“Iesu Ua Fetalai Isaraelu, ‘O Mai’”

O ni nai taimi i le va o le pe a o le 735 ma le 720 TLM, na osofaia ai e Asuria le Malo i Matu o Isaraelu, o le nofoaga o ituaiga e sefulu, o ituaiga e sefululua, ma ave faatagataotaua ai le faitau afe o tagata Isaraelu i vaega eseese o le Malo o Asuria. Na oo ina ta’ua tagata Isaraelu o “ituaiga ua leiloloa” o se vaega ona sa aveesea mai i latou mai lo latou laueleele ma faataapeapeina solo i isi atunuu. Ae sa leiloloa foi i latou i se faauigaga loloto atu: i le aluga o le taimi na leiloa ai lo latou faalagiga o le faasinomaga o le nuu o le feagaiga a le Atua.

Na iu lava foi ina liliuese mai le Alii le toatele o tagata i le Malo i Saute o Iuta i lo latou le toe mulimuli i poloaiga a le Alii. Sa osofaia ma faatoilaloina foi e Asuria le tele o lena malo; na o Ierusalema na faasaoina faavavega. Mulimuli ane, i le va o le 597 ma le 580 T.L.M., na faaumatia ai e Papelonia Ierusalema, e aofia ai le malumalu, ma ave faatagataotaua ai le to’atele o tagata. Pe a ma le 70 tausaga mulimuli ane, na faatagaina ai e na totoe o Iuta e toe foi i Ierusalema ma toe fausia le malumalu. Ae peitai, o le toatele o tagata sa nonofo ai lava i Papelonia.

A o mavae atu augatupulaga, o le fanauga a Isaraelu mai ituaiga uma sa “faataapeape … i nuu uma na latou le iloa” (Sakaria 7:14). O nisi o tagata o Isaraelu na taitai ese atu e le Alii i isi laueleele. O isi o tagata o Isaraelu na tuua Isaraelu ina ia sosola ese mai le pueina po o mafuaaga faapolokiki po o le tamaoaiga.

Tatou te ta’ua nei mea na tutupu o le faataapeapeina o Isaraelu. Ma e taua le iloa e uiga i le faataapeapeina mo ni nai mafuaaga. Mo se tasi o mea, o le autu iloga o le Feagaiga Tuai: O le toatele o perofeta o le Feagaiga Tuai o ni molimau vaaitino ia i le tifato faaleagaga lea na oo atu ai i le faataapeapeina o Isaraelu. Sa muai vaai i ai latou o perofeta ma lapatai mai e uiga i ai. O nisi o i latou na oo lava ina ola ai. E aoga le manatua o lena mea pe a e faitau i tusi a Isaia, Ieremia, Amosa, ma le tele o isi perofeta i le vaega mulimuli mai o le Feagaiga Tuai. Faatasi ai ma lena vaaiga i le mafaufau, a e faitau i a latou valoaga e uiga ia Asuria ma Papelonia, o le ifo i tupua ma le faatagataotauaina, tuufuaina ma iu ai i le toefuataiga, o le a e iloa ai le mea o loo latou talanoa mai ai.

O le malamalama i le faataapeapeina o Isaraelu o le a fesoasoani e te malamalama lelei ai foi i le Tusi a Mamona, aua o le Tusi a Mamona o se faamaumauga o se lalā o Isaraelu na faataapeapeina. O lenei faamaumauga o loo amata i le sosola ese o le aiga o Liae mai Ierusalema i le pe tusa o le 600 TLM, ae le’i leva lava ae osofai atu loa Papelonia. O Liae o se tasi lea o na perofeta sa vavalo e uiga i le faataapeapeina o Isaraelu. Ma sa fesoasoani lona aiga e faataunuu lena valoaga, i le aveina o le latou lala o le aiga o Isaraelu ma totoina i le isi itu o le lalolagi, i le atu Amerika.

Ae peitai, o le faataapeapeina o Isaraelu, ua na o le afa lena o le tala. E le galo i le Alii Lona nuu, pe tuulafoaia atoa e Ia i latou, e tusa lava pe ua latou tuulafoaia o Ia. O le tele o valoaga e faapea, o le a faataapeapeina Isaraelu na o mai faatasi ai ma le tele o folafolaga o le a i ai se aso e faapotopoto mai ai i latou e le Atua.

O lena aso, o le asō—o o tatou aso. O lea ua amatalia le faapotopotoga. I le 1836, e faitau afe tausaga talu ona mavae le faapotopotoina e Mose o le fanauga a Isaraelu i le auvae o le Mauga o Sinai, na faaali mai ai Mose i le Malumalu o Katelani e tuuina mai ia Iosefa Samita “ki o le faapotopotoina o Isaraelu mai vaega e fa o le lalolagi” (Mataupu Faavae ma Feagaiga 110:11). O le taimi nei, i lalo o le taitaiga a i latou o e ua umia nei ki, ua faapotopotoina mai ai ituaiga o Isaraelu mai atunuu uma o loo mafai ona o atu i ai auauna a le Alii.

Na ta’ua e Peresitene Russell M. Nelson lenei faapotopotoina “o le mea aupito sili ona taua ua faia i le lalolagi i aso nei. E leai se isi mea e faatusalia i lona maoae, e leai se isi mea e faatusalia i le taua, e leai se isi mea e faatusalia i le malualii. Ma afai e te filifili e, pe afai e te manao ai, e mafai ona avea oe o se vaega taua o lena mea.”

E mafai faapefea ona tatou fesoasoani atu? O le a le uiga o le ia faapotopoto Isaraelu? O lona uiga ea o le toefuataiga o ituaiga e sefululua i le laueleele sa latou nofoia? O le mea moni, e matuai sili atu lona uiga, e matuai sili atu ona faavavau. E pei ona faamalamalama mai e Peresitene Nelson:

Pe a tatou talanoa i le faapotopotoina, ua na ona tatou fai atu lava o lenei upumoni faavae: o tagata uma o fanau a lo tatou Tama Faalelagi, i itu uma o le veli, e tatau ona faalogo i le savali o le talalelei toefuataiina a Iesu Keriso. …

“Soo se taimi e te faia ai soo se mea e fesoasoani ai i soo se tasi—po o le fea lava le itu o le veli—e laa ai agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. E faigofie lava.”

E tupu lenei mea, e pei ona fai mai Isaia, “e taitoatasi” (Isaia 27:12) po o le, e pei ona valoia e Ieremia, “e taitasi i aai, ma le taitoalua i aiga” (Ieremia 3:14).

O le faapotopotoina o Isaraelu o lona uiga o le toe aumaia o le fanau a le Atua ia te Ia. O lona uiga o le toefuataiga o i latou i lo latou sootaga faafeagaiga ma Ia. O lona uiga o le toefaatuina o le “nuu paia” lea ua leva ona Ia fuafuaina e faatuina (Esoto 19:6).

I le avea ai ma se tasi ua osia se feagaiga ma le Atua, o oe o se vaega o le aiga o Isaraelu. Ua faapotopotoina mai oe, ma o oe o se tagata e faapotopotoa. O le tala iloga ua leva ona i ai i le tele o seneturi o tagata o le feagaiga ua faasolo ina oo atu ina faataunuuina, ma o oe o se tagata auai e sili ona taua. O le taimi lenei o “Iesu ua fetalai Isaraelu, ‘O mai.’”

O le savali lenei a le au faapotopoto: O mai i le feagaiga. O mai i Siona. O mai ia Iesu Keriso, le Paia o le Toatasi o Isaraelu, ma o le a Ia aumaia oe i le Atua, lou Tama.