Шүүгчид 2–4; 6–8; 13–16

Шүүгчид ном сэрэмжлүүлэг, урамшууллын аль аль нь байж болдог. Шүүгчид 2:1–19; 3:5–12-ыг уншихдаа ийм сэрэмжлүүлэг болон урамшууллыг хайж олоорой. Танд сэрэмжлүүлэг болон урамшуулал хэр хамаатай гэж та бодож байна вэ?

Жишээлбэл: Шүүгчид 2:19 эртний израилчуудын тухай биш, таны тухай эсвэл таны уруу таталтуудын тухай ярьж байсан бол энэ нь юуны талаар байх байсан бэ? Хэрэв Шүүгчид 3:9 Их Эзэний та нарыг чөлөөлөхийн тулд хийсэн зүйлийнх нь талаар байсан бол энэ нь юуны тухай байх байсан бол?

Өсвөр үеийнхний бат бөх байдлын төлөө: Сонголт хийхэд туслах хөтөч-ийн 9-р хуудсан дээрх асуулт, хариултыг уншихыг бод. Энэ нь Шүүгчид номын израилчуудад тохиолдсон туршлагатай ямар хамаатай гэж та бодож байна вэ? Энэ нь танд Есүс Христийн талаар юу зааж байна вэ?

Заримдаа нэг хүний итгэл олон хүнд итгэл төрүүлж чадна. Шүүгчид 4 дээр гардаг Дебора гэгч хүн тэр хүн нь байв. Шүүгчид 4:1–16-аас түүний талаар уншаад, тэр эргэн тойрныхоо хүмүүст хэрхэн нөлөөлж байсныг анхаар. Түүний туршлагыг амьдралдаа хэрхэн хэрэгжүүлж болохыг тунгаан бодоход тань туслах хэдэн асуултыг энд оруулав:

• Тэр үеийн израилчуудын нөхцөл байдлыг та хэрхэн дүрслэх вэ? (1–3-р шүлгийг үзнэ үү). Өнөөгийн нөхцөл байдал, хувь хүн, нийгмийн ямар ижил төстэй зүйлсийг та олж харж байна вэ?

• Деборагийн ямар үг, үйлдэл Их Эзэнд итгэдгийг нь харуулдаг вэ? Түүний итгэл бусдад хэрхэн нөлөөлсөн бэ? Түүний өөр юу танд гүн сэтгэгдэл төрүүлсэн бэ?

• 14-р шүлэгт Дебора “ЭЗЭН Өөрөө чиний өмнө явна” гэж хэлсэн нь ямар утгатай гэж та бодож байна вэ? Их Эзэн хэрхэн “таны өмнө явдаг вэ?” (мөн Сургаал ба Гэрээнүүд 84:87–88-ыг үзнэ үү).

Деборагийн итгэл Барак болон бусад израилчуудыг адисалсан шиг таны Есүс Христэд итгэх итгэл бусдыг хэрхэн адисалж болохыг тунгаан бод. Та энэ талаар бодоход тань туслах ахлагч Нийл Л.Андэрсэны “Бид Христийн тухай ярьдаг” (2020 оны 10-р сарын Ерөнхий чуулган, 96–100) захиасыг судалж болно. Уг захиасыг (1) Аврагчийн талаар илүү илэн далангүй ярих шалтгааныг болон (2) үүнийг хийх арга замуудыг олж мэдэх зорилгоор судал.

Дараа нь та Есүс Христийн тухай судруудаас, мөн амьд бошиглогчдын үгсээс мөн хувийн туршлагаасаа мэддэг зүйлсийнхээ жагсаалтыг гаргаж болно. Үүнийг хэн мэдэх хэрэгтэй вэ? Та үүнийг хэрхэн хуваалцах вэ?

Мөн Матай 5:14–16; 1 Петр 3:15; “Амьдралд учрах сайхан бүхэн” дууллыг Дуулал номын 151-ээс үзнэ үү.

Шүүгчид 6–8-ыг уншихдаа Их Эзэн Гидеоноос боломжгүй мэт санагдах зүйлд итгэхийг хүссэн тохиолдлуудыг тэмдэглэ. Тэр та нараас ийм зүйл хүсэж байсан уу?

Их Эзэн энэ түүхээр танд юу заахыг хичээж байна гэж та бодож байна вэ? Их Эзэн Өөрийн ажлыг бараг боломжгүй арга замаар хийж байхыг та хэрхэн харж байсан бэ?

Самсон назир хүнтэй холбоотой гэрээнүүд зэрэг Бурхантай байгуулсан гэрээнүүдээ зөрчсөн тул биеийн болон сүнслэг хүч чадлынхаа аль алиныг алдсан юм (назир хүний талаарх мэдээллийг Тооллого 6:1–6; Шүүгчид 13:7-оос үзнэ үү). Шүүгчид 13–16-аас Самсоны тухай уншихдаа Их Эзэн Самсонтой хамт байсныг мөн Самсон Их Эзэнд бүхнээ зориулаагүй үеийг харуулсан шүлгүүдийг анзаар.

Мөн та Их Эзэнтэй хийсэн гэрээнүүдээ тунгаан бодож болно. Эдгээр гэрээ нь таны амьдралд Түүний хүчийг хэрхэн авчирсан бэ? Самсоны туршлагаас сурч мэдсэн ямар зүйл таныг Бурхантай байгуулсан гэрээндээ үнэнч байхад сүнслэгээр өдөөсөн бэ?

Анн М.Дибб эгч ийн заасан: “Самсон маш их чадвартай төрсөн. Учир нь тэнгэр элч ээжид нь “Тэр филистчүүдийн гараас Израилыг аварч эхэлнэ” [Шүүгчид 13:5] хэмээн амласан байв. Гэвч Самсон өсөж том болоод Бурханы зүг харахын оронд дэлхийн уруу таталтад автагджээ. Тэр эдгээр сонголтыг зөв байсан гэхээс илүү “өөрт нь илүү таалагдсан” [Шүүгчид 14:3] тул хийдэг байж. Судруудад Самсоны замнал, үйлдэл болон сонголтуудын талаар дурдахдаа “тэгээд тэр явж” [Шүүгчид 14:7] гэсэн үгсийг олонтоо хэрэглэсэн байдаг. Босож, урагш гэрэлтүүлэн, өөрийн агуу чадварыг ашиглахын оронд Самсон дэлхийн зүйлд автан Бурханы өгсөн хүчийг алдаж, залуугаараа харамсалтайгаар насан эцэслэсэн билээ (“Босоод, урагш гэрэлтүүл,” Лиахона, 2012 оны 4-р сар).

Даллин Х.Өүксийн “Гэрээ ба үүрэг хариуцлага” захиасыг Лиахона, 2024 оны 5 сар; Үлиссэс Соарэсын “Есүс Христээр дамжуулан гэрээндээ итгэлтэй байх нь” захиасыг Лиахона, 2024 оны 5-р сараас тус тус үзнэ үү.

• Шүүгчид 3 дээр биднийг нүглээс чөлөөлдөг Аврагчийн хүчний тухай заадаг нэгэн загварыг дүрслэн харуулдаг. Та хүүхдүүддээ энэ загварыг тодорхойлоход нь туслахын тулд “ёрын мууг үйлджээ”, “Эзэнд хашхиран гуйсан”, “аврах нэгэн чөлөөлөгчийг босгосон” гэх мэт хэллэгүүдийг бичиж болно. Дараа нь танай хүүхдүүд энэ хэллэгүүдийг Шүүгчид 3:7–9; Шүүгчид 3:12–15-аас хайж болно. Бид энэ загвараас Их Эзэний талаар юу мэдэж авдаг вэ?

• Есүс Христ бидний Чөлөөлөгч гэдгийг онцлохын тулд та Есүсийн зургийг оролцуулсан хэдэн зураг цуглуулаад, доош харуулаад тавьж болно. Хүүхдүүдээр зургуудыг ээлжлэн эргүүлүүл. Хүүхдүүдийг Есүсийн зургийг олох үед Түүний тухай “Тэр Хүүгээ илгээсэн” (Хүүхдийн дууны ном, 20) зэрэг дууг дуулж, Тэр та нарыг хэрхэн чөлөөлсөн тухай тэдэнд ярьж өг.

• Та хүүхдүүддээ Шүүгчид 4-ийн түүхийг ярьж өгөхийн тулд Хуучин Гэрээний түүхүүд дэх “Эш үзүүлэгч эмэгтэй Дебора” -г ашиглаж болно. Деборагийн юуг шүтэн биширч байгаа тухайг нэг нэгэнтэйгээ хуваалц. Их Эзэнд итгэх итгэл нь түүний эргэн тойрон дахь хүмүүсийг хэрхэн адисалсан бэ? Бид бусдад Есүс Христэд улам итгэлтэй болоход нь туслахын тулд юу хийж чадах вэ?

  

  2:9

• Их Эзэн Израилын армийг хэрхэн цөөрүүлсэн тухай хүүхдүүддээ заахын тулд та Шүүгчид 7:4–7, энэ долоо хоногийн үйл ажиллагааны хуудас эсвэл Хуучин Гэрээний түүхүүд дэх “Гидеоны их цэрэг” (96–99) хэсгийг ашиглана уу. Яагаад Их Эзэн Гидеоны их цэргийг цөөн хүнтэй байлгахыг хүссэн бэ? (Шүүгчид 7:2-ыг үзнэ үү).

  

  2:37

• Танай хүүхдүүд илд, бамбай, бүрээ, дэнлүү, домбоны зураг зурж, эдгээр эд зүйлийн алийг нь тулаанд авч явахыг хүсэж байгаагаа ярилцаж болно. Дараа нь тэд Шүүгчид 7:16-г уншаад, Их Эзэн Гидеоны их цэргийг юу ашигла гэснийг мэдэж авч болно. Та нар Шүүгчид 7:19–21-ээс тулааны талаар уншихдаа энэ түүхээс Их Эзэний талаар юу сурч мэдсэнээ бие биетэйгээ хуваалц.

• Бидний гэрээ бидэнд сүнслэг хүч чадал өгдөгтэй адил Их Эзэнтэй байгуулсан Самсоны гэрээ түүнд биеийн хүч чадал өгсөн. Танай хүүхдүүд биеийн тамираар хичээллэх тухай мөн дасгал сургуулилт бидний бие махбодыг хэрхэн хүчтэй болгодог талаар ярилцах нь таалагдаж болно. Гэрээгээ сахих нь бидний сүнсийг хэрхэн хүчирхэг болгодог вэ? (Moзая 18:8–10; Сургаал ба Гэрээнүүд 20:77, 79-ийг үзнэ үү.)