Faamasino 2–4; 6–8; 13–16

O le tusi o Faamasino e mafai ona avea o se lapataiga ma se faamalosiauga. Vaavaai mo lenei lapataiga ma le faamalosiauga a o e faitauina le Faamasino 2:1–19; 3:5–12. O le a sou lagona i le faatatau o le lapataiga ma le faamalosiauga ia te oe?

Mo se faataitaiga, afai sa faatatau le Faamasino 2:19 ia te oe ma ou faaosoosoga nai lo tagata Isaraelu anamua, o le a se mea e ono fai mai ai? Afai o le Faamasino 3:9 e faatatau i mea na faia e le Alii e laveai ai oe, faamata o le a se mea e ono fai mai ai?

Mafaufau e faitau le fesili ma le tali o loo i le itulau e 9 o le Mo Le Malosi o le Autalavou: O Se Taiala mo le Faia o Filifiliga. O le a sou lagona e faatatau i lenei mea i le aafiaga o tagata Isaraelu i le tusi o Faamasino? O le a se mea o aoao mai ai ia te oe e uiga ia Iesu Keriso?

O nisi taimi o le faatuatua o se tagata e toatasi e mafai ona musuia ai le faatuatua i le toatele o isi. I le Faamasino 4, o lena tagata e toatasi o Tepora. Faitau e uiga ia te ia i le Faamasino 4:1–15, ma maitau le faatosinaga sa ia faia i tagata na siomia o ia. O nisi nei o fesili e fesoasoani ia te oe e mafaufau ai pe faapefea ona faatatau lona aafiaga i lou olaga:

• E faapefea ona e faamatalaina tulaga sa i ai tagata Isaraelu i lena taimi? (tagai i fuaiupu 1–3). O a ni mea e talitutusa ai tulaga o loo e vaaia i aso nei—i tagata taitoatasi ma le lalolagi?

• O a ni upu po o faatinoga a Tepora e faaali atu ai ia te oe sa i ai lona faatuatua i le Alii? Na faapefea e lona faatuatua ona faatosina ai isi? O le a se isi mea e faafiafiaina ai oe e uiga ia te ia?

• O le a sou lagona o le uiga o le fesili a Tepora i le fuaiupu 14: “E lei afio atu ea o Ieova i ou luma?” E faapefea e le Alii ona “afio atu ea i ou luma”? (tagai i le Mataupu Faavae ma Feagaiga 84:87–88).

Mafaufau loloto pe faapefea e lou faatuatua ia Iesu Keriso ona faamanuiaina isi i le ala na faamanuiaina ai e le faatuatua o Tepora ia Parako ma isi tagata Isaraelu. Ina ia fesoasoani ia te oe e mafaufau i lenei mea, e mafai ona e suesue i le savali a Elder Neil L. Andersen “Matou te Tautalatala e uiga ia Keriso” (Liahona, Nov. 2020, 88–91). Suesue le savali mo (1) mafuaaga e talanoa atili ai e uiga i le Faaola ma (2) auala e faia ai.

Ona mafai lea ona e faia se lisi o mea e te iloa e uiga ia Iesu Keriso—mai tusitusiga paia, mai upu a perofeta soifua, ma mai ou lava aafiaga patino. O ai e manaomia ona iloa lenei mea? O le a faapefea ona e faasoa atua?

Tagai foi i le Mataio 5:14–16; 1 Peteru 3:15; “E Latou te Fai Mea Lelei,” Viiga, nu. 134.

A o e faitauina le Faamasino 6–8, tusi ni taimi na talosagaina ai e le Alii ia Kitiona e talitonu i se mea atonu na foliga mai e le o ono i ai. Pe na Ia fesili mai ea i se mea faapena ia te oe?

O le a se mea e te lagona o loo taumafai le Alii e aoao atu ia te oe i lenei tala? O faapefea ona e vaaia le faia e le Alii o Lana galuega i auala atonu e le mafai ona faia?

Sa aveesea le malosi faaletino o Samasoni faapea ma lona malosi faaleagaga ona sa ia solia feagaiga ma le Atua, e aofia ai ma na [feagaiga] sa faatatau faapitoa lava i Naseri (mo faamatalaga e uiga i Naseri, tagai i le Numera 6:1–6; Faamasino 13:7). A o e faitau e uiga ia Samasoni i le Faamasino 13–16, matau fuaiupu o loo faaalia ai sa faatasi le Alii ma Samasoni, faaopoopo i fuaiupu o loo faaalia ai e lei tuuto atoatoa Samasoni i le Alii.

Atonu foi e te mafaufau loloto i feagaiga na e osia ma le Alii. Ua faapefea ona aumaia e nei feagaiga Lona mana i lou olaga? O le a se mea ua e aoaoina mai le tala i aafiaga o Samasoni lea e musuia ai oe ia tumau faamaoni i au feagaiga ma le Atua?

Na aoao mai Sister Ann M. Dibb: “Sa fanau mai Samasoni ma se tulaga gafatia tele. Sa folafola atu i lona tina, ‘O ia e afua mai ona faaola ia Isaraelu ai lima o Filisitia’ [Faamasino 13:5]. Peitai, a o ola a’e Samasoni, sa tele ina vaavaai atu o ia i faaosoosoga a le lalolagi nai lo le taitaiga a le Atua. Sa ia faia filifiliga ona sa “lelei lava ia i [lona] manatu” [Faamasino 14:3] nai lo le faia o na filifiliga ona e sa’o. O loo faatele, ona faaaoga e tusitusiga paia le faaupuga ‘Ona alu ifo lea’ [Faamasino 14:7] a o faamatalaina ai malaga a Samasoni, o taga, ma filifiliga. Nai lo le tulai ma susulu atu e faatino lona gafatia tele, sa faatoilaloina Samasoni e le lalolagi, ua le maua lona mana na tuuina i ai e le Atua, ma sa vave ona maliu i se maliu matautia” (“Tutulai ma Susulu Atu,” Liahona, Me 2012, 118).

Tagai foi i le Dallin H. Oaks, “O Feagaiga ma Tiutetauave,” Liahona, Me 2024, 93–96; Ulisses Soares, “Mautinoa i Feagaiga e ala ia Iesu Keriso,” Liahona, Me 2024, 17–21.

• O loo faamatala mai i leFaamasino 3 se mamanu o loo aoao mai ai e uiga i le mana o le Faaola e laveai ai i tatou mai le agasala. Ina ia fesoasoani i lau fanau e faailoa mai lenei mamanu, e mafai ona e tusia i lalo fuaitau nei: “amio leaga,” “alalaga atu ia Ieova,” ma le “faatuina le faaola.” Ona mafai lea e lau fanau ona vaavaai mo nei fuaitau i le Faamasino 3:7–9 ma le Faamasino 3:12–15. O le a se mea ua tatou aoaoina e uiga i le Alii mai lenei mamanu?

• Ina ia faamamafa atu o Iesu Keriso o lo tatou Faaola, e mafai ona e aoina mai ni ata o tagata, e aofia ai se ata o Iesu, ma faafaō. Tuu atu i lau fanau e auaua’i e faataliaga ia ata. A latou maua le ata o Iesu, usu se pese e uiga ia te Ia, e pei o le “Na Ia Auina Mai Lona Alo” (Tusipese a Tamaiti, 34–35), ma faamatala i lau fanau le auala na Ia laveaiina ai oe.

• E mafai ona e faaaogaina le “Tepora le Perofeta Fafine” i Tala o le Feagaiga Tuai, 92–95, e faamatala ai i lau fanau le tala i le Faamasino 4. Faasoa atu i le tasi ma le isi mea e te fiafia i ai e uiga ia Tepora. Na faapefea ona faamanuiaina e lona faatuatua i le Alii tagata na siomia ai o ia? O le a le mea e mafai ona tatou faia e fesoasoani ai i isi ia faateleina lo tatou faatuatua ia Iesu Keriso?

  

  2:9

• Faaaoga le Faamasino 7:4–7, itulau o gaoioiga o le vaiaso lenei, po o le “O Le Autau a Kitiona” i Tala o le Feagaiga Tuai, 96–99, e aoao ai lau fanau e uiga i le auala na faaitiitia ai e le Alii le autau a Isaraelu. Aisea na finagalo ai le Alii ia toaitiiti le autau a Kitiona? (tagai i le Faamasino 7:2).

  

  2:37

• E mafai e lau fanau ona tusi ni ata o se pelu, talita, pu, moli, ma le sioki ma talanoa po o fea o nei mea faitino latou te mananao i ai i se taua. Ona mafai lea ona latou faitauina le Faamasino 7:16 e aoao ai po o le a le mea na fetalai atu le Alii i le autau a Kitiona e faaaoga. A o e faitau e uiga i le taua i le Faamasino 7:19–21, faasoa atu i le tasi ma le isi mea ua e aoaoina e uiga i le Alii mai lenei tala.

• O feagaiga a Samasoni ma le Alii na tuuina atu ai ia te ia le malosi, e pei lava ona tuuina mai e a tatou feagaiga ia i tatou le malosi. Atonu o le a fiafia lau fanau e fai nisi o gaoioiga faaletino ma talanoaina auala e mafai e na gaoioiga ona fesoasoani ia tatou malolosi ai. E faapefea e le tausia o a tatou feagaiga ona faamalosia ai o tatou agaga? (tagai i le Mosaea 18:8–10; Mataupu Faavae ma Feagaiga 20:77, 79).