Հեսու 1–8, 23–24

Պատկերացրեք, թե ինչ էր զգում Հեսուն, երբ նրան կանչեցին փոխարինել Մովսեսին։ Ուշադրություն դարձրեք, թե ինչ է ասել Տերը Հեսու 1․1–9 հատվածներում, որպեսզի քաջալերի նրան։ Մտածեք ձեր առջև ծառացած դժվար մարտահրավերների մասին. ի՞նչն է այս հատվածներում ձեզ քաջալերում:

Հեսու անունը (Yehoshua կամ եբրայերեն Yeshua) նշանակում է «Եհովան փրկում է»։ Իսկ Հիսուս անունը գալիս է Yeshua անունից։ Այսպիսով, Հեսուի մասին կարդալիս մտածեք Իսրայելի որդիներին Հորդանան գետով անցնելու և դեպի ավետյաց երկիր առաջնորդելու նրա դերի մասին: Ինչպե՞ս էր նրա միսիան նման այն ամենին, ինչ Քրիստոսն է անում մեզ համար:

Հեսուին քաջալերելիս Տերը Հեսու 1․8 հատվածում սուրբ գրությունների կամ «օրենքի խոսքի» վերաբերյալ խորհուրդ տվեց: Հաշվի առնելով Հեսուի վրա դրված ծանր պարտականությունը՝ այս խորհուրդն ինչո՞ւ կարող էր հատկապես օգտակար լինել։

Երբ Տերը հրավիրում է մեզ կարդալ սուրբ գրությունները, Նա հաճախ օգտագործում է բառեր, որոնք պարզապես կարդալու սահմաններից դուրս են: Նա նաև մեծ օրհնություններ է խոստանում։ Ստորև բերված աղյուսակը կարող է օգնել ձեզ բացահայտել այդ հրավերներն ու խոստացված օրհնությունները.

Ինչպե՞ս է Տերը կատարել այդ խոստումները ձեր կյանքում: Օգտակար կլինի գնահատել սուրբ գրությունների ուսումնասիրության ձեր սովորությունները: Ի՞նչն է լավ ստացվում։ Ի՞նչ եք ոգեշնչվում անել՝ Աստծո խոսքի հետ կապված ավելի նշանակալից փորձառություններ ունենալու համար:

Տես նաև «As I Search the Holy Scriptures» օրհներգը, Հիմներ, հմր. 277։

Նոր Կտակարանի քրիստոնյաները Ռախաբին տեսնում էին որպես հավատքի և գործի ուժի օրինակ (տես Եբրայեցիներին 11․31, Հակոբոս 2․25)։ Հեսու 2 բաժինը կարդալիս մտածեք Ռախաբի հավատքի և գործի դերի մասին՝ իրեն, իր ընտանիքին և իսրայելացի հետախույզներին փրկելու գործում: Ի՞նչ է դա ուսուցանում ձեզ այն մասին, թե ինչպես կարող են ձեր հավատքն առ Քրիստոս և ձեր գործերն ազդել ձեր և ուրիշների վրա:

Տերը հրաշքներ գործեց Իր ժողովրդի մեջ, երբ առաջնորդեց նրանց դեպի ավետյաց երկիր և Նա կարող է անել նույնը ձեզ համար: Ահա մի քանի հարց, որոնք կօգնեն ձեզ ուսումնասիրել Հեսու 3–4 բաժինները․

• Ըստ ձեզ, ինչո՞ւ էր իսրայելացիներին անհրաժեշտ սրբագործվել՝ նախքան Հորդանան գետն անցնելը (տես Հեսու 3․5)։

• Նկատի ունեցեք, որ գետը բաժանվեց միայն այն բանից հետո, երբ «քահանաների ոտքերի թաթերը … մտան գետի ջրի մեջ» (Հեսու 3․13, 15)։ Ինչո՞ւ է դա կարևոր:

• Հորդանան գետում տեղի ունեցած այլ նշանակալից իրադարձությունների մասին իմանալու համար, տես Դ Թագավորների 2․6–15, 5․1–14, և Մարկոս 1․9–11 հատվածները։ Ի՞նչ կապ եք տեսնում այս իրադարձությունների միջև:

• Ինչպե՞ս է Տերը «հրաշքներ» գործել ձեր կյանքում։ (Հեսու 3․5) Ինչպե՞ս կարող եք ավելի հաճախ զգալ կամ ճանաչել այդ հրաշքները (օրինակ՝ տես Հեսու 3․17)։

Հեսու 6–8 հատվածներում նկարագրվում են Երիքովի և Գայի հողերի շուրջ մարտերը: Այդ բաժինները կարդալիս մտածեք, թե ինչպես եք պայքարում գայթակղության դեմ (օրինակ՝ տես Հեսու 7․10–13)։ Ի՞նչ սովորեցիք այն մասին, թե Աստված ինչպես կարող է օգնել ձեզ, և դուք ինչ պետք է անեք, որպեսզի ստանաք Նրա զորությունը: Օրինակ՝ ի՞նչն է տպավորում ձեզ Երիքովը գրավելու Տիրոջ հրահանգների մեջ (տես Հեսու 6․1–5)։ Հեսու 7 բաժնի պատմությունը կարող է ոգեշնչել ձեզ որոշում կայացնել, թե արդյոք «նզովք կա» ձեր կյանքում, որը դուք պետք է հեռացնեք (Հեսու 7․13)։

Հեսու 23–24 բաժիններում իսրայելացիներին ուղղված Հեսուի վերջին ուսմունքները ներառում են կարևոր նախազգուշացումներ, խորհուրդներ և խոստացված օրհնություններ: Գրեք այն ամենը, ինչ գտել եք: Հաշվի առնելով, թե ինչի միջով են անցել իսրայելացիները, ըստ ձեզ, ինչո՞ւ Հեսուն կյանքի վերջում որոշեց նրանց այս բաներն ասել: Ի՞նչն է ձեզ ոգեշնչում «Տիրոջը հարել»։ (Հեսու 23․8)։

Տես նաև Դեյլ Գ. Ռենլանդի «Ընտրեք այս օրը» ուղերձը, Լիահոնա նոյ․ 2018, 104–6։

• Ահա մի եղանակ՝ օգնելու ձեր երեխաներին «զորանալ և քաջ լինել» (Հեսու 1․6) Հիսուս Քրիստոսի միջոցով: Առաջարկեք նրանց գտնել մի արտահայտություն, որը կրկնվում է Հեսու 1․6, 9 և 18 հատվածներում և գրի առեք կամ մտապահեք այն: Օգնեք ձեր երեխաներին մտածել այնպիսի իրավիճակների մասին, երբ կարող են ունենալ այս ուղերձի կարիքը՝ ինչպես Հեսուն։ Կարող եք նաև միասին վերհիշել Հեսու 1–4, 6 հատվածներում նկարագրված պատմությունները (տես նաև «Հեսու մարգարեն» և «Ռախաբը և լրտեսները» պատմություները Հին Կտակարանի պատմություններ գրքից 85–91)։ Այս պատմությունների մեջ ներկայացված մարդիկ ինչպե՞ս քաջություն և ուժ ցույց տվեցին Տիրոջում:

  

  2:59

  

  1:39

• Հեսու 1․8 հատվածը կարդալը կարող է ոգեշնչել ձեր երեխաներին ինքնուրույն կարդալ սուրբ գրությունները: Օգնեք նրանց այս հատվածում գտնել բառեր, որոնք ուսուցանում են, թե ինչպես և ինչու մենք պետք է կարդանք սուրբ գրությունները: Նրանք կարող են նույն բանը փնտրել նաև 1 Նեփի 15․23–24, 2 Նեփի 31․20, 32․3, Հակոբ 4․6, Հելաման 3․29–30 հատվածներում։ Կարող եք նաև օգնել նրանց կազմել և իրականացնել սուրբ գրությունները կարդալու ծրագիր:

• Կարող եք օգտագործել իսրայելացիների՝ Հորդանան գետն անցնելու պատմությունը որպես մկրտության խորհրդանիշ․ թողնել մեր հին կյանքն անապատում և սկսել նորը՝ Աստծո հետ ուխտյալ հարաբերություններում: Հեսու 3–4 բաժինները (կամ «Հեսու մարգարեն» պատմությունը Հին Կտակարանի պատմություններ գրքից, 85–89) միասին կարդալիս կարող եք նաև նայել Հիսուսի մկրտության նկարին և բացատրել, որ Հիսուսը մկրտվել է նույն գետում, որով անցել են իսրայելացիները։ Ապա կարող եք երգել«Baptism» երգը (Children’s Songbook, 100–101): Կիսվեք միմյանց հետ, թե ինչով է մկրտվելը նման Հիսուս Քրիստոսի արքայությունում նոր կյանք սկսելուն:

  

  2:59

• Ի՞նչ կարող եք անել, որպեսզի օգնեք ձեր երեխաներին սովորել Հիսուս Քրիստոսին հետևելու ընտրություն կատարել, ինչպես որ Հեսուն առաջարկեց իսրայելացիներին անել դա: Կարող եք առաջարկել նրանց․

  • Մտապահել մի կարճ արտահայտություն Հեսու 24․15 հատվածից։ Փորձեք դա հետաքրքիր դարձնել ձեր երեխաների համար: Նրանց մտապահած բառերի քանակը կարող է կախված լինել նրանց տարիքից:

  • Գտնել պատմություններ այն մարդկանց մասին, որոնք ընտրել են ծառայել Հիսուս Քրիստոսին: Նրանք կարող են փնտրել դրանք Ընկեր ամսագրում, Ավետարանի պատկերագրքում կամ Հին Կտակարանի պատմություններ գրքում և սուրբգրային այլ պատմությունների գրքերում:

  • Դերերով խաղալ իրավիճակներ, որոնցում կարող են ընտրել՝ հետևել և ծառայել Փրկչին: