Esoto 1–6

O le a se mea ua uunaia ai oe e uiga i tamaitai na faamatalaina i le Esoto 1--2? Na faapefea ona latou fesoasoani e faataunuu le fuafuaga a le Atua mo Lona nuu? O le a se mea ua aoaoina oe e a latou taumafaiga e uiga i le auauna atu i le galuega a le Atua?

Ae e te lei amata faitauina le Esoto, atonu e te mafaufau i se faigata o loo e feagai—o se mea e te faamoemoe o le a laveaiina mai ai oe e le Alii. O a upu ma fasifuaitau i le Esoto 1–3 e foliga mai e talitutusa ma le faatagataotauaina faaleagaga po o isi aafiaga o loo feagai ma i tatou i aso nei? Matau foi le auala na sailia ai e le fanauga a Isaraelu le laveaiga ma le auala na tali mai ai le Alii (tagai mo se faataitaiga, i le Esoto 2:23–25; 3:7–8). Na faapefea e le Alii ona “alu ifo ou te lavea’i mai” oe?

I le tusi atoa o le Esoto, atonu foi e te matauina nisi o mea e tutusa ai Mose ma Iesu Keriso (tagai i le Teuteronome 18:18–19; 1 Nifae 22:20–21). Mo se faataitaiga, o a ni mea e tutusa ai mea ua e vaaia i le va o le Esoto 1:22; 2:1–10 ma le Mataio 2:13–16? Po o le va o le Esoto 24:18 ma le Mataio 4:1–2? O le a se mea e te lagona e finagalo le Alii ia e malamalama i ai e uiga ia te Ia lava ma Lona mana?

E mafai ona e mafaufau i se taimi na faatumulia ai oe i se mea i le maofa ma le ofo? Na faapefea ona e tali atu i ai? E faapefea ona e faamatalaina le faalagona o le loto na e lagonaina?

Faatasi ai ma lena manatu, faitau le Esoto 3:1–6. O le a se mea ua faagaeetia ai oe e uiga i aafiaga musuia o Mose? O le ā le mea na faia e Mose e faaalia ai le migao i le Atua? O a fesootaiga ua e vaaia i le va o ana amioga ma le migao mo mea paia?

O le faitauina o nei fuaiupu e ono uunaia ai oe e mafaufau i mea paia ma nofoaga paia i lou olaga. Aisea e paia ai i latou ia te oe? E faapefea ona ese lau taulimaina o i latou mai mea e masani ai? Ina ia taialaina lou mafaufau loloto, e mafai ona e tagai i le vaega ua faaulutalaina “Manatuaina o Folafolaga” i le savali a Elder David A. Bednar “O Mea Silisili Ese ma le Taua” (Liahona, Nov. 2017, 91–93). E mafai foi ona e usuina pe faalogologo i se viiga e musuia ai le maofa, e pei o le “Ou te Tu ma Ofo” (Viiga, nu. 107) ma mafaufau loloto po o le a le mea e uiga i le talalelei lea e te ofo.

Ioe, e tusa lava pe na tatou maua ni aafiaga faaleagaga matagofie, e i ai se tulaga lamatia o le faasamasamanoa tele i mea paia. E faapefea ona e aloese mai lenei mea? O savali nei e lua o loo talanoaina ai lenei faafitauli; filifili se tasi, ma vaavaai mo faamatalaga e fesoasoani ia te oe: Ulisses Soares, “E Maofa ia Keriso ma Lana Talalelei” (Liahona, Me 2022, 115–17); Gérald Caussé, “Pe O Ofoofogia Pea Ea ia te Oe?” (Liahona,, Me 2015, 99–100).

Tagai foi i le Mataupu Faavae ma Feagaiga 6:10–12; 63:64.

Ua tatou iloa i aso nei o Mose o se perofeta ma se taitai maoae. Ae peitai, sa lei vaai Mose ia te ia lava i le ala lena, i le taimi muamua na valaauina ai o ia e le Alii. A o e faitauina le Esoto 3–4, lisi popolega o Mose ma le auala na tali atu ai le Alii i mea taitasi. O a ni mea e te maua i nei mataupu e ono mafai ono musuia ai oe i taimi e te lagona ai le le atoatoa? O anafea na e vaai ai i le faamalosia o oe po o isi e le Atua e fai Lana galuega?

Tagai foi i le “The Church Gives Us Opportunities to Assist in God’s Work” i le “Church Organization” i Autu ma Fesili, Potutusi o le Talalelei.

E mafai ona faavaivailoto pe a foliga mai e le aoga a tatou taumafaiga faamaoni e faia mea lelei—pe a tatou taumafai e fai le finagalo o le Alii ae tatou te le o vaaia taunuuga sa tatou faamoemoeina. Ina ia aoao e uiga i se aafiaga faapea na oo ia Mose, faitau le Esoto 5:4–9, 20–23 Na faapefea ona fesoasoani le Alii ia Mose e faatoilalo ona lagona o le lotovaivai? (tagai i le Esoto 6:1–13). Sa faapefea ona fesoasoani le Alii ia te oe ina ia e finafinau i le faia o Lona finagalo?

Tagai foi i le Jeffrey R. Holland, “Faatalitali i le Alii,” Liahona, Nov. 2020, 115–17)

• Sa i ai se matafaioi telē ia Mose i le faasaolotoina o Isaraelu mai le nofopologa. Peitai semanu e le mafai ona ia faataunuuina lenei mea pe ana le’i puipuia ma tausia o ia e lona tina, lona tuafafine, afafine o Farao, ma isi tamaitai faamaoni. Fesoasoani i lau fanau e aoao e uiga i nei tamaitai i le Esoto 1:15–20; Esoto 2:2–10 (tagai foi i le Numera 26:59); ma le Esoto 2:16–21. E mafai foi ona e faaaogaina le itulau o gaoioiga o lenei vaiaso ma le “O Le Pepe o Mose” (i Tala o le Feagaiga Tuai, 61–63) e faamatala ai a latou tala. Sa faapefea ona faataunuuina e nei tamaitai le fuafuaga a le Atua? Talanoa le tasi i le isi e uiga i isi tagata e te faamemelo i ai o e fesoasoani i le galuega a le Atua, e aofia ai ni auala laiti ma faigofie. E mafai faapefea ona tatou mulimuli i a latou faataitaiga?

  

  1:36

• A uma ona faitau faatasi le Esoto 3:1–5 , fai atu i lau fanau e aotele nei fuaiupu i a latou lava upu (tagai foi i le “Mose le Perofeta” i Tala o le Feagaiga Tuai, 64–66). Na faapefea ona faaalia e Mose le migao i le afioaga o le Alii? E faapefea ona finagalo le Alii ia tatou faaalia le migao? E mafai foi ona e fai atu i lau fanau e fesoasoani ia te oe e sue (pe tusi) ni ata o nofoaga paia po o gaoioiga e tatau ona tatou migao ai. O a ni mea e mafai ona tatou faia ia avea ai o tatou aiga o se nofoaga paia?

  

  1:26

• Usu faatasi se pese e faatatau i le migao, e pei o le “Faaaloalo o le Alofa Lea” (Tusipese a Tamaiti, 12). A o e faia, e mafai e lau fanau ona maua upu po o fasifuaitau e faamatala ai le uiga o le migao. Afai o le taimi muamua lea ua tatou aumaia ai se uo i le lotu, e faapefea ona tatou faamatala atu le uiga o le migao?

• I le faaaoga ai o le tala o loo i le Esoto e 3; 4:1–17, tuu atu i tamaiti e auauai e faafoliga e pei o Mose. Atonu e malie le faaaofia ai o mea faitino po o mea faigofie e faaaoga, e pei o se moliuila ma se laau e faatusa i le laau na mumū. Fesoasoani i lau fanau ia iloa lagona o Mose e uiga i le tofiga na tuuina atu e le Alii ia te ia (tagai i le Esoto 3:11; 4:1, 10). Atonu e mafai ona outou faasoa atu i le tasi ma le isi taimi na tutusa ai o outou lagona. O le a se fautuaga e mafai ona tatou faasoa atu ia Mose e fesoasoani ai ia te ia? Faitau e uiga i le ala na faamalosiau ai le Alii ia Mose i le Esoto 3:12; 4:2–9, 11–12. Ta’u atu i tamaiti le auala na fesoasoani ai le Faaola ia te oe e faataunuu se valaauga, mulimuli i se uunaiga, pe faia se isi mea sa faigata ia te oe.