Esoto 19–20; 24; 31–34

Na aoao mai Peresitene Russell M. Nelson: “I le Feagaiga Tuai, o le upu Eperu lea e faaliliu mai ai le taua o le segullah, o lona uiga ‘meatotino taua,’ po o le ‘oloa.’ … Mo i tatou ina ia iloa o auauna a le Alii o ona tagata taua o se faaviiviiga aupito maualuga lea” (“Children of the Covenant,” Ensign, Me. 1995, 34). E faapefea ona aafia le ala e te malamalama ai i le Esoto 19:3–6i upu a Peresitene Nelson? O faapefea ona faaalia atu e le Alii ia te oe Na te faatauaina oe?

Na fetalai atu le Alii ia Mose e manaomia ona saunia le fanauga a Isaraelu ae latou te lei “fetaiai ma le Atua” (Esoto 19:10–11, 17) ma tausia feagaiga ma Ia (tagai i le Esoto 19:5). E faapefea ona e saunia mo aafiaga faaleagaga, e aofia ai le faamanatuga ma sauniga o le malumalu? E mafai faapefea ona e fesoasoani i isi e saunia? O le a se mea ua e aoaoina e uiga i sauniuniga mai le Luka 6:12–13; Enosa 1:2–6; Alema 17:2–3?

A o faapotopoto le fanauga a Isaraelu i le auvae mauga o le Mauga o Sinai, sa latou faalogoina le siufofoga o le Atua o tuuina mai Poloaiga e Sefulu (tagai Teuteronome 4:12–13). Ioe, e le na o poloaiga nei a le Atua—e tele isi poloaiga o loo i tusitusiga paia. A o e faitauina le Esoto 20:1–17, fesili ifo ia te oe lava pe aisea na faamamafa faapitoa ai e le Atua nei mea e sefulu. O se siata faataitai lenei e mafai ona e faaaogaina a o e mafaufau loloto i le taua o Tulafono e Sefulu i lou olaga:

• E faapefea e le tausia o nei poloaiga e sefulu ona fesoasoani ia te oe e tausia poloaiga silisili e lua na tuuina mai e Iesu i le Mataio 22:34–40?

• O a ni mea atonu e faaosoosoina ai i tatou e faamuamua ua taua atu na lo Ia? O a faamanuiaga ua e vaaia mai le avea o le Atua ma faamuamua aupito sili ona taua i le olaga?

• E faapefea ona e tali atu i se tasi o loo fai mai o Tulafono e Sefulu na tuuina mai i se taimi ua leva ae e le faatatau i aso nei? O a ni faataitaiga mai lou olaga e te faasoa atu o se vaega o lau tali? E mafai faapefea e le viiga “E Malu ma Aofa Poloaiga a le Atua” (Viiga, nu. 66) ona aafia ai le auala e te faamalamalama atu ai poloaiga a le Atua i isi?

• Na faapefea ona faataunuu e le Alii le folafolaga o loo i le Esoto 20:6 i lou olaga?

Tagai foi i le “O Le Poloaiga Sili—Alofa i le Alii,” i le Aoaoga a Peresitene o le Ekalesia: Ezra Taft Benson (2014), 37–45; Dallin H. Oaks, “Leai Ni Atua Ese,” Liahona, Nov. 2013, 72–75; Autu ma Fesili, “Poloaiga,” Potutusi o le Talalelei.

A o e faitauina le Esoto 24:3–8, mafaufau i feagaiga na e osia ma le Atua. E ui o le feagaiga a Isaraelu na aofia ai sauniga e ese mai i mea o loo mana’omia e le Atua i aso nei, ae atonu e te mātauina nisi o mea e talitutusa ai. Mo se faataitaiga, o fuaiupu 4, 5, ma le 8 o loo ta’ua ai se fata faitaulaga, taulaga i manu, ma le toto. O a ni mea e mafai ona faatusaina i ai nei mea, ma e faapefea ona faatatau i au feagaiga?

Taumafai e tuu oe lava i le tulaga o le fanauga a Isaraelu—ua e i ai i le vaomatua, ua 40 aso talu ona alu Mose, ma o loo i ai se feteenaiga ma tagata Kanana i le laueleele folafolaina i lou lumanai (tagai i le Esoto 32:1–8). E te manatu, aisea na mananao ai tagata Isaraelu i se tupua auro? O le a se mea ua musuia ai oe e uiga i le augani a Mose i le Alii i le Esoto 33:11–17?

E ui i le matuia o le agasala a Isaraelu, o loo aofia foi i le tala lenei se savali o le alofa mutimutivale ma le loto faamagalo o le Atua. O le a le mea o aoao atu e le Esoto 34:1–10 ia te oe e uiga i le Faaola? (tagai i le Esoto 32:30–32; Mosaea 14:4–8; 15:9; Mataupu Faavae ma Feagaiga 45:3–5).

Na faamatala e Peresitene Russel M. Nelson: “A o ou laitiiti, sa ou suesue i lisi na faia e isi e faatatau i mea e fai ma mea e le faia i le Sapati. O se taimi mulimuli ane sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi [tagai Esoto 31:13; Esekielu 20:12, 20]. Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te a‘u, ‘O le a le faailoga ou te manao e avatu i le Atua?’ O lena fesili e matua ta’u manino mai ai lava a’u filifiliga e uiga i le aso Sapati” (“O Le Sapati o Se Aso Fiafia,” Liahona, Me 2015, 130). Mafaufau loloto po o le a le faailoga e te manao e tuuina atu i le Atua faatasi ai ma lou tausia o le Sapati.

Ina ua alu ifo Mose mai le mauga, sa ia aumaia le tulafono sa tusia i luga o papa maa. Ae ina ua tau mai ua solia e Isaraelu la latou feagaiga, sa tata’e e Mose ia papa maa (tagai i le Esoto 31:18; 32:19). Mulimuli ane, na poloaiina ai e le Atua ia Mose e fai se isi seti o papa maa ma toe avatu i le mauga (tagai i le Esoto 34:1–4). O le Faaliliuga a Iosefa Samita o le Esoto 34:1–2 i le faaopoopoga o le Tusi Paia) ua faamanino mai ai o le seti muamua o papa maa na aofia ai sauniga o le “faatulagaga paia,” a le Atua po o le Perisitua Mekisateko. O le seti lona lua na aofia ai “ma le tulafono o poloaiga faaletino.” Sa o se tulafono maualalo ifo lea sa faaaogaina e le “perisitua maualalo” (tagai i le Mataupu Faavae ma Feagaiga 84:17–27), lea sa fuafuaina e tapena ai tagata Isaraelu mo le tulafono maualuga atu ma le perisitua maualuga atu ina ia mafai ona latou ulufale atu i le afioaga o le Atua.

• E mafai faapefea ona e faia le aoaoina o Poloaiga e Sefulu ia malie mo lau fanau? A o outou faitauina faatasi le Esoto 20:3–17 , tuu atu i lau fanau e fesoasoani ia te oe e sue pe tusi se ata e faatusa i Tulafono taitasi e Sefulu. Ona mafai lea ona feauauai lau fanau i le filifilia o se ata ma talanoa e uiga i le auala e mafai ona latou ola ai i lena poloaiga. Faasoa atu i le tasi ma le isi pe faapefea e le ola ai i lena poloaiga ona aumaia ia te oe le fiafia.

• E mafai foi ona outou usu faatasi se pese e pei o le “Tausi Poloaiga” (Tusipese a Tamaiti, 68). Fesoasoani i lau fanau e sue upu i le pese lea e aoao ai i latou i le mafuaaga e finagalo ai le Atua ia tatou tausia Ana poloaiga.

• Fesoasoani i lau fanau ia aoao le fuaitau “Ia e ava i lou tamā ma lou tina” (Esoto 20:12). Atonu e te manao e faamatala atu o le “ava” i se tasi o lona uiga o le faaalia o le faaaloalo ia i latou po o le aumaia ia i latou o le fiafia. O le a le mea na faia e Iesu e faamamalu ai Lona tina faaletino ma Lona Tama Faalelagi? (tagai i le Luka 2:48–51; Ioane 19:26–27). Atonu e mafai ona feauauai lau fanau e faatino mea e mafai ona latou faia e ava ai i o latou matua, ae mate mai e isi tamaiti le mea o loo latou faia.

• Atonu e fiafia lau fanau e vaai i faataitaiga o faailoga—e pei o faailoga o auala po o faailoga i luga o se fale. O a faamoemoega o faailoga? Ona mafai lea e lau fanau ona maua le upu “faailoga” i le Esoto 31:13, 16–17. O le a le fetalaiga a le Alii o se faailoga i le va o tatou ma Ia? Faasoa atu i le tasi ma le isi nisi o auala o loo e taumafai ai faatasi ma lou aiga e faaali atu lou alofa mo le Alii i le Sapati.

• Mafaufau e faaaoga le “Mose i luga o le Mauga o Sinai” (i Tala o le Feagaiga Tuai, 77–82) e fesoasoani ai i lau fanau e aoao i le tala o loo i le Esoto 32:1–8, 19–24. Aiseā na sesē ai i tagata Isaraelu le tapua’i i se faatagata nai lo le Atua?

  

  2:55

• Atonu e malie le fatuina o se ala i luga o le fola (pe sue se ala e latalata i lou fale) e faataitai ai upu nei mai le Esoto 32:8: “Ua vave ona latou o ese i le ala.” A o savavali i le ala, e mafai e lau fanau ona talanoa e uiga i faaosoosoga tatou te feagai e o ese ai mai le Atua. O le a se mea e fesoasoani ia i tatou e tumau ai i le ala o le Atua—ma toe foi atu ai pe afai ua tatou se ese? (tagai i le Esoto 34:6–7).