fatu ?

E’ita paha ’oia e ani ia ’outou i te mau mētaro tāo’a rahi, i te nīnira, ’aore rā i te rā’au nō te hō’ē sēkene. E aha tā te Fatu i hōro’a ia ’outou, ’e e aha tāna i ani mai ia ’outou ’ia pūpū atu ? E aha te taime « i tae [ai tō ’outou] ’ā’au nō te ’ohipara’a » ?

’A hi’o ato’a Topics and Questions [Tumu parau ’e uira’a], « Sacrifice », Vaira’a buka ’evanelia.

Tē fa’ahiti nei te Exodo 40:12–14 te mau ’ōro’a tahito ’o te fa’atere-ato’a-hia nei i tō tātou nei tau i roto i te fare o te Fatu. Teie te tahi atu mau ’īrava ’o te nehenehe e tauturu ia ’outou ’ia māramarama, e mea nāhea teie mau ’ōro’a i te fa’a’ite pāpū nō Iesu Mesia :

• Horoira’a : Salamo 51:2 ; Ezekiela 36:25–27

• Te mau ’ahu o te mau ’ahu mo’a : Isaia 61:10 ; Mataio 22:11–14 ; ’Āpokalupo 19:7–8

• Fa’atāhinura’a : Luka 4:18–19 ; Te ’Ohipa 10:38

E nehenehe te tuha’a rahi o te buka a Levitiko i te riro ’ei mea huru ’ē nō tātou—te mau tūsia ’ānimara, te mau ’ōro’a tei roto te toto ’e te pape ’e te mau ture e fa’atere nei i te mau tuha’a ri’i o te orara’a. Terā rā teie mau ’ōro’a ’e teie mau ture nō te ha’api’i ïa i te mau parau tumu ’o tei mātauhia—te tātarahapa, te mo’ara’a ’e te tāra’ehara a te Fa’aora. Nō te ’ite mai i teie mau parau tumu ’a tai’o ai ’outou te Levitiko 1:1–9 ; 4 ; 16, ’a feruri i te mau uira’a mai teie :

• E aha te mau ta’o ’aore rā te mau pereota tā’u i ’ite mai e fa’aha’amana’o iā’u ia Iesu Mesia ’e i tāna tūsia tāra’ehara ?

• E aha tā teie mau tūsia i ha’api’i mai iā’u nō ni’a i te tūsia a te Fa’aora ?

• Nāhea vau e riro ai mai te mau ta’ata tei rave i teie mau tūsia ?

’Aita te Fatu e tītau fa’ahou nei i te mau tūsia ’ānimara. Tē vai noa nei rā te tūsia ’ei parau tumu faufa’a rahi nō te ’evanelia. Nō te ’apo mai nō ni’a i te mau huru tūsia tā te Fatu e tītau nei, ’a ’imi māite te 3 Nephi 9:19–20 ; Te Ha’api’ira’a Tumu ’e te mau Fafaura’a 64:34. Nāhea ’outou ’ia pūpū atu i teie mau huru tūsia ? E aha tā Mose 5:7 e ha’api’i nei ia ’outou, e nāhea ’outou ’ia fa’ariro i tā ’outou mau tūsia ?

Hi’o ato’a « Mau mana’o e tāpe’a noa i roto i te ferurira’a : Te sēkene ’e te tūsia ».

• I te pae hope’a o teie arata’i ha’api’ira’a, tē vai ra hō’ē hōho’a nō te sēkene a te mau ’āti ’Īserā’ela i roto te mēdebara. E nehenehe ’outou e hi’o i te reira ’e tā ’outou mau tamari’i, ’e e ani ia rātou e aha te mau mātēria e hina’arohia nō te hāmani i te sēkene. I muri iho e tai’o ’āmui ’outou te Exodo 35:20–29, nō te ’ite mai nāhea teie mau mātēria i te hōro’ara’ahia mai. Nāhea te Fatu i te anira’a mai ia tātou ’ia tauturu i te patura’a i tōna bāsileia ?

• ’A feruri i te tai’o ’e rātou te Exodo 36:1 nō te ’ite mai, e aha tā te Fatu i hōro’a ia Bezaleela ’e ia Aholiaba nō te tauturu i te hāmanira’a i te sēkene. I muri iho e nehenehe ’outou e paraparau ’e tā ’outou mau tamari’i, i te mea tā ’outou e mana’o nei ’ua hōro’a mai te Fatu ia rātou nō te tauturu i te patu i tōna bāsileia. Nāhea tātou ’ia fa’a’ohipa i teie mau mea nō te ha’amaita’i ia vetahi ’ē ?

• Tē tāpura nei te Exodo 40:17–34 i te mau tāo’a tei riro ’ei tuha’a nō te sēkene a te ’āti ’Īserā’ela. Penei a’e e nehenehe ’outou ’e tā ’outou mau tamari’i e ’ite mai i te reira i roto i teie mau ’īrava, ’e i roto i te hōho’a o te sēkene i te pae hope’a o teie arata’i ha’api’ira’a. ’A tāu’aparau e nāhea te tuha’a tāta’itahi o te sēkene i te ha’api’i ia tātou nō ni’a i te Fa’aora ’aore rā, te Metua i te ao ra. ’Ei hi’ora’a, te ’āfata o te ’itera’a pāpū e fa’aha’amana’o mai ia tātou i te mau fa’auera’a a te Atua, te fata e fa’aha’amana’o mai ia tātou i te tūsia a Iesu Mesia, ’e tē vai atu ra.

• E aha te mau vāhi mo’a tā tātou e vai nei i teie mahana, ’o tē tauturu ia tātou ’ia ’ite ’ua fātata roa atu tātou ia Iesu Mesia ? ’Ei tuha’a nō teie ’āparaura’a, e nehenehe ’outou e māta’ita’i ’āmui i te vidéo « Temples [Te mau hiero] » (Vaira’a buka ’evanelia). E nehenehe ato’a ’outou e hīmene i te hō’ē hīmene mai te « Holy Places [Mau vāhi mo’a] » (Vaira’a buka ’evanelia). ’A fa’a’ite i te tahi ’e te tahi i tō ’outou mana’o nō ni’a i te mau vāhi mo’a mai te hiero.

5:41

• Te mau tūsia ’ānimara i fa’a’itehia i roto i te Faufa’a Tahito, ’ua fa’ata’ahia nō te ha’api’i i te mau tamari’i o ’Īserā’ela nō ni’a i te fa’a’orera’a hara nā roto ia Iesu Mesia. ’A feruri e nāhea te tai’ora’a nō ni’a i teie mau tūsia i te riro ’ei hō’ē ā tupura’a nō tā ’outou mau tamari’i. E nehenehe ’outou e fa’a’ite i te mau hōho’a nō Iesu Mesia i Getesemane ’e i ni’a i te sātauro (hi’o Buka hōho’a ’evanelia, N°56, 57) ’a tai’o ai ’outou ’e te mau tamari’i te Levitiko 1:1–4. ’A tauturu ia rātou ’ia ’ite mai i te mau ta’o ’aore rā te mau pereota ’o tē fa’aha’amana’o ia rātou i te tūsia a Iesu Mesia.

• E nehenehe ato’a ’outou e tai’o ’āmui te 3 Nephi 9:19–20 nō te ’ite i te mea tei fa’auehia ia tātou ’ia tūsia ’ei mono i te mau ’ānimara. E aha te aura’a e pūpū i te ’ā’au ’oto ’e te vārua tātarahapa i te Fatu ? Hi’o Arata’i nō te mau pāpa’ira’a mo’a, « ’ā’au ’oto » (Vaira’a buka ’evanelia) nō te tauturu i te pāhono i teie uira’a.