1 Samuel 8–10; 13; 15–16

1 Samuel 8 i tokbaot wan samting we i bin hapen we i save jenisim ples we Ol Man Isrel bae oli kasem. Blong kasem proteksen agensem ol enemi blong olgeta, Ol Man Isrel oli wantem wanem we ol neba blong olgeta oli gat—wan king blong rul ova long olgeta. Taem yu rid abaot rikwes blong olgeta mo ansa blong Lod, tingbaot huia nao yu luk long hem blong kasem sefti mo daereksen. Tingting long wanem i minim blong letem Lod “i rul ova long [yu]” (1 Samuel 8:7).

Truaot long ol wik we i stap kam, bae yu rid abaot wan namba blong ol king we oli singaotem olgeta blong lidim Isrel. Taem yu lan abaot olgeta, tingting long ol kwestin ia:

• ?Olsem wanem nao ol woning blong Lod oli bin kam tru long 1 Samuel 8:10–18?

• ?Olsem wanem nao ol pikinini blong Isrel oli filim tru long joes blong olgeta blong gat wan king long wol ia?

• ?Olsem wanem nao Jisas Kraes i defren long ol king blong wol ia? Tingting long wanem ol paoa blong wol we maet yu nidim blong karemaot long laef blong yu blong letem Kraes i stap olsem King blong yu.

Luk tu long “Rejoice, the Lord Is King!,” Hym, namba 66.

Ridim abaot olsem wanem God i bin jusum king blong Isrel long 1 Samuel 9–10 mo 16 (luk speseli long 9:15–17; 10:1–12; 16:1–13). Lukaotem ol sentens we i helpem yu andastanem wanem i minim blong “God i mas singaotem wan man, tru long profesi” insaed long Jos blong Lod tedei (Ol Toktok blong Bilif 1:5). Maet yu tingting blong stap putum yuwan long ples blong lida we i stap givim koling (Samuel), man we oli singaotem (Sol mo Deved), mo ol pipol we oli singaotem olgeta blong givim seves long olgeta (Ol Man Isrel). ?Wanem nao yu lanem aot long ol toktok mo ol aksen blong olgeta, insaed long ol japta ia?

Tingting long olsem wanem i isi tumas blong Sol i fraet long 1 Samuel 10, i wan sapraes blong rid abaot “stronghed blong hem” mo “fasin blong stap flas” afta we hem i kam king (1 Samuel 15:23). ?From wanem yu ting se hemia i hapen? Long 1 Samuel 13:5–14, ?wanem ol fasin mo ol aksen we yu luk we i lid i go blong foldaon?

Long 1 Samuel 15, bae yu rid abaot wan komanmen we i kam long Lod, se Sol i no obei from se, hem i tingting se hem i gat wan gudfala risen. Blong lanem samting aot long ol nogud joes blong Sol, luk long ves 22 mo riplesem toktok ia “sakrifaes” mo “nambawan sipsip” wetem ol samting we oli gud be oli no impoten tumas olsem blong stap lisin gud mo stap obei long Lod. ?Olsem wanem nao yu bin kasem blesing taem yu putum tingting blong Lod i kam faswan long laef blong yu?

?Yu bin eva mekem wan desisen folem “wanem we man i lukluk long bodi blong man nomo” long wan samting o long wan man o woman, afta biaen bae yu faenemaot se yu bin rong? Maet yu bin kakae wan samting we i no bin gud olsem we yu bin luk aotsaed blong hem. O maet yu bin jajem wan i no fea.

Taem we Samuel i stap lukaotem wan niufala king blong Isrel, Lod i tijim hem long wan wei we i moa gud. Rid abaot hemia long 1 Samuel 16:6–7, mo tingting blong stap mekem wan lis blong ol wei we ol pipol oli jajem ol narawan long “wanem we man i lukluk long bodi blong man nomo.” Yu save faenem sam eksampol long mesej blong Elda Christophe G. Giraud-Carrier “Yumi Ol Pikinini blong Hem” (Liahona, Novemba 2023, 114–16). ?Wanem nao i minim blong lukluk long “tingting blong man [hat blong man],” olsem we Lod i mekem? (1 Samuel 16:7). Yu save faenem ol eksampol tu blong hemia long mesej blong Elda Giraud-Carrier. Maet yu tingting long sam narafala taem, taem we Sevya i lukluk ova long wanem we man i lukluk long man long hem. (Luk long, eksampol, Mak 12:41–44; Luk 5:1–11; 19:1–9; Jon 4:5–30; Moses 6:31–36.) ?Wanem nao yu lanem long ol eksampol ia?

?Olsem wanem nao yu save folem eksampol blong Sevya long wei we yu lukluk long ol narafala man—mo long yuwan? ?Olsem wanem nao taem we yu stap mekem olsem, i afektem oltaem we yu toktok o mit wetem ol narawan? Tingting blong stap talem long wan abaot ol gud samting we yu luk long hat blong olgeta.

Luk tu long Ulisses Soares, “Ol Brata mo Sista long Kraes,” Liahona, Novemba 2023, 70–73.

• Taem yu ridim 1 Samuel 8 wetem ol pikinini blong yu,helpem olgeta blong faenem ol risen we i mekem se Samuel i bin talem long Ol Man Isrel se blong gat wan king i no wan gudfala aedia. ?From wanem i moa gud blong gat Jisas Kraes olsem king blong yumi? Maet yufala save mekem tugeta, wan pepa hat blong king mo gat wanwan janis blong stap werem mo stap serem wan samting we yumi save mekem blong soem se yumi wantem Jisas blong stap olsem king blong yumi. (Luk long tu long Jeremaea 23:5; Doktrin mo Ol Kavenan 45:59.)

• Stori blong God we i stap jusum Sol mo Deved blong kam ol king i save helpem ol pikinini blong yu blong andastanem olsem wanem God i stap singaotem ol pipol blong givim seves insaed long Jos tedei tru long revelesen. Blong tijim olgeta long ol stori ia, yu save raetemdaon ol samting we oli hapen insaed long stori long ol pis blong pepa, mo ol pikinini blong yu oli save putum olgeta long stret oda taem yufala ridim ol sentens blong skripja tugeta (luk long tu long “Yang Deved” long Ol Stori long OlTesteman, 110–11). Afta, yu save tokbaot ol taem we God i bin blesem yu wetem paoa long saed blong spirit blong mekem wan asaenmen o koling i hapen (luk long 1 Samuel 10:9–10).

  

  1:16

• Hemia, maet i wan gudfala taem blong tijim ol pikinini blong yu long namba faef toktok blong bilif. Talem long olgeta olsem wanem yu bin kasem koling blong yu insaed long Jos. ?Olsem wanem nao yu save se God i singaotem yu?

• Wan lesen we i yusum samting i save helpem ol pikinini blong yu blong andastanem prinsipol long 1 Samuel 16:7. Eksampol yu save soem long olgeta sam kaekae o wan buk wetem wan plastik o kova we i no majem stret ol samting we i stap insaed. Wanem nao 1 Samuel 16:7 mo samting we yu yusum long lesen i givim tingting long olsem wanem yumi mas lukluk long yumi wanwan mo ol narafala man? Singsing wan singsing we i tokbaot plante prinsipol ia, olsem “Love One Another” (Children’s Songbook, 136).

  Yusum ol samting long ol lesen blong yu. Taem ol pikinini blong yu oli gat wan samting blong lukluk long hem mo tajem we i go wetem wan prinsipol blong gospel, bae oli save tingbaot oltaem. Eksampol, taem yu ridim 1 Samuel 16:7 wetem olgeta, yu save letem olgeta oli helpem yu faenem ol eksampol blong ol samting we oli giaman long ae blong soem poen se yumi mas traem blong lukluk olsem we Lod i mekem—blong stap lukluk long “tingting blong man [o hat]”—bitim blong jajem folem “wanem we man i stap lukluk long bodi blong man nomo.”

• Yu mo ol pikinini blong yu i save serem ol eksperiens we yu bin lanem from wanem yu mas lukluk man long “tingting blong man [o hat],” be i no “wanem we man i lukluk long bodi blong man nomo” (ves 7). Maet yufala save gat wanwan janis blong stap talem long wanwan long yufala, abaot ol gudfala kwaliti we yufala i luk long hat blong wanwan long yufala.