පරණ ගිවිසුමේ ඇති ඓතිහාසික පොත්

ස්වාභාවිකවම, මෙම කථා යම් දෘෂ්ටිකෝණයකින් කියනු ලැබෙනවා. මලක්, ගලක් හෝ ගසක් දෙස එකවර කෝණ කිහිපයකින් බැලීමට නොහැකි වන්නා සේම, ඓතිහාසික වාර්තාවකින් එය ලියන පුද්ගලයාගේ හෝ පිරිසකගේ දෘෂ්ටිකෝණය පිළිබිඹු වීම වළක්වන්නට බැහැ. මෙම දෘෂ්ටිකෝණයට ලේඛකයන්ගේ ජාතික හෝ වාර්ගික බැඳීම් සහ ඔවුන්ගේ සංස්කෘතික සම්මතයන් සහ විශ්වාසයන් ඇතුළත් වෙනවා මෙම ඓතිහාසික පොත්වල ලේඛකයන් සහ සම්පාදකයන් යම් යම් විස්තර අත්හරිමින් යම් යම් තොරතුරු කෙරෙහි අවධානය යොමු කළ බව මෙය දැන ගැනීමෙන් අපට තේරුම්ගන්න පුළුවන්. අන් අය නොකරනු ඇතැයි සිතිය හැකි උපකල්පන ඔවුන් කර තිබෙනවා. ඒවගේම මෙම විස්තර සහ උපකල්පන මත පදනම්ව ඔවුන් නිගමනවලට ඇවිත් තිබෙනවා. අපට බයිබලයේ පොත් හරහා (සහ සමහර විට එකම පොත තුළ) විවිධ දෘෂ්ටිකෝණ පවා දකින්න පුළුවන්. මෙම දෘෂ්ටිකෝණ ගැන අප වැඩි වැඩියෙන් දැනුවත් වන තරමට, අපට ඉතිහාස පොත් වඩා හොඳින් තේරුම් ගන්න පුළුවන් වෙනවා.

පරණ ගිවිසුමේ ඓතිහාසික පොත් සියල්ලටම පොදු වූ එක් දෘෂ්ටිකෝණයක් තමයි දෙවියන්වහන්සේගේ ගිවිසුම් සෙනඟ වන ඉශ්‍රායෙල් දරුවන් පිළිබඳ දෘෂ්ටිකෝණය. ස්වාමින්වහන්සේ කෙරෙහි ඔවුන්ගේ ඇදහිල්ල ඔවුන්ගේ ජීවිතවල සහ ඔවුන්ගේ ජාතියේ කටයුතුවලදී උන්වහන්සේගේ හස්තය දැකීමට ඔවුන්ට උදව් වුණා. ලෝකයේ ඇති වෙනත් ඓතිහාසික පොත් මේ ආකාරයෙන් දේවල් දැකීමට නැඹුරු නොවුනත්, දෙවියන්වහන්සේ කෙරෙහි ඔවුන්ගේම ඇදහිල්ල ගොඩනගා ගැනීමට උත්සාහ කරන අය සඳහා මෙම අධ්‍යාත්මික දෘෂ්ටිකෝණය පරණ ගිවිසුමේ ඓතිහාසික පොත් ඉතා වටිනා දෙයක් බවට පත්වෙනවා.

මෙම ඓතිහාසික පොත් ආරම්භ වන්නේ ද්විතීය කථාව පොත අවසන් වන තැනින්, ඉශ්‍රායෙල්වරුන්ගේ පාළුකරයේ එහා මෙහා ගිය වසර අවසන් වීමට ආසන්න වෙමින්. යෝෂුවාගේ පොතේ දැක්වෙන ආකාරයට ඉශ්‍රායෙල් පුත්‍රයන් ඔවුන්ගේ පොරොන්දු දේශය වන කානාන් දේශයට ඇතුළු වීමට සූදානම් වන අතර ඔවුන් එය අත්පත් කරගත් ආකාරය එහි විස්තර කරනවා. විනිශ්චයකාරයන්ගේ පොතේ සිට 2 ලේකම් දක්වා ඉන්පසුව එන පොත්, පොරොන්දු දේශයේ ඉශ්‍රායෙල්වරුන්ගේ අත්දැකීම්, ඔවුන් එය පදිංචි වුණු අවස්ථාවේ සිට ඔවුන් ඇසිරියාව සහ බැබිලෝනිය විසින් යටත් කරගත් කාලය දක්වා කාලය ගැන විස්තර කරනවා. එස්රා සහ නෙහෙමියාගේ පොත්වල සඳහන් වන්නේ දශක ගණනාවකට පසු ඉශ්‍රායෙල්වරුන් කණ්ඩායම් කිහිපයක් ඔවුන්ගේ අගනුවර වන යෙරුසලමට නැවත පැමිණීම ගැනයි. අවසාන වශයෙන්, එස්තර් පොතේ පර්සියානු පාලනය යටතේ වහල්භාවයේ ජීවත් වූ ඉශ්‍රායෙල්වරුන් පිළිබඳ කථාවක් විස්තර කරනවා.

පරණ ගිවිසුමේ කාල නිර්ණය අවසන් වන්නේ එතැනිනුයි. පළමු වරට බයිබලය කියවන සමහර අය, පරණ ගිවිසුමේ පිටු අඩකට වඩා කියවීමට පෙර ඔවුන් ඇත්ත වශයෙන්ම එම කතාව කියවා අවසන් කර ඇති බව සොයාගැනීමෙන් පුදුමයට පත්වෙනවා. එස්තර්ගෙන් පසුව, ඉශ්‍රායෙල්වරුන්ගේ ඉතිහාසය ගැන අපට බොහෝ තොරතුරු ලැබෙන්නේ නෑ. ඒ වෙනුවට, ඉන්පසු එන පොත්—විශේෂයෙන්ම අනාගතවක්තෘවරුන්ගේ පොත්—ඓතිහාසික පොත් ඉදිරිපත් කළ කාල සටහන තුළ පවතිනවා. උදාහරණයක් වශයෙන්, අනාගතවක්තෘ යෙරෙමියාගේ දේවසේවය සිදු වූයේ 2 රාජාවලිය 22–25 (සහ 2 ලේකම් 34–36 තුළ ඇති සමාන්තර වාර්තාව) තුළ වාර්තා කර ඇති සිදුවීම් අතරතුරයි. මෙය දැන ගැනීමෙන් ඔබ ඓතිහාසික කතා සහ අනාවැකි පොත් යන දෙකම කියවන ආකාරයට බලපෑමක් ඇති කරනවා.

පරණ ගිවිසුම කියවන විට, ඕනෑම ඉතිහාසයක් මෙන්, නූතන ඇස්වලට අමුතු හෝ කරදරකාරී ලෙස පෙනෙන, පුද්ගලයින්ගේ ක්‍රියා හෝ පැවසීම් ගැන ඔබ කියවීමට ඉඩ තිබෙනවා. අප මෙය අපේක්ෂා කළ යුතුයි—පරණ ගිවිසුමේ ලේඛකයින් ලෝකය දුටුවේ, යම් ආකාරයකින්, අපට වඩා හාත්පසින්ම වෙනස් වූ දෘෂ්ටිකෝණයකින්. ප්‍රචණ්ඩත්වය, වාර්ගික සබඳතා සහ කාන්තාවන්ගේ භූමිකාවන් යන ගැටළු මෙම පැරණි ලේඛකයින් අද අපි දකිනවාට වඩා වෙනස් ලෙස දකින්නට ඇති දේවල් වෙන්න පුළුවන්.

එසේනම් අපට කරදරකාරී ලෙස පෙනෙන ශුද්ධලියවිලිවල කොටස් හමු වූ විට අප කළ යුත්තේ මොනවාද? පළමුව, එක් එක් ඡේදය පුළුල් සන්දර්භයක් තුළ සලකා බැලීම උපකාරී වෙන්න පුළුවන් දෙවියන්වහන්සේගේ ගැලවීමේ සැලැස්මට එය ගැලපෙන්නේ කෙසේද? ස්වර්ගීය පියාණන්වහන්සේගේ සහ යේසුස් ක්‍රිස්තුස්වහන්සේගේ ස්වභාවය ගැන ඔබ දන්නා දේ සමඟ එය ගැලපෙන්නේ කෙසේද? වෙනත් ශුද්ධලියවිලිවල එළිදරව් කරන ලද සත්‍යයන් සමඟ හෝ ජීවමාන අනාගතවක්තෘවරුන්ගේ ඉගැන්වීම් සමඟ එය ගැලපෙන්නේ කෙසේද? එමෙන්ම එය ඔබගේම හදවතට සහ මනසට ලැබෙන ආත්මයාණන්වහන්සේගේ රහසිගත මිමිණුම් වලට ගැලපෙන්නේ කෙසේද?

සමහර අවස්ථාවලදී, යම් ඡේදයක් මේ කිසිවකට නොගැලපෙන බව පෙනෙන්න පුළුවන්. සමහර විට එම ඡේදය ප්‍රහේලිකා කැබැල්ලක් මෙන් විය හැකි අතර එයට ඔබ දැනටමත් එකලස් කර ඇති කෑලි අතර ස්ථානයක් ඇති බවක් නොපෙනෙන්න පුළුවන්. එම කොටස ගැලපෙන ලෙස බල කිරීමෙන් සම්බන්ධ කිරීමට උත්සාහ කිරීම හොඳම ප්‍රවේශය නොවේ. එහෙත් සම්පූර්ණ ප්‍රහේලිකාවම අතහැර දැමීමද හොඳම ප්‍රවේශය වන්නේ නෑ. ඒ වෙනුවට, ඔබට එම කොටස ටික වේලාවකට පසෙකට දැමීමට සිදුවෙන්න පුළුවන්. ඔබ තවදුරටත් ඉගෙන ගන්නා විට සහ ප්‍රහේලිකාව තවත් එකට එකතු කරන විට, මෙම කොටස් එකට ගැලපෙන ආකාරය වඩා හොඳින් දැකීමට ඔබට හැකියාව ලැබෙයි.

විශේෂිත දෘෂ්ටිකෝණයකට සීමා වීමට අමතරව, ශුද්ධලියවිලිමය ඉතිහාසය මානව දෝෂ වලට යටත් වන බව මතක තබා ගැනීමද උපකාරී වෙන්න පුළුවන්. උදාහරණයක් වශයෙන්, සියවස් ගණනාවක් පුරා, මූලධර්ම, නියෝග සහ ගිවිසුම් පිළිබඳ වැදගත් සත්‍යයන් ඇතුළුව, “බොහෝ සරල හා වටිනා දේවල් [බයිබලයෙන්] ඉවතට ගෙන තිබුණි” (1 නෙපී 13:28; තවත් බලන්න 26, 29, 40 පද). ඒ අතරම, අපගේම දෘෂ්ටිකෝණයන්ද සීමිත බව පිළිගැනීමට අපි කැමැත්තෙන් සිටිය යුතුයි: සෑම විටම අපට සම්පූර්ණයෙන්ම නොතේරෙන දේවල් සහ අපට තවමත් පිළිතුරු දිය නොහැකි ප්‍රශ්න තිබෙන්න පුළුවන්.

එලෙසම, මෙම මැණික් සමහර විට අසම්පූර්ණ මිනිසුන් විසින් අත්විඳින ලද කරදරකාරී අත්දැකීම් සහ දුර්වල තේරීම් යන පාෂාණමය භූමියේ සැඟවී තිබුණද—පිළිතුරු නොලබන ප්‍රශ්න නිසා පරණ ගිවිසුමේ ඇති සදාකාලික සත්‍යයේ වටිනා මැණික් වලින් අපව ඈත් නොකළ යුතුයි. සමහර විට මෙම මැණික්වලින් වටිනාම දේ දෙවියන්වහන්සේගේ ප්‍රේමය පිළිබඳ සාක්ෂි සපයන කථා සහ ඡේද වෙන්න පුළුවන්—විශේෂයෙන්ම ඒවා අපගේ මනස යේසුස් ක්‍රිස්තුස්වහන්සේගේ පරිත්‍යාගය දෙසට යොමු කරන ඒවා වෙන්න පුළුවන්. කුමන කෝණයකින් බැලුවත් මේ වගේ මැණික් එදා වගේම අදත් බැබළෙනවා. ඒවගේම මෙම වාර්තා—මනුෂ්‍ය දුර්වලකම් ඇති නමුත් ස්වාමින්වහන්සේට ප්‍රේම කළ සහ සේවය කළ පුරුෂයන් සහ ස්ත්‍රීන් වන දෙවියන්වහන්සේගේ ගිවිසුම්ගත සෙනඟ ගැන පවසන නිසා—පරණ ගිවිසුමේ ඓතිහාසික පොත්වල ඒ සත්‍යයේ මැණික් බහුලව තිබෙනවා.