Rut; 1 Samuel 1–7

Laef i had long wan wido long eni longfala rod. Be taem we hasban blong Rut i ded, situesen blong hem i had bigwan. Long kalja blong Ol Man Isrel long taem ia, wan woman we i no gat man o boe oli no gat raet long wan propeti, mo i gat smol janis blong oli save mekem mane. Taem yu stap ridim stori blong Rut, luk olsem wanem Lod i mekem ol hadtaem ia oli kam ol bigfala blesing. ?Wanem nao yu luk save long Rut we i bin helpem hem? ?Olsem wanem nao Boas i sevem Rut aot long situesen blong hem we i harem nogud tumas ia? (luk long Rut 4:4–10). ?Olsem wanem nao tugeta, Rut mo Boas, tufala i semmak long Jisas Kraes?

Luk tu long “Be Still, My Soul,” Hym, namba 124.

Ating yu safa bigwan from yu lusum wan, semmak olsem Rut mo Nomi (luk long Rut 1:1–5). O mebi, olsem Hana, yu wantem wan blesing we yu no kasem yet (luk long 1 Samuel 1:1–10). ?Olsem wanem nao ol woman ia oli soem fet blong olgeta long God? ?Wanem nao yu lanem aot long ol eksampol blong olgeta?

Yes, i no evriwan we i stap prea blong gat wan pikinini, bae i kasem wan pikinini; mo i no evriwan we waef o man blong hem i ded, i mared bakegen. Be evriwan we oli tanem olgeta i go long Sevya, oli kasem help mo daereksen blong Hem. Tingting long olsem wanem nao “[Lod] i bin leftemap tingting blong [yu]” (Rut 2:12) long taem blong ol hadtaem blong yu.

Luk tu long Amy A. Wright, “Bae Oli Stap Laef long Dei Ia,” Liahona, Novemba 2023, 9–11.

Taem ol enemi blong olgeta oli atakem olgeta, Ol Man Isrel oli ting se i simpol blong stap holem taet ak blong kavenan, bae i protektem olgeta. Taem yu ridim 1 Samuel 4–6, tingbaot from wanem hemia i no bin wokaot. (Tekem not tu abaot ol aksen blong ol boe blong IIae we oli no stret mo gud, we oli bin givim seves olsem ol pris insaed long tabenakol, long 1 Samuel 2:12–25.) ?Wanem nao yu ting se Lod i stap traem blong tijim long ol pipol blong Hem? ?Wanem nao yu lanem aot long wanem we i hapen long Ol Man Filistia afta we oli kasem ak? (luk long ol japta 5–6). ?Wanem nao yu lanem aot long ol hadwok blong Ol Man Isrel we oli mekem blong kasem bak proteksen blong Lod long 1 Samuel 7?

Maet bae yu kasem insperesen blong stap ridim poem blong pres, blong Hana insaed long 1 Samuel 2:1–10. ?Wanem nao yu faenem long ol toktok blong hem we i save helpem ol pikinini boe blong Eli mo evri narafala Man Isrel?

Wanwan taem, yu save filim olsem Samuel, we i bin harem voes blong Lod, be i no bin haremsave. Olsem yumi evriwan, Samuel i bin lanem olsem wanem blong haremsave voes blong Lod. Taem yu stap stadi long 1 Samuel 3, wanem nao yu lanem long yangfala boe ia abaot blong stap harem mo obei voes blong Lod? Mo tu, yu save lukaotem sam moa skripja ia mo mekem wan lis blong ol gaedlaen we oli save helpem wan man o woman blong harem save voes blong Lod: 1 King 19:11–12; Luk 24:15–32; 3 Nifae 11:3–7; Doktrin mo Ol Kavenan 6:22–23; 8:2–3; 9:7–9.

Ol narafala taem, yu save filim se ol heven oli sat mo Lod i no wanem blong toktok wetem yu. Presiden Russell M. Nelson i talem: “?Yu ting se God i rili wantem toktok wetem yu? “!Yes!” (“Revelesen blong Jos, Revelesen blong Ol Laef blong Yumi,” Liahona, Mei 2018, 93–96). Taem yu stadi long mesej blong Presiden Nelson, ?wanem nao yu faenem we i givim insperesen long yu blong harem mo obei long voes blong Lod? ?Wanem nao Presiden Nelson i invaetem yu blong mekem, mo wanem ol blesing nao hem i promesem? Mo tu, yu save faenem ol invitesen mo ol promes blesing abaot revelesen long “Wokbaot long laet blong God” (Blong Ol Yut Oli Kam Strong: Wan Gaed Buk blong Stap Mekem Ol Joes, 16–20). Tingting blong stap jusum wan samting we yu save mekem blong “kam antap long paoa blong yufala long saed blong spirit blong kasem revelesen.”

• Taem yu serem wetem ol pikinini blong yu stori blong Rut (yu save yusum “Rut mo Naomi” long Ol Stori long OlTesteman, 100–103), invaetem olgeta blong leftemap han blong olgeta evri taem oli harem wan aksen blong kaen fasin, insaed long stori ia. mo tu, oli save serem olsem wanem oli filim taem ol narawan oli kaen long olgeta, o taem we oli kaen long ol narawan. ?Olsem wanem nao Sevya i bin stap kaen long yumi? ?Olsem wanem nao yumi save folem eksampol blong Hem? (luk long “Kindness Begins with Me,” Children’s Songbook, 145).

  

  2:0

• Ol stori blong Rut mo Hana i save givim insperesen long ol pikinini blong yu blong stap fetful, taem i gat hadtaem. Tingting blong helpem olgeta blong krietem wan simpol jat wetem ol heding ia Ol Hadtaem, Ol Aksen, Ol Blesing. Afta, tugeta, yufala save ridim Rut 1:3–5, 8, 16; 2:1–3, 8–12; 4:13–17; 1 Samuel 1:1–18 mo raet andanit long ol heding ia wanem oli faenem long ol ves ia. ?Olsem wanem nao Rut mo Hana i soem fet blong tufala long Lod? Yu o ol pikinini blong yu, afta, yufala save serem ol eksampol blong olsem wanem Lod i bin blesem yu long ol taem we yu fesem hadtaem.

• Blong lanem abaot Hana, ol pikinini blong yu oli save ridim 1 Samuel 1:1–18 o “Hana” long Ol Stori long OlTesteman (104–5) o wajem “Hannah’s Faith” (video, Gospel Laebri). Maet bae i wan gud taem blong sakem wan balong i go long wan pikinini mo invaetem olgeta blong talem pat blong stori bifo pasem balong i go long wan narawan bakegen. ?Wanem nao yu lanem abaot prea long eksampol blong Hana?

  

  1:15

  

  3:9

• Maet wan simpol drama i save helpem ol pikinini blong yu blong lanem samting aot long eksperiens blong Samuel long saed blong revelesen. Wan pikinini i save aktem se hem i Samuel, mo wan narawan i save aktem se hem i Eli taem yu stap ridim 1 Samuel 3:1–10 (luk tu long “Profet Samuel” long Ol Stori long OlTesteman, 106–9, o vidio ia, “Samuel and Eli,” Gospel Laebri). ?Wanem nao yumi lanem aot long Samuel abaot olsem wanem blong harem voes blong Lod? ?Olsem wanem nao yumi soem se yumi wantem blong lisin taem we Lod i toktok long yumi?

  

  2:10

  

  1:58

• Askem ol pikinini blong yu long olsem wanem bae oli save eksplenem long wan, olsem wanem Lod i stap toktok long olgeta. Yu save helpem olgeta blong lukaotem ol ansa long Doktrin mo Ol Kavenan 6:22–23; 8:2–3; 9:7–9.