Ol Histri Buk insaed long OlTesteman

Long wan nomol wei, ol stori ia oli talem long sam wei blong lukluk ol samting. Semmak olsem we i no posibol blong lukluk long wan flaoa, ston, o tri moa bitim wan wei long semtaem, nao i no posibol tu blong wan histri stori i soemaot ol defren lukluk blong man, o grup blong ol pipol we oli raetem histri. Lukluk ia, i gat ol man we oli raetem ol buk ia long kantri mo pipol blong olgeta, mo tu, wanem i fasem olgeta long ol standet blong kalja mo bilif. Taem yumi save hemia, bae i helpem yumi blong andastanem se olgeta ia we oli bin raet mo putum tugeta ol histri buk ia, oli lukluk nomo long samfala ditel, mo oli lego sam narafalawan i stap. Oli talem samsamting we ol narawan oli no bin talem. Mo oli mekem las tingting blong olgeta folem ol ditel ia mo ol defren tingting we oli bin gat. Yumi save luk ol defren kaen lukluk truaot long ol buk blong Baebol (mo samtaem insaed long wan semfala buk ia nomo). Taem moa yumi luksave ol defren kaen lukluk ia, moa bae yumi andastanem gud ol histri buk ia.

Wan lukluk we i semmak long evri histri buk blong OlTesteman, i lukluk ia blong ol pikinini blong Isrel, ol kavenan pipol blong God. Fet blong olgeta long Lod i bin helpem olgeta blong luk han blong Hem insaed long laef blong olgeta, mo long ol afea blong kantri blong olgeta. I nomata se ol histri buk blong wol ia oli no luk ol samting long wei ia, lukluk ia long saed blong spirit i pat blong wanem i mekem ol histri buk blong OlTesteman ia oli impoten tumas long ol pipol we oli stap lukaot blong bildimap fet blong olgeta long God.

Ol histri buk ia oli stat long ples we buk blong Dutronome i finis, wetem ol yia we Ol Man Isrel oli bin stap wokbaot long waelples, mo i kam blong finis. Buk blong Josua i soem long ol pikinini blong Isrel we oli rere blong kam insaed long Kenan, promes graon blong olgeta, mo i tokbaot olsem wanem nao oli bin tekova long hem. Buk we i kam afta, i Jajes i go kasem 2 Kronikel, i tokbaot eksperiens blong Isrel long graon ia blong promes, stat long taem we oli bin stap long hem i go kasem taem we oli bin winim Asiria mo Babilon. Ol buk blong Esra mo Nehemaea oli tokbaot samfala grup blong Ol Man Isrel we oli gobak long kapitol siti blong olgeta, Jerusalem, plante yia afta. Laswan, buk blong Esta i tokbaot stori blong Ol Man Isrel we oli laef olsem ol prisena anda long rul blong Pesia.

Mo olsem ia nao, taemlaen blong OlTesteman i finis. Sam long ol pipol we i fastaem blong olgeta blong ridim Baebol oli sapraes blong faenemaot se oli finis blong ridim stori blong OlTesteman bifo oli ridim moa long haf blong pej blong hem. Afta long Esta, yumi no gat tumas infomesen abaot histri blong Ol Man Isrel. Be, ol buk we oli kam afta—speseli buk blong ol profet—i go stret wetem taemlaen we ol histri buk oli presentem. Eksampol: seves blong profet Jeremaea i bin tekem ples long taem blong ol samting we oli bin hapen insaed long 2 King 22–25 (mo stori we i semmak long 2 Kronikel 34–36). Blong save hemia, bae i save lidim wei we yu stap ridim tufala histri storian ia mo ol buk blong ol profet.

Taem yu stap ridim OlTesteman, semmak wetem eni histri, bae yu ridim abaot ol pipol we oli stap mekem samting, o talem sam samting we, long ae blong tedei, bae i luk defren, o i mekem tingting i no stap kwaet. Yumi mas tingting blong luk sam samting olsem—olgeta we oli bin raetem OlTesteman oli bin lukluk wol ia long wan lukluk blong bifo, we long sam wei, i defren long lukluk blong yumi. Vaelens, ol rilesen folem kalja, mo rol blong ol woman, oli jes samfala poen we ol man we oli bin raet bifo, oli bin lukluk long wan defren wei long hemia blong yumi tedei.

?Wanem nao bae yumi mekem taem yumi kam pas long ol ples insaed long ol skripja we i mekem tingting blong yumi i trabol? Faswan, bae i help blong lukluk long wanwan sentens wetem lukluk we i moa bigfala lukluk long wanem i bin stap hapen long tetaem ia. ?Olsem wanem nao hemia i go wetem plan ia blong God blong fasin blong sevem man? ?Olsem wanem nao hemia i go wetem wanem yu save abaot huia stret i Papa long Heven mo Jisas Kraes? ?Olsem wanem nao hemia i go wetem ol trutok we oli soemaot long revelesen insaed long ol nara skripja, o wetem ol tijing blong ol profet we oli stap laef? ?Mo olsem wanem nao hemia i go wetem ol kwaet toktok blong Spirit we Hem i talem long hat mo maen blong yu?

Long sam kes, sentens i no go nating wetem eni long ol samting ia. Samtaem, wan sentens i olsem wan pis blong pasol, mo i luk olsem se hem i no gat wan ples wetem ol pis blong pasol we yu bin putum tugeta finis. Blong traem blong fosem pis ia blong i go wetem ol narawan, bae i no stret blong mekem olsem. Be i no stret tu blong givap long ful pasol ia. Be, maet bae yu putum pis pasol ia i stap long saed fastaem blong wan sot taem. Taem yu stap lanem moa mo putum tugeta moa pis blong pasol ia, bae yu save luk gud moa olsem wanem ol pis blong pasol ia oli go tugeta.

Bae i help tu blong tingbaot se, antap long fasin ia blong lukluk samting long wan stret wei, ol histri blong skripja, i save gat mistek blong man. Eksampol: Ova long plante handred yia, “i gat plante klia mo gudgudfala samting we oli bin tekemaot long [Baebol],” we i gat samfala impoten trutok abaot doktrin mo ol odinens mo ol kavenan (1 Nifae 13:28; luk tu long ol ves 26, 29, 40). Long semtaem, yumi mas wantem talemaot se ol lukluk blong yumi tu, oli no luk i go longwe tumas: oltaem bae i gat ol samting we bae yumi no andastanem fulwan, mo bae i gat ol kwestin we yumi no save ansarem yet.

Be long semtaem, ol kwestin we i no gat ansa blong ol, oli no mas holemtaet yumi blong kasem ol ston ia blong trutok we i no save finis, we yumi save faenem insaed long OlTesteman—iven sapos ol ston ia we oli sas, samtaem oli haed insaed long graon we i gat fulap ston, we i fulap long ol eksperiens blong trabol mo ol pua joes we ol pipol we oli no stret mo gud oli mekem. Maet ol ston ia we oli sas tumas, oli ol stori mo ol skripja we oli testifae abaot lav ia blong God—speseli ol ples ia we oli poenem maen blong yumi blong i lukluk long sakrifaes ia blong Jisas Kraes. Taem yu lukluk long ol ston we oli sas ia long eni kaen wei, bae oli saen we oli saen tedei, semmak olsem we oli bin saen bifo. Mo from se ol stori ia oli tokbaot wan kavenan pipol blong God—ol man mo ol woman we oli bin gat ol wiknes blong man, be yet, oli bin lavem mo givim seves o wok blong Lod—ol ston ia we oli sas we oli gat trutok, oli fulap i stap insaed long ol histri buk blong OlTesteman.