O le Falefetafa’i ma le Taulaga

Ina ua poloaiina e le Atua ia Mose e fau se falefetafa’i i le tolauapiga a Isaraelu, sa Ia fofoga mai lona faamoemoega: “Ou te nofo ai faatasi ma i latou” (Esoto 25:8). I totonu o le falefetafa’i, sa fai ai le atolaau o le feagaiga ma sui o le afio ai o le Atua—o se pusa laupapa, na ufitia i le auro, na i ai faamaumauga tusitusiga o le feagaiga a le Atua ma Lona nuu. O le atolaau sa teuina i le potu aupito paia ma maototonu, na vavaeeseina mai le falefetafa’i atoa i se veli. O lenei veli e mafai ona faatusa i lo tatou vavaeeseina mai le afioaga o le Atua ona o le Pa’u, faapea foi ma lo tatou ala e toe foi atu ai ia te Ia—e ala atu i le Faaola.

E ese mai lo o Mose, ua na’o le toatasi se tagata ua tatou iloa e mafai ona ulu atu i lena “mea e sili ona paia” (Esoto 26:34—o le ositaulaga. E pei o isi ositaulaga, e tatau ona mulumuluina ma faauuina muamua o ia ma faaofuina i ofu paia ua faatusa i lona tofi. E taitasi i le tausaga i se aso e ta’u o le Aso o le Togiola, e osi ai e le faitaulaga sili ia taulaga e fai ma sui o tagata a’o le’i ulufale atu na’o ia i totonu o le falefetafa’i. I le veli, e susunuina ai e ia le mea manogi. O le asu manogi e alu a’e i le lagi na faatusaina i tatalo a tagata e alu a’e i le Atua. Ona alu atu lea o le faitaulaga sili, e ui atu i le veli o loo aveina le toto mai le manu na osi ai le taulaga, ma alu atu i le nofoalii o le Atua, na faatusaina i le atolaau o le feagaiga.

O le iloa ai o mea ua e iloa e uiga ia Iesu Keriso ma Lana matafaioi i le fuafuaga a le Tama Faalelagi, o mafai ona e vaaia le ala e faasino atu ai e le falefetafa’i i tatou i le Faaola? E pei lava o le falefetafa’i, o le atolaau o loo i ai i totonu, na faatusaina i le afio ai o le Atua i totonu o Lona nuu, o Iesu Keriso sa afio ai le Atua i totonu o Lona nuu. E pei o le faitaulaga sili, o Iesu Keriso o le Puluvaga i le va o i tatou ma le Atua le Tama. Sa Ia ui atu i le veli e fautua mo i tatou ona o le toto o Lana lava taulaga.

O nisi o vaega o le falefetafa’i a Isaraelu atonu ua e masani ai, ae maise lava pe afai ua e alu atu i le malumalu ia maua ou lava sauniga. O le malumalu o le maota o le Alii—o Lona nofoaga i totonu o Lona nuu. E pei o le mea e sili ona paia o le falefetafa’i, o le potu selesitila o le malumalu ua fai ma sui o le afioaga o le Atua. Ina ia ulu atu i ai, e ao ona mulumuluina ma faauuina muamua i tatou. Tatou te ofuina ni ofu paia. Tatou te osia feagaiga. Tatou te tatalo i se fata faitaulaga lea e o a’e ai tatalo i le Atua. Ma mulimuli lava tatou ui atu i se veli i totonu o le afioaga o le Atua.

Atonu o le mea e tutusa ai e sili ona taua i le va o malumalu i aso nei ma le falefetafa’i i aso anamua o le, pe afai e malamalama tonu i ai, e tau fai faamalosia ai o tatou faatuatua ia Iesu Keriso ma faatumulia ai i tatou i le agaga faafetai mo Lana taulaga togiola. E finagalo le Atua ia ulu atu Ana fanau uma i Lona afioaga; e finagalo o Ia i se “malo o ositaulaga” ma faitaulaga tamaitai (Esoto 19:6). Peitai, o a tatou agasala e taofia ai i tatou mai le mauaina o lena faamanuiaga, ona “e leai se mea e lē mamā e mafai ona nofo faatasi ma le Atua” (1 Nifae 10:21). O lea na auina mai ai e le Atua le Tama ia Iesu Keriso, o lo tatou “faitaulaga sili i mea lelei atali” (Eperu 9:11). Na te susuea le veli mo i tatou ma faamalosiau i le nuu uma o le Atua ia “faalatalata atu ai ma le faamalosi i le nofoalii o le alofa tunoa, ina ia alofaina ai o i tatou” (Eperu 4:16).

O aso nei, o le faamoemoega o malumalu ua sili atu nai le mauaina o le faaeaga mo i tatou lava. A uma ona maua o tatou lava sauniga, ma osia feagaiga ma le Atua, e mafai ona faia galuega e fai ma sui o o tatou augatuaa, ma maua sauniga mo i latou. I se itu, e mafai ona avea i tatou e pei o se faitaulaga sili anamua—ma le Faitaulaga Silisili—e tatalaina le ala i le afioaga o le Atua mo isi.

O mataupu faavae o le togiola ma le faaleleiga na malosi le aoaoina i faiga anamua o le osi o taulaga i manu, lea na leva ona i ai muamua i le tulafono a Mose. Na Osia e Atamu ma Eva le taulaga. Sa la’ua malamalama i lona faasino faafaatusa i le taulaga a le Faaola. Ma sa la’ua aoaoina atu lenei mea i a la fanau.

O le faafaatusa o taulaga e osi i manu atonu e foliga mai na faapitoa ona mafua ai ni lagona faanoanoa tele i le Aso o le Togiola (“Yom Kippur” i le faaEperu). O le manaomia o lenei sauniga faaletausaga sa faaleoina mai i le Levitiko 16:30: “O le aso lea e fai ai le togiola mo outou e faamamaina ai outou, ina ia mama outou i luma o Ieova i a outou agasala.” O lenei mea na faatagaina le tumau o le afio ai o le Atua faatasi ma tagata. O lenei togiola sa ausiaina e ala i ni sauniga eseese. I se tasi o nei [sauniga], na fasimate ai se ‘oti o se taulaga mo agasala a tagata, ona avatu lea e le faitaulaga sili le toto o le ‘oti i totonu o le mea e sili ona paia. Mulimuli ane, ona tuu lea e le faitaulaga sili ona lima i luga o se ‘oti ola ma ta’uta’u atu agasala a le fanauga a Isaraelu—e siita’i faafaatusa ai na agasala i le ‘oti. Ona tuliese ai lea i fafo le ‘oti mai le tolauapiga a Isaraelu.

I nei sauniga, o ‘oti na faatusa ia Iesu Keriso, na suitulaga ai o Ia mo tagata agasala. E le tatau ona faatagaina le agasala i totonu o le afioaga o le Atua. Ae nai lo o le faatamaia po o le tutuliese i fafo o tagata agasala, na tuuina mai e le Atua se isi auala—nai lo o lena, o le a fasimateina pe tuliese i fafo se ‘oti. “E ave foi e le ‘oti i ona luga a latou amio leaga uma” (Levitiko 16:22).

O nei sauniga na faailoa atu ai le ala ua tuuina mai e le Atua e toe avatu ai i tatou i Lona afioaga—o Iesu Keriso ma Lana Togiola. O le Faaola ua na “tauave o tatou tiga, ma na tauave o tatou faanoanoa,” faapea foi “le amioleaga o i tatou uma” (Isaia 53:4, 6). Sa avea o ia ma suitulaga ia i tatou, tuuina mai Lona soifua e totogi ai le sala o le agasala, ona manumalo lea i le oti e ala i Lona Toetu. O le taulaga a Iesu Keriso sa o le “taulaga tele ma mulimuli; ioe, e le o se taulaga o se tagata, pe o se manu vaefa” ae nai lo o lena “o se taulaga e ao ina le gata ma faavavau” (Alema 34:10). O Ia o le faataunuuga o mea uma na faasino agai atu i ai taulaga anamua.

Mo lenei mafuaaga, ina ua faamaeaina Lana osigataulaga, sa Ia fetalai mai ai, “Ia outou le toe osia mai ia ia te au se taulaga i le faamaligiina o le toto; ioe o a outou taulaga … ia faauma ese. … Ma ia outou osi mai mo se taulaga ia te au le loto momomo ma le agaga salamo” (3 Nifae 9:19–20).

O lea la, a e tau i fuaitau i le Feagaiga Tuai e uiga i taulaga ma le falefetafa’i (pe mulimuli ane, o le malumalu)—ma o le a tele ia mea e te tau i ai—ia manatua o le faamoemoega autu lava o ia mea uma, o le faamalosia o lou faatuatua i le Mesia, o Iesu Keriso. Faafesootai mea ua e faitauina ma aoao i lau tapuaiga i Lona maota. Tau ina ia liliu atu lou loto ma lou mafaufau ia te Ia. Mafaufau loloto i mea na Ia faia e toe avatu ai oe i le afioaga o le Atua—ma mea o le a e faia e mulimuli ai ia te Ia.