Kenese 18–23

Na faia e le Alii ni folafolaga matagofie i le au faatuatua, ae peitai o nisi taimi, o tulaga o o tatou olaga e mafua ai ona tatou tau mafaufau pe mafai faapefea ona faataunuuina na folafolaga. Atonu sa i ai ni lagona faapena o Aperaamo ma Sara. O a ni mea ua e aoaoina mai i o laua aafiaga? Atonu e fesoasoani le amata o au suesuega i le toe iloiloina o mea na folafola mai e le Atua i le Kenese 17:4, 15–22. Sa faapefea ona tali atu Aperaamo ma Sara? (tagai foi i le Faaliliuga a Iosefa Samita, Kenese 17:23 [i le Kenese 17:17, vaefaamatalaga b; Kenese 18:9–12). Sa faapefea ona tali atu le Alii e fesoasoani ia i laua ia i ai lo laua faatuatua malosi atu i Ana folafolaga? (tagai i le Kenese 18:14).

O a ni mea e te maua i nei fuaiupu e atinae ai lou faatuatua? O a nisi aafiaga—i lou olaga po o le olaga o se isi—ua faamalosia ai lou faatuatua e faapea, o le a faataunuuina e le Atua Ana folafolaga i Lana lava taimi ma Lana lava ala? E mafai foi ona e mafaufau loloto pe faapefea ona e lagolagoina lou faatuatua pe a le maua faamanuiaga folafolaina i lenei olaga. O le a se fautuaga e te maua i le Eperu 11:8–13 ma le savali a Peresitene Russell M. Nelson “Ua Toetu Keriso; O Le Faatuatua ia te Ia O Le A Aveesea ai Mauga”? (Liahona, Me 2021, 101–4).

Tagai foi i le Mataupu Faavae ma Feagaiga 88:68.

O a ni lesona e te aoaoina e uiga i le sosola ese mai le amioleaga, ao e faitau e uiga ia Lota ma lona aiga? Mo se faataitaiga, o le a se mea na faagaeetia ai oe e uiga i le mea na fai mai ai le agelu ma faia e fesoasoani ai ia Lota ma lona aiga ina ia sao mai le faafanoga? (tagai i le Kenese 19:12–17). E faapefea ona fesoasoani le Alii ia te oe ma lou aiga ina ia sosola ese pe saili le puipuiga mai faatosinaga a le tiapolo i le lalolagi? Mafaufau i tulaga e ono faaosoosoina ai oe e “[tepa] i tua” (fuaiupu 26) ae e tatau ona e tulimatai atu i luma ma le faatuatua i le Faaola. O le a se mea ua faaopoopo e le Luka 9:62 i lou malamalama i lenei autu?

(Tagai foi i le Faaliliuga a Iosefa Samita, Kenese 19:9–15 (i le faaopoopoga o le Tusi Paia).

Na aoao mai Elder Jeffrey R. Holland:

“O le mea moni lava, o le mea na sese i le avā a Lota e le na o lona tepa i tua; a o lona loto sa ia manao e toe foi i tua. E foliga mai ae lei taitai ona ia sopoia tuaoi o le aai, ua leva ona ia misia mea sa ofoina mai e Sotoma ma Komoro ia te ia. …

“E mafai foi ona faapea na tepa i tua le avā a Lota faatasi ai ma le tetee i le Alii mo mea ua Ia fai atu ai ia te ia e tuu e aua le avea. … O le mea lea e le na o lona tepa i tua; ae sa ia tepa i tua ma le moomoo. I sona faapuupuuga, o lona taofi mau o mea ua tuanai ua faatoilalo ai lona talitonu i le lumanai. O lena, e mautinoa lava, ua na o se vaega itiiti o lana agasala.

“… Ou te aioi atu ia te outou ia aua nei nopia’i ai i taimi ua alu, pe moomoo naumati mo taimi ua sola, po o le a lava le lelei atonu na i ai na taimi ua sola. O le tuanai e mo le aoaoina mai ai, ae le o le ola ai. Tatou te vaai i tua e pue mai aloiafi mai aafiaga susulu ae le o lefulefu. Ma afai ua tatou aoaoina mea e manaomia ona tatou aoaoina ma ua tatou aumaia ma i tatou mea sili atu na tatou aafia ai, ona tatou vaavaai lea i luma ma tatou manatua o le faatuatua e masani lava ona faasino atu i le lumanai. …

“… O lena nofoa’i i olaga ua tuanai, e aofia ai mea sese ua tuanai, e matua le sa’o lava! E lē o le talalelei lena a Iesu Keriso.

“Mo [tagata] umao augatupulaga uma, ou te valaau atu ‘Manatua le avā a Lota’ [Luka 17:32]. O le faatuatua e mo le lumanai. O le faatuatua e fausia i luga o le taimi ua tuanai ae le o le moomoo lava e tumau ai iina. E talitonu le faatuatua o le Atua o loo i ai ni mea se tele o loo fuafuaina mo i tatou taitoatasi ma o Keriso e moni lava o le ‘faitaulaga sili i mea lelei atali’ (Eperu 9:11)” (“O Le a Oo Mai Le Mea Sili,” Liahona,, Ian. 2010, 24, 26--27).

E ui tatou te le iloa uma mafuaaga na poloaiina ai e le Atua ia Aperaamo ina ia ofo atu Isaako e fai ma taulaga, ua tatou iloa sa o se tofotofoga o lona faatuatua i le Atua. Ua tatou iloa foi, “o se faatusa o le Atua ma lona Atalii Pele e Toatasi” (Iakopo 4:5). A o e faitauina le Kenese 22:1–19, e mafai ona e vaavaai mo faatusa po o mea e talitutusa i le va o le ositaulagaina e Aperaamo o Isaako ma le ositaulagaina e le Tama o Lona Alo, o Iesu Keriso. Mafaufau e tusi mea e te maua i se siata faapenei:

O a faatusa po o mea e talitutusa ai ma le taulaga togiola a le Faaola e te iloa e sili ona anoa? Mafaufau e usu pe faitau upu o se viiga o loo faaalia ai le alofa o le Tama mo i tatou, e pei o le “O le Alofa o le Tama,” Viiga. nu. 104. E mafai foi ona tusifaamaumau ou lagona e uiga i le Tama Faalelagi ma Iesu Keriso ma la La’ua taulaga mo oe.

Afai e te manao e suesue atili e uiga i le taulaga a lo tatou Faaola, mafaufau e faitau le savali a Peresitene Jeffrey R. Holland “Faauta i le Tamai Mamoe a le Atua” (Liahona, Me 2019, 44–46). Aisea ua avea ai se tamai mamoe ma se faatusa mamana o le Alo o le Atua? O le a le mea na aoao mai e Peresitene Holland e faateleina ai lou migao mo le meaalofa a le Tama Faalelagi?

Tagai foi i le “Akedah (The Binding)” (vitio), Potutusi o le Talalelei.

12:56

• Ina ia aoao e uiga i le faatuatuaina e Aperaamo ma Sara o folafolaga a le Atua, e mafai ona tou talanoa ma lau fanau e uiga i se taimi sa tatau ai ona latou faatalitali mo se mea sa latou mananao moni i ai. Ona mafai lea ona e vaai i le ata o Sara ma Isaako i le amataga o lenei otootoga ma talanoa e uiga i le folafolaga na faia e le Atua ia te ia ma Aperaamo (tagai foi i le “Aperaamo ma Sara,” i Tala o le Feagaiga Tuai, 28–31). Fesoasoani i lau fanau ia mafaufau i mea na folafola mai e le Atua ia i tatou pe a tatou faamaoni. Faamalosiau ia i latou ia onosai ma faatuatua o le a tausia e le Atua Ana folafolaga.

  

  2:20

• Ina ia fesoasoani i lau fanau e aoao le upumoni taua i le Kenese 18:14, e mafai ona e tusia upu taitasi mai le fuaiupu muamua o lena fuaiupu i ni fasipepa eseese. Ona faafefiloi lea o pepa, ma valaaulia lau fanau e faatulaga sa’o lelei nei upu. Ona mafai lea ona tou faitauina ma lau fanau le Kenese 17:15–21; 21:1–7 e sue ai se faataitaiga o se mea na faia e le Alii na foliga mai e le mafai. Faasoa atu i lau fanau lou faatuatua o le a faataunuuina e le Alii Ana folafolaga, e tusa lava pe foliga mai e le mafai pe umi foi se taimi e alu ai.

• Fesili i lau fanau e uiga i tulaga e ono valaaulia ai i latou e se tasi e fai se mea latou te iloa e le sa’o. E faapefea ona tatou “sosola ese” mai nei tulaga? Aotele le Kenese 19:15–26 i le faamatala atu na nonofo le aiga o Lota i se aai amioleaga tele, ma na lapataia i latou e agelu ina ia o ese. A o e faitau faatasi ma lau fanau fuaiupu 15–17, 26, fesili atu ia i latou po o le a le uiga mo i tatou i aso nei o le “sola” mai le leaga ma “aua e te tepa i tua” (fuaiupu 17).

• Faaaoga ata o Aperaamo ma Isaako ma le O Le Faasatauroga (tagai i le Tusi Ata o le Talalelei, nu. 9, 57) e mafai ona fesoasoani i lau fanau e faatusatusa le tala o loo i le Kenese 22 ma le taulaga a le Faaola (tagai i le Mataio 27:26–37). O le a se mea e mafai ona tatou aoaoina e uiga i le Tama Faalelagi ma Iesu Keriso mai i tala ia Aperaamo ma Isaako ma le O Le Faasatauroga? (Tagai foi i le “Aperaamo ma Isaako,” i le O Tala o le Feagaiga Tuai, 34–37.)

  

  2:0

• E mafai ona e mafaufau i se taaloga faigofie e taaalo ai ma lau fanau lea e manaomia ai lo latou mulimuli i faatonuga? Atonu o faatonuga e mafai ona taitai atu ai i se ata natia o le Faaola. E mafai ona uunaia e le taaloga se talanoaga e uiga i mea ua poloaiina i tatou e le Tama Faalelagi e fai ina ia mafai ona tatou toe nonofo faatasi ma Ia ma Iesu Keriso. Usu faatasi se pese e faatatau i poloaiga, e pei o le “Tausi Poloaiga” (Tusipese a Tamaiti, 186). E mafai foi ona fesoasoani le itulau o gaoioiga mo lenei vaiaso.