Kenese 37–41

Na tele taimi, na foliga mai ai na lafoaia ai e le manuia ia Iosefa, ae sa lei tuulafoaia lava e le Alii. A o e faitau i le tala ia Iosefa, mafaufau loloto i fesili e pei o nei: O le a se mea na fai e Iosefa ina ia latalata ai pea i le Alii? Na faapefea ona “ia te ia” le Alii? (tagai i le Kenese 39; 40:1–19; 41:9–45). O le a se mea ua e aoaoina mai le tala ia Iosefa e mafai ona fesoasoani ia te oe e iloa ai le i ai o le Alii i lou olaga?

E mafai foi ona e fesili i ni fesili faapena e faatatau i lou lava olaga. O a ni faamaoniga ua e vaaia e lei tuulafoaia ai oe e le Alii i taimi o ou tofotofoga? Mafaufau pe faapefea ona e faasoa atu ou aafiaga i tagata o lou aiga ma augatupulaga i le lumanai (tagai i le 1 Nifae 5:14).

Ioe, o le a iai isi ou tofotofoga i le lumana’i. O le a se mea e mafai ona e faia i le taimi nei e fesoasoani ai ia mautinoa e le aveesea oe e nei tofotofoga mai le Alii? Mafaufau e tusi se tusi e uunaia ai lou tagata i le lumanai ina ia tumau le latalata atu ia te Ia e tusa lava po o le a. E mafai ona e faaaofia ai ni malamalamaaga mai le soifuaga o Iosefa pe mai le savali a Elder D. Todd Christofferson “O Lo Tatou Sootaga ma le Atua” (Liahona, Me 2022, 78–81).

Tagai foi i le Ioane 14:18; Roma 8:28; Alema 36:3; Mataupu Faavae ma Feagaiga 121:7–8; “Afio Mai!,” Viiga, nu. 92.

Sa i ai ia Iosefa se meaalofa mo le iloatino o savali mai le Alii e ala i miti. O le a se mea ua mafai ona e aoaoina mai le Kenese 37:5–11; 40:5–8; 41:14–25, 37–38 e uiga i le mauaina ma le malamalama i faaaliga mai le Alii? Mo se faataitaiga, o le a se mea na e aoao mai i le faataitaiga a Iosefa pe a foliga mai e faigata ona malamalama i faaaliga? (tagai i le Kenese 40:8; 41:16).

Mafaufau loloto pe o faapefea ona faaali mai e le Alii Lona finagalo ia te oe. O le a lau mea o loo fai e faatino ai faaaliga ua tuuina mai e le Alii ia te oe? O faapefea ona e sailia se taiala faaopoopo ma ia te Ia?

Afai e tuuina atu e Iosefa se fautuaga i le auala e tetee atu ai i faaosoosoga e faia agasala faalefeusuaiga, o le a sou manatu i sana tala o le a fai mai? Mafaufau i lenei mea ao e faitau e uiga i lana aafiaga i le Kenese 39. Mo se faataitaiga, mafaufau pe faapefea ona tali atu Iosefa i popolega faapenei:

• Afai e leai se isi tagata e iloa le mea o loo ou faia, o le a le mea e popole ai fua? (tagai i fuaiupu 8–9).

• Ou te taumafai e tetee atu, ae e foliga mai e le muta le faaosoosoga (tagai i le fuaiupu 10).

• O le a se mea e tatau ona ou faia pe a ou i ai i se tulaga e malosi ai faaosoosoga? (tagai i le fuaiupu 12).

E faapefea ona e faamatala mai le mafuaaga e taua ai le usiusitai i le tulafono o le legavia? (tagai i le Mo Le Malosi o le Autalavou: O Se Taiala mo le Faia o Filifiliga, 23–28).

E moni lava o le faataitaiga a Iosefa, e mafai ona faatatau i isi ituaiga o faaosoosoga. I le manatua ai o le aafiaga a Iosefa, mafaufau e fai se fuafuaga mo le aloese ma le tetee atu i faaosoosoga. Mo se faataitaiga, e mafai ona e mafaufau i se faaosoosoga ma tusi i lalo tulaga e aloese ai ma le auala o le a e “sola” ai pe a tulai mai se faaosoosoga.

O nisi nei o mau e mafai ona faailoa mai ai lau fuafuaga. O le a se mea ua e aoaoina mai ia mea taitasi e uiga i le auala e mafai ai e le Faaola ona fesoasoani ia te oe e tetee atu i faaosoosoga? Mataio 4:1–11; 1 Korinito 10:13; 1 Nifae 15:23–24; 3 Nifae 18:17–18.

A o e faia lau fuafuaga, atonu foi e fesoasoani le mafaufau i taimi ua tuanai na e aloese ai pe tetee atu i faaosoosoga. Na faapefea ona fesoasoani le Faaola ia te oe? (tagai i le 2 Nifae 4:18–33).

O le faaliliuga a Iosefa o le miti a Farao na taitai atu ai i ni fautuaga atamai ma aoga mo le faasaoina mai se oge (tagai i le Kenese 41:15–57). Mafaufau po o a savali faaleagaga e ono i ai i le Alii mo oe i lenei tala. O le a sou lagona e finagalo o Ia ia e saunia mo faigata i lou lumanai?

Tagai foi i le David A. Bednar, “O Le a Tatou Tofotofoina i Latou,” Liahona, Nov. 2020, 8–11.

• O le faitau e uiga i lagona faigata i le aiga o Iosefa e mafai ona uunaia ai se talanoaga e uiga i le auala e tatau ona tatou taulimaina ai tagata o le aiga. Ina ia faamatala le tala ia Iosefa ma ona uso mai le Kenese 37, e mafai ona e faaaogaina ata o loo i lenei otootoga po o le “O Miti Musuia a Iosefa” (i Tala o le Feagaiga Tuai, 47–51). Tuu atu i lau fanau e faasoa mai mea latou te iloa e uiga i le tala. Atonu e te fai atu i lau fanau e vaai faalemafaufau faapea sa latou i ai i le aiga o Iosefa. O le a se mea semanu latou te fai atu pe faia ina ia avea ai ma se tagata e faatupuina le filemu i le aiga? Mo se faataitaiga, o le a le uiga o le “tautala filemu” i totonu o lo tatou aiga? (fuaiupu 4). Ua Avea Faapefea Iesu Keriso ma se faatupu filemu i le aiga o le Atua?

  

  2:17

• Pe a feagai lau fanau ma taimi faigata, e tatau ona latou iloa o le a faatasi le Alii ma i latou, e pei ona sa Ia faatasi ma Iosefa. Atonu e mafai ona e fesoasoani i lau fanau e fai se lisi o mea faigata na tutupu ia Iosefa (tagai i le Kenese 37:23–28; 39:20; po o “O Miti Musuia a Iosefa” ma le “Iosefa i Aikupito,” i Tala o le Feagaiga Tuai, 47–51, 52–56). A uma faigata taitasi latou te maua, valaaulia lau fanau e toe fai, “Sa I Ai Ieova ia Iosefa” (Kenese 39:2).

  

  2:17

  

  2:50

• Atonu e mafai e lau fanau ona suesue i le Kenese 39:1–3, 20–23 mo taimi uma o le fuaitau “Sa I Ai Ieova ia Iosefa” ma fuaitau faapena. Tuu atu ia i latou e faasoa mai o latou manatu pe o le a le uiga o lenei fasifuaitau. E faapefea ona tatou iloa o loo faatasi le Alii ma i tatou? Faamatala e le tasi i le isi e uiga i ou lagona sa faatasi le Atua ma oe i se taimi sa luitauina ai.

• O se lesona lenei o mea faitino e mafai ona fesoasoani i lau fanau e mulimuli ai i le faataitaiga a Iosefa o le sosola ese mai le avā a Potifara: Faaaoga ni maneta se lua e fai ma sui o Iesu Keriso ma Satani. Faaaoga se mea faitino laitiiti uamea, e pei o se kilipi faamau pepa, e faatusa ia i tatou. Ona tuu atu lea i lau fanau e vaai pe faapefea ona malosi le aafiaga o se maneta i luga o le mea faitino uamea pe a latou faasolo atu le mea faitino i ai. E faapefea ona faaalia lenei upumoni i le aafiaga o Iosefa i le Kenese 39:7–12 ? O le a se mea e mafai ona tatou faia e o ese ai mai le agasala ae latalata atili atu ia Iesu? O le vitio “Temptation Fades as We Seek Christ in Every Thought” (Potutusi o le Talalelei) ma se pese e pei o le “Ua Naunau ia te Oe” (Viiga, nu. 57) e mafai ona fesoasoani i lenei talanoaga.

  

  2:58

  Faaaoga musika. “O viiga ma isi pese paia e mafai ona fesoasoani i tamaiti e lagonaina ai le alofa o le Atua, lagona le Agaga, ma aoao upumoni o le talalelei. O fatuga, fati, ma solo faigofie e mafai ona fesoasoani i tamaiti e manatua ai upumoni o le talalelei mo le tele o tausaga e oo mai. A’o e pese faatasi ma tamaiti, fesoasoani ia latou maua ma malamalama i mataupu faavae ua aoaoina i pese. (Aoao Atu i le Ala a le Faaola, 32).

• Fesoasoani i lau fanau e mafaufau i faaosoosoga latou te ono feagai. Tuu atu ia i latou e faatino le auala e mafai ai ona latou “sosola” mai nei faaosoosoga.