Ruta; 1 Samuelu 1–7

E faigata le olaga o se fafine ua oti lana tane i soo se vaitaimi. Ae ina ua maliu le tane o Ruta, sa matuā faigatā lava lona tulaga. I le aganuu a Isaraelu i lena vaitaimi, o se tamaitai e leai se tane po o ni atalii na leai sona aiā i fanua ma toeitiiti lava a leai se auala e maua ai se mea e tausi ai o ia. Ao e faitau i le tala a Ruta, maitau le ala na liliu ai e le Alii le mala i ni faamanuiaga maoae. O le a se mea e te matauina e uiga ia Ruta atonu na fesoasoani ia te ia? Na faapefea ona faasaoina e Poasa ia Ruta mai lona tulaga faigatā? (tagai i le Ruta 4:4–10). Na faapefea ona pei uma Ruta ma Poasa o Iesu Keriso?

Tagai foi “Be Still, My Soul,” Hymns, nu. 124.

Atonu na e mafatia i se toesega tele, e pei ona sa i ai Ruta ma Naomi (tagai i le Ruta 1:1–5). Pe atonu, e pei o Hana, o loo e moomoo mo ni faamanuiaga e te le’i mauaina lava (tagai i le 1 Samuelu 1:1–10). Na faapefea ona faaalia e nei tamaitai o laua faatuatua i le Atua? O le a se mea ua e aoao mai ia laua faataitaiga?

E moni, e le o tagata uma e tatalo mo se tama ma mauaina, ma e le o tagata uma e feoti taitoalua e toe faaipoipo. Ae o tagata uma e liliu atu i le Faaola e maua Lana fesoasoani ma le taitaiga. Mafaufau pe na faapefea ona e “sau e faatuatua” i le Alii (Ruta 2:12) i le gasologa o ou taimi faigata o le olaga.

Tagai foi i le Amy A. Wright, “Gafatia le Aso ia Keriso,” Liahona, Nov. 2023, 9–11.

Ina ua osofa’ia e o latou fili, e foliga mai na manatu tagata Isaraelu o le na o le iai o le atolaau o le feagaiga o le a puipuia ai i latou. A o e faitauina le 1 Samuelu 4–6, mafaufau pe aisea na le aoga ai lena mea. (Ia matau foi amioga le amiotonu a atalii o Eli, o e na auauna atu o ni ositaulaga i le fale fetafa’i, i le 1 Samuelu 2:12–25.) O le a sou manatu i le mea sa taumafai le Alii e aoao atu i Lona nuu? O le a se mea ua e aoaoina mai le mea na tupu i tagata Filisitia ina ua uma ona mauaina le atolaau? (tagai i mataupu 5–6). O le a se mea ua e aoaoina mai taumafaiga a Isaraelu e toe maua le puipuiga a le Alii i le 1 Samuelu 7?

Atonu e musuia oe i le faitauina o le solo o viiga a Hana i le 1 Samuelu 2:1–10. O le a se mea e te maua mai i ana upu semanu e fesoasoani i atalii o Eli ma e o totoe o isi tagata Isaraelu?

E i ai taimi, atonu e te lagonaina ai le pei o Samuelu, o lē na faalogo i le siufofoga o le Alii ae na te lei iloaina. E pei o i tatou uma, na tatau ia Samuelu ona aoao ia iloa le siufofoga o le Alii. Ao e suesue i le 1 Samuelu 3, o le a se mea e te aoao mai i lenei alii talavou e faatatau i le faalogoina ma usitai i le siufofoga o le Alii? Atonu e mafai foi ona e suesue i nei mau faaopoopo ma fai se lisi o taiala e mafai ona fesoasoani i se tagata e iloa ai le siufofoga o le Alii: 1 Tupu 19:11–12; Luka 24:15–32; 3 Nifae 11:3–7; Mataupu Faavae ma Feagaiga 6:22–23; 8:2–3; 9:7–9.

I nisi taimi, atonu e te lagona ua tapunia le lagi ma e lē finagalo le Atua e fesoota’i atu iā te oe. Na saunoa mai Peresitene Russell M. Nelson: “E finagalo moni ea le Atua e talanoa mai ia te oe? Ioe! (“Faaaliga mo le Ekalesia, Faaaliga mo o Tatou Olaga,” Liahona, Me 2018, 93–96). A o e suesue i le savali a Peresitene Nelson, o le a se mea ua e maua e musuia ai oe e faalogo ma usitai i le siufofoga o le Alii? O le a le mea ua valaaulia oe e Peresitene Nelson e fai, ma o a faamanuiaga ua ia folafola mai? E mafai foi ona e maua valaaulia ma faamanuiaga folafolaina e uiga i faaaliga i le “Savali i le malamalama o le Atua” (Mo Le Malosi o le Autalavou: O Se Taiala mo le Faia o Filifiliga, 16–20). Mafaufau e filifili se mea se tasi e mafai ona e faia e “faateleina ai lou gafatia faaleagaga e maua ai faaaliga.”

• A o e faasoa atu i lau fanau le tala ia Ruta (e mafai ona e faaaogaina le “Ruta ma Naomi” i Tala o le Feagaiga Tuai, 100–103), valaaulia i latou e sii o latou lima i taimi uma latou te faalogo ai i se faatinoga o le agalelei i le tala. E mafai foi ona latou faasoa atu o latou lagona pe a agalelei isi ia i latou, pe agalelei foi i isi. Na faapefea ona agalelei mai le Faaola ia i tatou? E mafai faapefea ona tatou mulimuli i Lana faataitaiga? (tagai i le “O Le Agalelei e Amata Ia Te A’u” Tusipese a Tamaiti, 83).

  

  2:0

• O tala ia Ruta ma Hana e mafai ona musuia ai lau fanau ina ia tumau faamaoni i taimi faigata. Mafaufau e fesoasoani ia i latou e fatu se siata faigofie e i ai ulutala O Tofotofoga, Faatinoga, Faamanuiaga. Ona mafai lea ona outou faitau faatasi le Ruta 1:3–5, 8, 16; 2:1–3, 8–12; 4:13–17; 1 Samuelu 1:1–18 ma tusi i lalo o ulutala mea latou te mauaina i nei fuaiupu. Na faapefea ona faaalia e Ruta ma Hana lo laua faatuatua i le Atua? Ona mafai lea ona faasoa atu e oe po o lau fanau ni faataitaiga o le auala na faamanuiaina ai oe e le Alii i taimi faigata.

• Ina ia aoao e uiga ia Hana, e mafai e lau fanau ona faitau le 1 Samuelu 1:1–18 po o le “Hana” i Tala o le Feagaiga Tuai (104–5) pe matamata i le “Hannah’s Faith” (vitio, Potutusi o le Talalelei). Atonu e malie le togiina o se polo i se tamaitiiti ma valaaulia i latou e faamatala se vaega o le tala a o lei pasia atu le polo i se isi tagata. O le a se mea e mafai ona tatou aoaoina e uiga i le tatalo, mai le faataitaiga a Hana ?

  

  1:15

  

  3:9

• Atonu o se faatinoga faigofie e mafai ona fesoasoani i lau fanau e aoao ai mai le aafiaga o Samuelu i faaaliga. E mafai ona faafoliga le tasi tamaitiiti o Samuelu, ae o le isi e mafai ona faafoliga o Eli a o e faitauina le 1 Samuelu 3:1–10 (tagai foi i le “Samuelu le Perofeta” i le Tala i le Feagaiga Tuai, 106–9, po o le vitio “Samuelu ma Eli,” Potutusi o le Talalelei ). O le a se mea e mafai ona tatou aoao mai ia Samuelu e uiga i le ala e lagonaina ai le siufofoga o le Alii? E faapefea ona faaalia lo tatou naunau e faalogo pe a fetalai mai le Alii ia i tatou?

  

  2:10

  

  2:4

• Fesili i lau fanau e mafaufau pe faapefea ona latou faamatalaina i se tasi le ala e talanoa mai ai le Alii ia i latou. E mafai ona e fesoasoani ia i latou e vaavaai mo tali i le Mataupu Faavae ma Feagaiga 6:22–23; 8:2–3; 9:7–9.