විනිශ්චයකාරයන්ගේ පොත 2–4; 6–8; 13–16

විනිශ්චයකාරයන්ගේ පොත අනතුරු ඇඟවීමක් මෙන්ම දිරිගැන්වීමක් වෙන්න පුළුවන්. ඔබ විනිශ්චයකාරයන්ගේ පොත 2:1–19; 3:5–12 කියවන විට මෙම අනතුරු ඇඟවීම සහ දිරිගැන්වීම සොයන්න. මෙම අනතුරු ඇඟවීම සහ දිරිගැන්වීම ඔබට අදාළ වන බව ඔබට හැඟෙන්නේ කෙසේද?

උදාහරණයක් වශයෙන්, විනිශ්චයකාරයන්ගේ පොත 2:19 පුරාණ ඉශ්‍රායෙල්වරුන් ගැන නොව ඔබ සහ ඔබේ පරීක්ෂාවන් ගැන වන්නේ නම්, එයින් කුමක් කියවෙයිද? විනිශ්චයකාරයන්ගේ පොත 3:9 ඔබව ගලවා ගැනීමට ස්වාමින්වහන්සේ කළ දේ ගැන නම්, එයින් කුමක් කියවෙයිද?

යෞවනයේ ශක්තිය සඳහා: තේරීම් කිරීම සඳහා මාර්ගෝපදේශයක් 9 වෙනි පිටුවේ ඇති ප්‍රශ්නය සහ පිළිතුරු කියවීම ගැන සලකා බලන්න. ඔබට හැඟෙන ලෙස, විනිශ්චයකාරයන්ගේ පොතේ ඉශ්‍රායෙල්වරුන්ගේ අත්දැකීම්වලට මෙය අදාළ වන්නේ කෙසේද? යේසුස් ක්‍රිස්තුස්වහන්සේ ගැන මෙයින් ඔබට උගන්වන්නේ කුමක්ද?

සමහර විට එක් පුද්ගලයෙකුගේ ඇදහිල්ල තවත් බොහෝ දෙනෙකු තුළ ඇදහිල්ල සඳහා පෙළඹවීමක් වෙන්න පුළුවන්. විනිශ්චයකාරයන්ගේ පොත 4 තුළ, එම එක් පුද්ගලයා වන්නේ දෙබොරා යි. විනිශ්චයකාරයන්ගේ පොත 4:1–15 තුළ ඇය ගැන කියවා, ඇය අවට සිටින පුද්ගලයින්ට ඇය නිසා ඇති වූ බලපෑම සැලකිල්ලට ගන්න. ඇයගේ අත්දැකීම් ඔබේ ජීවිතයට අදාළ වන්නේ කෙසේදැයි සලකා බැලීමට ඔබට උපකාර වන ප්‍රශ්න කිහිපයක් මෙන්න:

• ඒ කාලයේ ඉශ්‍රායෙල්වරුන් සිටි තත්වයන් ඔබ විස්තර කරන්නේ කෙසේද? (බලන්න 1–3 පද). පුද්ගලයන් සහ සමාජය තුළ ඇති—අද තත්ත්වයන් සමඟ ඔබ දකින සමානකම් මොනවාද?

• දෙබොරාට ස්වාමින්වහන්සේ කෙරෙහි ඇදහිල්ල තිබූ බව ඔබට පෙන්වන්නේ ඇගේ කුමන වචන හෝ ක්‍රියාවන්ද? ඇගේ ඇදහිල්ල අන් අයට බලපෑවේ කෙසේද? ඇය ගැන ඔබව විශ්මයට පත් කරන තවත් දේවල් මොනවාද?

• ඔබ සිතනා ලෙස, 14 වෙනි පදයේ ඇති ඇගේ ප්‍රශ්නයෙන් දෙබොරා අදහස් කළේ කුමක්ද: “ස්වාමින්වහන්සේ නුඹට පෙරටුව යනවා නොවේද?” ස්වාමින්වහන්සේ ඔබට “පෙරටුව යන්නේ”කෙසේද? (බලන්න දහම සහ ගිවිසුම් 84:87–88).

දෙබොරාගේ ඇදහිල්ල බාරාක්ට සහ අනෙකුත් ඉශ්‍රායෙල්වරුන්ට ආශිර්වාද කළ ආකාරයටම, යේසුස් ක්‍රිස්තුස්වහන්සේ කෙරෙහි ඔබේ ඇදහිල්ල අන් අයට ආශිර්වාද කළ හැකි ආකාරය ගැන මෙනෙහි කරන්න. ඔබට මේ ගැන සිතීමට උපකාර කිරීම සඳහා, ඔබට වැඩිහිටි නීල් එල්. ඇන්ඩර්සන්ගේ “අපි ක්‍රිස්තුස්වහන්සේ ගැන කතා කරන්නෙමු”(ලියහෝනා, නොවැ. 2020, 88–91) යන පණිවිඩය අධ්‍යයනය කරන්න පුළුවන්. (1) ගැලවුම්කරුවාණන් ගැන වඩාත් විවෘතව කථා කිරීමට හේතු සහ (2) එය කළ හැකි ක්‍රම ගැන සෙවීම සඳහා මෙම පණිවිඩය කියවන්න.

ඉන්පසු ඔබට ශුද්ධලියවිලි වලින්, ජීවමාන අනාගතවක්තෘවරුන්ගේ වචනවලින් සහ ඔබේ පෞද්ගලික අත්දැකීම් වලින් ඔබ යේසුස් ක්‍රිස්තුස්වහන්සේ ගැන දැනගෙන ඇති දේවල් ලැයිස්තුවක් සාදාගන්න පුළුවන්. මෙය දැනගත යුත්තේ කවුද? ඔබ එය බෙදාගන්නේ කෙසේද?

තවත් බලන්න මතෙව් 5:14–16; 1 පේත්‍රැස් 3:15.

ඔබ විනිශ්චයකාරයන්ගේ පොත 6–8 කියවන විට, ගිඩියොන්ට විශ්වාස කිරීමට නොහැකි යැයි පෙනෙන දෙයක් විශ්වාස කරන ලෙස ස්වාමින්වහන්සේ ඉල්ලා සිටි අවස්ථා ගැන අවධානය දෙන්න. උන්වහන්සේ ඔබෙන් එවැනි දෙයක් කවදා හෝ අසා තිබෙනවාද?

ඔබට හැඟෙන ලෙස, මෙම වාර්තාව සමඟ ස්වාමින්වහන්සේ ඔබට ඉගැන්වීමට උත්සාහ කරන්නේ කුමක්ද? ස්වාමින්වහන්සේ කළ නොහැකි යැයි පෙනෙන ආකාර වලින් උන්වහන්සේගේ කාර්යය කරන ආකාරය ඔබ දැක ඇත්තේ කෙසේද?

සම්සොන්ට ඔහුගේ ශාරීරික ශක්තිය සහ ආත්මික ශක්තිය යන දෙකම අහිමි වූයේ ඔහු විශේෂයෙන්ම නාසරියයන්ට අදාළ වූ ගිවිසුම් ඇතුළුව, දෙවියන්වහන්සේ සමඟ ඇති ගිවිසුම් කඩ කළ නිසයි, (නාසරියයන් පිළිබඳ තොරතුරු සඳහා බලන්න, ගණන් කථාව 6:1–6; විනිශ්චයකාරයන්ගේ පොත 13:7). ඔබ විනිශ්චයකාරයන්ගේ පොත 13–16 හි සම්සොන් ගැන කියවන විට, ස්වාමින්වහන්සේ සම්සොන් සමඟ සිටි බව පෙන්වන පද මෙන්ම සම්සොන් සම්පූර්ණයෙන්ම ස්වාමින්වහන්සේට කැප නොවූ බව පෙන්වන පද ද සැලකිල්ලට ගන්න.

ඔබ ස්වාමින්වහන්සේ සමඟ ඇති කරගත් ගිවිසුම් ගැන ද ඔබට සිතා බලන්න පුළුවන්. මෙම ගිවිසුම් උන්වහන්සේගේ බලය ඔබේ ජීවිතයට ගෙන ආවේ කෙසේද? දෙවියන්වහන්සේ සමඟ ඔබේ ගිවිසුම්වලට එකඟව සිටීමට ඔබව පොළඹවන සම්සොන්ගේ අත්දැකීම් වලින් ඉගෙනගන්නේ මොනවාද?

ඈන් එම්. ඩිබ් සහෝදරිය මෙසේ ඉගැන්වුවා: “සම්සොන් උපත ලැබුවේ විශාල හැකියාවන් ඇතිවයි. ඔහුගේ මවට මෙසේ පොරොන්දු ලැබී තිබුණා, ‘ඔහු පිලිස්තිවරුන්ගේ අතින් ඉශ්‍රායෙල් ගළවන්ට පටන්ගන්නවා ඇත’ [විනිශ්චයකාරයන්ගේ පොත 13:5]. නමුත් සම්සොන් වැඩෙත්ම, ඔහු දෙවියන්වහන්සේගේ මගපෙන්වීමට වඩා ලෝකයේ පරීක්ෂාවන් දෙස බැලුවා. ‘[ඒ] ඔහුගේ කැමත්ත’ [විනිශ්චයකාරයන්ගේ පොත 14:3] නිසා ඔහු ඒ තේරීම් කළා, නමුත් ඔහු එසේ කළේ එම තේරීම් නිවැරදි නිසා නොවේ. සම්සොන්ගේ ගමන, ක්‍රියා සහ තේරීම් ගැන පවසන විට ශුද්ධලියවිලි පදවල ‘ඔහු ගොස්’ [විනිශ්චයකාරයන්ගේ පොත 14:7] යන වාක්‍ය ඛණ්ඩය නැවත නැවතත් භාවිතා කරනවා. ඔහුගේ ශ්‍රේෂ්ඨ හැකියාවන් සපුරාලීම සඳහා නැගී සිටීම හා බැබළීම වෙනුවට, සම්සොන් ලෝකයේ දේවල් වලින් යටපත් වී සිටියා, ඔහුට ලැබී තිබූ දෙවියන්වහන්සේ දුන් බලය අහිමි වුණා, සහ ඛේදජනක, ඉක්මන් මරණයකින් ඔහු මිය ගියා” (“Arise and Shine Forth,” Liahona, May 2012, 118).

තවත් බලන්න ඩැලන් එච්. ඕක්ස්, “ගිවිසුම් සහ වගකීම්,” ලියහෝනා, මැයි 2024, 93–96; උලිසෙස් සෝරෙස්, “යේසුස් ක්‍රිස්තුස්වහන්සේ තුළින් ගිවිසුම් විශ්වාසය,” ලියහෝනා, මැයි 2024, 17–21.

• පාපයෙන් අපව ගලවා ගැනීමට ගැලවුම්කරුවාණන්ගේ බලය ගැන උගන්වන රටාවක් ගැන විනිශ්චයකාරයන්ගේ පොත 3 විස්තර කරනවා. ඔබේ දරුවන්ට මෙම රටාව හඳුනා ගැනීමට උපකාර කිරීම සඳහා, ඔබට මෙම වාක්‍ය ඛණ්ඩ ලියා තැබිය හැකිය: “නපුර කළා”, “ස්වාමින්වහන්සේට මොරගැසුවා” සහ “ගලවන්නෙකු නැඟිටුවා.” ඉන්පසු ඔබේ දරුවන්ට විනිශ්චයකාරයන්ගේ පොත 3:7–9 සහ විනිශ්චයකාරයන්ගේ පොත 3:12–15 තුළ ඇති මෙම වාක්‍ය ඛණ්ඩ සොයන්න පුළුවන්. මෙම රටාවෙන් අපි ස්වාමින්වහන්සේ ගැන ඉගෙනගන්නේ මොනවාද?

• යේසුස් ක්‍රිස්තුස්වහන්සේ අපගේ ගලවාගන්නා බව අවධාරණය කිරීමට, ඔබට යේසුස්වහන්සේගේ පින්තූරයක් ඇතුළුව යම් යම් පුද්ගලයින්ගේ පින්තූර කිහිපයක් එකතු කර ඒවායෙහි රූප නොපෙනෙන ලෙසට බිමට හරවා තබන්න පුළුවන්. ඔබේ දරුවන්ට මාරුවෙන් මාරුවට ඒ පින්තූර පෙරළා බැලීමට ඉඩ දෙන්න. ඔවුන් යේසුස්වහන්සේගේ පින්තූරය සොයාගත් විට, උන්වහන්සේ ගැන ගීතයක් ගායනා කර, උන්වහන්සේ ඔබව ගලවාගත් ආකාරය ගැන ඔබේ දරුවන්ට කියන්න.

• දෙබොරා ගැන ඔබ අගය කරන දේ එකිනෙකා සමඟ බෙදාගන්න. ස්වාමින්වහන්සේ කෙරෙහි ඇගේ ඇදහිල්ල ඇය වටා සිටින පුද්ගලයින්ට ආශිර්වාද කළේ කෙසේද? යේසුස් ක්‍රිස්තුස්වහන්සේ කෙරෙහි වැඩි ඇදහිල්ලක් තැබීමට අන් අයට උපකාර කිරීමට අපට කළ හැක්කේ මොනවාද?

  

  2:9

• ගිඩියොන්ගේ හමුදාව මෙතරම් කුඩා වෙනවාට ස්වාමින්වහන්සේට අවශ්‍ය වූයේ ඇයි? (බලන්න විනිශ්චයකාරයන්ගේ පොත 7:2).

  

  2:37

• ඔබේ දරුවන්ට කඩුවක්, පලිහක්, හොරණෑවක්, පහනක් සහ පිට්ටනියක් වැනි චිත්‍ර ඇඳිය ​​හැකි අතර, සටනකදී තමන්ට අවශ්‍ය මෙම වස්තූන්ගෙන් කවරක්දැයි කතා කරන්න පුළුවන්. ඉන්පසු ස්වාමින්වහන්සේ ගිඩියොන්ගේ හමුදාවට භාවිතා කරන්නට කිව්වේ මොනවාදැයි ඉගෙනගැනීමට, ඔවුන්ට විනිශ්චයකාරයන්ගේ පොත 7:16 කියවන්න පුළුවන්. ඔබ විනිශ්චයකාරයන්ගේ පොත 7:19–21 තුළ ඇති සටන ගැන කියවන විට, මෙම කතාවෙන් ඔබ ස්වාමින්වහන්සේ ගැන ඉගෙන ගන්නා දේ එකිනෙකා සමඟ බෙදාගන්න.

• අපගේ ගිවිසුම් අපට අධ්‍යාත්මික ශක්තිය ලබාදෙනවා සේම, සම්සොන් ස්වාමින්වහන්සේ සමඟ ඇති කරගත් ගිවිසුම් ඔහුට ශාරීරික ශක්තිය ලබා දුන්නා. ඔබේ දරුවන් ශාරීරික අභ්‍යාස කිහිපයක් කිරීමෙන් සහ එම ව්‍යායාම අපගේ ශරීරය ශක්තිමත් කිරීමට උපකාරී වන්නේ කෙසේදැයි සාකච්ඡා කිරීමෙන් සතුටු වෙන්න පුළුවන්. අපගේ ගිවිසුම් පවත්වා ගැනීම අපගේ ආත්මයන් ශක්තිමත් කරන්නේ කෙසේද? (බලන්න මොසායා 18:8–10; දහම සහ ගිවිසුම් 20:77, 79).