Iosua 1–8; 23–24

Vaai faalemafaufau pe na ono faapeī mo Iosua le valaauina e suitulaga ia Mose. Maitau i le fetalaiga a le Alii i le Iosua 1:1–9 e faamalosiau ai o ia. Mafaufau i luitau faigata lua te faafeagai; o le a se mea o i nei fuaiupu e avatua ia te oe le lototele?

O le igoa Iosua (Yehoshua po o Yeshua i le faaEperu) o lona uiga “E faaolaina e Ieova.” Ma o le igoa Iesu e sau mai le Yeshua. A o e faitau e uiga ia Iosua, mafaufau i lana matafaioi i le taitaiina o le fanauga a Isaraelu i le isi itu o le Vaitafe o Ioritana ma agai atu i le nuu folafolaina. Na faapefea ona talitutusa lana misiona ma mea o loo faia e Keriso mo i tatou?

A o Ia faamalosiau atu ia Iosua, na tuuina mai e le Alii fautuaga i le Iosua 1:8 e uiga i tusitusiga paia, po o “le tusi o lenei tulafono.” I le mafaufau ai i le mamafa o le tiutetauave a Iosua, aisea atonu na fesoasoani faapitoa ai lenei fautuaga?

Pe a valaaulia i tatou e le Alii e faitau tusitusiga paia, e masani ona Ia faaaogaina upu e sili atu nai lo le na o le faitauina. Ua Ia folafola mai foi faamanuiaga silisili. O le siata o loo i lalo e mafai ona fesoasoani ia te oe e iloa ai nei valaaulia ma faamanuiaga folafolaina:

Na faapefea ona faataunuu e le Alii Ana folafolaga i lou olaga? Atonu o le taimi lelei lenei e iloilo ai ou mausa o le suesueina o tusitusiga paia. O le a le mea o loo sologa lelei? O le a se mea ua e lagonaina ua musuia e fai ina ia maua ai ni aafiaga e sili atu ona anoa i le afioga a le Atua?

Tagai foi i le “A Ou Su’esu’e i Mau Paia,” Viiga, nu. 174.

O le au Kerisiano anamua sa latou vaai ia Raava o se faataitaiga o le mana o le faatuatua ma galuega (tagai i le Eperu 11:31; Iakopo 2:25). Ao e faitau i le Iosua 2, mafaufau i le matafaioi o le faatuatua ma galuega a Raava i le laveaiina o ia lava, lona aiga, ma tagata Isaraelu matavao. O le a se mea ua aoao atu e lenei mea ia te oe e uiga i le ala e uunaia ai e lou faatuatua ia Keriso ma au galuega ia oe lava ma isi?

Sa faia e le Alii mea ofoofogia i Lona nuu a o Ia taitaiina i latou i le laueleele folafolaina, ma e mafai foi ona Ia faia lea lava mea e tasi mo oe. O nisi nei o fesili e taialaina ai lau suesuega o le Iosua 3–4:

• Aisea e te manatu na manaomia ai e tagata Isaraelu ona faapaia i latou lava ae latou te lei sopoia le Vaitafe o Ioritana? (tagai i le Iosua 3:5).

• Ia matau na faatoa vaeluaina le vaitafe ina ua “tutu i le vai … o alofivae o faitaulaga” (Iosua 3:13, 15). Aisea e taua ai lena mea?

• Mo isi mea taua na tutupu i le Vaitafe o Ioritana—tagai i le 2 Tupu 2:6–15; 5:1–14; ma le Mareko 1:9–11. O a fesootaiga ua e vaaia i le va o nei mea na tutupu?

• Na faapefea ona faia e le Alii ni “vavega” i lou olaga (Iosua 3:5). E mafai faapefea ona e oo i ai—pe iloa—soo na vavega? (mo se faataitaiga, tagai i le Iosua 3:17).

O leIosua 6–8 e nafa ma taua mo laueleele o Ieriko ma Ai. A o e faitau i nei mataupu, mafaufau i ala o loo e tau ai ma faaosoosoga i lou lava olaga (mo se faataitaiga, tagai i le Iosua 7:10–13). O le a se mea ua e aoao ai e uiga i le ala e mafai ona fesoasoani ai le Atua ia te oe ma mea e manaomia ona e faia ia maua ai Lona mana. Mo se faataitaiga, o le a se mea ua faagaeetia ai oe e uiga i faatonuga a le Alii mo le aveina o Ieriko? (tagai i le Iosua 6:1–5). Atonu o le tala i le Iosua 7 o le a musuia ai oe e iloilo pe “ua ia te oe le mea ua faatoina” i lou olaga e tatau ona e aveesea (Iosua 7:13).

O aoaoga mulimuli a Iosua i tagata Isaraelu i le Iosua 23–24 o loo aofia ai lapataiga taua, fautuaga, ma faamanuiaga folafolaina. Atonu e mafai ona e faia se lisi o mea e te maua. A mafaufau i mea uma na oo i ai tagata Isaraelu, aisea ua e manatu na filifili ai Iosua e ta’u atu nei mea ia i latou i le faaiuga o lona olaga? O a ni mea ua e maua e musuia ai oe e “pipii atu ia Ieova”? (Iosua 1:8).

Tagai foi i le Dale G. Renlund “Ina Filifili Ia Outou i le Aso Nei,” Liahona, Nov. 2018, 104–6.

• O se tasi lenei o auala e fesoasoani ai i lau fanau ia “faamalosi ma lototele” (Iosua 1:6) e ala mai ia Iesu Keriso. Valaaulia i latou e su’e se fuaitau o loo toe ta’ua i le Iosua 1:6, 9, ma le 18, ma tusi i lalo pe tauloto. Fesoasoani i lau fanau e mafaufau i tulaga latou te ono manaomia ai lenei savali, pei ona sa faia e Iosua. E mafai foi ona outou toe iloiloina faatasi nisi o tala i le Iosua 1–4; 6 (tagai foi i le “Iosua le Perofeta” ma le “Raava ma Sipai” i Tala o le Feagaiga Tuai, 85–91). Na faapefea ona faaalia e tagata o loo i nei tala le lototele ma le malosi i le Alii?

  

  2:59

  

  1:39

• O le faitauina o le Iosua 1:8 e mafai ona musuia ai lau fanau e faitau na o i latou ia tusitusiga paia. Fesoasoani ia i latou e su’e upu i lenei fuaiupu lea e aoao ai i latou i le auala ma le mafuaaga e tatau ai ona tatou faitauina tusitusiga paia. E mafai ona latou vaavaai mo le mea lava lea e tasi i le 1 Nifae 15:23–24; 2 Nifae 31:20; 32:3; Iakopo 4:6; Helamana 3:29–30. E mafai foi ona e fesoasoani ia i latou e fai ma faataunuu se fuafuaga e faitau ai tusitusiga paia.

• E mafai ona e faaaogaina le tala i tagata Isaraelu o loo sopoia le Vaitafe o Ioritana e fai ma faatusa o le papatisoga—o le lafoaia o lo tatou olaga tuai i le vaomatua ma amata se olaga fou i se sootaga o le feagaiga ma le Atua. A o outou faitau faatasi i le Iosua 3–4 (po o le “Iosua le Perofeta” i Tala o le Feagaiga Tuai, 85–89), e mafai foi ona e vaai i se ata o Iesu o papatisoina ma faamatala atu faapea na papatisoina Iesu i le vaitafe lava lea na sopoia e tagata Isaraelu. Ona mafai lea ona e usuina se pese e pei o le “Papatisoga” (Tusipese a Tamaiti, 54). Faasoa atu i le tasi ma le isi le auala e pei ai le papatisoina o le amataina o se olaga fou i le malo o Iesu Keriso.

  

  2:59

• O le a se mea e mafai ona e faia e fesoasoani ai i lau fanau e aoao e filifili e mulimuli ia Iesu Keriso, e pei ona valaaulia ai e Iosua le fanauga a Isaraelu e fai? E mafai ona e valaaulia i latou e:

  • Tauloto se fuaitau puupuu mai le Iosua 24:15. Taumafai e faia ia maua ai le fiafia mo lau fanau. O le aofai o upu latou te taulotoina e ono faalagolago i o latou matutua.

  • Saili ni tala e uiga i tagata o e na filifili e auauna atu ia Iesu Keriso. E mafai ona latou vaai i le mekasini o le Uo , le Tusi Ata o le Talalelei, po o le Tala o le Feagaiga Tuai ma isi tusi o tala o tusitusiga paia.

  • Faatino tulaga e mafai ai ona latou filifili e mulimuli ma auauna atu i le Faaola.