Гэтлэл 35–40; Леви 1; 4; 16; 19

Гэтлэл 35–40 нь израилчуудын асар барих хүчин чармайлтыг дүрсэлдэг бөгөөд тэндэх ариун ёслолууд хүмүүсийг ариун болоход тусалдаг байв. Эдгээр бүлгийг уншихдаа Их Эзэн Өөрийн хүмүүсийг асарт юу байрлуулахыг хүссэнийг олж мэд. Эдгээр зүйл юуг төлөөлж болох вэ? Эдгээр нь ариун байдал өсөн нэмэгддэг талаар танд юуг санал болгож байна вэ? Ялангуяа уг эд юмс таны оюун ухааныг Аврагч руу хэрхэн хандуулах талаар бодож үз. Дараахтай адил хүснэгт танд тусалж болох юм.

Зүгээр л ариун газар байх нь биднийг ариун болгохгүй. Леви 19 нь ариун байдлаа өсгөн нэмэгдүүлэхэд израилчуудад туслах Их Эзэний өгсөн хууль, зарлигуудын талаар өгүүлсэн байдаг. Их Эзэнээс ариуныг эрэлхийлэхэд туслах юуг та эдгээр зарлигаас олж мэдсэн бэ? Та эдгээр зарчмын дагуу илүү бүрэн дүүрэн амьдрахын тулд юу хийхээр сүнслэгээр өдөөгдсөн бэ?

Түүнчлэн Хэнри Б.Айрингийн “Ариун байдал ба аз жаргалын төлөвлөгөө“ хэмээх захиасыг 2019 оны 10-р сарын Ерөнхий чуулган, 114–117; мөн Gospel Library дахь “The Tabernacle” видеог тус тус үзнэ үү.

7:19

Египетээс гарч явсны дараах жил Израилын хүүхдүүд болон Иеховагийн хоорондын харилцаа шулуун дардан байгаагүй гэж хэлэхэд хилсдэхгүй. Гэсэн ч Гэтлэл 35:4–35, 36:1–7-г уншихдаа, асар барих зарлигийг израилчууд хэрхэн хүлээн авсныг анхаарна уу. Их Эзэнд илүү сайн үйлчлэхэд туслах ямар зүйлийг та израилчуудаас сурч мэдсэн бэ?

Тэр танаас асарт зориулах үнэт металл, маалинга, мод гуйхгүй байж болно. Их Эзэн танд юу өгсөн бэ? Тэр таныг юу өргөл болгохыг хүсэж байна вэ? Хэзээ “зүрх [тань] хөдөлж, ажилд ирж” байсан бэ?

Гэтлэл 40:12–14 дээр өнөө үед Их Эзэний өргөөнд гүйцэтгэгдэж байгаа эртний ёслолуудыг дурдсан байдаг. Дараах хэдэн шүлэг эдгээр ёслол Есүс Христийг хэрхэн гэрчилдэг тухай олж мэдэхэд тань тусална:

• Угаалга: Дуулал 51:2; Езекиел 36:25–27

• Ариун хувцсаар хувцаслах: Исаиа 61:10; Матай 22:11–14; Илчлэл 19:7–8

• Тосолгоо: Лук 4:18–19; Үйлс 10:38

Амьтнаар өргөх тахил, цус болон ус орсон зан үйл мөн амьдралын нарийн ширийнийг заасан хууль гэх мэт Леви номын ихэнх хэсэг бидэнд хачирхалтай санагдаж болох юм. Гэхдээ тэдгээр зан үйл, хууль нь наманчлал, ариун байдал, Аврагчийн Цагаатгал зэрэг бидний мэдэх зарчмуудыг заах зорилготой байсан. Та Леви 1:1–9; 4; 16-г уншихдаа эдгээр зарчмыг олохын тулд дараах асуултуудыг авч үзнэ үү:

• Надад Есүс Христийг болон Түүний цагаатгагч золиослолыг санагдуулдаг ямар үг, хэллэгийг би олж мэдсэн бэ?

• Бид эдгээр золиослолоос Аврагчийн золиослолын тухай юу сурч мэдсэн бэ?

• Би эдгээр золиослолыг хийсэн хүмүүстэй юугаараа адилхан бэ?

Их Эзэн дахин амьтнаар тахил өргөхийг шаардахгүй. Гэхдээ золиослол бол сайн мэдээний чухал зарчим мөн. Их Эзэн ямар золиослол шаарддагийг олж мэдэхийн тулд 3 Нифай 9:19–20; Сургаал ба Гэрээнүүд 64:34-ийг үзнэ үү. Та иймэрхүү золиослолуудыг хэрхэн хийдэг вэ? Мосе 5:7 золиослолыг хэрхэн харах талаар танд юу зааж байна вэ?

“Санах зүйлс: Асар ба тахил-ыг үзнэ үү.”

• Энэ тоймын төгсгөлд израилчуудын цөл дэх асрын зураг байгаа. Та зургийг хүүхдүүдтэйгээ хамт хараад, асар барихад ямар материал шаардлагатай байсныг асууж болно. Дараа нь та эдгээр материалыг хэрхэн хангаж байсныг мэдэхийн тулд Гэтлэл 35:20–29-ийг хамтдаа уншиж болно. Их Эзэн хэрхэн биднийг Өөрийнх нь хаант улсыг байгуулахад хувь нэмрээ оруулахад урьсан бэ?

• Их Эзэн асрыг барихад туслахын тулд Безалел, Охолиаб хоёрт юу өгснийг мэдэхийн тулд Гэтлэл 36:1-ийг тэдэнтэй хамт унших талаар бодож үз. Дараа нь та Их Эзэн Өөрийнх нь хаант улсыг байгуулахад туслахын тулд тэдэнд юу өгсөн гэж бодож байгаагаа хүүхдүүдтэйгээ ярилцаж болно. Бид эдгээр зүйлийг бусдыг адислахын тулд хэрхэн ашиглаж болох вэ?

• Гэтлэл 40:17–34-т израилчуудын асрын хэсгүүдийг жагсаасан байдаг. Та болон таны хүүхдүүд эдгээрийг энэ хэдэн шүлгээс болон энэ тоймын төгсгөлд байгаа асрын зургаас олж болох юм. Асрын хэсэг бүр нь Аврагч эсвэл Тэнгэрлэг Эцэгийн талаар хэрхэн зааж болох тухай ярилц. Жишээлбэл: Гэрчлэлийн авдар нь Бурханы зарлигуудыг сануулдаг бол тахилын ширээ нь Есүс Христийн золиослолын тухай гэх мэт зүйлсийг бидэнд сануулдаг.

• Есүс Христэд илүү ойртоход бидэнд тусалдаг ямар ямар ариун газар байдаг вэ? Та энэ яриаг өрнүүлж Gospel Library дахь “Temples” видеог хамтдаа үзэж болно. Та бас Gospel Library дахь “Holy Places” гэх мэт дууг дуулж болно. Ариун сүмтэй адил ариун газруудын талаар юу гэж боддогоо бие биетэйгээ хуваалц.

5:41

• Хуучин Гэрээний үед дүрслэгдэж байсан амьтны тахилууд нь Есүс Христээр дамжуулан өршөөгдөх тухай израилын хүүхдүүдэд заах зорилготой байв. Эдгээр тахилын тухай унших нь хүүхдүүдэд тань ямар ач тустайг бодож үзээрэй. Та Леви 1:1–4-ийг хүүхдүүдтэй хамт уншихдаа Гетсемани дахь болон загалмай дээрх Есүс Христийн зургуудыг үзүүлж болно (Сайн мэдээний зургийн цуглуулга, 56, 57-г үзнэ үү). Тэдэнд Есүс Христийн золиослолыг сануулах үг, хэллэгүүдийг олоход тусал.

• Та бас амьтдын оронд юуг өргөл болгохыг бидэнд зарлиг болгодгийг мэдэхийн тулд 3 Нифай 9:19–20-ийг хамтдаа уншиж болно. Их Эзэнд харууссан зүрх, гэмшсэн сэтгэлтэй байх гэдэг нь юу гэсэн утгатай вэ? Энэ асуултад хариулахад туслахын тулд Судруудын удирдамж дээрх “Харууссан зүрх” (Gospel Library) хэсгийг үзнэ үү.