Deuteronomio 6–8; 15; 18; 29–30; 34

Ang balaod ni Moises milakip og daghang makita nga mga seremonyas ug mga ritwal. Ingon nga inyong makita sa tambag ni Moises diha sa Deuteronomio, ang Ginoo nabalaka usab mahitungod sa sulod nga kahimtang sa iyang katawhan—ang espirituhanon nga kahimtang sa ilang mga kasingkasing.

Diha sa mga tudling sa ubos, pangitaa ang pulong nga kasingkasing, ug pamalandonga unsa kahay gisimbolo niini. Mahimo nimong hunahunaon kini nga mga tudling isip usa ka matang sa espirituhanong pag-eksamen sa inyong kasingkasing. Unsa nga pangagpas sa kasingkasing ang imong ihatag sa imong kaugalingon? Unsa nga mga tambal ang imong i-resita sa pagpausbaw sa kahimtang sa imong kasingkasing? Isulat ang imong mga panghunahuna:

• Deuteronomio 6:4–7:

• Deuteronomio 8:2–5:

• Deuteronomio 8:11–17:

• Deuteronomio 29:18–20:

• Deuteronomio 30:6–10:

• Deuteronomio 30:14–20:

Usa ka paagi sa paghan-ay sa imong mga hunahuna mao ang pagdrowing og usa ka kasingkasing ug sulati sa sulod niini og mga butang nga ang Ginoo nagsulti nga ikaw kinahanglan aduna diha sa imong kasingkasing. Dayon ikaw makasulat sa gawas niini sa mga butang nga kinahanglan nga ipalayo nimo sa imong kasingkasing.

Unsaon nimo sa pagpakita nga ikaw nahigugma sa Dios sa bug-os mong kasingkasing? Alang sa mga ideya, tan-awa diha sa “Higugmaa ang Dios, higugmaa ang imong silingan” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili, 10–12.

M. Russell Ballard, “Gihigugma Mo ba Ako Labaw sa Paghigugma Nimo Niining mga Butanga?; Liahona, Nob. 2021, 51–53.

Kadaghanan sa mga Israelita kinsa mosulod sa gisaad nga yuta wala makasaksi sa mga hampak sa Ehipto o makatabok sa Pulang Dagat. Si Moises nasayod nga sila—ug ang umaabot nga mga henerasyon—kinahanglang mahinumdom sa mga milagro sa Dios ug sa mga balaod sa Dios aron magpabilin nga katawhan sa Dios.

Unsa nga tambag ang imong makaplagan diha sa Deuteronomio 6:4–12, 20–25 nga makatabang kanimo nga mahinumdom sa dagkong mga butang nga gihimo sa Dios alang kanimo? Unsay nadasig ka sa pagbuhat aron ang pulong sa Ginoo sa matag adlaw “magapaibabaw sa imong kasingkasing”? (bersikulo 6).

Mahimo usab ka nga magtuon sa mensahe ni Jan E. Newman “Pagpatunhay sa Tingog sa mga Tawo sa Pakigsaad diha sa Nagtubo nga Henerasyon” (Liahona, Nob. 2023, 36–38) ug hunahunaa kon unsaon nimo pagbalhin sa imong hugot nga pagtuo diha ni Kristo ngadto sa umaabot nga mga henerasyon.

Tan-awa usab sa Deuteronomio 11:18–21; Dale G. Renlund, “Hunahunaa ang Pagkamaayo ug Katalagsaon sa Dios,” Liahona, Mayo 2020, 41–44; Bible Dictionary, “Frontlets or phylacteries.”

Wala pa kita moabot sa adlaw nga “walay kabos uban kaninyo” (Deuteronomio 15:4), busa ang mga baroganan mahitungod sa pagtabang sa mga kabos diha sa Deuteronomio 15 bililhon pa gihapon, bisan kon ang partikular nga mga naandan nausab na. Timan-i unsay gitudlo sa mga bersikulo 1–15 mahitungod kon nganong kita nagtabang sa mga tawo nga nanginahanglan ug unsa ang atong mga kinaiya mahitungod niini.

Unsay gipasabot sa “pagabuklaron mo kaniya ang imong kamot” ngadto sa mga tawo nga nanginahanglan? (bersikulo 8, 11). Unsay inyong nakat-onan gikan sa mga ehemplo sa Ginoo mahitungod sa pagtabang sa mga tawo nga nanginahanglan? (tan-awa diha sa bersikulo 15).

Tan-awa usab sa “Nakabuhat Ba Ako og Maayo Karon?,” Mga Himno, nu. 135.

Si Pedro, Nephi, Moroni, ug ang Manluluwas Mismo tanan mikomentaryo mahitungod sa panagna diha sa Deuteronomio 18:15–19 (tan-awa diha sa Mga Buhat 3:20–23; 1 Nephi 22:20–21; Joseph Smith—Kasaysayan 1:40; 3 Nephi 20:23). Unsay imong nakat-onan mahitungod sa Manluluwas gikan niini nga mga bersikulo? Paghunahuna mahitungod sa unsay imong nabasa mahitungod ni Moises sa milabay nga pipila ka mga semana. Sa unsang paagi si Moises “sama ngadto” ni Jesukristo?

Kini tingali makapainteresado ang pagtandi sa mga pulong ni Moises diha sa Deuteronomio 29:9; 30:15–20 ngadto sa pipila sa kataposang mga pagtulun-an ni Lehi sa iyang pamilya diha sa 2 Nephi 2:26–29; 4:4. Giunsa ni Lehi sa pagpasabot og maayo sa unsay gitudlo ni Moises? Unsa ang imong nakit-an dinhi niini nga mga tudling nga nakapadasig kanimo sa “pagpili sa kinabuhi”? (Deuteronomio 30:19).

• Sa pagtabang sa imong mga bata sa pagsabot sa Deuteronomio 6:5, ikaw makadrowing og usa ka kasingkasing, usa ka latid sa lawas, ug usa ka kusgang bukton. Ang imong mga bata makatudlo ngadto sa mga hulagway samtang imong basahon ang mga pulong nga “kasingkasing,” “kalag,” ug “kusog” diha sa bersikulo. Unsaon nato sa pagpakita sa Ginoo nga ato siyang gihigugma uban sa bug-os natong kasingkasing, kalag, ug kusog?

• Basaha uban sa imong kabataan ang tambag sa Ginoo ngadto sa mga Israelita sa pagbutang sa mga tudling sa kasulatan diin ilang makita kini kada adlaw. (tan-awa diha sa Deuteronomio 6:6–9). Kini tingali modasig kanimo ug sa imong mga bata sa paghunahuna og mga paagi sa pagsiguro nga kamo dili “makalimot sa Ginoo” (bersikulo 12) ug sa paghinumdom unsay Iyang nabuhat alang kaninyo.

• Mahimo tingali nimong itudlo nga ang Deuteronomio 6:13, 16 ug 8:3 mitabang sa Manluluwas atol sa importanting higayon sa Iyang kinabuhi. Aron makita kon giunsa, pagdungan og basa diha sa Mateo 4:1–10. Dayon makahimo kamo sa pagpakigbahin ngadto sa usag-usa og pipila ka mga tudling sa kasulatan nga nakatabang kanimo sa mga panahon sa panginahanglan.

• Samtang kamo nagbasa sa Deuteronomio 18:18 og dungan, tabangi ang imong mga bata sa pagsabot nga ang Propeta sama ni Moises niini nga bersikulo mao si Jesukristo. Tingali makatan-aw kamo sa mga hulagway sa mga butang nga gihimo ni Moises ug sa mga butang nga gihimo ni Jesukristo, ug ipapares sa imong mga bata kini (tan-awa diha sa Libro sa mga Hulagway sa Ebanghelyo, mga nu. 15, 16, 38, 39). Unsa ang gitudlo kanato sa atong propeta karon mahitungod sa Manluluwas?

• Ang paghisgot mahitungod sa Deuteronomio 29:12–13 naghatag og oportunidad alang kanimo ug sa imong kabataan sa paghisgot mahitungod sa mga pakigsaad nga ilang himoon o nakahimo na uban sa Langitnong Amahan. Unsay buot ipasabot sa pagkahimo nga katawhan sa Dios? Giunsa sa atong mga saad paghimo kanato nga mga katawhan sa Dios? (tan-awa diha sa bersikulo 13; tan-awa usab diha sa Mosiah 18:8–10).

• Kon ang imong mga bata nagkinahanglan og tabang sa pagsabot unsa ang usa ka pakigsaad, isugyot nga sila makakita og kahulogan sa “Pakigsaad” diha sa Giya ngadto sa mga Kasulatan (Librarya sa Ebanghelyo). Unsa nga mga saad gihimo sa Dios ug sa mga Israelita ngadto sa usag usa diha sa Deuteronomio 30:8–10? Unsa nga mga saad atong nahimo ngadto sa Dios? (tan-awa sa Doktrina ug mga Pakigsaad 20:37, 77). Giunsa niini nga mga saad pagkonektar kanato ngadto Kaniya? Hunahunaa ang pagkanta og dungan sa usa ka awit mahitungod sa mga pakigsaad, sama sa “Standing on the Promises” (Gospel Library).