Teuteronome 6–8; 15; 18; 29–30; 34

O le tulafono a Mose na aofia ai le tele o sauniga i fafo ma faiga. E pei ona o le a e vaaia i le fautuaga a Mose i le Teuteronome, sa popole foi le Alii i le tulaga i totonu o Lona nuu—o le tulaga faaleagaga o o latou loto.

I fuaitau o loo i lalo, vaavaai mo le upu loto, ma mafaufau loloto po o le a se mea e ono faatusa i ai. Atonu e te mafaufau i nei fuaitau o se ituaiga o siaki faaleagaga i lou loto. O le a se fautuaga o le a e tuuina atu ia te oe lava ia? O a togafitiga e te faatonuina e faaleleia ai le soifua maloloina faaleagaga o lou loto? Tusi i lalo au uunaiga:

• Teuteronome 6:4–7:

• Teuteronome 8:2–5:

• Teuteronome 8:11–17:

• Teuteronome 29:18–20:

• Teuteronome 30:6–10:

• Teuteronome 30:14–20:

O se tasi o auala e faatulaga ai ou mafaufauga o le tusi lea o se loto ma tusi i totonu mea ua fetalai mai le Alii e tatau ona i ai i lou loto. Ona mafai lea ona e tusia i fafo atu o le tusi mea e tatau ona e taofia mai lou loto.

E faapefea ona e faaalia lou alofa i le Atua ma lou loto atoa? Mo manatu, tagai i le “Alofa i le Atua, alofa i Lou Tuaoi” i le Mo Le Malosi o le Autalavou: O Se Taiala mo le Faia o Filifiliga, 10–12.

Tagai foi i le M. Russell Ballard, “Pe Sili Mai Lou Alofa Ia te A’u i o Latou Nei?,” Liahona, Nov. 2021, 51–53.

O le tele o tagata Isaraelu o e o le a ulu atu i le nuu o le folafolaga sa le’i molimauina mala i Aikupito pe na sopoia le Sami Ulaula. Na iloa e Mose o i latou—ma augatupulaga i le lumanai—o le a manaomia ona manatua vavega a le Atua ma tulafono a le Atua ina ia tumau pea ona avea ma nuu o le Atua.

O le a le fautuaga ua e maua i le Teuteronome 6:4–12, 20–25 lea e mafai ona fesoasoani e te manatua ai mea tetele ua faia e le Atua mo oe? O le a se mea ua musuia oe e fai ina ia mafai e le afioga a le Alii i aso taitasi ona “i ai foi i lou loto”? (fuaiupu 6).

E mafai foi ona e suesueina le savali a Uso Jan E. Newman “Faasaoina o le Leo o le Nuu o le Folafolaga i le Tupulaga Faia’e” (Liahona, Nov. 2023, 36–38) ma mafaufau pe faapefea ona e tuufaasolo atu lou faatuatua ia Keriso i tupulaga i le lumanai.

Tagai foi i le Teuteronome 11:18–21; Dale G. Renlund, “Mafaufau i le Agalelei ma le Silisili ese o le Atua,” Liahona, Me 2020, 41–44; Bible Dictionary, “Frontlets or phylacteries.”

Tatou te lei oo i le aso “ina ia leai se tagata ia te oe e mativa” (Teuteronome 15:4), ina ia taua pea mataupu faavae o le fesoasoani i e matitiva i le Teuteronome 15 e tusa lava pe o faatinoga faapitoa ua suia. Matau mea i fuaiupu 1–15 o loo aoao mai e uiga i le mafuaaga tatou te fesoasoani ai i tagata o loo manaomia le fesoasoani ma po o le a foi o tatou uiga faaalia e tatau ona i ai e uiga i ai.

O le a le uiga o le “matua faamafola atu lou lima” i tagata e manaomia le fesoasoani? (fuaiupu 8, 1). O le a se mea ua e aoaoina mai le faataitaiga a le Alii e uiga i le fesoasoani atu i tagata o loo manaomia le fesoasoani? (tagai i le fuaiupu 15).

Tagai foi i le “Ua Ou Faia ’Ea se Lelei?,” Viiga, nu. 136.

O Peteru, Nifae, Moronae ma le Faaola lava Ia na saunoa uma i le valoaga i le Teuteronome 18:15–19 (tagai i le Galuega 3:20–23; 1 Nifae 22:20–21; Iosefa Samita—Talafaasolopito 1:40; 3 Nifae 20:23). O le a se mea e te aoaoina e uiga i le Faaola mai nei fuaiupu? Mafaufau i mea na e faitauina e uiga ia Mose i nai vaiaso ua mavae atu. E faapefea ona “pei” Mose o Iesu Keriso?

Atonu e manaia le faatusatusa o upu a Mose i le Teuteronome 29:9; 30:15–20 ma nisi o aoaoga faaiu a Liae i lona aiga i le 2 Nifae 2:26–29; 4:4. Na faapefea ona faalauteleina e Liae mea na aoaoina e Mose? O a ni mea ua e maua i nei fuaiupu e uunaia ai oe e “filifili le ola”? (Teuteronome 30:19).

• Ina ia fesoasoani i lau fanau ia malamalama i le Teuteronome 6:5, e mafai ona e tusia se fatu, se auivi o le tino, ma se lima malosi. E mafai e lau fanau ona faasino i ata pe a e faitauina upu ‟fatu,” ‟agaga,” ma le ‟malosi” i le fuaiupu. E faapefea ona tatou faaali atu i le Alii tatou te alolofa ia te Ia ma o tatou loto atoa, agaga, ma le malosi atoa?

• Faitau faatasi ma lau fanau le fautuaga a le Alii i tagata Isaraelu e tuu fuaitau o mau i le mea o le a latou vaai i ai i aso uma (tagai i le Teuteronome 6:6–9). E ono musuia ai oe ma lau fanau e mafaufau i ni auala e mautinoa ai ia aua “nei galo ia te oe o Ieova” (fuaiupu 12) ma ia manatua mea na Ia faia mo oe.

• E mafai ona e faasino atu faapea o le Teuteronome 6:13, 16 ma le 8:3 na fesoasoani i le Faaola i se taimi taua i Lona soifuaga. Ina ia iloa pe na faapefea, faitau faatasi le Mataio 4:1–10. Ona mafai lea ona e faasoa atu i le tasi ma le isi nisi o fuaitau o mau na fesoasoani ia te oe i taimi o le manaomia ai.

• A o outou faitauina faatasi le Teuteronome 18:18 , fesoasoani i lau fanau ia malamalama o le Perofeta e pei o Mose i lenei fuaiupu o Iesu Keriso. Atonu e mafai ona e vaai i ata o mea na faia e Mose ma mea na faia e Iesu Keriso, ma tuu atu i lau fanau e faatusatusa (tagai i le Tusi Ata o le Talalelei, nu. 15, 16, 38, 39). O le a se mea ua aoao mai e lo tatou perofeta o aso nei e uiga i le Faaola?

• O le talanoa e uiga i le Teuteronome 29:12–13 e tuuina atu ai se avanoa mo tagata o lou aiga e talatalanoa ai i feagaiga o le a latou faia pe ua faia ma le Tama Faalelagi. O le a le uiga o le avea ma nuu o le Atua? E faapefea e a tatou folafolaga ona avea ai i tatou ma tagata o le Atua? (tagai i le fuaiupu 13; tagai foi i le Mosaea 18:8–10).

• Afai e manaomia e lau fanau se fesoasoani e malamalama ai po o le a le feagaiga, fautua atu ia latou su’e se faauigaga i le “Feagaiga” i le Taiala i Tusitusiga Paia (Potutusi o le Talalelei). O a folafolaga na faia e le Atua ma tagata Isaraelu i le tasi ma le isi i le Teuteronome 30:8–10? O a folafolaga ua tatou faia ma le Atua? (tagai i le Mataupu Faavae ma Feagaiga 20:37, 77). E faapefea e nei folafolaga ona fesootaia tatou ma Ia? Mafaufau e pepese faatasi i se pese e uiga i feagaiga, e pei o le “Standing on the Promises” (Potutusi o le Talalelei).