2 Tupu 16–25

O le toatele o i tatou ua i ai aafiaga ia na luitauina ai o tatou faatuatua. Mo Esekia ma ona tagata, o se tasi o na luitau na o’o mai ina uao atu le ’autau a Asuria i Ierusalema. Ao e faitau i le 2 Tupu 18–19, vaai faalemafaufau e faapea sa e nofo i Ierusalema i le aluga o lenei taimi. O a ni ou lagona, mo se faataitaiga, i le faalogo atu i tauemuga a Asuria i le 2 Tupu 18:28–37; 19:10–13? O le a se mea e te faia? Faatusatusa mafuaaga a Asuria mo tagata Isaraelu e le faatuatuaina ai le Alii ma mafuaaga ua tuuina mai e Satani mo i tatou e masalosalo ai i lo tatou faatuatua i aso nei. E mafai foi ona e faatusatusaina mafuaaga o Asuria ma ou mafuaaga ua e faatuatuaina ai le Alii.

O le a se mea e te aoao mai i le mea na faia e Esekia i lea tulaga? (tagai i le 2 Tupu 19:1–7, 14–19). Na faapefea ona tali atu le Alii? (tagai i le 2 Tupu 19:35–37). Aisea e te manatu na tumau ai le faamaoni o Esekia? (tagai i le 2 Tupu 18:5–7). Mafaufau loloto pe na faapefea ona lagolagoina oe e le Alii i taimi o le luitauina. O le a se mea ua e lagona le musuia e fai ina ia faatupulaia ai lou faatuatua ia te Ia?

O le savali a Peresitene Jeffrey R. Holland: “Aua E Te Fefe: Tau Ina E Faatuatua!” (Liahona, Me 2022, 34–36) o loo i ai fautuaga aoga mo taimi o le fefe po o le masalosalo. O se viiga e pei o le “Faamalosi ia i le Galuega Nei” (Viiga, nu. 152) e mafai foi ona i ai ni savali faamalosiau. O a ni mea na e maua mai i nei punaoa lea e mafai ona fesoasoani ia te oe?

Tagai foi i le 2 Nofoaiga a Tupu 31–32; 3 Nifae 3–4; Jörg Klebingat, “Avea ma Soo Lototoa i Aso e Gata Ai,” Liahona, Me 2022, 107–10.

Sa i ai ia Salemanesa, le tupu o Asuria, se mafuaaga lelei e talitonu ai o le a manumalo lana autau i Ierusalema (tagai i le 2 Tupu 17; 18:33–34; 19:11–13). Ae sa i ai se savali a le Alii e faatatau ia Salemanesa, na tuuina mai e ala mai i le perofeta o Isaia. O loo faamaumauina i le 2 Tupu 19:20–34. O a ni upumoni e te maua i le savali a le Alii lea e fesoasoani e te maua ai le faatuatua ia te Ia ma Lana fuafuaga?

Pe na e lagonaina ea e i ai se mea faaleagaga e le o ia te oe? Atonu na e lagonaina e faapea o lau sootaga ma le Atua e mafai ona malosi tele atu. O le a se mea na fesoasoani e te toe saili atu ai ia te Ia ma Lana tosinaga? Mafaufau loloto i nei fesili ao e faitau le 2 Tupu 21--23, e uiga i le ala na o ese ai le Malo o Iuta mai le Alii i lalo o le Tupu o Manase (tagai i le 2 Tupu 21) ma le ala na fesoasoani ai le Tupu o Iosia i tagata e toe liliu atu ia te Ia(tagai i le 2 Tupu 22–23). Na faapefea ma aisea na suia ai Iosia ma lona nuu? (tagai i le 2 Tupu 22:8–11; 23:1–6, 21, 24).

Na ta’ua e Peresitene Spencer W. Kimball le tala i le Tupu o Iosia “o se tasi lenei o tala pito sili o tusitusiga paia uma” (Aoaoga a Peresitene o le Ekalesia: Spencer W. Kimball [2006], 62). Faitau upu a Peresitene Kimball e uiga i le Tupu o Iosia (itulau 62–64). Atonu e mafai ona e mafaufau i se aafiaga na “galue malosi” ai se fuaitau o mau i totonu ia te oe. O le a se mea e mafai ona e faia e maua ai nisi aafiaga faapena?

Tagai foi i le Alema 31:5; “Josiah and the Book of the Law” (vitio), Potutusi o le Talalelei.

12:36

O le a se mea e faagaeetia ai oe e uiga i le feagaiga na osia e Iosia i le 2 Tupu 23:3? A o faaauau pea ona e faitauina le mataupu 23, matau le mea na faia e Iosia e faaali atu ai lona tuuto i le Alii (tagai foi i le ata i le faaiuga o lenei otootoga). E faapefea ona e faaalia lou tuuto ia te Ia?

• I le 2 Tupu 18:3, 5–6, fesoasoani i lau fanau ia iloa po o a uiga patino ma auaumama na avea ai Esekia ma tupu lelei. A o outou faitau faatasia le 2 Tupu 19:14–19, e mafai ona latou iloa ai le auala na ia faaalia ai sa ia faatuatuaina le Alii. E mafai ona e vaai i se ata o Iesu ma talanoa e uiga i le mafuaaga e mafai ai ona tatou faatuatuaina o Ia. E faapefea ona tatou faʻaali atu tatou te faatuatuaina le Alii?

• I le 2 Tupu 22:1, fesoasoani i lau fanau ia iloa le matua o Iosia i le taimi na avea ai o ia ma tupu. O le a se mea ua tatou aoaoina e uiga ia Iosia i le fuaiupu 2? Mafaufau i se gaoioiga e mafai ona faaalia ai le mulimuli i le Alii ma le le liliu “ese i le itu taumatau po o le itu tauagavale.”

• O le aufaigaluega o loo faamatalaina i le 2 Tupu 22:3–7 sa faatuatuaina i tupe na faaaoga e toe fau ai le malumalu “aua ua latou faia ma le faamaoni lava” (fuaiupu 7). A uma ona faitau nei fuaiupu, e mafai ona tou talanoa ma lau fanau e uiga i mea na faatuatuaina ai oe. E mafai faapefea ona faatuatuaina i tatou e pei o le aufaigaluega o loo i nei fuaiupu?

• Ina ia faailoa atu le tala i le Tupu o Iosia i le 2 Tupu 22–23, e mafai ona e nanāina se kopi o tusitusiga paia i se mea i totonu o le potu. Valaaulia lau fanau e saili ia maua. Ona mafai lea ona e faasoa atu le mea na tupu ina ua maua e se tasi o faitaulaga a Iosia tusitusiga paia i totonu o le malumalu (tagai i le 2 Tupu 22:8–11; tagai foi i le “Tupu o Iosia” i Tala o le Feagaiga Tuai, 148–49). Faamata o le a le mea e ono tupu ia i tatou pe a na tatou le mauaina tusitusiga paia? Faasoa atu i le tasi ma le isi le mafuaaga ua e fiafia ai ua tatou maua tusitusiga paia i le asō.

  

  1:36

• A uma ona faitau le 2 Tupu 23:2–3, e mafai ona tou talanoa ma lau fanau e uiga i ni mau ua musuia ai oe e “mulimuli atu ia Ieova” (fuaiupu 3). E mafai fo’i ona outou usuina se pese e faatatau i tusitusiga paia, e pei o le “Saili, Mafaufau Loloto, ma Tatalo” (Tusipese a Tamaiti, 66).

• Ina ua iloa e Iosia ma ona tagata tulafono a le Atua, na latou osia se feagaiga e ola ai. Faitau e uiga i lea mea ma lau fanau i le 2 Tupu 23:1–3, ma fesoasoani ia i latou e sue upu po o fasifuaitau o loo faaalia ai lagona o tagata e uiga i poloaiga a le Alii. Atonu e mafai e lau fanau ona tutū ma talanoa e uiga i mea e mafai ona faauiga i ai le “[auga] i le feagaiga.” Valaaulia i latou e savavali i le mea o tutū ai ma talanoa e faatatau i le faauigaina o le “mulimuli atu ia Ieova.” O le isi mea e sosoo ai, e mafai ona tuu o latou lima i luga o o latou fatu ma fautua mai ni auala e mafai ai ona tatou tausia a tatou feagaiga “ma o [tatou] loto atoa.”