Numeros 11–14; 20–24; 27

Sa Numeros 11:11–17, 24–29, timan-i ang problema nga giatubang ni Moises ug ang solusyon nga gitanyag sa Dios. Unsa kaha ang gipasabot ni Moises sa dihang miingon siya nga nanghinaot siya “nga ang tibook nga katawhan sa Ginoo mga manalagna”? (bersikulo 29). Samtang kamo mamalandong niini nga pangutana, pangita og posible nga mga tubag diha sa mensahe ni Presidente Russell M. Nelson nga “Pagpadayag alang sa Simbahan, Pagpadayag alang sa Atong mga Kinabuhi” (Liahona, Mayo 2018, 93–96).

Ang pagsulti nga ang tanan makahimo sa pagdawat og pagpadayag, bisan pa niana, wala magpasabot nga tanan kita makagiya sa katawhan sa Dios sa paagi nga gibuhat ni Moises. Ang panghitabo nga narekord diha sa Numeros 12 nagklaro niini. Unsa nga mga pagbantay ang inyong nakita dinhi niini nga kapitulo? Unsa ang imong gibati nga gusto sa Ginoo nga imong masabtan mahitungod sa personal nga pagpadayag ug sa pagsunod sa Iyang propeta?

Tan-awa usab sa 1 Nephi 10:17; Doktrina ug mga Pakigsaad 28:1–7; Dallin H. Oaks, “Duha ka Linya sa Komunikasyon,” Liahona,, Nob. 2010, 83–86.

Ang uban mahibulong sa pagkasayod nga si Moises, ang gamhanang lider kinsa miatubang sa Paraon ug mihimo og katingalahang mga milagro pinaagi sa gahom sa Ginoo, usab usa ka “mapainubsanon kaayo” (Numeros 12:3). Unsay buot ipasabot sa mapainubsanon? Hunahunaa ang pagtuon sa pagpasabot ni Elder David A. Bednar sa “Maaghop ug Mapaubsanon sa Kasingkasing” (Liahona, Mayo 2018, 30–33) o sa “Maaghop, Pagkamaaghop” diha sa Giya ngadto sa mga Kasulatan (Librarya sa Ebanghelyo).

Unsa ang imong nakat-onan gikan sa mga ehemplo ni Moises sa Exodo 18:13–25; Numeros 11:26–29; Numeros 12; Mga Hebreohanon 11:24–27; ug Moises 1:10–11? Mahimo ka usab mamalandong kon giunsa sa Manluluwas pagpakita og pagkamapainubsanon (tan-awa diha sa Mateo 11:29; 27:11–14; Lucas 22:41–42; Juan 13:4–5). Unsa ang gitudlo niini nga mga ehemplo diha kanimo?

Samtang ikaw magbasa sa Numeros 13–14, sulayi sa pagbutang sa imong kaugalingon sa lugar sa mga Israelita. Ngano sa imong hunahuna gusto sila nga “mamalik ngadto sa Ehipto”? (Numeros 14:3). Unsaon nimo paghulagway ang lain nga “espiritu” nga si Caleb aduna? (Numeros 14:24). Unsay nakapadani kanimo mahitungod sa hugot nga pagtuo ni Caleb ug Josue, ug sa unsang paagi imong magamit ang ilang mga ehemplo sa mga sitwasyon nga imong giatubang?

Ang mga propeta sa Basahon ni Mormon nasayod sa istorya nga makaplagan diha sa Numeros 21:4–9 ug nakasabot sa espirituhanong kamahinungdanon niini. Basaha ang ilang mga pagtulun-an mahitungod niini nga istorya diha sa 1 Nephi 17:40–41; Alma 33:18–22; ug Helaman 8:13–15. Aniay pipila ka pangutana nga pamalandongon samtang ikaw magtuon:

• Unsa ang girepresentar sa tumbaga nga bitin?

• Sa unsa kaha ang mga pinaakan sa bitin nagrepresentar?

• Ang mga Israelita kinahanglang “[motan-aw] sa bitin nga tumbaga” (Numeros 21:9) aron mamaayo. Ngano sa imong hunahuna ang uban midumili sa pagtan-aw? Aduna bay susama nga butang nahitabo sukad nganha kanimo?

• Unsay gibati nimo nga midasig sa pagbuhat nga mas hingpit nga “motan-aw diha sa Anak sa Dios uban sa hugot nga pagtuo” ug mamaayo? (Helaman 8:15).

Ang pagbasa niining mga tudling mahimong makapahinumdom kanimo sa uban pang mga higayon diha sa kasulatan diin ang mga tawo kinahanglan magpabilin sa ilang pagpunting diha ni Kristo. Sama pananglit, itandi ang mensahe sa Numeros 21:4–9 sa Mateo 14:25–31 ug sa 1 Nephi 8:24–28 (tan-awa usab ang mga hulagway diha sa kataposan sa latid niini nga semana). Unsa ang kalagmitan nga magpalayo kanato gikan kang Kristo? Unsaon Niya pagpanalangin ang mga tawo kinsa nagpabilin nga nagpunting diha Kaniya?

Tan-awa usab ang “Jesus, ang Paghunahuna Ko Kanimo Katam-is” (Mga Himno, nu. 83.)

Sa dihang si Balak, ang hari sa Moab, nahibalo nga nagsingabot ang mga Israelita, gipatawag niya si Balaam, usa ka tawo nga nailhan nga mohatag og mga panalangin ug mga tunglo. Gusto ni Balak nga iyang tungluhon ang mga Israelita. Timan-i kon giunsa ni Balak pagsulay sa pag-agni si Balaam (tan-awa diha sa Numeros 22:5–7, 15–17), ug paghunahuna mahitungod sa mga tintasyon nga mahimo nimong atubangon sa pagsupak sa kabubut-on sa Dios. Unsay nagdani kanimo mahitungod sa mga tubag ni Balaam diha sa Numeros 22:18, 38; 23:8, 12, 26; 24:13? Makaguol nga paagi, sa kadugayan nadala si Balaam sa pagpamugos ug mibudhi sa Israel (tan-awa sa Numeros 31:16; Judas 1:11). Pamalandonga kon unsaon nimo sa pagpabiling matinud-anon ngadto sa Ginoo bisan pa sa pagpamugos sa uban.

• Pangutan-a ang imong mga bata kon nahinumdom ba sila og pipila sa milagro nga gihimo sa Ginoo aron matabangan ang mga Israelita (tan-awa diha sa “Ang mga Pag-antos sa Ehipto” ug “Ang Pagpalabay” diha sa Mga Istorya sa Daang Tugon, pahina 70–74). Unya mahimo nimong i-summarize alang kanila ang Numeros 11:4–10, nga naghatag og gibug-aton nga ang mga Israelitae nakalimot sa ilang mga panalangin ug nagbagulbol. Unsa nga mga panalangin ang usahay natong makalimtan?

• Samtang manganta o maminaw mo ug awit mahitungod sa pagpasalamat, sama sa “Ipha ang Inyong Panalangin” (Mga Himno, nu. 148), ang imong mga bata makadrowing og mga hulagway sa mga panalangin nga gihatag sa Ginoo kanila.

• Aron ipaila ang Numeros 12, mahimo nimong isulti sa imong mga bata nga ang Ginoo wala malipay ni Aaron ug Miriam, ang igsoon nga lalaki ug igsoon nga babaye ni Moises. Dapita sila sa pagbasa sa Numeros 12:1–8 aron mahibaloan kon ngano. Hunahunaa ang paggamit sa Libro sa mga Hulagway sa Ebanghelyo aron matabangan ang imong mga bata nga makapangita ug mga ehemplo sa mga tawo diha sa mga kasulatan kinsa nagtahod sa propeta sa Ginoo ug mga napanalanginan. Sa unsa nga paagi kita mapanalanginan kon kita mosunod sa propeta sa Ginoo?

• Mahimo nimo gamiton ang “Moises ug ang Bitin nga Tumbaga [Bronsi]” sa Mga Istorya sa Daang Tugon, pahina 83–84, aron matabangan ang imong mga bata nga makakat-on kon unsay nahitabo sa Numeros 21:6–9. Sa unsa nga paagi nga ang bitin nga tumbaga susama ni Jesukristo? (tan-awa sa Juan 3:14–15). Mahimo nga malingaw ang imong mga bata sa paghimo og bitin gamit ang papel ug sa pagsulat diha niini sa pipila ka yano nga mga butang nga sila makahimo sa “pagtan-aw diha sa Anak sa Dios uban sa hugot nga pagtuo” (Helaman 8:15).

  

  1:2

• Ang mas magulang nga mga bata makapili og usa sa mosunod nga mga kasulatan ug sa pagpakigbahin kon unsay gidugang niini ngadto sa ilang pagsabot sa istorya: 1 Nephi 17:41; Alma 33:18–20; Helaman 8:13–15; Doktrina ug mga Pakigsaad 6:36.

• I-summarize ang Numeros 22:1–18 alang sa imong mga bata, maghatag og gibug-aton kon sa unsang paagi si Balaam midumili sa pagtunglo sa mga katawhan sa Dios, bisan tuod og si Balak, ang hari sa Moab, mitanyag kaniya og kadungganan ug katigayonan. Dayon ikaw makatabang sa imong mga bata sa pagsiksik sa mosunod nga mga bersikulo alang sa mga hugpong sa mga pulong nga gibati nila nga nagpakita nga si Balaam buot nga mosunod sa Dios: Numeros 22:18; 23:26; 24:13. Tingali ang imong mga bata makapili og usa ka hugpong sa mga pulong nga ilang nagustohan ug isulat kini diha sa usa ka kard aron motabang kanila sa paghinumdom sa pagsunod sa Ginoo.