Exodo 35–40; Levitico 1; 4; 16; 19

Exodo 35–40 naghulagway sa mga paningkamot sa mga Israelita sa pagtukod og tabernakulo, diin ang sagradong mga ordinansa motabang kanila nga mahimong balaan nga katawhan. Samtang nagbasa ka niini nga mga kapitulo, pangitaa ang mga butang nga gipangayo sa Ginoo sa Iyang katawhan nga ibutang diha sa tabernakulo. Unsa kaha ang girepresentar niini nga mga butang? Unsa ang ilang gisugyot nganha kanimo mahitungod sa pagdugang sa pagkabalaan? Ilabi nang hunahunaa kon sa unsang paagi kini nga mga butang nagpahunahuna kanimo ngadto sa Manluluwas. Ang talaan nga sama niini tingali makatabang kanimo:

Sa tinuod, ang pagkaanaa lamang sa balaang mga dapit dili maghimo kanato nga balaan. Levitico 19 naghulagway og mga balaod ug mga sugo nga gihatag sa Ginoo sa pagtabang sa mga Israelita nga madugangan ang pagkabalaan. Unsa ang imong nakaplagan niini nga mga sugo nga makatabang kanimo sa pagtinguha og pagkabalaan gikan sa Ginoo? Unsa ang imong gibati nga midani nga buhaton ang mas hingpit nga pagpuyo niini nga mga baroganan?

Tan-awa usab sa Henry B. Eyring, “Pagkabalaan ug ang Plano sa Kalipay,” Liahona, Nob. 2019, 100–103; “The Tabernacle” (bidyo), Librarya sa Ebanghelyo.

7:19

Sa tuig human mibiya sa Ehipto, ang relasyon sa mga anak sa Israel ngadto sa Ginoo mahulagway nga dili makanunayon. Ug gani, samtang magbasa ka sa Exodo 35:4–35 ug 36:1–7, timan-i kon sa unsang paagi ang mga Israelita misanong sa sugo sa paghimo og tabernakulo. Unsa ang imong nakat-onan sa mga Israelita nga makatabang kanimo nga mas maayong moserbisyo sa Ginoo?

Tingali dili Siya mangayo kanimo og bililhon nga mga metal, tela, o kahoy alang sa usa ka tabernakulo. Unsa ang nahatag sa Ginoo kanimo, ug unsa ang Iyang gipangayo kanimo nga ihalad? Kanus-a ang imong “kasingkasing nagaagda [kanimo] sa pag-anhi sa buluhaton”?

Tan-awa usab ang Mga Hilisgotan ug mga Pangutana, “Paghalad,” Librarya sa Ebanghelyo.

Ang Exodo 40:12–14 naghisgot bahin sa karaang mga ordinansa nga gipahigayon usab sa atong panahon diha sa balay sa Ginoo. Ania ang pipila ka dugang nga mga bersikulo nga makatabang kanimo sa pagkat-on kon giunsa niini nga mga ordinansa pagpamatuod mahitungod ni Jesukristo:

• Paghugas: Salmo 51:2; Ezequiel 36:25–27

• Pagsul-ob sa balaang mga garment: Isaias 61:10; Mateo 22:11–14; Gipadayag 19:7–8

• Pagdihog: Lucas 4:18–19; Mga Buhat 10:38

Ang kadaghanan sa basahon sa Levitico maingon og kahibulongan ngari kanato—mga pagsakripisyo og hayop, mga ritwal nga naglakip sa dugo ug tubig, ug mga balaod nga nagdumala sa gagmay nga mga detalye sa kinabuhi. Apan kini nga mga ritwal ug mga balaod gituyo aron sa pagtudlo og mga baroganan nga pamilyar—paghinulsol, pagkabalaan, ug ang Pag-ula sa Manluluwas. Sa pagpangita niini nga mga baroganan samtang ikaw nagbasa sa Levitico 1:1–9; 4; 16, hunahunaa ang mga pangutana sama niini:

• Unsa nga mga pulong o mga hugpong sa mga pulong ang akong makaplagan nga magpahinumdom kanako ni Jesukristo ug sa Iyang maulaong sakripisyo?

• Unsa ang akong makat-onan gikan niini nga mga sakripisyo mahitungod sa sakripisyo sa Manluluwas?

• Sa unsang paagi ako nahisama sa mga tawo kinsa mihimo niini nga mga sakripisyo?

Ang Ginoo wala na magkinahanglan sa paghalad og mga mananap karon. Apan ang sakripisyo usa ka importante gihapon nga baroganan sa ebanghelyo. Aron makakat-on mahitungod sa mga matang sa paghalad nga gipangayo sa Ginoo, pagtuon sa 3 Nephi 9:19–20; Doktrina ug mga Pakigsaad 64:34. Giunsa nimo paghalad niini nga mga matang sa mga halad? Unsa ang gitudlo kanimo sa Moises 5:7 mahitungod kon unsaon nimo pagtan-aw sa imong mga halad?

Tan-awa usab sa“Mga Hunahuna nga Hinumdoman: Ang Tabernakulo ug Sakripisyo.”

• Sa kataposan niini nga latid mao ang usa ka hulagway sa tabernakulo sa mga Israelita diha sa kamingawan. Tingali gusto nimo nga tan-awon kini uban sa imong kabataan ug pangutan-a sila kon unsa nga mga materyales ang gikinahanglan sa pagtukod sa tabernakulo. Dayon mahimo ninyong basahon og dungan ang Exodo 35:20–29 aron mahibaloan kon giunsa paghatag kini nga mga materyales. Giunsa kita pagdapit sa Ginoo nga motampo sa pagtukod sa Iyang gingharian?

• Hunahunaa ang pagbasa uban kanila sa Exodo 36:1 aron mahibaloan kon unsa ang gihatag sa Ginoo ni Bezaleel ug Aholiab aron motabang sa pagtukod sa tabernakulo. Makahimo ka dayon sa pagsulti sa imong mga bata mahitungod sa unsay imong gibati sa gihatag sa Ginoo kanila aron makatabang sa pagtukod sa Iyang gingharian. Sa unsa nga paagi kita makagamit niini nga mga butang aron sa pagpanalangin sa uban?

• Ang Exodo 40:17–34 naglista sa mga butang nga mga kabahin sa tabernakulo sa mga Israelita. Tingali ikaw ug ang imong mga bata makapangita niini diha sa maong mga bersikulo ug diha sa hulagway sa tabernakulo nga naa sa kataposan niini nga latid. Pag-istorya mahitungod kon sa unsa nga paagi ang matag bahin sa tabernakulo makatudlo mahitungod sa Manluluwas o sa Langitnong Amahan. Sama pananglit, ang arka sa pagpamatuod makapahinumdom kanato sa mga sugo sa Dios, ang halaran makapahinumdom kanato sa sakripisyo ni Jesukristo, ug uban pa.

• Unsa ang balaan nga mga dapit kita aduna karon nga nagtabang kanato sa pagbati nga mas naduol ngadto ni Jesukristo? Ingon nga kabahin niini nga panag-istoryahanay, mahimo nga mag-uban kamo sa pagtan-aw sa bidyo, “Temples [Mga Templo]” (Gospel Library). Mahimo usab ninyong kantahon ang usa ka awit sama sa “Balaang mga Dapit” (Librarya sa Ebanghelyo). Ipakigbahin sa usag usa kon unsa ang inyong gibati mahitungod sa balaang mga dapit sama sa templo.

5:41

• Ang pagsakripisyo og hayop nga gihulagway diha sa Daang Tugon gituyo aron sa pagtudlo sa mga anak sa Israel mahitungod sa pagpasaylo pinaagi ni Jesukristo. Hunahunaa kon unsaon sa pagbasa mahitungod niini nga mga sakripisyo makahimo og sama alang sa imong mga bata. Ikaw makapakita og mga hulagway ni Jesukristo sa Getsemani ug diha sa krus (tan-awa diha sa Libro sa mga Hulagway sa Ebanghelyo, nus. 56, 57) samtang ikaw nagbasa uban sa mga bata Levitico 1:1–4. Tabangi sila sa pagpangita og mga pulong o mga hugpong sa mga pulong nga nagpahinumdom kanila sa sakripisyo ni Jesukristo.

• Mahimo usab basahon ninyo og dungan ang 3 Nephi 9:19–20 aron mahibaloan kon unsay gisugo kanato nga isakripisyo imbis nga mga hayop. Unsa ang gipasabot sa pagbaton og usa ka masulub-on nga kasingkasing ug mahinulsolon nga espiritu ngadto sa Ginoo? Tan-awa diha sa Giya ngadto sa mga Kasulatan, “Masulob-on nga Kasingkasing” (Librarya sa Ebanghelyo) alang sa tabang sa pagtubag niini nga pangutana.