2 Samuelu 11–12; 1 Tupu 3; 6–9; 11

O nisi taimi tatou te vaai ai i tagata e foliga mai e malolosi i lo latou faatuatua, ma tatou te manatu e le aafia i latou i faaosoosoga. O filifiliga matautia a Tavita o loo faamatalaina i le 2 Samuelu 11 ua faaalia manino ai e le o le tulaga lea. Mafaufau po o a ni lesona e mafai ona e aoao mai i ona aafiaga. O fesili faapenei e ono fesoasoani ia te oe e suesue ai le 2 Samuelu 11–12:

• O a filifiliga sa faia e Tavita na faapea ona taitai atu ai o ia i lalo o se ala faateteleina o le agasala? Ae o a ni filifiliga amiotonu na ono mafai ona ia faia? (Tagai foi i le vitio “To Look Upon” (Potutusi o le Talalelei).

  

  4:24

  Faaaogaina o vitio E mafai ona fesoasoani vitio ia te oe e vaai faalemafaufau ai i tala mai tusitusiga paia ma mafaufau pe faapefea ona faatatau ia te oe. Mafaufau pe faapefea ona e faaaogaina e faaleleia ai le aoao atu ma le aoaoina. Mo se faataitaiga, a o matamata i le “To Look Upon” (Potutusi o le Talalelei), mafaufau e taofi le vitio i ni vaega eseese e mafaufau loloto ai pe talanoaina nisi o fesili o loo fautuaina mai i lenei gaoioiga.

• E faapefea ona taumafai le fili e taitai oe i ala agasala? O a ni filifiliga e mafai ona e faia i le taimi nei e tumu ai i le saogalemu faaleagaga?

• Matau le tali a Tavita i le tala ia Natano i le 2 Samuelu 12:1–6. O le ā se mea ua fautua mai i lana tali e faatatau i le vaaiga a Tavita iā te ia lava? O le a se mea ua faia e le Alii e fesoasoani ai ia te oe e vaai sa’o atili ia te oe lava ia?

• E faapefea ona e aoteleina mea na tutupu i le 2 Samuelu 11–12 i se lapataiga e tasi le fuaiupu?

O le faitau e uiga i filifiliga leaga a Tavita e mafai ona taitai atu ai oe e aoao e uiga i le matautia o ponokalafi ma agasala faalefeusuaiga. O se punaoa lelei mo lenei mea o le Mo Le Malosi o le Autalavou: O Se Taiala mo le Faia o Filifiliga, aemaise lava vaega ua faaulutalaina “O mea e fai i le taimi nei” ma le “E paia lou tino” (itulau 21–28). Atonu e mafai ona e vaavaai i lena punaoa mo fautuaga semanu e fesoasoani ia Tavita e faia ai ni filifiliga sili atu. Pe mafai foi ona e faitauina le “O le a fesoasoani Iesu Keriso ia oe” (itulau 6–9), ma vaavaai mo se mea semanu e fesoasoani ia Tavita e toe foi atu ai i le Alii.

Mafaufau e usu se viiga e pei o le “Ua Naunau ia te Oe” (Viiga. nu. 57) ma mafaufau loloto pe na faapefea ona faamalosia oe e le Faaola pe a e feagai ma faaosoosoga.

Tagai foi i le 2 Nifae 28:20–24; Ulisses Soares, “Saili Atu ia Keriso i Mafaufauga Uma,” Liahona, Nov. 2020, 82–85; “Puleaina o Tekinolosi,” Potutusi o le Talalelei; “Watch Your Step” (vitio), Potutusi o le Talalelei.

2:47

Afai e fai mai le Alii ia te oe, “Ina fai mai ia, pe se a se mea ou te avatu ia te oe” (1 Tupu 3:5), o le a se mea e te fai atu ai? O le a se mea ua faagaeetia ai oe i le talosaga a Solomona? Mafaufau loloto pe aisea ua avea ai “le loto matala” e “iloatino ai le lelei ma le leaga” (fuaiupu 9) o se meaalofa taua tele. O a ni mea e mafai ona e faia e sailia ai lenei meaalofa?

Tagai foi i le Moronae 7:12–19.

I le 1 Tupu 6–7 o le a e maua ai se faamatalaga auiliili o le maota paia lea na fausia e Solomona mo le Alii. Atonu e foliga mai e lē tāua tele iā te oe faamatalaga e pei ona sa i ai i tagata Isaraelu anamua. Ae o le faitauina o nei mataupu e ono e maua ai se lagona mo le taua tele ia i latou o le i ai o se maota o le Alii. Aisea e taua ai ia te oe?

Atonu e te mafaufau loloto po o ā mea e ono faatusa i ai vaega eseese o le malumalu o Solomona. Mo se faataitaiga, mafaufau po o le a le mea e ono faatusa i ai kerupi, laau, ma fugalaau i le 1 Tupu 6:35 . (Tagai foi i le Kenese 3:24.)

O leMataupu e 8 o loo tusifaamaumauina ai le tatalo a Solomona ina ua mae’a le malumalu (tagai i fuaiupu 22–61). Mafaufau e fai se lisi o faamanuiaga na talosagaina e Solomona. O le a se mea ua faagaeetia ai oe e uiga i nei faamanuiaga? (Ia matau foi folafolaga a le Alii i le 1 Tupu 6:11–13; 9:1–9.) Afai sa e alu i le maota o le Alii, mafaufau i ou aafiaga i le tapuai ai iina. Na faapefea ona fesoasoani le tausia o feagaiga o le malumalu ia te oe e maua ai faamanuiaga a le Alii?

Tagai foi i le Mataupu Faavae ma Feagaiga 109; Henry B. Eyring, “Ou te Fia Vaai i le Malumalu,” Liahona, Me 2021, 28–31.

O le a le uiga o le “ia atoatoa lou loto … ia Ieova”? (1 Tupu 8:61). Pe ese lena mai a tatou faatinoga ua atoatoa? E faapefea? Faitau le 1 Tupu 11:1–11, ma matau le fetalaiga a le Alii e uiga i le loto o Solomona. Atonu e te mafaufau loloto pe o i ai ni faatosinaga i lou olaga e mafai ona liliu ese ai lou loto mai le Alii ae agai atu i “isi atua.”

• “O leTupu o Tavita” i Tala o le Feagaiga Tuai, 117–20, e mafai ona fesoasoani ia te oe e faamatala ai i lau fanau le tala i le 2 Samuelu 11. Atonu e te fai atu i lau fanau e faailoa mai filifiliga sese na faia e Tavita ma fautua mai ni filifiliga lelei semanu e mafai ona ia faia. O a ni mea e mafai ona tatou faia pe a faaosoosoina i tatou lea e mafai ona fesoasoani ia i tatou e filifili le mea sa’o?

  

  2:11

• O le faitau e uiga i agasala matautia a Tavita atonu o se avanoa lelei lea e talatalanoa ai i ogaoga matautia o ponokalafi. Matamata le vitio “What Should I Do When I See Pornography?” (Potutusi o le Talalelei) o loo i ai se taitaiga aoga. Fesoasoani i lau fanau ia faia se fuafuaga e uiga i mea o le a latou faia pe a latou tau i ponokalafi.

  

  5:46

• A o e aoao ma lau fanau e uiga i le faapaiaga o le malumalu i le 1 Tupu 8, e mafai ona e vaai i ata o malumalu i le otootoga o lenei vaiaso. Tuu atu i lau fanau e talanoa e uiga i mea ua latou vaaia i ata. E mafai ona e faamamafaina fuaiupu 57–58. O le a le uiga o le “savali i ala uma [o le Alii”? (1 Tupu 8:58). Atonu e mafai e lau fanau ona faia se laasaga mo tali taitasi latou te tuuina mai.

• Ta’u atu i lau fanau pe faapefea e le tausia o feagaiga e te osia i le malumalu ona fesoasoani ia te oe e savavali ai i ala o le Alii. E mafai ona e ta’u atu ia i latou po o a nei feagaiga (tagai i le Tusitaulima Aoao, 27.2, Potutusi o le Talalelei). E mafai foi ona outou usuina faatasi se pese e pei o le “Ou te Fia Vaai i le Malumalu” (Tusipese a Tamaiti, 99).

• O le faitau e uiga i le auala na tosinaina ai e avā a Solomona o ia e ono mafai ona taitai atu ai i se talanoaga e uiga i faataitaiga o “isi atua”—po o mea e tapuai i ai tagata pe alolofa i ai nai lo le Alii. E faapefea ona tatou faaalia lo tatou alolofa ia te Ia e sili atu nai lo se isi lava mea i o tatou olaga?