1 Samuelu 8–10; 13; 15–16

O le1 Samuelu 8 o loo faamatala mai ai se mea na tupu o le a suia ai e faavavau le taunuuga o tagata Isaraelu. Mo le puipuiga mai o latou fili, sa mananao tagata Isaraelu i le mea sa i ai i lo latou tuaoi—o se tupu e pule ia i latou. A o e faitau e uiga i la latou talosaga ma le tali a le Alii, mafaufau po o ai e te vaavaai atu i ai mo le saogalemu ma le taitaiga. Mafaufau po o le a le uiga o le tuu atu i le Alii e fai ma “tupu ia te [oe]” (1 Samuelu 8:7).

I vaiaso a sau, o le a e faitau ai e uiga i le tele o tupu na valaauina e taitai Isaraelu. A o e aoao e uiga ia i latou, mafaufau i fesili nei:

• Na faapefea ona faataunuuina lapataiga a le Alii i le 1 Samuelu 8:10–18?

• Na faapefea ona aafia le fanauga a Isaraelu i la latou filifiliga e fai se tupu faalelalolagi?

• E faapefea ona ese Iesu Keriso mai tupu faalelalolagi? Mafaufau po o a faatosinaga faalelalolagi atonu e manaomia ona e aveesea mai lou olaga ina ia avea ai Keriso ma ou Tupu.

Tagai foi i le “Fiafia, o le Ali’i o le Tupu!,” Viiga, nu. 38.

Faitau e uiga i le auala na filifilia ai e le Atua tupu o Isaraelu i le 1 Samuelu 9–10 ma le 16 (tagai faapitoa i le 9:15–17; 10:1–12; 16:1–13). Vaavaai mo fuaitau lea e fesoasoani ia te oe e malamalama ai i le uiga o le “valaauina e le Atua, e ala i le valoaga” i le Ekalesia a le Alii i aso nei (Mataupu Faavae o le Faatuatua 1:5). Atonu e te mafaufau e tuu oe lava i le tulaga o le taitai o loo tuuina atu le valaauga (Samuelu), le tagata ua valaauina (Saulo ma Tavita), ma tagata ua valaauina i laua e auauna atu i ai (le fanauga a Isaraelu). O le a se mea ua e aoao mai i a la upu ma faatinoga i nei mataupu?

I le mafaufau ai i le foliga matamuli o Saulo i le 1 Samuelu 10, e faateia le faitau e uiga i lona “fouvale” ma le “finauvale” ina ua avea o ia ma tupu (1 Samuelu 15:23). Aisea e te manatu na tupu ai lea mea? I le 1 Samuelu 13:5–14, o a uiga ma amioga ua e vaaia na taitai atu ai i lona paū?

I le 1 Samuelu 15, o le a e faitau ai e uiga i se poloaiga mai le Alii e le’i usitai i ai Saulo ona sa manatu o ia e i ai sona mafuaaga lelei. Ina ia aoao mai filifiliga le lelei a Saulo, vaai i le fuaiupu e 22 ma suia upu “taulaga” ma le “ga’o o le mamoe po’a” i mea e foliga mai e lelei ae e le taua e pei o le faalogo ma le usiusitai i le Alii. Na faapefea ona faamanuiaina oe a o e faamuamuaina le finagalo o le Alii i lou olaga?

Pe na e faia ea se faaiuga e faavae i le “vaai i le tino” o se mea po o se tasi, ae iloa ai sa e sese? Atonu sa e ai i se mea sa le lelei e pei ona foliga mai ai. Pe atonu foi na e faamasinoina se tasi i se tulaga le tonu.

A o saili Samuelu mo se tupu fou o Isaraelu, sa aoaoina o ia e le Alii i se auala e sili atu. Faitau e uiga i ai i le 1 Samuelu 16:6–7, ma mafaufau e fai se lisi o auala e faamasino ai e tagata isi i le “vaai i le tino.” E mafai ona e maua nisi o faataitaiga i le savali a Elder Christophe G. Giraud-Carrier “O i Tatou o Ana Fanau” (Liahona, Nov. 2023, 114–16). O le a le uiga o le vaai “i le loto,” e pei ona faia e le Alii? (1 Samuelu 16:7). E mafai foi ona e maua ni faataitaiga o lenei mea, i le savali a Elder Giraud-Carrier. Atonu e mafai ona e mafaufau i isi taimi na sopoloa ai le silasila a le Faaola i foliga i fafo o se tagata. (Tagai, mo se faataitaiga, Mareko 12:41–44; Luka 5:1–11; 19:1–9; Ioane 4:5–30; Mose 6:31–36.) O a ni mea ua e aoaoina mai i na faataitaiga?

E mafai faapefea ona e mulimuli i le faataitaiga a le Faaola i le ala e te vaai ai i isi—ma oe lava? E ono faapefea ona aafia ai au fegalegaleaiga po o mafutaga ma isi ona o le faia o lea mea? Mafaufau e ta’u atu i se tasi le agalelei ua e vaaia i o latou loto.

Tagai foi i le Ulisses Soares, “Uso e ma Tuafafine ia Keriso,” Liahona, Nov. 2023, 70-73.

• A o e faitauina le 1 Samuelu 8 ma lau fanau, fesoasoani ia i latou e sue mafuaaga na ta’u atu ai e Samuelu i tagata Isaraelu o le i ai o se tupu o se manatu leaga. Aisea e sili atu ai le avea o Iesu Keriso ma o tatou Tupu? Atonu e mafai ona outou faia faatasi se pale pepa ma auauai e tuu i le ulu ma faasoa atu se mea e mafai ona tatou faia e faaali atu ai tatou te mananao ia avea Iesu ma o tatou Tupu. (Tagai foi i le Ieremia 23:5; Mataupu Faavae ma Feagaiga 45:59.)

• O tala i le filifilia e le Atua o Saulo ma Tavita e fai ma tupu e mafai ona fesoasoani i lau fanau ia malamalama pe faapefea ona valaauina tagata e auauna atu i le Ekalesia i aso nei e ala i faaaliga. Ina ia aoao i latou i nei tala, e mafai ona e tusia i lalo mea na tutupu mai tala i luga o fasipepa, ma e mafai e lau fanau ona tuu i le faasologa sao a o outou faitauina faatasi fuaitau o mau (tagai foi i le “Tavita Talavou” i le Tala o le Feagaiga Tuai, 110–11). Ona mafai lea ona e talanoa e uiga i taimi na faamanuiaina ai oe e le Atua i le mana faaleagaga e faataunuu ai se tofiga po o se valaauga (tagai i le 1 Samuelu 10:9–10).

  

  1:16

• Atonu foi o se taimi lelei lenei e aoao ai lau fanau i le mataupu faavae o le faatuatua lona lima. Tau atu ia i latou le auala na e maua ai lou valaauga i le Ekalesia. E faapefea ona e iloa na valaauina oe e le Atua?

• O se lesona o mea faitino e mafai ona fesoasoani i lau fanau ia malamalama ai i le mataupu faavae o loo i le 1 Samuelu 16:7. Mo se faataitaiga, e mafai ona e faaali atu ia i latou ni meaai po o se tusi ma se afifi po o se ufiufi e le fetaui ma le mea o loo i totonu. O le a le mea o loo fautua mai i le 1 Samuelu 16:7 ma le lesona faatino e uiga i le auala tatou te vaai ai ia i tatou lava ma isi tagata? Usu se pese lea e faamamafa ai le mataupu faavae lea, e pei o le “Ia Fealofani,”Tusipese a Tamaiti, 74).

  Faaaoga lesona faitino. A maua e lau fanau se mea e vaai ma pa’i atu i ai e faatatau i se mataupu faavae o le talalelei, o le a sili atu ona latou manatuaina. Mo se faataitaiga, a o e faitauina faatasi ma i latou le 1 Samuelu 16:7 , e mafai ona e tuu atu ia i latou e fesoasoani ia te oe e su’e ni faataitaiga o manatu sese o le vaai e faailoa ai le manatu e tatau ona tatou taumafai e vaai e pei ona vaai le Alii—e ala i le vaai “i le loto”—nai lo faamasinoga e faavae i le vaai “i le tino.”

• E mafai ona e oe ma lau fanau ona faasoa atu se mea na tupu, aafiaga ia na e iloa ai le mafuaaga e tatau ai ona e “vaai i le loto,” ae le na o “le vaai i le tino” (fuaiupu 7). Atonu fo’i e tou te feauauai e ta’u atu i le tasi ma le isi uiga lelei o loo e vaaia i loto o le tasi ma le isi.