1 Tupu 12–13; 17–22

E faapefea ona e faamatalaina le mea sese na faia e le Tupu o Reopoamo, le atalii o Solomona, i le 1 Tupu 12:1–14? O ā uiga faaKeriso na ono mafai ona fesoasoani ia Reopoamo e faasaoina ai lona malo? (tagai i le fuaiupu 7; Mataio 20:25–28; Mosaea 2:10–21). E mafai faapefea ona e faaaogaina nei uiga o se taitai—pe i se valaauga i le Ekalesia po o se taitai o lou lava olaga?

Sa talosagaina e le perofeta o Elia se fafine ua oti lana tane e avatu muamua ni meaai ma ni vai mo ia ona faatoa aai ai lea o ia ma lana tama tama ua matelaina. Aisea o le a ia faia ai lena mea? O le talosaga a Elia e mafai foi ona vaaia o se faamanuiaga mo lenei aiga ausane. Sa laua manaomia faamanuiaga a le Alii, ma o le ositaulaga e aumaia ai faamanuiaga—e aofia ai faamanuiaga o le faatuatua malosi atu.

A o e faitauina le 1 Tupu 17:8–16, vaai faalemafaufau o oe o lenei fafine ua oti lana tane. O le a se mea e faagaeetia ai oe e uiga ia te ia? E mafai foi ona e faia se lisi o filifiliga e manaomia ai le faatuatua ia Iesu Keriso (mo ni faataitaiga, tagai i le Mo Le Malosi o le Autalavou: O Se Taiala i le Faia o Filifiliga [2022]). O a mea ua e aoao mai i lenei fafine ua oti lana tane e uiga i le faaaogaina o le faatuatua?

E faapefea ona talitutusa amioga a Elisaia i le 1 Tupu 19:19–21 ma amioga a le fafine ua oti lana tane?

Mafaufau i osigataulaga na e faia e mulimuli ai i le Faaola. O le a le mea o i le 1 Tupu 17:8–16; 19:19–21 e aoao atu ia te oe e uiga i nei osigataulaga? E faapefea e lou malamalama i le Faaola ona fesoasoani ia te oe pe a Ia fesiligia i tatou e faia ni osigataulaga? Na faapefea ona ia faamanuiaina oe?

Tagai foi i le Mataio 4:18–22; 6:25–33; Luka 4:24–26; “Elijah and the Widow of Zarephath” (vitio), Potutusi o le Talalelei; “Ou te le Masalo,” Viiga, nu. 67.

10:12

Atonu na manatu tagata Isaraelu e iai mafuaaga lelei e tapua’i ai iā Paala, o lē sa lauiloa o le atua o afā ma timuga. Ina ua mavae le tolu tausaga o le lamala, sa latou matuā mana’omia lava le timu. Ma o le tapuai ia Paala sa taliaina faaleagafesootai ma faalauiloa e le tupu ma le masiofo. A o e faitauina le 1 Tupu 18, mafaufau pe aisea atonu e le mautonu ai se tasi i o tatou aso e uiga i le mulimuli i le Alii. I lenei mataupu, o le a sou manatu i le mea sa taumafai le Alii e aoao atu e uiga ia te Ia lava? O a ni aafiaga na fesoasoani ia te oe e te tuuto atu ai e mulimuli i le Faaola?

Tagai foi D. Todd Christofferson, “Filifiliga ma le Tautinoga” (faigalotu i le lalolagi atoa mo talavou matutua, 12 Ian., 2020), Potutusi o le Talalelei.

O le mea e faanoanoa ai, o le vavega i luga o le Mauga o Karamelu e lei faafaigofieina ai le misiona a Elia. O le mea moni, sa lamatia lona ola, ma sa tatau ona lafi o ia i se ana i le vaomatua. O iina, i le tauivi ai ma le tuuatoatasi ma le lotovaivai, sa ia maua ai se aafiaga ma le Alii, lea sa matuai ese lava mai le aafiaga i luga o le Mauga o Karamelu. O le a se mea ua e aoao ai mai le aafiaga o Elia i le 1 Tupu 19:1–18 e uiga i le ala e fesootai mai ai le Alii ia te oe i taimi o ou mafatiaga?

Mafaufau loloto i taimi e te lagona ai ua fetalai mai le Alii ia te oe. E faapefea ona e faamatalaina le auala e fesootai mai ai o Ia ia te oe? Aisea e avea ai upu “filemu” ma le “itiiti” o ni auala lelei e faamatala ai le siufofoga o le Agaga? O a isi upu e te maua i le Helamana 5:30; Mataupu Faavae ma Feagaiga 6:22–23; 11:12–14? O a ni mea e tatau ona e faia ia maua soo ai le taitaiga a le Alii?

tagai foi i le Salamo 46:10.

• Ina ia fesoasoani i lau fanau e aoao i tala o le faatuatua i le 1 Tupu 17, e mafai ona e faaali atu ia i latou ni ata po o ni mea faitino e faataitai ai tala, e pei o manulele, falaoa, po o se tamaitiiti. A o e faamatala atu i lau fanau nei tala, valaaulia i latou e sue le ata po o le mea faitino e o faatasi ma tala taitasi. “Elia le Perofeta” (i Tala o le Feagaiga Tuai, 121–24) e mafai ona fesoasoani ia te oe e faamatala ai nei tala. O a ni mea o aoao mai ia i tatou e nei tala e uiga i le faaalia o le faatuatua ia Iesu Keriso?

  

  1:58

• Fesoasoani i lau fanau e mafaufau i auala e mafai ona latou faaalia ai lo latou faatuatua ia Iesu Keriso. Usu faatasi ma i latou se pese e uiga i le faatuatua, e pei o le “I Have Faith in the Lord, Jesus Christ” (Potutusi o le Talalelei), ma faasoa atu i le tasi ma le isi mea ua e aoaoina e uiga i le faatuatua mai le pese.

• Atonu e mafai e lau fanau ona tusi se ata o le mea na fetalai mai ai le Alii i le fafine ua oti lana tane e tuuina atu ia Elia (tagai i le 1 Tupu 17:12–13) ma le mea na maua e le fafine ua oti lana tane o le tali lea (tagai i le 1 Tupu 17:15–16). (Tagai foi i le itulau o gaoioiga o lenei vaiaso.) E mafai foi ona latou vaavaai mo ata o isi tagata o e na lafoaia se mea sa latou mananao i ai mo se mea e sili atu ona lelei. Valaaulia lau fanau e sue ni ata i le Tusi Ata o le Talalelei po o le Sau, Mulimuli Mai ia te A’u. O le a le mea o finagalo le Alii tatou te ositaulagaina? E faapefea ona ia faamanuiaina i tatou?

• A o outou faitauina faatasi le 1 Tupu 18:17–39 e mafai e lau fanau ona filifili se fuaiupu ma tusi se ata o le mea o loo faamatalaina ai. E mafai ona latou faaaoga a latou ata e faamatala ai le tala ia latou lava upu. (Tagai foi “Elia ma Ositaulaga a Paala,” i Tala o le Feagaiga Tuai, 125–28.)

  

  2:17

• Fesoasoani i lau fanau e mafaufau i ni tulaga atonu latou te manaomia ai ona filifili pe mulimuli ia Iesu Keriso pe leai. Atonu e mafai ona latou tusia ni ata o i latou lava o faia le filifiliga sa’o. Faasoa atu i le tasi ma le isi le mafuaaga ua e filifili ai e mulimuli ia Iesu.

• A o e aoteleina le 1 Tupu 19:9–12, valaaulia lau fanau e fai ni faatinoga e faatusa i le matagi malosi, mafuie, ma le afi. Ona valaaulia lea o i latou e nonofo filemu a o outou faapea mai faatasi, i se leo filemu, “e mulimuli i le afi o le leo filemu ma le itiiti” (fuaiupu 12). (Tagai foi i le “Ua Fetalai le Alii ia Elia,” i Tala o le Feagaiga Tuai, 129–31.) Faamatala i lau fanau ni taimi na e oo ai i aafiaga o le le leo filemu ma le itiiti o le Agaga Paia.

  

  1:48

• Usu faatasi se pese e uiga i le Agaga, e pei o le “O le Agaga Paia” (Tusipese a Tamaiti, 56). O le a se mea e mafai ona faalavelaveina i tatou mai le iloaina o le Agaga? O le a se mea e mafai ona fesoasoani ia i tatou e faalogo ia te Ia?