Иошуа 1–8; 23–24

Мосег орлуулахаар дуудахад Иошуад ямар байсныг төсөөлөн бод. Их Эзэн урамшуулан зоригжуулахын тулд Иошуа 1:1–9-д түүнд юу гэж хэлснийг анхаар. Өөрт тулгардаг хүнд бэрхшээлүүдийн талаар бод. Энэ шүлэгт хэлсэн ямар үг танд урам зориг өгч байна вэ?

Иошуа (еврей хэлээр Yehoshua эсвэл Yeshua) гэдэг нэр нь “Иехова авардаг” гэсэн утгатай. Мөн Есүс гэдэг нь Yeshua гэсэн үгнээс үүдэлтэй. Тиймээс Иошуагийн тухай уншихдаа тэр Израилын хүүхдүүдийг Иордан голыг гатлуулан, амласан газар руу удирдахад нь ямар үүрэг гүйцэтгэснийг бодоорой. Түүний даалгавар Христийн бидний төлөө хийдэг даалгавартай юугаараа адилхан байсан бэ?

Их Эзэн Иошуаг урамшуулахдаа Иошуа 1:8 дээр судруудын талаар буюу “хуулийн үгийн” талаар зөвлөсөн. Иошуагийн чухал үүргийг авч үзвэл энэ зөвлөгөө яагаад онцгой ач холбогдолтой байсан бэ?

Их Эзэн биднийг судруудыг уншихад урихдаа зүгээр уншихаас илүү үгсийг олонтаа хэрэглэдэг. Тэр бас агуу адислалуудыг амладаг. Энэ хүснэгт нь эдгээр урилга болон амлагдсан адислалуудыг олж мэдэхэд тань тусална.

Их Эзэн амьдралд тань эдгээр амлалтыг хэрхэн биелүүлж байсан бэ? Одоо судар судлах дадал хэвшилдээ дүгнэлт хийхэд тохиромжтой цаг байж болох юм. Юу сайн болж байна вэ? Бурханы үгнээс илүү утга учиртай туршлага хуримтлуулахын тулд та юу хийхээр сүнслэгээр өдөөгдсөн гэж бодож байна вэ?

Мөн “Ариун судрыг судлах үед” хэмээх дууг Дуулал номын д. 147-оос үзнэ үү.

Шинэ Гэрээний эртний Христэд итгэгчид Рахабыг итгэл, үйлс хоёрын үлгэр жишээ хэмээн харж байсан (Еврей 11:31; Иаков 2:25-ыг үзнэ үү). Иошуа 2-ыг уншихдаа, Рахабын итгэл, үйлс нь өөрийг нь болон гэр бүлийг нь мөн Израилын туршуулуудыг аврагдахад ямар үүрэг гүйцэтгэсэн талаар бодож үз. Энэ нь Христэд итгэх итгэл, үйлс тань танд болон бусдад хэрхэн нөлөөлж болох талаар юу зааж байна вэ?

Их Эзэн Өөрийн хүмүүсийг амлагдсан нутаг руу удирдахдаа гайхамшгийг үйлдсэн бөгөөд та нарын төлөө ч мөн адил зүйлийг хийж чадна. Иошуа 3–4-ийг судлахад тань чиглүүлэх хэдэн асуулт:

• Израилчууд яагаад Иордан голыг гатлахын өмнө өөрсдийгөө ариусгах хэрэгтэй байсан бэ? (Иошуа 3:5-ыг үзнэ үү).

• Гол мөрөн зөвхөн “тахилч нарын хөлийн ул … усны захад дүрэгдсэний” (Иошуа 3:13, 15) дараа хуваагдсаныг анхаар. Энэ нь яагаад чухал вэ?

• Иордан голын дэргэд өөр хэдэн чухал үйл явдал болсон тухай 2 Хаад 2:6–15; 5:1–14 болон Марк 1:9–11-ээс үзнэ үү. Та эдгээр амлалтаас ямар ямар холбоо хамаарал харж байна вэ?

• Их Эзэн “гайхамшгийг” таны амьдралд хэрхэн үйлдэж байсан бэ? (Иoшуа 3:5). Та тэдгээр гайхамшгийг хэрхэн ойр ойрхон мэдэрч, ялган таньж болох вэ? (жишээлбэл, Иошуа 3:17-г үзнэ үү).

Иошуа 6–8-д Иерихогийн болон Аины газар нутгийн төлөөх дайн тулааны талаар өгүүлдэг. Эдгээр бүлгийг уншихдаа уруу таталттай хэрхэн тэмцдэгээ эргэцүүлэн бодно уу (жишээлбэл, Иошуа 7:10–13-ыг үзнэ үү). Бурхан танд хэрхэн тусалж чадах мөн Түүний хүчнээс авахын тулд юу хийж болох талаар та юу сурч мэдсэн бэ? Жишээлбэл, Иерихог эзлэн авах талаар өгсөн Их Эзэний зааврын юу нь танд гүн сэтгэгдэл төрүүлсэн бэ? (Иошуа 6:1–5-р шүлгийг үзнэ үү). Хэрэв амьдралд тань “хориг цээр болсон зүйлс” (Иошуа 7:13) байвал Иошуа 7 дахь түүх тэдгээрийг зайлуулах шийдвэр гаргахад таныг сүнслэгээр өдөөсөн байж болох юм.

Иошуа 23–24 дээрх Иошуагийн израилчуудад хандсан сүүлчийн сургаалуудад чухал сэрэмжлүүлэг, зөвлөгөө, амлагдсан адислалууд орсон байдаг. Магадгүй та олсон зүйлийнхээ жагсаалтыг гаргаж болох юм. Израилчуудын туулсан зовлон бэрхшээлийг эргэцүүлэн бодоход, яагаад Иошуа энэ талаар насныхаа эцэст хэлэх болсон гэж та бодож байна вэ? Юу таныг “ЭЗЭНээс бат зуурахад” сүнслэгээр өдөөдөг вэ? (Иошуа 23:8).

Дэйл Г.Рэнландын “Өнөөдөр өөрсдөдөө сонго” хэмээх захиасыг 2018 оны 10-р сарын Ерөнхий чуулган сэтгүүлийн 106–109-р хуудаснаас мөн үзнэ үү.

• Есүс Христээр дамжуулан “тууштай бөгөөд зоригтой байхад” (Иошуа 1:6) хүүхдүүддээ туслах нэг арга бол тэднийг Иошуа 1:6, 9,, 18 дээр давтагдсан хэллэгийг олж, бичээд, цээжлэхэд урих явдал юм. Иошуагийн адилаар, энэ захиас тэдэнд хэрэгтэй байж болох нөхцөл байдлуудыг бодоход хүүхдүүддээ тусал. Та нар бас Иошуа 1–4; 6-р бүлгийн зарим түүхийг хамтдаа дүгнэж болно; (мөн Хуучин Гэрээний түүхүүд дэх “Бошиглогч Иошуа”, “Рахаб ба туршуулууд”, 85–91-р хуудсыг үзнэ үү). Эдгээр түүхэд гарч байгаа хүмүүс Их Эзэнд хэрхэн зориг, хүч чадлаа харуулсан бэ?

  

  2:59

  

  1:39

• Иошуа 1:8-ыг унших нь танай хүүхдүүдэд бие даан судраас уншихад нь сүнслэгээр нөлөөлж болох юм. Бид судруудыг хэрхэн, яагаад унших ёстойг тэдэнд заасан үгсийг энэ шүлгээс олоход нь тэдэнд тусал. Тэд 1 Нифай 15:23–24; 2 Нифай 31:20; 32:3; Иаков 4:6; Хиламан 3:29–30-ээс төстэй зүйлийг хайж олж болох юм. Та бас судруудыг унших төлөвлөгөө гаргаж хэрэгжүүлэхэд нь тэдэнд тусалж болно.

• Та Иордан голыг гаталж буй израилчуудын түүхийг цөлд байсан хуучин амьдралаа орхиж, Бурхантай гэрээт харилцаатай болж, шинэ амьдрал эхлүүлсэн баптисмын бэлгэдэл болгон ашиглаж болно. Тиймээс та нар Иошуа 3–4 (эсвэл Хуучин Гэрээний түүхүүд дэх “Бошиглогч Иошуа” (85–89) -г уншихдаа Есүсийн баптисм хүртэж байгаа зургийг харж, Есүс израилчуудын гаталсан тэр голд баптисм хүртсэн гэдгийг тайлбарлаж болно. Дараа нь та нар “Баптисм” (Хүүхдийн дууны ном, х.54) зэрэг дууг дуулж болно. Баптисм хүртэх нь Есүс Христийн хаант улсад амьдралаа шинээр эхлэхтэй юугаараа адилхан болохыг бие биетэйгээ хуваалц.

  

  2:59

• Иошуа израилчуудыг Есүс Христийг дагахыг сонгож сурахад урьсан шиг та хүүхдүүддээ туслахын тулд юу хийж болох вэ? Та тэднийг дараах зүйлийг хийхэд урьж болох юм:

  • Иошуа 24:15-аас нэг богино хэллэг цээжил. Үүнийг хүүхдүүддээ хөгжилтэй болгохыг хичээ. Наснаас нь шалтгаалж хэдэн үг цээжлэхийг шийдэж болно.

  • Есүс Христэд үйлчлэхээр сонгосон хүмүүсийн тухай түүхүүдийг ол. Тэд Найз сэтгүүл, Сайн мэдээний уран зургийн цуглуулга, Хуучин Гэрээний түүхүүд болон бусад судрын түүхийн номуудыг харж болно.

  • Аврагчийг дагаж мөн үйлчлэхийг сонгож болох нөхцөл байдлуудыг тэднээр жүжигчлэн тоглуул.