11–17 Mei. ‘Yufala I Mas Lukaot Gud blong Yufala I No Fogetem Lod’: Dutronome 6–8; 15; 18; 29–30; 34,” Kam Folem Mi—Blong Hom mo Jos: OlTesteman 2026 (2026)
11–17 Mei. ‘Yufala I Mas Lukaot Gud blong Yufala I No Fogetem Lod,’” Kam Folem Mi: OlTesteman 2026
Moses long Hil Neboho, i kam long Jon Steel, © Providence Collection/licensed from goodsalt.com
11–17 Mei: “Yufala I Mas Lukaot Gud blong Yufala I No Fogetem Lod”
Dutronome 6–8; 15; 18; 29–30; 34
Seves blong Moses long wol ia i stat long wan hil, taem we Lod i toktok long hem long wan smol tri wetem faea (luk long Eksodas 3:1–10 Mo i en tu long wan hil, ova long 40 yia afta, taem we God i givim long Moses wan lukluk blong promes graon ia antap long hil blong Neboho (luk long Dutronome 34:1–4). Moses i spendem ful laef blong hem blong i rere ol pikinini blong Isrel blong oli go long promes graon, mo buk blong Dutronome i rekodem las instraksen, rimaenda, tok blong askem strong, mo ol strong plis blong hem wetem Ol Man Isrel. Taem yu ridim ol toktok blong hem, i klia se stamba tingting long seves blong Moses—wok blong rere we ol pipol oli nidim blong mekem—i no blong oli mas laef long draeples, blong winim ol enemi, o stap bildim wan nesen. Hem i abaot blong oli lanem blong lavem God, obei long Hem, mo stap tru long Hem. Hemia nao wanem yumi evri wan i nidim blong rere blong yumi save go long promes graon blong laef we i no save finis. Moses we i neva putum leg blong hem long “graon blong hem i gud tumas, oltaem i karem fulap kaekae” (Eksodas 3:8), from fet blong hem mo hem i stap fetful, hem i go long promes graon we God i rere blong olgeta we oli folem Hem.
Blong gat wan bigfala lukluk long Buk blong Dutronome, luk long “Dutronome” insaed long Bible Dictionary.
Ol aedia blong Stap Lanem Samting long Hom mo long Jos
Dutronome 6:4–7; 8:2–5, 11–17; 29:18–20; 30:6–10, 14–20
“Yu mas lavem Hae God* ya we i God blong yu long olgeta hat blong yu.”
Loa blong Moses i tekem tu plante seremoni aotsaed mo ol kastom. Olsem we bae yu luk long kaonsel blong Moses insaed long Dutronome, Lod tu i wari abaot insaed situesen blong ol pipol blong Hem—situesen blong olgeta long saed blong spirit.
Long ol sentens andanit ia lukaotem toktok ia hat, mo tingting hevi long wanem hemia i ripresentem. Maet yu tingting long ol sentens ia olsem wan jekap long saed blong spirit long hat blong yu. ?Wanem nara jekap bae yu givim long yuwan? ?Wanem ol tritmen nao bae yu advaesem blong mekem helt blong hat blong yu i kam moa gud? Raetemdaon ol filing mo tingting blong yu:
-
Dutronome 6:4–7:
-
Dutronome 8:2–5:
-
Dutronome 8:11–17:
-
Dutronome 29:18–20:
-
Dutronome 30:6–10:
-
Dutronome 30:14–20:
Wan wei blong oganaesem ol tingting blong yu i save dro wan Sep blong hat mo raet insaed long hem ol samting we Lod i talem we yu mas gat insaed long hat blong yu. Afta, yu save raetem aotsaed ol samting we yu mas stap putum hat blong yu i stap longwe long hem.
?Olsem wanem nao yu soem se yu lavem God wetem ful hat blong yu? Blong kasem ol aedia, luk long “Lavem God, lavem neba blong yu” long Blong Ol Yut Oli Kam Strong: Wan Gaed Buk blong Stap Mekem Ol Joes, 10–12.
Luk tu long M. Russell Ballard, ““?Yu Yu Lavem Mi Moa, I Winim Ol Nara Samting Ia?”,” Liahona, Novemba 2021, 51–53.
Lukaotem ol niu wei blong yu blong lukluk ol samting long saed blong spirit. Kam Folem Mi i stap givim samfala ples long skripja mo samfala prinsipol we yumi save lukluk moa long olgeta, be yu no letem ol tingting ia oli stopem yu blong mekem moa samting long stadi blong yu. Taem yu ridim Dutronome, maet bae yu fanemaot wan prinsipol we oli no tokbaot plante long ples ia. Letem Tabu Spirit bae i gaedem yu long ol trutok we yu nidim blong lanem.
Dutronome 6:4–12, 20–25
“Yufala i mas lukaot gud blong yufala i no fogetem Lod.”
Plante long ol Ol Man Isrel we oli go long promes graon oli no fesem ol bigfala panis long Ijip o krosem Red Si. Moses bin i save se olgeta—mo ol fiuja jeneresen—bae oli nid blong tingbaot ol merikel blong God mo ol loa blong God sapos oli wantem gohed blong stap olsem ol pipol blong God.
?Wanem kaonsel nao yu faenem insaed long Dutronome 6:4–12, 20–25 we i save helpem yu blong tingbaot ol bigfala samting we God i bin mekem blong yu? ?Wanem nao i givim yu insperesen blong mekem se tok blong Lod bae oltaem i stap “[long olgeta tingting blong yufala]”? (ves [5]
Maet yu save stadi tu long mesej blong Brata Jan E. Newman “Stap Holemtaet Voes blong Ol Kavenan Pipol insaed long Ol Jeneresen we Oli Stap Kam Antap” (Liahona, Novemba 2023, 36–38) mo tingting long olsem wanem bae yu pasem fet blong yu long Kraes i go long ol fiuja jeneresen.
Luk tu long Dutronome 11:18–21; Dale G. Renlund, “Tingting long Gudfala Fasin mo Bigfala Paoa blong God,” Liahona, Mei 2020, 41–44; Bible Dictionary, “Frontlets or phylacteries.”
Dutronome 15:1–15
Blong stap helpem ol pipol we i stap long nid i nidim bigfala han mo hat we i wantem blong mekem.
Be yumi no kasem dei ia yet we “bae i no gat puaman long medel blong yumi” (Dutronome 15:4), mekem se olgeta prinsipol abaot fasin blong helpem olgeta we oli pua insaed long Dutronome 15 oli impoten yet tedei, iven we ol kaen praktis ia, i bin jenis. Luksave wanem we ol ves 1–15 i tij abaot from wanem yumi helpem ol pipol we oli stap nid mo wanem fasin yumi mas gat blong mekem hemia.
?Wanem i minim blong “yufala i mas glad blong letem oli kam kaon long yufala olsem we oli wantem,” i go long ol pipol we oli stap long nid? (ol ves8, 11). ?Wanem nao yu lanem aot long eksampol blong Lod abaot stap helpem ol pipol we oli stap long nid? (luk long ves 15).
Luk tu long “Have I Done Any Good?,” Hym, namba 223.
Dutronome 18:15–19
Moses i bin stap “olsem” Jisas Kraes.
Pita, Nifae, Moronae, mo Sevya Hemwan evriwan oli bin tokbaot profesi we i stap long Dutronome 18:15–19 (luk long Ol Wok 3:20–23; 1 Nifae 22:20–21; Josef Smit—Histri 1:40; 3 Nifae 20:23). ?Wanem nao yu lanem abaot Sevya long ol ves ia? Tingbaot wanem we yu bin Ridim abaot Moses long ol wik we i pas finis. Long wanem wei nao Moses i “olsem” Jisas Kraes?
Jisas Kraes i talem long ol pipol blong Hem long Amerika blong bifo se, “Mi mi hem we Moses i bin tokbaot,” (3 Nifae 20:23).
Dutronome 29:9, 30:15–20
Lod i invaetem mi blong jus bitwin gud mo nogud.
Bae i intresting blong komperem ol toktok blong Moses insaed long Dutronome 29:9; 30:15–20 wetem sam long ol las tijing blong Lihae i go long famli blong hem long 2 Nifae 2:26–29; 4:4. ?Olsem wanem nao Lihae i eksplenem moa wanem we Moses i bin tijim? ?Wanem nao yu fanem insaed long ol sentens ia we i givim insperesen long yu blong “jusum laef”? (Dutronome 30:19).
Sam Aedia blong Tijim Ol Pikinini
Dutronome 6:5
Mi save lavem Lod wetem ful hat blong mi.
-
Blong helpem ol pikinini blong yu oli andastanem Dutronome 6:5, yu save dro wan sep blong hat, dro wan bodi mo wan strong han. Ol pikinini blong yu oli save poen i go long ol pikja taem yu ridim ol toktok ia “hat,” “sol,” mo “paoa.” ?Olsem wanem nao yumi soem long Lod se yumi lavem Hem wetem ful hat, sol mo paoa blong yumi?
Dutronome 6:6–15
Mi save kipim toktok blong God insaed long hat blong mi.
-
Rid wetem ol pikinini blong yu kaonsel blong Lod we i go long OL Man Isrel blong putum ol toktok blong ol skripja long ples we bae oli save luk evri dei (luk long Dutronome 6:6–9). Hemia i save givim insperesen long yu mo ol pikinini blong yu blong tingting long ol wei blong mekemsua se yu no “fogetem Lod” (ves 12) mo blong tingbaot wanem we Hem i bin mekem blong yu.
-
Yu save poenemaot se long Dutronome 6:13, 16 mo 8:3 i helpem Sevya long wan impoten taem long laef blong Hem. Blong luk hemia olsem wanem, tugeta, ridim Matiu 4:1–10. Afta, yu save serem wetem wanwan long yufala sam long ol toktok blong skripja we oli bin helpem yu long ol taem we yu gat nid.
Dutronome 18:15–18
Ol profet oli tijim yumi abaot Jisas Kraes.
-
Tugeta, taem yufala i ridim Dutronome 18:18 , helpem ol pikinini blong yu andastanem profet olsem Moses long ves ia, hem i Jisas Kraes. Maet yu save lukluk long ol pikja blong ol samting we Moses i bin mekem mo ol samting we Jisas Kraes i bin mekem, mo askem ol pikinini blong yu blong majem olgeta (luk long Gospel Art Buk, ol namba 15, 16, 38, 39). ?Wanem nao profet blong yumi tedei i bin tijim long yumi abaot Sevya?
Dutronome 29:12–13; 30:8–10
From se tru long ol kavenan blong mi, mi mi pat blong ol pipol blong God.
-
Stap tokbaot Dutronome 29:12–13 i givim wan janis long yu mo ol pikinini blong yu blong tokbaot ol kavenan we bae oli mekem o bin mekem finis wetem Papa long Heven. ?I minim wanem blong stap olsem ol pipol blong God? ?Long wanem wei ol promes blong yumi oli mekem yumi kam ol pipol blong God? (luk long ves 13; luk tu long Mosaea 18:8–10).
-
Sapos ol pikinini blong yu oli nidim help blong andastanem wanem i wan kavenan talem long olgeta blong faenem wan mining blong “Kavenan” insaed long Gaed long Ol Skripja (Gospel Laebri). ?Wanem ol promes nao we God mo Ol Man Isrel oli mekem wetem wanwan long olgeta long Dutronome 30:8–10? ?Wanem ol promes nao we yumi bin mekem wetem God (luk long Doktrin mo Ol Kavenan 20:37, 77). ?Long wanem wei ol promes ia oli joenem yumi wetem Hem? Tingting blong stap singsing tugeta long wan singsing abaot ol kavenan, olsem “Standing on the Promises” (Gospel Laebri).
Blong kasem moa aedia, luk long magasin blong Fren blong manis ia.