“4–10 Mei. ‘Yufala I No Mas Girap Agensem Lod, Mo Yufala I No Mas Fraet: Ol Namba 11–14; 20–24; 27,” Kam Folem Mi—Blong Hom mo Jos: OlTesteman 2026 (2026)
“4–10 Mei. ‘Yufala I No Mas Girap Agensem Lod, Mo Yufala I No Mas Fraet,’” Kam Folem Mi: OlTesteman 2026
Waelples kolosap long Sinae Penisula
4–10 Mei: “Yufala I No Mas Girap Agensem Lod, Mo Yufala I No Mas Fraet”
Ol Namba 11–14; 20–24; 27
Iven sapos oli wokbaot, bae i no tekem 40 yia blong oli wokbaot long draeples blong Sinae i go kasem promes graon long Kenan. Be hemia i hamas longfala taem we ol pikinini blong Isrel i nidim—i no blong kavremap i longfala ples we oli wokbaot long hem long graon be i blong kavremap hamas longfala ples oli wokbaot long saed blong spirit: longfala ples bitwin huia olgeta long pas mo huia God i nidim olgeta blong oli kam olsem ol kavenan pipol blong Hem.
Buk blong Namba i talemaot sam long ol samting we i hapen long ol 40 yia ia, we i tekem tu ol lesen blong ol pikinini blong Isrel oli bin nidim blong lanem bifo oli go insaed long promes graon. Oli lanem olsem wanem blong oli stap fetful long ol wokman blong Lod (luk long Namba 12). Oli lanem blong trastem paoa blong Lod, iven taem we fiuja i luk olsem se i no gat hop nomo long hem (luk long Namba 13–14 Mo oli lanem se blong no gat fet, i prapa spolem gud yumi long saed blong spirit, be oli save sakem sin mo lukaotem hiling blong Sevya (luk long Namba 21:4–9).
Yumi evriwan i olsem Ol Man Isrel long sam wei. Yumi save se i olsem wanem blong stap long waelples long saed blong spirit, mo ol semmak lesen we oli lanem oli helpem yumi blong rere blong go long promes graon blong yumi: laef we i no save finis wetem Papa blong yumi long Heven.
Blong gat wan bigfala lukluk long Buk blong Namba, luk long “Ol Namba” insaed long Bible Dictionary.
Ol aedia blong Stap Lanem Samting long Hom mo long Jos
Ol Namba 11:11–17, 24–29; 12
Revelesen i blong evriwan, be God nao i lidim Jos blong Hem tru long profet blong Hem.
Long Namba 11:11–17, 24–29, luk problem we Moses i fesem mo ansa we God i givim. ?Wanem yu ting se Moses i minim taem hem i talem se hem i wantem tumas ”blong Hae God i givim spirit blong hem long olgeta man, i mekem olgeta evriwan i toktok olsem ol profet?” (ves 29). Taem yu tingting hevi long kwestin ia, lukaotem ol posibol ansa insaed long mesej blong Presiden Russell M. Nelson “Revelesen blong Jos, Revelesen blong Laef blong Yumi” (Liahona, Mei 2018, 93–96).
Blong stap talem se yumi evriwan i save kasem revelesen, be, i no minim se yumi evri wan i save lidim ol pipol blong God olsem we Moses i bin mekem. Ol samting we oli hapen long Namba 12 i mekem hemia i klia. ?Wanem ol woning we yu faenem insaed long japta ia? ?Wanem nao yu filim se Lod i wantem yu blong andastanem abaot revelesen blong yuwan mo blong stap folem profet blong Hem?
Luk tu long 1 Nifae 10:17; Doktrin mo Ol Kavenan 28:1–7; Dallin H. Oaks, “Two Lines of Communication,” Liahona, Nov. 2010, 83–86.
Lukluk nomo long wanem we i moa impoten. Sam pipol oli filim se, ol tingting blong stap stadi long evri wik i tumas insaed long Kam Folem Mi. Taem yu luklukbak long ol aotlaen ia, folem Spirit. Tingting long ol nid blong yuwan mo ol nid blong ol pipol we maet yu stap tijim olgeta. Blong stap andastanem mo yusum wan prinsipol ia fulwan, long wan wik, bae i help bigwan bitim blong stap ridim sam japta nomo.
Namba 12:3
“Moses, tingting blong hem i stap daon moa.”
Sam pipol oli sapraes blong lanem se Moses, lida ia we i gat olgeta paoa i stanap long fored blong Farao mo mekem ol nambawan merikel wetem paoa blong God, mo tu, “tingting blong hem i stap daon bigwan” (Ol Namba 12:3). ?Wanem nao i minim blong no stap flas? Tingting blong stap stadi long toktok blong Elda David A. Bednar we i eksplenem insaed long “Hem I No Stap Flas mo Tingting blong Hat blong Hem I Stap Daon” (Liahona, Mei 2018, 30–33) o “No Stap Flas, Fasin blong No Stap Flas” long Gaed long Ol Skripja (Gospel Laebri).
?Wanem nao yu lanem aot long ol eksampol blong Moses blong gat fasin blong no stap flas Eksodas 18:13–25; Ol Namba 11:26–29; Ol Namba 12; Hibrus 11:24–27; mo Moses 1:10–11? Mo tu, maet yu save tingting hevi long olsem wanem Sevya i bin soem fasin blong no stap flas (luk long Matiu 11:29; 27:11–14; Luk 22:41–42; Jon 13:4–5). ?Wanem nao ol eksampol ia oli tijim long yu?
Namba 13– 14
Wetem fet long Lod, mi save gat hop long fiuja.
Taem yu stap rid long Namba 13–14, traem blong putum yuwan long ples blong Ol Man Isrel. ?From wanem yu ting se oli bin wantem “gobak long Ijip”? (Ol Namba 14:3). ?Olsem wanem nao bae yu tokbaot narafala “spirit” we Keleb i bin gat? (Namba 14:24). ?Wanem nao i tajem yu abaot fet blong Keleb mo Josua, mo olsem wanem yu yusum ol eksampol blong olgeta long ol situesen we yu stap fesem?
Ten blong ol spae blong Ol Man Isrel oli bin fraet; Josua mo Keleb i bin gat fet. Josua mo Keleb: Tufala Spae we i stap obei, i kam long Douglas Klauba. © Lifeway Collection/licensed from goodsalt.com
Namba 21:4–9
Sapos mi lukluk long Jisas Kraes wetem fet, Hem bae i save hilim mi long saed blong spirit.
Ol profet long Buk blong Momon oli save stori we oli rekodem long Namba 21:4–9 mo oli andastanem mining blong hem long saed blong spirit. Ridim ol tijing blong olgeta abaot stori ia long 1 Nifae 17:40–41; Alma 33:18–22; mo Hileman 8:13–15. Hemia samfala kwestin we yu save tingting hevi long hem taem yu stap stadi:
-
?Wanem nao snek we oli wokem long bras i save ripresentem?
-
?Wanem nao ol mak blong tut blong snek i save ripresentem?
-
Ol Man Isrel oli mas “[luk] pikja blong snek” (Namba 21:9) blong oli kam gud bakegen. ?From wanem yu ting se sam pipol oli no akseptem blong lukluk? ?I bin gat wan samting we i semmak olsem we i bin hapen long yu?
-
?Wanem nao yu filim insperesen blong mekem moa fulwan blong “lukluk long Pikinini blong God wetem fet” mo kam oraet? (Hileman 8:15).
Blong stap ridim ol sentens ia, maet i rimaenem yu abaot ol narafala taem insaed long ol skripja taem ol pipol oli bin nidim blong gohed blong lukluk nomo long Kraes. Eksampol, komperem mesej blong Namba 21:4–9 wetem Matiu 14:25–31 mo 1 Nifae 8:24–28 (luk tu long ol pikja long aotlaen long en blong wik ia). ?Wanem i muvum yumi blong go longwe long Kraes? ?Olsem wanem nao Hem i blesem ol pipol we oli stap lukluk nomo long Hem?
Luk tu long “Jesus, the Very Thought of Thee” (Hym, namba 141).
Namba 22–24
Bae mi folem tingting blong God, iven sapos ol narafalawan oli traem blong fosem mi blong no mekem.
Taem we Balak, king blong Moab, i lanem se Ol Man Isrel oli stap kam, hem i singaotem Balam, wan man we oli save long hem olsem man blong talemaot ol blesing mo ol strong nogud toktok. Balak i wantem hem blong talem strong nogud toktok long Ol Man Isrel. Luk olsem wanem Balak i traem winim tingting blong Balam blong i foldaon long sin (luk long Namba 22:5–7, 15–17), mo tingbaot ol temtesen we yu stap fesem we oli go agensem wanem we God i wantem. ?Wanem nao i tajem yu abaot ansa blong Balam long Namba 22:18, 38; 23:8, 12, 26; 24:13? Be sore nomo, i luk olsem Balam i givap long fos ia mo i tanem baksaed long Isrel (luk long Namba 31:16; Jud 1:11). Tingting hevi long wanem yu save mekem blong gohed blong stap fetful long Lod iven sapos ol narafala oli stap fos.
Sam Aedia blong Tijim Ol Pikinini
Namba 11:4–10
Mi save stap talem tangkyu from wanem we God i bin givim long mi.
-
Askem ol pikinini blong yu sapos oli tingbaot sam long ol merikel we Lod i bin mekem blong helpem Ol Man Isrel (luk long “Bigbigfala Panis blong Ijip” mo “Pasova” long Ol Stori long OlTesteman, 67–74). Afta, yu save mekem i kam sot stori ia long Namba 11:4–10, stap tokbaot plante se Ol Man Isrel oli bin fogetem ol blesing blong olgeta mo oli stap komplen. ?Wanem ol blesing we samtaem yumi stap fogetem?
-
Taem yu singsing o lisin long wan singsing abaot fasin blong talem tangkyu, olsem “Count Your Blessings” (Hym, namba 241), ol pikinini blong yu oli save droem ol pikja blong ol blesing we Lod i bin givim long olgeta.
Namba 12
Lod i wantem mi blong mi folem profet blong Hem.
-
Blong introdiusum Namba 12, yu save talem long ol pikinini blong yu se Lod i no hapi wetem Eron mo Miriam, brata mo sista blong Moses. Invaetem olgeta blong ridim Namba 12:1–8 blong faenemaot se from wanem. Tingting blong stap yusum Gospel Art Buk blong helpem ol pikinini blong yu blong faenem ol eksampol blong ol pipol insaed long ol skripja we oli bin respektem profet blong Lod, mo oli kasem blesing. ?Long wanem wei nao yumi kasem blesing taem yumi folem profet blong Lod?
Namba 21:6–9
Mi save lukluk i go long Jisas Kraes.
-
Yu save yusum tu “Moses mo Snek we Oli Wokem long Bras” long Ol Stori long OlTesteman, 83–84, blong helpem ol pikinini blong yu blong lanem wanem we i hapen long Namba 21:6–9. ?Olsem wanem nao snek we oli wokem long bras i semmak olsem Jisas Kraes? (luk long Jon 3:14–15). Maet ol pikinini blong yu bae oli glad blong stap mekem wan pepa snek mo stap raetem long hem sam long ol simpol samting we oli save mekem blong “lukluk long Pikinini blong God wetem fet” (Hileman 8:15).
1:2Moses and the Brass Serpent
-
Ol bigfala pikinini oli save jusum wan long olgeta skripja ia mo serem wanem skripja ia i ademap long andastaning blong olgeta abaot stori ia: 1 Nifae 17:41; Alma 33:18–20; Hileman 8:13–15; Doktrin mo Ol Kavenan 6:36.
Snek We Oli Wokem long Bras, i kam long Brent Evans
Namba 22–24
Mi save folem tingting blong God, iven sapos ol narafala man oli traem blong winim tingting blong mi blong no folem.
-
Talem i sot stori long Namba 22:1–18 long ol pikinini blong yu, mo tokbaot plante olsem wanem Balam i no wantem blong talem wan strong toktok long ol pipol blong God, i nomata Balak, king blong Moab i givim hem ona mo ol rij samting. Afta, askem ol pikinini blong lukaotem long ol ves ia sam sentens we oli filim se i soem strong tingting we Balam i gat blong folem God: Namba 22:18; 23:26; 24:13. Maet ol pikinini blong yu oli save jusum wan sentens we oli laekem mo raetem long wan kad blong helpem olgeta blong tingbaot blong obei Lod.
Blong kasem moa aedia, luk long magasin blong Fren blong manis ia.