Numera 11–14; 20–24; 27

I le Numera 11:11–17, 24–29, maitau le faafitauli na feagai ma Mose ma le tali na fautuaina atu e le Atua. O le a lou manatu i le uiga o le tala a Mose ina ua ia fai mai e manao “ia fai ma perofeta le nuu uma o Ieova”? (fuaiupu 29). A o e mafaufau loloto i lenei fesili, vaavaai mo tali e ono i ai i le savali a Peresitene Russell M. Nelson “Faaaliga mo leEkalesia, Faaaliga mo o Tatou Olaga” (Liahona, Me 2018, 93–96).

Peitai, o le fai mai e mafai ona tatou maua uma faaaliga, e le faapea ai e mafai ona tatou taitaiina uma tagata o le Atua i le ala na faia e Mose. O le mea na tupu o loo i le Numera 12 ua faamanino ai lenei mea. O a ni lapataiga ua e mauaina i lenei mataupu? O le a se mea e te lagona e finagalo le Alii ia e malamalama i ai e faatatau i faaaliga faaletagata lava ia ma le mulimuli i Lana perofeta?

Tagai foi i le 1 Nifae 10:17; Mataupu Faavae ma Feagaiga 28:1–7; Dallin H. Oaks, “O Laina e Lua o Fesootaiga,” Liahona, Nov. 2010, 83–86.

O nisi tagata ua faateia i le iloaina o Mose, le taitai malosi sa tu i luma o Farao ma faia vavega ofoofogia faatasi ai ma le mana o le Alii, sa “matua agamalu lava” foi (Numera 12:3). O le ale uiga o le avea ma sē e agamalu? Manatu e suesue i le faamalamalamaga a Elder David A. Bednar i le “Agamalu ma Maulalo i le Loto” (Liahona,, Me 2018, 30–33) po o le “Agamalu” i le Taiala i Tusitusiga Paia (Potutusi o le Talalelei).

O le a se mea ua e aoaoina mai faataitaiga a Mose o le agamalu i le Esoto 18:13–25; Numera 11:26–29; Numera 12; Eperu 11:24–27; ma le Mose 1:10–11? Atonu e mafai foi ona outou mafaufau loloto i le ala na faaalia ai e le Faaola le agamalu (tagai i le Mataio 11:29; 27:11–14; Luka 22:41–42; Ioane 13:4–5). O le a se mea o aoao atu e nei faataitaiga ia te oe?

Ao e faitau i le Numera 13–14, taumafai e tuu oe lava i le tulaga o le fanauga a Isaraelu. Aisea e te manatu na latou mananao ai e “toe foi atu i Aikupito”? Numera 14:3). E faapefea ona e faamatalaina le isi “loto” sa i ai ia Kalepo? (Numera 14:24). O le a se mea e faagaeetia ai oe e uiga i le faatuatua o Kalepo ma Iosua, ma e mafai faapefea ona e faaaogaina a laua faataitaiga i tulaga e feagai ma oe?

Na silafia e perofeta o le Tusi a Mamona le tala ua tusifaamaumauina i le Numera 21:4–9 ma malamalama i lona taua faaleagaga. Faitau a latou aoaoga e uiga i lenei tala i le 1 Nifae 17:40–41; Alema 33:18–22; ma le Helamana 8:13–15. O nisi nei o fesili e te mafaufau i ai ao e suesue:

• O le a se mea e mafai ona faatusa i ai le gata apamemea?

• O le a le mea e mafai ona faatusa i ai le u a le gata?

• Na tatau i tagata Isaraelu ona “[vaai] i le gata apamemea” (Numera 21:9) ina ia malolo ai. Aisea e te manatu na mumusu ai nisi tagata e vaai i ai? Pe na tupu ea se mea faapena ia te oe?

• O le a se mea ua e lagona le musuiaina e fai ina ia atili atoatoa ai loa “vaai ae i luga ma le faatuatua i le Alo o le Atua” ma ia malolo ai? (Helamana 8:15).

O le faitauina o nei fuaitau e ono faamanatu atu ai ia te oe isi taimi i tusitusiga paia na manaomia ai e tagata ona taulai atu pea ia Keriso. Mo se faataitaiga, faatusatusa le savali o le Numera 21:4–9 ma le Mataio 14:25–31 ma le 1 Nifae 8:24–28 (tagai foi i ata o loo i le faaiuga o le otootoga o lenei vaiaso). O le ā se mea e foliga mai e aveese ai i tatou mai ia Keriso? E faapefea ona Ia faamanuiaina tagata o e taulai atu pea ia te Ia?

Tagai foi i le “Iesu, a Mafaufau ia Oe” (Viiga,, nu. 76).

Ina ua iloa e Palako, o le tupu o Moapi, na latalata atu tagata Isaraelu, sa valaau atu o ia ia Palaamo, o se tagata sa lauiloa i le faaleoina atu o faamanuiaga ma fetuu. Na mana’o Palako e fetuu tagata Isaraelu. Maitau le ala na taumafai ai Palako e tauanau Palaamo (tagai i le Numera 22:5–7, 15–17) ma mafaufau e uiga i faaosoosoga lua te feagai ia faasagatau atu ai i le finagalo o le Atua. O le a se mea ua faagaeetia ai oe e uiga i tali a Palaamo i le Numera 22:18, 38; 23:8, 12, 26; 24:13? O le mea e faanoanoa ai, na iu lava ina gauai atu Palaamo i le malosi o le tauanau ma faalataina ai Isaraelu (tagai i le Numera 31:16; Iuta 1:11). Mafaufau loloto i auala e mafai ona e tumau faamaoni ai i le Alii e ui lava i tauanauga malosi mai isi.

• Fesili atu i lau fanau pe latou te manatua nisi o vavega na faia e le Alii e fesoasoani ai i tagata Isaraelu (tagai i “O Mala o Aikupito” ma le “O Le Paseka” i Tala o le Feagaiga Tuai, 67–74). Ona mafai lea ona e aoteleina mo i latou le Numera 11:4–10, ma faamamafa atu ua galo i tagata Isaraelu o latou faamanuiaga ma sa faitio. O a faamanuiaga e galo ia i tatou i nisi taimi?

• A o e usuina pe faalogologo i se pese e uiga i le lotofaafetai, e pei o le “Faitau Ou Manuia” (Viiga, nu. 151), e mafai e lau fanau ona tusi ni ata o faamanuiaga ua tuuina mai e le Alii ia i latou.

• Ina ia faailoa atu le Numera 12, e mafai ona e ta’u atu i lau fanau sa le fiafia le Alii ia Arona ma Miriama, le uso ma le tuafafine o Mose. Valaaulia i latou e faitau le Numera 12:1–8 e su’e ai pe aisea. Mafaufau e faaaoga le Tusi Ata o le Talalelei e fesoasoani ai i lau fanau e sue faataitaiga o tagata i tusitusiga paia o e na faaaloalo i le perofeta a le Alii ma sa faamanuiaina. O faapefea ona faamanuiaina i tatou pe a tatou mulimuli i le perofeta a le Alii?

• E mafai ona e faaaogaina le “Mose ma le Gata Apamemea” i Tala o le Feagaiga Tuai, 83–84, e fesoasoani ai i lau fanau e aoao le mea na tupu i le Numera 21:6–9. E faapefea ona pei le gata apamemea o Iesu Keriso? (tagai i le Ioane 3:14–15). Atonu e fiafia lau fanau e fai se gata mai pepa ma tusi ai ni mea faigofie e mafai ona latou faia e “vaai ae i luga ma le faatuatua i le Alo o le Atua” (Helamana 8:15).

  

  1:2

• E mafai e tamaiti matutua taitasi ona filifili se tasi o mau nei ma faasoa mai mea o loo faaopoopo mai e mau nei i lo latou malamalamaaga o le tala: 1 Nifae 17:41; Alema 33:18–20; Helamana 8:13–15; Mataupu Faavae ma Feagaiga 6:36.

• Aotele le Numera 22: 1–18 mo lau fanau, faamamafa le ala na musu ai Palaamo e fetuu tagata o le Atua, e ui lava o Palako, le tupu o Moapi, na ofoina atu ia te ia le mamalu ma oa. Ona mafai lea ona e fesoasoani i lau fanau e sailiili i fuaiupu nei mo fasifuaitau latou te manatu o faaalia ai le naunautai o Palaamo e mulimuli i le Atua: Numera 22:18; 23:26; 24:13. Atonu e mafai e lau fanau ona filifili se fuaitau se tasi latou te fiafia i ai ma tusi i luga o se kata e fesoasoani ai ia latou manatua e usitai i le Alii.