“25–31 Mei. ‘Hae God I Jusumaot Wan Man blong I Tekemaot Olgeta long Han blong King: Jajes 2–4; 6–8; 13–16,” Kam Folem Mi—Blong Hom mo Jos: OlTesteman 2026 (2026)
“25–31 Mei. ‘Hae God I Jusumaot Wan Man blong I Tekemaot Olgeta long Han blong King,’” Kam Folem Mi: OlTesteman 2026
“Bambae Mi Mi Kam Wetem Yufala”—Debora, woman we I Profet, i kam long Des Leavitt
25–31 Mei: “Hae God I Jusumaot Wan Man blong I Tekemaot Olgeta long Han blong King”
Jajes 2–4; 6–8; 13–16
Yumi evriwan i save olsem wanem taem yumi mekem wan sin, yumi harem nogud from, mo afta sakem sin mo mekem strong tingting blong jenisim ol fasin blong yumi. Be oltaem, yumi fogetem wanem we yumi bin stretem bifo, mo taem we temtesen i kam, yumi luk se yumi mekem semmak sin bakegen. Paten ia i kamkamaot plante taem insaed long buk blong Jajes. Ol bilif mo wosip praktis blong Ol Man Kenan—we oli mas ronemaot olgeta long graon blong olgeta—i mekem Ol Man Isrel oli brekem kavenan blong olgeta we oli mekem wetem Lod mo oli tanem baksaed blong olgeta long Hem blong no wosipim Hem. From hemia, oli lusum proteksen blong Hem mo oli kam ol prisena. Mo evri taem hemia i hapen, Lod i givim long ol kavenan pipol janis blong sakem sin mo i jusum wan blong tekemaot olgeta long han blong king, wan lida blong militeri we oli singaotem “jaj.” I no evri jaj long Buk blong Jajes we oli man we oli gat stret mo gud fasin, be sam long olgeta i soemaot bigfala fet blong mekem ol pikinini blong Isrel oli kasem fri, mo putumbak ol kavenan rilesensip blong olgeta wetem Lod. Ol stori ia, oli rimaenem yumi se nomata wanem i lidim yumi longwe long Jisas Kraes, Hem i Ridima blong Isrel mo oltaem bae Hem i wantem blong mekem yumi kam fri mo welkamem yumi i gobak long Hem.
Blong gat wan bigfala lukluk long buk blong Jajes, luk long “Jajes, book of” insaed long Bible Dictionary.
Ol aedia blong Stap Lanem Samting long Hom mo long Jos
Jajes 2:1–19; 3:5–12
Lod i fogivim mi, taem mi sakem sin oltaem.
Buk blong Jajes i save kam tugeta, wan woning mo wan ples blong leftemap tingting. Lukaotem ol woning ia mo ol toktok blong leftemap tingting taem yu ridim Jajes 2:1–19; 3:5–12. ?Olsem wanem nao yu filim abaot ol toktok blong woning mo blong leftemap tingting oli blong yu?
Eksampol, sapos Jajes 2:19 hem i abaot yu mo ol temtesen blong yu be i no abaot Ol Man Isrel blong bifo, ?wanem nao bae i save talem? Sapos Jajes 3:9 hem i abaot wanem we Lod i bin mekem blong mekem yu kam fri, ?wanem nao bae i save talem?
Tingting blong stap ridim kwestin mo ansa long pej 9 blong Blong Ol Yut Oli Kam Strong: Wan Gaed Buk blong Stap Mekem Ol Joes. ?Olsem wanem nao yu filim se hemia i aplae long eksperiens blong Ol Man Isrel insaed long blong Jajes? ?Wanem nao hemia, i tijim yu abaot Jisas Kraes?
Jajes 4:1–15
Mi save givim insperesen long ol narawan blong gat fet long Lod.
Samtaem, fet blong wan man o woman, i save givim insperesen long plante narawan. Long Jajes 4, wan woman ia, hem i, Debora. Ridim abaot hem long Jajes 4:1–16, mo teknot long paoa blong hem we hem i gat long ol pipol raon long hem. Hemia i samfala kwestin blong helpem yu blong tingting long olsem wanem eksperiens blong hem, maet i aplae long laef blong yu:
-
?Olsem wanem nao bae yu tokbaot ol situesen blong Ol Man Isrel we oli go tru long hem long tetaem ia? (luk long ol ves 1–3). ?Wanem ol samting we i sem semmak we yu luk long ol situesen blong tedei—long wanwan man mo woman mo sosaeti?
-
?Wanem ol toktok o aksen blong Debora i soem yu se hem i gat fet long Lod? ?Olsem wanem nao fet blong hem i givim paoa long ol narawan? ?Wanem bakegen i tajem yu abaot hem?
-
Wanem nao yu filim Debora i minim long kwestin blong hem long ves 14: “Naoia Hae God i stap go fastaem long yufala, i stap lidim yufala” ?Olsem wanem nao “Lod i stap go fastaem long yu? (luk long Doktrin mo Ol Kavenan 84:87–88).
Tingting hevi long olsem wanem fet blong yu long Jisas Kraes, i save blesem ol narawan long wei we fet blong Debora i bin blesem Barak mo ol narafala Man Isrel. Blong helpem yu tingbaot hemia, maet yu save stadi long mesej blong Elda Neil L. Andersen “Yumi Toktok abaot Kraes” (Liahona, Novemba 2020, 88–91). Lukaotem ol mesej blong (1) ol risen blong toktok moa open abaot Sevya mo (2) ol wei blong mekem.
Afta, maet yu mekem wan lis blong ol samting we yu save abaot Jisas Kraes—aot long ol skripja, long ol toktok blong ol profet, mo long eksperiens blong yuwan. ?Huia nao i nid blong save hemia? ?Olsem wanem nao bae yu serem?
Luk tu long Matiu 5:14–16; 1 Pita3:15; “Each Life That Touches Ours for Good,” Hym, namba 293.
Invaetem ol pikinini blong serem wanem oli gat Sapos yu wan tija—long hom o long jos—“givim janis long olgeta we oli stap lan, blong serem wetem wanwan long olgeta, wanem we oli stap lanem abaot Sevya mo gospel blong Hem. Taem yu mekem hemia, bae i helpem olgeta blong mekem ol trutok we oli bin lanem i kam pat blong olgeta mo talemaot ol tingting mo filing blong olgeta.” (Tij long Wei blong Sevya, 26). Eksampol, taem yufala stap stadi long Jajes 4 tugeta, yu save givim long wanwan long olgeta we oli stap lan, .speseli wan samting blong lukaotem insaed long japta ia mo afta, invaetem olgeta blong serem wetem wanwan long olgeta, wanem oli faenem
Jajes 6–8
Lod bambae i save mekem ol merikel taem yumi trastem ol wei blong Hem.
Taem yu ridim Jajes 6–8, tekem not abaot ol eksampol long taem we Lod i askem Gideon blong bilivim wan samting we maet hem i no sua abaot hem. ?Hem i bin eva askem wan samting we i semmak olsem long yu?
?Wanem nao yu filim we Lod i stap traem blong tijim yu wetem stori ia? ?Olsem wanem nao yu bin luk Lod i mekem wok blong Hem long ol wei we yu no save pikjarem?
Jajes 13–16
God i mekem mi kam moa strong taem mi stap fetful long ol kavenan blong mi.
Samson i lusum tugeta ,paoa long saed blong bodi mo long saed blong spirit blong hem from se hem i brekem kavenan blong hem wetem God, wetem ol kavenan ia we oli speseli blong Ol Man Nasaret (blong moa infomesen abaot Ol Man Nasaret, luk long Namba 6:1–6; Jajes 13:7). Taem yu rid abaot Samson long Jajes 13–16, tekem not se ol ves ia oli soem se Lod i bin stap wetem Samson, mo tu ol ves we oli soem se Samson i no komitim hem fulwan long Lod.
Maet yu tingting hevi tu long ol kavenan we yu bin mekem wetem Lod. ?Long wanem wei nao ol kavenan ia oli bin tekem paoa blong Hem i kam long laef blong yu? ?Wanem nao yu bin lanem long eksperiens blong Samson we i givim yu insperesen blong stap tru long ol kavenan blong yu wetem God?
Sista Ann M. Dibb i bin tijim se: “Samson i bon i kam long wol ia, wetem bigfala paoa we hem i save kasem. Mama blong hem i bin kasem promes se: ‘Hem nao bambae i statem wok ia blong tekemaot yufala long han blong ol man Filistia, blong sevem yufala’ [Jajes 13:5]. Be taem Samson i stap groap, hem i bin lukluk moa long ol temtesen blong wol ia, be i no long daereksen blong God. Hem i bin mekem ol joes from se oli mekem hem i glad [Jajes 14:3] be i no from ol joes ia oli bin stret. Ol skripja oli ripitim toktok ia ‘mo i godaon’ [Jajes 14:7] taem we oli stap tokbaot ol wokbaot, ol aksen mo ol joes blong Samson. Hem i no bin girap mo saen i go blong mekem o kasem bigfala paoa we i stap blong hem i kasem, be Samson i letem wol i winim hem, i lusum paoa ia we God i bin givim long hem, mo i ded long wan ded we i nogud mo i kam kwiktaem” (“Arise and Shine Forth,” Liahona, May 2012, 118).
Luk tu long Dallin H. Oaks, “Ol Kavenan mo Ol Responsabiliti,” Liahona, Mei 2024, 93–96; Ulisses Soares, “Tras long Kavenan We I Kam tru long Jisas Kraes,” Liahona, Mei 2024, 17–21.
Sam Aedia blong Tijim Ol Pikinini
From se hemia i fas Sandei blong manis, oli leftemap tingting blong ol Praemeri tija blong yusum ol aktiviti blong stap lanem samting long “Apendiks B: Stap Mekem Rere Ol Pikinini from wan Laeftaem long Kavenan Rod blong God.”
Jajes 3:7–9, 12–15
Jisas Kraes i Sevya blong mi.
-
Jajes 3 i tokbaot wan paten we i tij abaot paoa blong Sevya blong mekem yumi kam fri aot long sin. Blong helpem ol pikinini blong yu blong luksave paten ia, yu save raetemdaon ol sentens ia: “fasin we i no gud,” “oli krae i go long Hae God,” mo “blong i jusumaot wan man, blong i tekemaot olgeta long han blong king ya.” Afta, ol pikinini blong yu oli save lukaotem ol toktok ia long Jajes 3:7–9 mo Jajes 3:12–15. ?Wanem nao yumi lanem abaot Lod long ol paten ia?
-
Blong tokbaot plante se Jisas Kraes, Hem i Man we I Mekem yumi kam Fri, yu save karem sam pikja i kam tugeta blong ol pipol, we i tekem tu, wan pikja blong Jisas, mo putum olgeta i lukluk i go daon. Askem ol pikinini blong yu blong gat wanwan janis blong stap tanem ova ol pikja. Taem oli faenem pikja blong Jisas, singsing wan singsing abaot Hem, olsem “He Sent His Son” (Children’s Songbook, 34–35), mo talem long ol pikinini blong yu abaot olsem wanem Hem i bin mekem yu kam fri.
Jajes 4:1–15
Mi save givim insperesen long ol narawan blong gat fet long Lod.
-
Yu save yusum “Debora–Woman we I Profet” long Ol Stori long OlTesteman, 92–95, blong talem stori ia long ol pikinini blong yu long Jajes 4. Serem wetem wanwan long yufala, wanem yu laekem tumas long Debora. ?Olsem wanem nao fet blong hem long Lod i blesem ol pipol we oli stap raon long hem? ?Wanem nao yumi save mekem blong helpem ol narawan blong gat moa fet long Jisas Kraes?
2:9Deborah the Prophetess
Jajes 7:1–21
Lod i save yusum ol smolsmol samting blong mekem ol bigfala wok.
-
Yusum Jajes 7:4–7, aktiviti pej blong wik ia o “Ami blong Gideon” long Ol Stori long OlTesteman, 96–99, blong tijim ol pikinini blong yu abaot olsem wanem Lod i bin mekem ol ami blong Isrel i kam moa smol. ?From wanem Lod i wantem ami blong Gideon blong i wan smol ami nomo? (luk long Jajes 7:2)
2:37The Army of Gideon
-
ol pikinini blong yu oli save droem ol pikja blong wan naef blong faet, sil blong proteksen, trampet, kolman laet mo .jag mo tokbaot wijwan long ol samting ia nao bae oli wantem long wan taem blong faet. Afta, oli save ridim Jajes 7:16 blong lanem wanem we Lod i talem long ami blong Gideon blong yusum. Taem yu rid abaot faet long Jajes 7:19–21, serem wetem wanwan long yufala, wanem yu lanem abaot Lod insaed long stori ia.
Samson I Brekemdaon Ol Bigfala Pos, i kam long James Tissot ol narawan
Jajes 13:5
Blong kipim ol kavenan i givim mi paoa.
-
Kavenan blong Samson wetem Lod i bin givim hem paoa long saed blong bodi, olsem we kavenan blong yumi i givim paoa long yumi long saed blong spirit. Ol pikinini blong yu, maet oli glad blong mekem sam eksasaes mo stap toktok raon long olsem wanem ol eksasaes ia oli save helpem olgeta blong mekem ol bodi blong yumi oli strong. ?Olsem wanem nao taem yumi kipim ol kavenan blong yumi, i mekem spirit blong yumi i strong? (luk long Mosaea18:8–10; Doktrin mo Ol Kavenan 20:77, 79).
Blong kasem moa aedia, luk long magasin blong Fren blong manis ia.