Eseta

E tele fuaitau i le Feagaiga Tuai o loo faasino atu i le galuega ma le taulaga togiola a le Faaola. O le siata o loo i lalo ua lisi atu ai nisi o nei fuaitau. A o e faitauina nei fuaiupu, o a ni lagona uunai e oo atu ia te oe e uiga i le Faaola?

O valoaga ma aoaoga e uiga i le Faaola ua sili atu ona tele ma manino lelei i le Tusi a Mamona. Mafaufau pe ua faapefea ona faamalosia lou faatuatua e ala i fuaitau e pei o nei: 1 Nifae 11:31–33; 2 Nifae 25:13; Mosaea 3:2–11; Alema 7:10–13.

O loo faaauau pea ona molimau faapitoa perofeta o Aso e Gata Ai ia Iesu Keriso ma Lana misiona togiola. A o e faalogologo i le konafesi aoao i le faaiuga o lenei vaiaso o le Eseta, ia tusi molimau ia Keriso e te faalogo i ai. O a ni mea ua latou aoao mai ia te oe e uiga ia te Ia?

O le Eseta o se taimi fiafia, aua o se taimi e faamanatu ai le Togiola ma le Toetu a le Faaola. Ae, e oo lava i le taimi o le Eseta, e toatele tagata e le o lagonaina le olioli mo mafuaaga eseese. O le a se mea e mafai ona e faia e faasalalau atu ai le filemu ma le olioli o le Faaola i lenei Eseta?

O se tasi o manatu o le sailia lea o savali i tusitusiga paia e uiga i le filemu ma le olioli o loo ofoina mai e Iesu Keriso, e pei o nei: Salamo 16:8–11; 30:2–5; Isaia 12; 25:8–9; 40:28–31; Ioane 14:27; 16:33; Alema 26:11–22. Mafaufau pe faapefea ona e faasoa atu nei savali i isi. Mo se faataitaiga, atonu e mafai ona e fatuina ni kata o le Eseta e faasoa atu, e faavae i savali nei. Ia tatalo po o ai e manaomia ona maua lau faafeiloaiga o le Eseta. Atonu foi e te filifili e faasoa atu au savali i luga o ala o faasalalauga faaagafesootai, lea e toatele tagata e mafai ona vaai i ai.

O viiga e uiga ia Keriso ma le Toetu, e pei o le “Ua Toetu mai o Ia!” O le(Viiga, nu. 111), e mafai foi ona fesoasoani ia i tatou e lagona ai lefilemu ma le olioli i le Eseta. Vaavaai mo fasifuaitau i le viiga, i lou manatu, lea e maua ai le olioli o le Eseta.

Tagai foi i le Jeffrey R. Holland, “E Le Avatu faapei ona Avatu e le Lalolagi,” Liahona, Me 2021, 35–38; Mark S. Palmer, “E Liua Lo Tatou Tiga e avea ma Olioli,” Liahona, Me 2021, 88–90.

O se gaoioiga lenei e mafai ona fesoasoani ia te oe e iloa ai le tele o faamanuiaga e oo mai e ala mai ia Iesu Keriso ma Lana Togiola. Faitau mau o loo i lalo e uiga i mea e fesoasoani Iesu Keriso ia i tatou e faatoilalo. Taumafai e faavasega fuaitau i vaega nei: agasala, oti, tofotofoga, ma vaivaiga (o nisi fuaitau e ono fetaui i le silia ma le tasi le vaega). A o e faitau, o a ni ou manatu e uiga i le mana o le Faaola?

• Isaia 61:1-3

• Esekielu 36:26–28

• Mataio 11:28-30

• Luka 1:46–55

• Roma 8:35–39

• Alema 7:10–13

• Alema 11:42–45

• Alema 58:11

• Moronae 10:32–33

• Mataupu Faavae ma Feagaiga 19:15–19

• Mose 5:9-12

E faapefea ona e faamatala atu i se uo e le o se Kerisiano le mafuaaga e taua ai Iesu Keriso ia te oe? Savali a Elder Ahmad S. Corbitt “Pe E Te Silafia le Pogai Ua Ou Talitonu Ai o Se Kerisiano ia Keriso?” (Liahona, Me 2023, 119–21) e mafai ona fesoasoani.

Tagai foi i le Reyna I. Aburto, “E Leai se Manumalo o le Tuugamau,” Liahona, Me 2021, 85–87; Autu ma Fesili, “Togiola a Iesu Keriso,” “Toetu, Potutusi o le Talalelei.

O a mea ua e aoao mai i nei fuaiupu e uiga i le tau na totogi e Iesu Keriso mo lou faaolataga: Isaia 53:3–5; Mosaea 3:7; Mataupu Faavae ma Feagaiga 19:16–19? O le a le tau na totogi e le Tama Faalelagi? (tagai i le Ioane 3:16).

• O le vaiaso o le Eseta o se taimi lelei lea e aoao ai lau fanau e uiga i mea na faia e le Faaola mo i tatou i Ketesemane ma luga o le satauro. E mafai ona e amata i le faaali atu ia i latou o ata o loo i lalo ma tuu atu ia i latou e talanoa e uiga i mea o loo tutupu i ata. A o vaavaai lau fanau i ata, e mafai ona e faitauina fuaiupu o loo faamatala ai nei mea na tutupu (tagai i le Mataio 26:36–46; 27:35–50; Luka 22:39–46; Ioane 19:16–30). E mafai e lau fanau ona faasino atu faamatalaga auiliili o loo i ata latou te faalogo i ai i fuaiupu.

• E faapefea ona faamanuiaina i tatou ona o le taulaga a Iesu mo i tatou? Fesoasoani i lau fanau e vaavaai mo upu ma fasifuaitau e tali ai lenei fesili i le Isaia 53:4–12; Alema 7:11–13; ma le Mataupu Faavae ma Feagaiga 19:16–19. Faasoa atu i le tasi ma le isi ou lagona e uiga i le Faaola ina ua uma ona faitauina nei mau.

• E mafai ona e faaaogaina le itulau o gaoioiga o lenei vaiaso po o isi ata i lenei otootoga e faamatala ai i lau fanau le tala o le Toetu (tagai foi i le “Ua Toetu Mai Iesu,” i le Tala o le Feagaiga Fou, 139–44). Ona tuu atu lea i lau fanau e toe faamatala atu le tala ia te oe.

• Mafaufau pe faapefea ona e fesoasoani i lau fanau ia maua le olioli ia Keriso i lenei Eseta. Mo se faataitaiga, e mafai ona outou usuina faatasi se viiga e sili ona fiafia i ai o le Eseta, e pei o le “Ua Toetu Mai le Alii” (Viiga, nu. 112) po o le “Gethsemane” (Potutusi o le Talalelei). Ina ia su’e nisi viiga e uiga i le Toetu, e mafai ona e tagai i le faasino autu o Viiga ma le Tusipese a Tamaiti. E mafai ona e faasoa atu ma lau fanau i le tasi ma le isi le mafuaaga e te fiafia ai i nei pese ma ou lagona i ai pe a e usuina. O le a le mea ua aoao mai e nei pese ia te i tatou e uiga i le Tama Faalelagi ma Iesu Keriso?

• O loo i ai i le Potutusi o le Talalelei se faaputuga o vitio o le Eseta e ono fiafia i ai lau fanau. Atonu e mafai ona e tuu atu ia i latou e filifili se tasi e matamata ai. Fesili atu ia i latou po o le a se mea ua latou aoaoina e uiga ia Iesu Keriso mai le vitio. E mafai foi ona e fai atu ia i latou e aotele le savali o vitio i se fuaiupu se tasi.

• A o e matamata faatasi ma lau fanau i le konafesi aoao i le faaiuga o lenei vaiaso o le Eseta, fesoasoani ia i latou e matau le taimi e molimau atu ai molimau faapitoa a le Faaola i le Toetu. Atonu e mafai ona e faia se taaloga faatatau i ai—valaaulia i latou e tutu i taimi uma latou te faalogo ai i upu e pei o le Eseta po o le Togiola po o le Toetu. Faasoa atu i le tasi ma le isi le mafuaaga o lou faafetai ai mo molimau a perofeta soifua e uiga i le Faaola.