Բ Օրենք 6–8, 15, 18, 29–30, 34

Մովսեսի օրենքը ներառում էր բազմաթիվ արտաքին արարողություններ և ծեսեր: Բ Օրենք գրքում ներկայացված Մովսեսի խորհրդում կտեսնեք, որ Տերը նաև մտահոգված էր Իր ժողովրդի ներքին վիճակով՝ նրանց սրտերի հոգևոր վիճակով:

Ստորև բերված հատվածներում փնտրեք սիրտ բառը և խորհեք, թե ինչ կարող է այն խորհրդանշել: Կարող եք այդ հատվածները դիտարկել որպես ձեր սրտի հոգևոր ստուգում: Ի՞նչ ախտորոշում կտաք ինքներդ ձեզ: Ի՞նչ բուժում կնշանակեք՝ ձեր սրտի հոգևոր առողջությունը բարելավելու համար: Գրեք ձեր տպավորությունները.

• Բ Օրենք 6․4–7.

• Բ Օրենք 8․2–5.

• Բ Օրենք 8․11–17.

• Բ Օրենք 29․18–20.

• Բ Օրենք 30․6–10.

• Բ Օրենք 30․14–20.

Ձեր մտքերը համակարգելու համար կարող եք նկարել սիրտ և դրա ներսում գրել այն բաները, որոնք, ըստ Տիրոջ խոսքերի, պետք է ունենաք ձեր սրտում: Ապա սրտի նկարից դուրս կարող եք գրել այն բաները, որոնք պետք է հեռու պահեք ձեր սրտից:

Ինչպե՞ս եք ցույց տալիս, որ սիրում եք Աստծուն ձեր ամբողջ սրտով: Գաղափարների համար տես «Սիրեք Աստծուն և սիրեք ձեր ընկերոջը» բաժինը Երիտասարդներին զորացնելու համար. Ընտրություն կատարելու ուղեցույցում 10–12։

Տես նաև Մ. Ռասսել Բալլարդի «Սիրո՞ւմ ես ինձ ավելի, քան դրանք» ուղերձը, Լիահոնա, նոյ․ 2021, 51–53:

Իսրայելացիներից շատերը, որոնք կմտնեին ավետյաց երկիր, չէին տեսել Եգիպտոսում տեղի ունեցած պատուհասները և չէին անցել Կարմիր ծովի միջով: Մովսեսը հասկանում էր, որ նրանք և ապագա սերունդները պետք է հիշեն Աստծո հրաշքները և Աստծո օրենքները՝ Աստծո ժողովուրդ մնալու համար:

Ի՞նչ խորհուրդ եք գտնում Բ Օրենք 6․4–12, 20–25 հատվածներում, որը կօգնի ձեզ հիշել այն մեծ գործերը, որոնք Աստված արել է ձեզ համար: Ի՞նչ եք ոգեշնչվել անել, որպեսզի Տիրոջ խոսքերն ամեն օր «քո սրտում լինեն» (հատված 6)։

Կարող եք նաև ուսումնասիրել եղբայր Ժան Է․ Նյումանի «Ուխտի ժողովրդի ձայնը և աճող սերունդը» ուղերձը (Լիահոնա, նոյ. 2023, 36–38) և մտածել, թե ինչպես կփոխանցեք ձեր հավատքն առ Քրիստոս ապագա սերունդներին:

Տես նաև Բ Օրենք 11․18–21 հատվածները, Դեյլ Գ. Ռենլանդի «Մտածեք Աստծո բարության և մեծության մասին» ուղերձը, Լիահոնա, մայիս 2020, 41–44,

Մենք դեռ չենք հասել այն օրվան, «եթե քեզ մոտ կարիքավոր մեկը չգտնվի» (Բ Օրենք 15.4), ուստի աղքատներին օգնելու վերաբերյալ Բ Օրենք 15 գլխում գտնվող սկզբունքները դեռևս արժեքավոր են, նույնիսկ եթե որոշակի գործառույթներ փոխվել են: Ուշադրություն դարձրեք, թե ինչ են ուսուցանում հատվածներ 1–15-ն այն մասին, թե ինչու ենք մենք օգնում կարիքի մեջ գտնվող մարդկանց և ինչպիսին պետք է լինի մեր վերաբերմունքը դրա վերաբերյալ:

Ի՞նչ է նշանակում «ձեռքը բացել» կարիքի մեջ գտնվող մարդկանց առաջ (հատվածներ 8, 11)։ Ի՞նչ սովորեցիք Տիրոջ օրինակից կարիքի մեջ գտնվող մարդկանց օգնելու մասին (տես հատված 15)։

Sես նաև «Have I Done Any Good?» օրհներգը, Հիմներ, հմր. 223։

Պետրոսը, Նեփին, Մորոնին և Փրկիչն անձամբ են մեկնաբանել Բ Օրենք 18․15–19 հատվածների մարգարեությունը (տես Գործք Առաքելոց 3․20–23, 1 Նեփի 22․20–21, Ջոզեֆ Սմիթ-Պատմություն 1․40, 3 Նեփի 20․23)։ Ի՞նչ սովորեցիք այս հատվածներից Փրկչի մասին: Խորհեք մի քանի շաբաթվա ընթացքում Մովսեսի մասին ձեր կարդացածի շուրջ: Ինչո՞վ է Մովսեսը «նման» Հիսուս Քրիստոսին:

Հետաքրքիր կլինի համեմատել Բ Օրենք 29․9, 30․15–20 հատվածներում ներկայացված Մովսեսի խոսքերը 2 Նեփի 2․26–29, 4․4 հատվածներում ներկայացված Լեքիի՝ իր ընտանիքին ուղղված վերջին մի քանի ուսմունքի հետ։ Լեքին ինչպե՞ս զարգացրեց այն, ինչ Մովսեսն էր ուսուցանում: Ի՞նչ գտաք այս հատվածներում, որը ձեզ ոգեշնչում է «ընտրել կյանքը»: (Բ Օրենք 30․19)

• Որպեսզի օգնեք ձեր երեխաներին հասկանալ Բ Օրենք 6․5 հատվածը, կարող եք նկարել սիրտ, մարմնի գծապատկեր և ամուր բազուկ։ Ձեր երեխաները կարող են մատնացույց անել նկարները, երբ կարդում եք հատվածում գրված «սիրտ», «հոգի» և «զորություն» բառերը: Ինչպե՞ս ենք մենք ցույց տալիս Տիրոջը, որ սիրում ենք Նրան մեր ամբողջ սրտով, հոգով և զորությամբ:

• Ձեր երեխաների հետ կարդացեք Տիրոջ խորհուրդն իսրայելացիներին՝ դնել սուրբ գրությունների հատվածներն այնտեղ, որտեղ կտեսնեն դրանք ամեն օր (տես Բ Օրենք 6․6–9)։ Դա կարող է ոգեշնչել ձեզ և ձեր երեխաներին մտածել, թե ինչպես համոզված լինել, որ դուք չեք «մոռացել Տիրոջը» (հատված 12) և հիշում եք, թե ինչ է Նա արել ձեզ համար:

• Կարող եք նշել, որ Բ Օրենք 6․13, 16 և 8․3 հատվածներն օգնեցին Փրկչին Նրա կյանքի կարևոր պահին: Որպեսզի տեսնեք, թե ինչպես է դա տեղի ունեցել, միասին կարդացեք Մատթեոս 4․1–10 հատվածները։ Ապա կարող եք կիսվել միմյանց հետ սուրբ գրությունների որոշ հատվածներով, որոնք օգնել են ձեզ, երբ կարիքի մեջ էիք:

• Ձեր երեխաների հետ Բ Օրենք 18․18 հատվածը կարդալիս օգնեք նրանց հասկանալ, որ այս հատվածում նկարագրված Մովսեսի նման մարգարեն Հիսուս Քրիստոսն է: Կարող եք նայել նկարներ, որտեղ պատկերված է, թե ինչ են արել Մովսեսը և Հիսուս Քրիստոսը և հնարավորություն տալ, որ ձեր երեխաները համապատասխանեցնեն դրանք (տես Ավետարանի նկարների գիրքը, հմր. 15, 16, 38, 39)։ Ի՞նչ է մեր մարգարեն այսօր ուսուցանել մեզ մեր Փրկչի մասին:

• Բ Օրենք 29․12–13 հատվածների մասին զրուցելը ձեզ և ձեր երեխաներին հնարավորություն է տալիս քննարկել այն ուխտերը, որոնք կկապեն կամ կապել են Երկնային Հոր հետ։ Ի՞նչ է նշանակում լինել Աստծո ժողովուրդ: Ինչպե՞ս են մեր խոստումները մեզ դարձնում Աստծո ժողովուրդ (տես հատված 13, տես նաև Մոսիա 18․8–10)։

• Եթե ձեր երեխաներն օգնության կարիք ունենան՝ հասկանալու, թե ինչ է ուխտը, առաջարկեք նրանց գտնել «Ուխտ» բառի սահմանումը Սուրբ գրքերի ուղեցույցում (Gospel Library հավելված)։ Ի՞նչ խոստումներ են տվել միմյանց Աստված և իսրայելացիները Բ Օրենք 30․8–10 հատվածներում։ Ի՞նչ խոստումներ ենք տվել մենք Աստծուն (տես Վարդապետություն և Ուխտեր 20.37, 77)։ Ինչպե՞ս են այդ խոստումները կապում մեզ Նրա հետ: Կարող եք միասին երգել ուխտերի մասին հետևյալ երգը․ «Standing on the Promises» (Gospel Library հավելված):