1 Samuel 17–18; 24–26; 2 Samuel 5–7

Stori blong Deved mo Golaeat hem i wan long ol bes stori we plante oli save, insaed long ol skripja. Yes, oltaem yumi stap lukluk nomo long Deved. Be long taem naoia, taem yu stadi long 1 Samuel 17, tingting hevi tu long ol toktok blong narafala pipol insaed long japta ia (luk long lis andanit ia). ?Wanem nao yu lanem abaot olgeta mo ol risen blong olgeta? ?Wanem nao yu lanem abaot Deved? ?Olsem wanem nao hem i defren?

• Golaeat: ol ves 8–10, 43–44

• Eliab: ves 28

• Sol: ves 33

• Deved: ol ves 26, 32, 34–37, 39, 45–47

Stori blong yu, nomata se i no gat plante we oli save gud long hem olsem blong Deved, sua se bae i tekem tu, ol bigfala saes blong ol jalenj olsem Golaeat mo ol spesel janis blong eksasaesem fet long Lod. ?Wanem nao eksampol blong Deved i tijim long yu abaot stap fesem wanem we i kam agensem yu, insaed long stori blong yu? mo tu, yu save ridim mesej blong Presiden Camille N. Jonson “Invaetem Kraes blong Raetem Stori blong Yu” (Liahona, Novemba 2021, 80–82) wetem wan long ol jalenj blong yu long maen. ?Lukaotem ol ansa blong ol kwestin olsem olgeta ia: ?Olsem nao Lod i wantem mi blong lukluk long ol jalenj blong mi? ?Olsem wanem nao Hem i bin helpem mi bifo? ?Olsem wanem nao mi save soem se mi trastem Hem blong raetem stori blong mi?

Maet yu save finis se i gat sam japta we oli no gud afta long stori blong Deved (luk long, eksampol, 2 Samuel 11). Sapos yu bin gat janis blong givim sam advaes long Deved afta long faet blong hem, ?wanem nao bae yu talem? ?Olsem wanem nao advaes ia i aplae long laef blong yu?

Luk tu long “The Lord Will Deliver Me” (vidio), Gospel Laebri.

3:24

Blong ademap long ol jalenj blong wanwan man o woman, yumi tu, yumi fesem ol bigbigfala mo ol defdefren problem we i afektem ful wol. Taem ol fos blong ivel oli “kam tugeta …blong faet” agensem ol fos blong gud (1 Samuel 17:1), maet bae yumi tingting se olsem wanem nao ol hadwok blong yumiwan i save mekem wan janis i hapen. ?Wanem nao yu lanem aot long stori blong Deved we i givim hop long yu?

Luk tu long “Yumi Mas Gohed,” STSP, pej 10.

Taem yu ridim 1 Samuel 18, tingting blong luksave wanem i defren long Sol mo pikinini boe blong hem, Jonatan (we sapos i no bin Deved, bae oli tingting se hem nao bae i kam nekis king). ?Olsem wanem nao Sol mo Jonatan tufala i tingting long sakses blong Deved? ?Wanem nao yu save lanem aot long eksperiens ia?

?Wanem nao yu faenem long ol fasin blong Jonatan mo ol aksen we oli rimaenem yu abaot Jisas Kraes?

Long 1 Samuel 24–26, lukaotem ol lesen abaot, fasin blong gat hae tingting, fogivnes mo fasin blong save kontrolem yuwan. Maet yu save tingting tu blong stap ridim mesej blong Elda Mak A. Bragg “Fasin blong Gat Kontrol Olsem Hemia blong Kraes” olsem pat blong stadi blong yu (Liahona, Mei 2023, 60–63). ?Olsem wanem nao Deved, Abigel mo ol narawan oli soemaot—o oli no soemaot—fasin blong gat kontrol olsem hemia blong Kraes? ?Wanem ol janis nao yu gat blong soem fasin blong gat kontrol olsem hemia blong Kraes?

Mesej blong Sista Kristen Yee “Tanem Nogud I Kam Gud: Rod Ia blong Kasem Hiling Tru long Fasin blong Fogiv” (Liahona, Novemba 2022, 36–39) i save helpem yu blong stadi 1 Samuel 25. ?Olsem wanem nao Abigel i olsem Jisas Kraes?

Iven afta we Deved i winim Golaeat long faet, ol problem blong hem wetem Ol Man Filistia, oli no finis yet. Taem yu stap rid long 2 Samuel 5:17–25, tingting long olsem wanem eksampol blong Deved i save helpem yu long ol jalenj we yu fesem (luk tu long 1 Samuel 23:2, 10–11; 30:8; 2 Samuel 2:1). ?Olsem wanem nao yu bin kasem blesing taem yu stap tekem aksen long revelesen we yu bin kasem?

Taem we Deved i talem se bae hem i bildim wan haos, we i wan tempol, blong Lod (Luk 2 Samuel 7: 1–3), Lod i ansa se pikinini boe blong Deved bae i bildim haos ia (luk long ol ves ia 12–15; luk tu long 1 Kronikel 17:1–15). Lod i talem tu se bae Hem tu bae i bildim wan “haos” blong Deved, minim ol laen, mo se jea blong king blong hem bae i stap foreva ( luk long 2 Samuel 7:11, 16, 25–29; Sam 89:3–4, 35–37). Promes ia Jisas Kraes i fulfilim, King blong yumi we I No Save Finis, we i wan laen blong Deved (luk long Matiu 1:1; Luk 1:32–33; Jon 18:33–37).

• Maet yu wantem blong yusum “Deved mo Golaeat” long Ol Stori long OlTesteman, 112–16, blong helpem ol pikinini blong yu blong save gud wanem i bin hapen long 1 Samuel 17:20–54. Afta, yu save askem olgeta blong talem bakegen stori ia, mo yusum ol pikja o laen droing long aotlaen ia. Askem olgeta, wanem nao oli ting se Lod i wantem olgeta blong lanem aot long stori ia.

  

  2:36

• Mo tu, yu mo ol pikinini blong yu i save mekem wan lis blong sam jalenj we oli had tumas, we maet oli save fesem long laef blong olgeta. Afta, helpem olgeta blong faenem ol samting we Deved i talem we i save help wetem ol jalenj ia (luk long 1 Samuel 17:26, 32, 34–37, 45–47). Serem olsem wanem Jisas Kraes i bin helpem yu long taem blong ol jalenj.

• Invaetem ol pikinini blong maj olsem Deved we i stap go blong faet wetem Golaeat, mo semtaem, oli singsing wan singsing abaot fasin blong no gat fraet olsem hemia, “I Will Be Valiant” (Children’s Songbook, 162).

• ?Olsem wanem nao yu save helpem ol pikinini blong yu blong lanem samting aot long frensip blong Jonatan mo Deved? Wan wei i blong givim long wanwan pikinini, tu pepa blong sep blong hat, wan we i ripresentem Deved mo narawan blong ripresentem Jonatan. Ridim tugeta sam sentens long ol pikinini, 1 Samuel 18:1–4 we i tokbaot bigwan lav we tufala fren ia i gat long wanwan long tufala. Afta, ol pikinini oli save raetem o dro long ol pepa sep blong hat blong olgeta, olsem wanem oli save soem lav long wan fren.

• Long ol japta ia, Deved i kam king blong Isrel. Maet bae i wan gud taem blong ol pikinini blong yu blong aktem se wan i wan king o kwin. ?Wanem ol loa nao bae oli mekem? ?Weaples nao bae oli go from help? Helpem ol pikinini blong yu blong faenemaot wetaem nao Deved i bin nidim help, hem i “askem,” o prea blong kasem ansa. Eksampol, taem yu stap ridim 2 Samuel 5:19, 23, invaetem ol pikinini blong lisin long toktok ia “askem” mo blong oli foldem han blong olgeta taem oli harem toktok ia. ?From wanem nao Deved i nidim help blong Lod long niufala responsabiliti blong hem?

• Talem long wanwan long yufala abaot ol taem we yu bin prea from help blong Papa long Heven. ?Wanem i mekem se i defren blong gat Hem i helpem yu?

• Ol king we yumi rid abaot olgeta insaed long OlTesteman, olgeta evriwan, oli gat ol mistek, mo ol kingdom blong oli bin en. Be Jisas Kraes, Hem i King we i stret gud evriwan mo bae i rul blong oltaem. Yu save helpem ol pikinini blong yu blong faenemaot hemia taem tugeta, yufala i ridim wanem we profet Netan i bin talem long King Deved long 2 Samuel 7:16–17. ?Olsem wanem nao kingdom blong Deved i no gat en? Helpem ol pikinini blong faenem mo ridim ol pat blong skripja we oli tijim se Jisas Kraes i wan laen blong Deved, Hem i wan King, olsem long Luk 1:32–33; Jon 18:33–37; mo Revelesen 19:16. ?Olsem wanem nao Jisas i defren long ol king blong wol ia? ?Olsem wanem nao yumi givim ona long Jisas Kraes olsem King blong yumi blong Taem we I No Save Finis?