Kenese 24–33

A o faitauina le Kenese 24, fesili ifo ia te oe lava pe aisea na manatu ai Aperaamo o le faaipoipoga a lona atalii o Isaako e taua tele. Aisea e taua ai le faaipoipoga i le Atua?

O a uiga e te maua ia Repeka o le a saofaga i se faaipoipoga ma se aiga malosi? (tagai faapitoa i fuaiupu 15–28, 57–61).

Tagai foi i Autu ma Fesili, ‟Faaipoipoga,” Potutusi o le Talalelei.

I aganuu a Isaako ma Repeka, e maua e le atalii matua le tofi o le ulumatua, o lona uiga o se tofi sili atu, faatasi ai ma tiutetauave sili atu mo le tausia o le aiga. Ao e faitau i le Kenese 25:29–34, mafaufau pe aisea atonu na malie ai Esau e lafoai lona tofi o le ulumatua e faafesuiai mo se meaai. O a ni lesona ua e maua mo oe lava i lenei tala? Atonu e fesoasoani le faia o ni lisi se lua: (1) faamanuiaga e faavavau e finagalo le Atua e tuuina atu ia te oe ma (2) mea faalelalolagi e ono faalavelaveina ai oe. Ona mafai lea ona e faitau le fuaitau, e sui le “tofi” i se mea mai le lisi muamua ma le “atasema” i se mea mai le lisi lona lua. O le a faapefea ona e taulai atu i le Faaola ma faamanuiaga e faavavau o Lana talalelei?

Tagai foi i le Mataio 6:19–33; M. Russell Ballard, “Manatua Mea e Aupito Sili ona Taua,” Liahona, Me 2023, 105-7.

A o moe i luga o se aluga maa, sa faia ai e Iakopo se miti na suia ai [lona] olaga. O se aafiaga paia tele lea na faaigoa ai e Iakopo le nofoaga o Peteli, po o le “fale o le Atua,” ma tautino atu, “E moni lava e i ai Ieova i le mea nei” (Kenese 28:16).

A o e faitauina le Kenese 28, atonu e te fesili ifo ia te oe lava po o le a le mea na matua paia ai lenei aafiaga ia Iakopo. O le a le mea na oo ia te ia i lena taimi? O a lagona atonu na oo ia Iakopo? E mafai foi ona e vaavaai mo upu ma fasifuaitau i fuaiupu 10–22 ia e faamanatu atu ai ia te oe le maota o le Alii. O a ni uunaiga e te maua e uiga i le Atua, Lona maota, ma Ana feagaiga?

I le faaiuga o lenei otootoga o loo i ai se atavali o loo faaalia ai le miti a Iakopo; e mafai ona e faatatau i ai a o e faitau. Afai e te fatuina lau lava ata o lana miti, o le a sau mea e fai? O a ni upumoni mai le tala e te taumafai e faaalia?

O le viiga “Ta Felata’i Nei, le Atua ma Oe” (Viiga, nu. 59) na faavaeina i aafiaga na o’o ia Iakopo. O a fesootaiga ua e vaaia i le va o lenei pese ma le Kenese 28:10–22? E faapefea ona fesoasoani le malumalu ia te oe e te lagona ai le latalata atili atu i le Atua? Mafaufau e vaavaai mo tali i lenei fesili i le savali a Peresitene Russell M. Nelson “O Le Malumalu ma Lou Faavae Faaleagaga” (Liahona, Nov. 2021, 93–96). Atonu foi e te manao e toe iloilo feagaiga ma faamanuiaga o le maota o le Alii i le Tusitaulima Aoao, 27.2 (Potutusi o le Talalelei). E faapefea e le tausia o nei feagaiga ona aumaia le mana o le Atua i lou olaga?

A o e faitau i le Kenese 29:31–35 ma le 30:1–24, vaavaai mo upu o loo faamatala ai le alofa mutimutivale o le Atua ia Rasela ma Lea. Mafaufau loloto pe sa faapefea ona “silasila mai [le Atua] i [ou] tiga” ma “manatua” oe (Kenese 29:32; 30:22).

Ina ua toe foi atu Iakopo i Kanana, sa matua’i “mata’u tele ma atuatuvale” o ia i le pe o le a faapefea ona talia o ia e lona uso o Esau (Kenese 32:7). A o e faitauina le Kenese 32–33, mafaufau loloto i a outou lava sootaga faaleaiga—atonu aemaise lava se sootaga e manaomia ai le faamalologa. Atonu o le a musuia oe i le tala lenei e te aapa atu ai i se isi tagata. O fesili faapenei e mafai ona fesoasoani e taiala ai lau faitau:

• Sa faapefea ona tapena Iakopo e feiloai ma Esau?

• O le a se mea na laualuga ia te oe e uiga i le tatalo a Iakopo o loo maua i le Kenese 32:9–12?

• O le a se mea ua e aoaoina e uiga i le faamagalo atu mai le faataitaiga a Esau?

• E faapefea ona fesoasoani le Faaola ia i tatou e faamalolo [manu’a] o se mafutaga faaleaiga?

• Ina ia faamamafaina le faataitaiga mataina o le agalelei o Repeka, e mafai ona e faaali atu i lau fanau le ata o loo i lalo po o le itulau o gaoioiga o lenei vaiaso a o e aoteleina le tala i le Kenese 24:10–21. Atonu e fiafia lau fanau e faatino vaega o le tala. E mafai ona taitai atu ai i se talanoaga e uiga i faatinoga agalelei ua tou vaaia ma lau fanau.

• Mafaufau e usu faatasi se pese e faatatau i le agalelei, e pei o le “O Le Agalelei e Amata Ia Te A’u” (Tusipese a Tamaiti ,83 ). Valaaulia tamaiti e faalogo mo le upu “agalelei” (po o se upu talitutusa) ma tutū pe a latou faalogo i ai. E faapefea ona tatou agalelei faapei o Repeka?

• Mafaufau e faaaoga le “Iakopo ma Esau” (i Tala o le Feagaiga Tuai, 38–41) e fesoasoani ai i lau fanau ia malamalama i le tala i le Kenese 25:21–34. Atonu e mafai ona vaaifaalemafaufau lau fanau e faapea na fesili atu Esau mo la latou fautuaga pe tatau ona ia faafesuiai lona tofi o le ulumatua mo le atasema. O le a se latou tala e fai atu ia te ia?

  

  2:5

• O a mea e taua e faavavau ia te oe ma lau fanau? Atonu e mafai e lau fanau ona maua ni ata po o ni mea faitino e faatusa i nei mea. E mafai faapefea ona tatou faaali atu i le Alii e taua nei mea ia i tatou?

• A o outou faitauina faatasi le Kenese 28:10–22 , e mafai ona e faaaogaina se apefai po o se faasitepu (po o se ata e pei o lea o loo i le faaiuga o lenei otootoga) e talanoa ai e uiga i le auala e pei ai a tatou feagaiga o se apefai. Atonu e mafai e lau fanau ona faafoliga o loo latou feaʻei i luga o le apefai, i sitepu taitasi talanoa e uiga i taimi tatou te folafola atu ai e usitai i le Atua, e pei o le taimi tatou te papatiso ai, aai i le faamanatuga, pe o atu i le malumalu. E faapefea e a tatou feagaiga ona aumaia i tatou e latalata atili i le Atua?

• Ina ia faailoa atu nei fuaiupu, e mafai ona e faamatala atu e faapea, ina ua mavae le tele o tausaga o lagona faigata, o le a toe feiloai Iakopo ia Esau. Faitau faatasi le Kenese 32:6–11. Na faapeī lagona o Iakopo? O le a le mea sa ia faia ia maua ai le fesoasoani? Faitau faatasi le Kenese 33:1–4 e iloa ai le ala na tali mai ai le Alii i le tatalo a Iakopo. Afai e mafai ona talanoa mai Esau ma Iakopo ia i tatou i aso nei, faamata o le a se mea la te ono ta’u mai ia i tatou pe afai o loo i ai se finauga i lo tatou aiga?