1 Samuelu 17–18; 24–26; 2 Samuelu 5–7

O le tala ia Tavita ma Koliata o se tasi lea o tala e sili ona lauiloa i tusitusiga paia. O le mea moni, e masani ona tatou taula’i atu iā Tavita. A e i le taimi lenei, a o e faitau i le 1 Samuelu 17, mafaufau loloto foi i upu a isi tagata o loo i lenei mataupu (tagai i le lisi o loo i lalo). O le a se mea ua e aoaoina e uiga ia i latou ma o latou faamoemoega? O le a se mea ua e aoaoina e uiga ia Tavita? O faapefea ona ese mai o ia?

• Koliata: fuaiupu 8–10, 43–44

• Eliapo: fuaiupu 28

• Saulo: fuaiupu 33

• Tavita: fuaiupu 26, 32, 34–37, 39, 45–47

O lau tala, e ui e le lauiloa e pei o Tavita, ae e mautinoa lava o le a aofia ai luitau e pei o Koliata e faatoilalo ma avanoa e faaaoga ai le faatuatua i le Alii. O le a se mea ua aoao atu e le faataitaiga a Tavita ia te oe e uiga i le feagai ai ma faigata i lau tala? E mafai foi ona e faitauina le savali a Peresitene Camille N. Johnson “Valaaulia Keriso e Taitai Lau Tala” (Liahona, Nov. 2021, 80–82) ma se tasi o ou luitau i lou mafaufau. Vaavaai mo tali i fesili faapenei: E faapefea ona finagalo le Alii ou te vaai i o’u luitau? Na faapefea ona Ia fesoasoani mai ia te au i le taimi ua tuanai? E mafai faapefea ona ou faaalia ou te faatuatuaina o Ia e tusi la’u tala?

Atonu ua e iloa o loo i ai ni mataupu matautia i se taimi mulimuli ane o le tala a Tavita (tagai, mo se faataitaiga, i le 2 Samuelu 11). Pe ana e maua le avanoa e avatu ai se fautuaga iā Tavita ina ua uma lana taua ma Koliata, o le ā se tala e te fai atua? O faapefea ona faatatau lenei fautuaga i lou olaga?

Tagai foi i le “The Lord Will Deliver Me” (vitio), Potutusi o le Talaleiei.

3:30

E faaopoopo atu i luitau patino, tatou te feagai foi ma faafitauli tetele ma faigata ia e aafia ai le lalolagi atoa. Pe a “faapotopoto faatasi malosiaga o le leaga … e tau” e faasaga i malosiaga o le lelei (1 Samuelu 17:1), atonu tatou te mafaufau pe faapefea e a tatou taumafaiga taitoatasi ona faia se eseesega. O le a le mea ua outou faitau i ai i le tala a Tavita lea e aumaia ia te oe le faamoemoe?

Tagai foi i le “Faamalosi ia i le Galuega Nei,” Viiga, nu. 152.

A o e faitauina le 1 Samuelu 18, mafaufau e faatusatusa ia Saulo ma lona atalii o Ionatana (o lē, pe ana leai Tavita, semanu e manatu o ia e avea ma tupu e sosoo ai). Na faapefea ona tali atu Saulo ma Ionatana i le manuia o Tavita? O le a se mea na e aoaoina mai lenei aafiaga?

O le a se mea o e vaaia i uiga ma faatinoga a Ionatana lea e faamanatu atu ai ia te oe ia Iesu Keriso?

I le 1 Samuelu 24–26, vaavaai mo lesona e uiga i le faamaualuga, faamagaloga, ma le pulea o le tagata lava ia. Atonu foi e te mafaufau e faitau le savali a Elder Mark A. Bragg “Uiga Tamalii FaaKeriso,” o se vaega o lau suesuega (Liahona, Me 2023, 60–63). Na faapefea ona faaalia e Tavita, Apikaila, ma isi—pe le mafai foi ona faaalia—le tamali’i faaKeriso i nei mataupu? O a ni avanoa o e maua e faaalia ai le tamalii faaKeriso?

O le savali a Sister Kristen Yee “Matagofie e Sui A’i Le Lefulefu: O Le Ala o le Faamagalo Atu ma le Faamagalo Mai” (Liahona, Nov. 2022, 36–39) e mafai ona fesoasoani ia te oe e suesue ai le 1 Samuelu 25. E faapefea ona pei Apikaila o Iesu Keriso?

E ui lava ina ua faato’ilaloina e Tavita ia Koliata, ae e le’i uma ona faafitauli ma Filisitia. Ao e faitau i le 2 Samuelu 5:17–25, mafaufau pe faapefea ona fesoasoani le faataitaiga a Tavita ia te oe i luitau lua te fetaia’i (tagai foi i le 1 Samuelu 23:2, 10–11; 30:8; 2 Samuelu 2:1. O faapefea ona faamanuiaina oe e ala i le faatinoina o faaaliga e te maua.

Ina ua ofo atu Tavita e fau se fale, o lona uiga o se malumalu, mo le Alii (tagai i le 2 Samuelu 7:1–3, sa tali mai le Alii e faapea, e moni lava o le a fausia e le atalii o Tavita (tagai i fuaiupu 12–15; tagai foi i le 1 Nofoaiga Tupu 17:1–15). Sa fetalai atu foi le Alii, ae a uma o le a ia fausia se “fale” mo Tavita, o lona uiga o se fanau, ma o lona nofoalii o le a tumau e faavavau (tagai i le 2 Samuelu 7:11, 16, 25–29; Salamo 89:3–4, 35–37). O lenei folafolaga sa faataunuuina ia Iesu Keriso, o lo tatou Tupu Faavavau, o se na tupuga mai ia Tavita (tagai i le Mataio 1:1; Luka 1:32–33; Ioane 18:33–37).

• Atonu e te manao e faaaoga le “Tavita ma Koliata” i Tala o le Feagaiga Tuai, 112–16, e fesoasoani ai i lau fanau ia faamasani i le mea na tupu i le 1 Samuelu 17:20–54. Ona mafai lea ona e tuu atu ia i latou e toe faamatala le tala e faaaoga ai ata po o ata o laina i le otootoga lenei. Fesili atu ia i latou po o le a so latou manatu i le mea e finagalo le Alii latou te aoaoina mai lenei tala.

  

  2:36

• E mafai foi ona e faia ma lau fanau se lisi o nisi o luitau faigata latou te ono feagai i le taimi o o latou olaga. Ona fesoasoani lea ia i latou e sue mea na fai mai ai Tavita e mafai ona fesoasoani i nei luitau (tagai i le 1 Samuelu 17:26, 32, 34–37, 45–47). Tau atu i tamaiti le auala na fesoasoani ai Iesu Keriso ia te oe i taimi o luitau.

• Valaaulia tamaiti e savavali e pei o Tavita o le a tau ma Koliata ao usuina se pese e uiga i le lototele, e pei o le “O Le a Ou Lototoa” (Tusipese a Tamaiti, 85).

• E mafai faapefea ona e fesoasoani i lau fanau e aoao mai le faauoga a Ionatana ma Tavita? O se tasi o auala o le tuu atu lea i tamaiti taitasi o ni fatu pepa se lua, o le tasi e fai ma sui ia Tavita ae o le isi e fai ma sui o Ionatana. Ona faitau faatasi lea ni nai fasifuaitau mai le 1 Samuelu 18:1–4 lea o loo faamamafa ai le alofa na lagonaina e nei uo e toalua mo le tasi ma le isi. Ona mafai lea e lau fanau ona tusi pe tusi i luga o a latou fatu pepa le auala e mafai ona latou faaalia ai le alofa i se uo.

• I nei mataupu, na avea ai Tavita ma tupu o Isaraelu. Atonu o se mea malie mo lau fanau le faafoliga o se tupu po o se masiofo. O a tulafono o le a latou faia? O fea e mafai ona latou o i ai mo se fesoasoani? Fesoasoani i lau fanau ia latou iloa pe a manaomia e Tavita le fesoasoani, na te “fesili atu,” pe tatalo, mo ni tali. Mo se faataitaiga, a o e faitauina le 2 Samuelu 5:19, 23, valaaulia tamaiti e faalogo mo le upu “fesili” ma piilima o latou lima pe a latou faalogo ai. Aisea o le a manaomia ai e Tavita le fesoasoani a le Alii i lana matafaioi fou?

• Tau atu i le tasi ma le isi e uiga i se taimi na e tatalo ai mo se fesoasoani a le Tama Faalelagi. O le a le eseesega na i ai ona ua Ia fesoasoani ia te oe?

• O tupu tatou te faitau i ai i le Feagaiga Tuai na tofu uma lava ma faaletonu ma na muta uma o latou malo. Ae o Iesu Keriso o se Tupu atoatoa ma o le a nofotupu e faavavau. E mafai ona e fesoasoani i lau fanau ia iloa lenei mea e ala i le faitau faatasi o mea na ta’u atu e le perofeta o Natano i le Tupu o Tavita i le 2 Samuelu 7:16–17. E faapefea ona leai se mutaaga o le malo o Tavita? Fesoasoani i tamaiti e sue ma faitau fuaitau o mau lea e aoao atu o Iesu Keriso, o se e tupuga mai ia Tavita, o lo tatou Tupu, e pei o le Luka 1:32–33; Ioane 18:33–37; ma le Faaaliga 19:16. E faapefea ona ese Iesu mai tupu o le lalolagi? E faapefea ona tatou faamamaluina Iesu Keriso o lo tatou Tupu Faavavau?